Panon Yon Natulongan so “Managdarak” ya Anak?

“Manliket lapud . . . sikato so abalang tan aromog.”​—LUCAS 15:32, NW.

1, 2. (a) Panon so inkiwas na arum a kalangweran diad Kristianon katuaan? (b) Anto so liknaan na atateng tan ananak ed ontan iran kipapasen?

 “AGKO la labay so man-Tasi!” Agaylan makapatalagnaw iratan a salita na sakey ya anak no narengel itan na matakot ed Dios ya atateng a nanggunaet a mamabaleg ed ananak da diad Kristianon paraan! Walaray tobonbalo a basta “niagus” ya agda mismon imbesngaw iray getma ra. (Hebreos 2:1) Dakel ed saraya so inyaliling na managdarak ya anak ed parabolo nen Jesus, a tinmaynan ed abung nen ama to tan nandarak ed tawir to diad arawin dalin.​—Lucas 15:11-16.

² Anggaman aliwa itan a problema na karaklan ed saray Tastasi nen Jehova, anggaporay makaligliwan salita a sigpot a makapangekal ed ermen na saramay walaan na ontan a problema. Agmet nibaliwala so kaermenan a naliliknan mismo na benger a tobonbalo. Diad puso to et nayarin sikatoy gogonigonen na konsiensia to. Diad parabolo nen Jesus, say managdarak ya anak so ‘akanonot a siansia,’ tan nanliketan itan nen ama to. Panon a natulongan na atateng tan arum ni ed kongregasyon iray managdarak pian ‘makanonot iran siansia’?​—Lucas 15:17.

No Akin a Walaray Onkakasipa ed Katuaan

3. Anto so arum iran rason no akin ya ontataynan ed Kristianon kongregasyon so arum a kalangweran?

³ Wala so nilasus nilibon kalangweran a maliket a manlilingkor ed si Jehova diad loob na Kristianon kongregasyon. Akin sirin ya onkakasipa so arum a kalangweran? Nayarin isipen da a walay  agda asalin bengatla ya iyoopresi na mundo. (2 Timoteo 4:10) Odino nayarin ipasen da a mapegpeget so mananalimbeng a kasimpukokan nen Jehova. Say pakakakonsiensia, mabiskeg ya interes ed kasunian a sekso, odino ed pilalek ya awaten na saray kalimog so nayarin pansengegan na ikasipa na sakey a kalangweran manlapud pulok nen Jehova. Nayarin agla manlingkor ed Dios so sakey a kalangweran lapud ompatnag a pansimpisimpitan na atateng to odino arum nin Kristiano.

4. Anto so mabetbet a manunan sengegan na isusuawi na saray kalangweran?

⁴ Say rebelyoson awawey tan walna na sakey ya anak so kaslakan a sintomas na espiritual a kaleteyan, a pakapatnagan no anto so walad puso to. (Uliran 15:13; Mateo 12:34) Antokaman so rason na insuawi na sakey a tobonbalo, say mabetbet a manunan pansesengegan na problema et say agto impanayakup ed “suston pikakabat ed katuaan.” (2 Timoteo 3:7, NW) Imbes a miluyos-luyos labat diad panagdayew ed si Jehova, importantin bayuboan na saray kalangweran so maapit tan personal a siglaotan ed sikato. Anto so makatulong ed sikara pian nagawaan da itan?

Onapit ed Dios

5. Anto so makana ta pian nabayuboan na sakey a kalangweran so personal a siglaotan ed Dios?

⁵ “Singger kayo ed Dios,” so insulat nen babangatan a Santiago, “et sikato so onsingger naani ed sikayo.” (Santiago 4:8) Pian nagawaan itan, nepeg a natulongan so sakey a kalangweran pian nabayuboan to so pankaliktan ed Salita na Dios. (Salmo 34:8) Diad gapo et nakaukolan to ni so “gatas”​—say manuna iran bangat na Biblia. Balet no napanliliketan to la so Salitay Dios tan kakaliktanen to la so “anawet a tagano,” salanti, say aralem ya espiritual ya impormasyon, agmanbayag et nadampot to so espiritual ya inkatakken. (Hebreos 5:11-14; Salmo 1:2) Sakey a tobonbalo ya angaksobin nigalet la ed estiloy-kabibilay na mundo so ginmapon angapresya ed espiritual iran estandarte. Anto so akatulong ed sikato ya ompawil? Diad inkiwas to ed suhestion a basaen so interon Biblia, sikatoy nantultuloy ed eskedyul ton regular a panagbasa na Biblia. On, makana so regular a pambasa ed Salita na Dios pian nabayuboan so maapit a siglaotan ed si Jehova.

6, 7. Panon a natulongan na atateng so ananak da pian nabayuboan da so pankaliktan ed Salitay Dios?

⁶ Agaylan importante so panulong na atateng ed ananak da pian nabayuboan da so pankaliktan ed Salitay Dios! Anggaman walaan ira na regular a panagaral na pamilya, akiulop-ulop so sakey a tin-edyer a bii ed saray benger a tobonbalo. Nipaakar ed panagaral na pamilya to, oniay nanonotan to: “Sano mantepet si Dad, basaen ko labat iray ebat, ya agak anggan makapilupaan ed sikato.” Imbes a kobrian labat so materyal legan na panagaral na pamilya, usaren na makabat ya atateng so dunong ed panagbangat. (2 Timoteo 4:2) Pian napanggayagaan na sakey a tobonbalo so panagaral, nepeg ton nalikna ya ontukoy met itan ed sikato. Akin ta no tepeten no anto so panmoria to tan paibesngaw itan ed sikato? Pasesegen so kalangweran a mangiyaplika ed materyal ya aaralen. *

⁷ Niarum ni, gawaen a mabilabilay so Makasulatan a diskusyon. Sano matukoy, paiyakto ed saray kalangweran iray ebento tan drama ed Biblia. Tulongan ira ya ilitrato da ed kanonotan da so lugar tan itsura na dalin ya inkagawaan na saray ebenton sisingbaten. Nayarin makatulong met so pangusar ed saray mapa tan tsart. On, tekep na daiset ya inka-abilidar, nagawan mabilabilay tan walaay panduruma so panagaral na pamilya. Nepeg met a surien na atateng so mismon relasyon da ed si Jehova. Diad mas iyaapit da ed si Jehova, natulongan da met so ananak da a manggawa ed satan.​—Deuteronomio 6:5-7.

8. Panon a makatulong ed sakey so pikakasi pian onapit ed Dios?

⁸ Makatulong met ed sakey so pikakasi pian onapit ed Dios. Sakey a tin-edyer a bii so nagogonigon lapud agto makapanpili ed Kristianon dalan na bilay tan say pililimog to’d saray kaaro ya agmangawat ed saray sisiaen to. (Santiago 4:4) Anto so ginawa to nipaakar ed satan? Oniay impatua to: “Diad inmuna-unan pankanawnawa, nampikasi ak a maong ed si Jehova nipaakar ed naliliknak.” Inkuanto a naebatan so pikakasi to sanen aromog to ed loob na Kristianon kongregasyon so  sakey a kaaro a napangibagaan toy problema to. Lapud liknaen ton sikatoy inggiya nen Jehova, ginapoan ton paeleten so personal a siglaotan to ed Dios. Natulongan na atateng so ananak da ya onaligwas ed kalidad na mismon pikakasi ra. Sano manpipikasi a sankapamilyaan, sigpot ya ibalikas na atateng so walad kapusoan da ta pian nalikna na ananak da so personal a relasyon ed baetan na atateng tan si Jehova.

Magmaliw a Maanos Ingen ta Mapekder

9, 10. Anton ehemplo so impatnag nen Jehova ed pagmaliw a manangitepel ed saray matungangan Israelita?

⁹ Sano onsusuawi la so sakey a tobonbalo, nayarin isian to la so inkasikato tan resistian to so antokaman a sagpot na atateng to a makapitongtong ed sikato nipaakar ed espiritual. Anto so gawaen na atateng ed ontan a makapasubok a kipapasen? Konsideraen no anto so ginawa nen Jehova ed kadaanan ya Israel. Inanosan toray “anawet-tenten” iran Israelita diad loob na masulok a 900 a taon sakbay toran inkaindan ed matungangan kurang da. (Exodo 34:9; 2 Awaran 36:17-21; Roma 10:21) Anggaman ed aminpigan ‘impanubok da ed sikato,’ sikara so ‘kinasian’ nen Jehova. “Aminpigapiga a pinaekal to so petang na ulo to, tan agto pinetdak so amin a sanok to.” (Salmo 78:38-42) Anggapoy pakatetelan ed impideneng na Dios ed sikara. Si Jehova so aaligen na maaron atateng tan maanos ira sano agtampol onkiwas so anak da ed saray sagpot dan ontulong ed sikato.

¹⁰ Say pagmaliw a manangitepel, odino maanos, so agmankabaliksan na “pananos ed mabayag a panaon”; mankabaliksan itan na agpangisuko ed amin ya ilalo a napaaligwas ni so agirogiron relasyon. Impatnag nen Jehova so ehemplo ed no panon so pagmaliw a manangitepel. Sikato so inmuna lan kinmiwas diad ‘aminpigapigan’ impangibaki to ed saray mensahero to diad saray Israelita. “Walaan na panangabagey [si Jehova] ed baley to,” anggaman “niludlurey da so saray igaganggan na Dios, tan minudmora ra so saray salita to.” (2 Awaran 36:15, 16) Sikato so inmapelo ed saray Israelita, ya inkuanto: “Ompawil kayo natan balang sakey a manlapu ed inkauges na saray dalan to.” (Jeremias 25:4, 5) Ingen, ag-inkompromiso nen Jehova iray matunong a prinsipyo to. Saray Israelita so abilin ya “ompawil” ed Dios tan ed saray dalan to.

11. Panon a magmaliw a manangitepel iray atateng balet ta mapekder ira diad pidedeneng da ed kinmasipa ya anak da?

¹¹ Si Jehova so naalig na atateng diad pagmaliw  dan manangitepel, ya agda isusuko so amin lan ilalo nipaakar ed kinmasipa ya anak da. Basta ag-ira naaandian na ilalo, sarag dan pansiansiaen a lukas so linya na pitatalosan odino ipawil lamet so pitatalosan. Bangta tutumboken daray matunong a prinsipyo, nayarian da so ‘maminpigan’ onapelo ed anak da ya ompawil ed dalan na katuaan.

Sano Nadispelosip so Menor de Edad

12. Anto so responsabilidad na atateng nipaakar ed sakey a menor de edad a wala ni’d pudir da balet ta nakal ed kongregasyon?

¹² Panon to no say menor de edad ya anak a walad pudir na atateng et alanor ed ambelat a gawan-mauges tan sikato so nakal ed kongregasyon lapud agmagbabawin awawey to? Lapud say anak so wala ni’d pudir na atateng, responsabilidad da nin siansia so mangibangat tan mandisiplina ed sikato unong ed Salita na Dios. Panon iyan nagawaan?​—Uliran 6:20-22; 29:17.

13. Panon a nasabi na atateng so puso na nankasalanan ya ilalak da?

¹³ Posibli, sankaabigan ni ingen, no iter itan a bilin tan disiplina legan na pribadon panagaral na Biblia. Agnepeg ya husgaan na ateng so inmawet lan awawey na anak kanian salien ton tebeken so walad puso to. Anto so interon laknab na sakit to ed espiritual? (Uliran 20:5) Kasin nasabi ni so anlemek a parte na puso to? Antoran teksto so epektibon nausar? Impaseguro nen apostol Pablo ed sikatayo: “Say salita na Dios sikatoy mabilay tan mabiskeg, tan makdem nen say anggan dinan a kampilan a duaray tarem, tan ontalos ya angga ed pansianan na kamarerwa tan espiritu, tan angga ed saray langolangoan tan saray utek, tan masiglat a mangibiig ed saray nonot tan saray getma na puso.” (Hebreos 4:12) On, wala ni so nagawaan na atateng nen say basta labat pangibaga ed ilalak da ya agla mangaagamil na gawan-mauges. Nayarian dan igapo tan pansiansiaen so proseso na panamaabig.

14. Anto so primeron kundang a nepeg a gawaen na mankakasalanan a tobonbalo pian nipawil to lamet so siglaotan to ed si Jehova, tan panon a makatulong so atateng ed anak pian nagawaan to itan a kundang?

¹⁴ Nakaukolan a nipawil lamet na nankasalanan a tobonbalo so siglaotan to ed si Jehova. Say primeron kundang a nepeg ton gawaen et say ‘pagbabawi . . . tan panpataoli.’ (Gawa 3:19; Isaias 55:6, 7) Pian natulongan so tobonbalo diad ayaman da a magbabawi, saray atateng so nepeg a ‘mantepel, a manbangat a matayadno’ ed anak da ya aliwan maabig so walna to. (2 Timoteo 2:24-26) Nakaukolan a sikatoy ‘baaten’ da ed Biblikon pantalos. Say Griegon salita a nipatalos a ‘baaten’ so nipatalos met a “mangiter na makakombinsin ebidensya.” (Apocalipsis 3:19; Juan 16:8) Say pamaat, sirin, so manasaglawi ed pangipanengneng na nagnap ya ebidensya pian nakombinse so anak a mauge-uges so ginawa to. Tua, mairap so panggawa ed satan. Kapiganman a posibli, nayarian na atateng so onapelo ed puso to, ya usaren so amin a paraan a matukoy ed Kasulatan pian sikatoy nakombinse. Sikatoy nepeg dan tulongan pian natalosan to so pankaukolan a ‘gulaen so mauges, tan aroen so maong.’ (Amos 5:15) Nayarin sikato so ompawil ed “suston kanonotan [to] pian makalukpos manlapud patit na Diablo.”

15. Anto so betang na pikakasi ed kipawil na siglaotan na sakey a mankakasalanan ed si Jehova?

¹⁵ Pian nipawil so siglaotan na sakey ed si Jehova, kakkaukolan so panagpikasi. Siempre, anggapo so nepeg a “mankerew” nipaakar ed mabanday a kasalanan a mabitar ya aagamilen na siopaman ya agmagbabawin indibidual a datin kalimog ed Kristianon kongregasyon. (1 Juan 5:16, 17; Jeremias 7:16-20; Hebreos 10:26, 27) Ingen, nayarin kerewen na atateng ed si Jehova ya ikdan to ra na kakabatan pian napidenengan da so situasyon. (Santiago 1:5) No ipatnag na  adispelosip a tobonbalo so ebidensya na panagbabawi to balet ta andian na “kawayangan a misalita ed Dios,” nayarin ipikasi na atateng a no say Dios et makaromog na basiyan pian perdonaen so impankasalanan na anak, nagawa komon so linawa To. (1 Juan 3:21) Say pakadngel ed saratan a pikakasi so kaukolan a makatulong ed tobonbalo pian namoria ton si Jehova et mapangasin Dios. *​—Exodo 34:6, 7; Santiago 5:16.

16. Panon tayon natulongan iray kapamilyaan na saray menor de edad ya adispelosip?

¹⁶ No adispelosip so sakey a bautismadon tobonbalo, ilaloan a saray membro na kongregasyon so ‘agmiulop’ ed sikato. (1 Corinto 5:11; 2 Juan 10, 11) Saya so nayarin makatulong ed sikato pian ‘makanonot a siansia’ tan ompawil ed mananalimbeng a kasimpukokan na Dios. (Lucas 15:17) Anggaman ontan, balanglan sikatoy ompawil ed organisasyon odino andi, napaseseg na saray membro na kongregasyon so pamilya na adispelosip a tobonbalo. Amin tayo so makaromog na pankanawnawan mangipanengneng na “pililikna” tan magmaliw a ‘matamoy diad panangabagey’ ed sikara.​—1 Pedro 3:8, 9, NW.

No Panon a Makatulong so Arum

17. Anto so nepeg a nodnonoten na saray membro na kongregasyon sano tutulongan da so onkakasipan anak?

¹⁷ Komusta so nipaakar ed tobonbalo ya ag-adispelosip ed Kristianon kongregasyon balet ta linmetey ed pananisia? “No nairapan so sakey a kabiangan,” so insulat nen apostol Pablo, “amin a kabiangan miirap ira ed sikato.” (1 Corinto 12:26) Say arum so nayarin magmaliw ya interesado ed pankaabigan na ontan a tobonbalo. Siempre, nakaukolan so panag-alwar, lapud say tobonbalo a mansasakit ed espiritual so nayarin makaimpluensyan maong ed arum a kalangweran. (Galacia 5:7-9) Diad sakey a kongregasyon, saray maabig-impanggetman wala la’d edad a malabay ya ontulong ed arum a tobonbalon linmetey ed espiritual so angimbita ed sikara diad pantitipon pian mantogtog na bantog iran musika. Anggaman mabulos ya akila tan nanggayaga ed ontan iran sesyon iray tobonbalo, say impluensya ra ed balang sakey so angitonton la ingen ed agda la impilimog ed kongregasyon. (1 Corinto 15:33; Judas 22, 23) Say makatulong  ed iyabig na mansasakit ya anak et, aliwan say sosyal iran pantitipon ya andiay espiritual a panangidirehi, noagta say pililimog a makatulong ed sikaton makabayubo ed pankaliktan ed espiritual a bengabengatla. *

18. Panon tayon naalig so awawey na ama na managdarak ed parabolo nen Jesus?

¹⁸ Sano onatendi la ed Kingdom Hall odino ed asamblea so sakey a tobonbalon tinmaynan ed kongregasyon, nonoten pa no anto so liknaan to. Agta nepeg tayon ipatnag met so manangabrasan awawey na ama na managdarak ed parabolo nen Jesus? (Lucas 15:18-20, 25-32) Oniay insalaysay na sakey a tin-edyer a tinmaynan ed Kristianon kongregasyon tan diad saginonor et inmatendi ed distriton kombension: “Abaloan ko et ibaliwala da ak ya amin, balet saray agagi so inmasingger tan angabrasa ed siak. Siak so pirmin atenyeg.” Sikato so ginmapon nanaral lamet na Biblia tan abautismoan ed saginonor.

Ag-onsusuko

19, 20. Akin a nepeg tayon mantinien so positibon awawey nipaakar ed managdarak ya anak?

¹⁹ Say itulong ed “managdarak” ya anak pian ‘makanonot a siansia’ et mankaukolan na anos tan sakey itan ya angat ed atateng tan ed arum ni. Balet ag-onsusuko. “Say Katawan agto bayagen so sipan to, a singa say arum igaton da a mabayag; noag ingen masungdo ed sikayo, agto labay a wala so siopaman a natawtaw noag ingen amin komon nagegemtan da so panagsibkel.” (2 Pedro 3:9) Walaan itayo na Makasulatan a panamaseguro a kaliktan nen Jehova a magbabawi tan manbilay so totoo. Diad tua, sikato so inmuna lan nanggawa na uksoyan pian makapipulangan so totoo ed sikato. (2 Corinto 5:18, 19) Say anos to so nanggawan posibli parad minilyon a makanonot a siansia.​—Isaias 2:2, 3.

²⁰ Agta kaukolan sirin ya usaren na atateng so amin a Makasulatan a paraan pian natulongan iray managdarak a menor de edad a makanonot a siansia? Diad pangalig ed si Jehova, magmaliw a manangitepel legan yon gagawaen so positibo iran kundang pian natulongan so anak yo a makapawil ed si Jehova. Mapekder a mansiansia ed saray prinsipyo na Biblia, tan salien ya ipatnag iray kalidad nen Jehova, salanti say aro, inkahustisya, tan kakabatan legan a manpipikasi kayo ed sikato parad tulong to. No panon a kinmiwas iray inmawet laran nanrebelde ed maaron imbitasyon nen Jehova ya ompawil ira, say managdarak ya anak yo so nayarin ompawil ed mananalimbeng a pulok na Dios.​—Lucas 15:6, 7.

[Saray paimano ed leksab]

Kasin Nanonotan Yo?

• Anto so nayarin manunan sengegan na problema na saray tobonbalo a tinmaynan ed kongregasyon?

• Panon a natulongan iray kalangweran a makabayubo ed personal a siglaotan ed si Jehova?

• Akin a nakaukolan na atateng so pagmaliw a matepel balet ta mapekder ya ontulong ed managdarak ya anak?

• Panon a natulongan na kongregasyon so sakey a managdarak ya anak pian makapawil?

[Tepetepet Parad Panagaral]

[Litrato ed pahina 15]

Makana so panagbasa na Salitay Dios pian nabayuboan so maapit a relasyon ed si Jehova

[Litrato ed pahina 15]

Say masimoon a pikakasi na atateng so makatulong pian nalikna na ananak da so personal a relasyon na atateng tan si Jehova

[Litrato ed pahina 17]

Abrasaen so managdarak ya anak sano sikatoy ‘makanonot a siansia’

[Litrato ed pahina 18]

Manggawa na positibo iran kundang pian natulongan so ananak yo a makapawil ed si Jehova