Tepetepet Manlapud Saray Managbasa

Anto so ‘panagpainawa’ ya atukoy diad Hebreos 4:9-11, tan panon a say sakey so ‘makaloob ed satan a panagpainawaan’?

Nansulat si apostol Pablo ed saray Hebreon Kristiano nen inmunan-siglo: “Wala so nakdaan . . . a sakey a pampainawa nipaakar ed baley na Dios. Ta say linmoob ed pampainawa [na Dios], dili a sikato nampainawa met ed saray kimey to unong a say Dios tinmunda ed saray kimey to. Pansesegan tayo sirin so onloob ed saman a panagpainawaan.”​—Hebreos 4:9-11.

Sanen sinaglawi nen Pablo so nipaakar ed impampainawa na Dios manlapud kimey To, sikatoy mapatnag a manutukoy ed walan nisalaysay diad Genesis 2:2, ya onia so nabasa tayo: “Sanen komapito ya agew intunda na Dios so kimey to a ginawa to; et nampainawa ed amin a kimey to a ginawa to ed saman a komapito ya agew.” Akin a ‘nampainawa si Jehova ed komapito ya agew’? Maseguron aliwan lapud kaukolan to so manpakasil “ed amin a kimey to a ginawa to.” Itatarya na ontumbok a bersikulo so pamatnagan na ebat: “Say Dios benendisyonan to so komapito ya agew, tan sinantipika to [“pinagmaliw ton sagrado,” NW ]; lapud diad saman ya agew nampainawa so Dios ed amin a kimey to a pinalsa tan ginagawa to.”​—Genesis 2:3; Isaias 40:26, 28.

Say “komapito ya agew” so miduma ed dinanman ed inmunan anemiran agew lapud satan so agew a benendisyonan na Dios tan pinagmaliw ton sagrado, salanti, say agew a nibiig, odino nidedika ed, sakey ya espisyal a gagala. Anto itan a gagala? Imparungtal na Dios ed asasakbay so gagala to nipaakar ed katooan tan ed dalin. Onia so imbaga na Dios ed inmunan laki tan say asawa to: “Manbunga kayo, tan ondakel kayo, tan makmakan yo so dalin, tan sikato so patuloken yo: tan niiter ed sikayo so pakauley ed saray sirasira na dayat, tan pakauley ed saray manok ya atap ed saray tawen, tan amin a bengatla a mabilay ya onggalaw dia ed dalin.” (Genesis 1:28) Anggaman inter na Dios so ayadyarin gapoan ed katooan tan say dalin, mankaukolan ni itan na panaon pian napatulok tan napasimbalo so interon dalin a magmaliw a paraiso a napno na ayadyarin pamilya na too, unong a ginagala na Dios. Kanian, diad “komapito ya agew,” nampainawa, odino tinmunda so Dios, ed kaaruman a kimey a panamalsa ed dalin pian naabuloyan ya onaligwas so bengatlan apalsa to la a mitunosan ed linawa to. Diad sampot na satan ya “agew,” magmaliw lan kapetegan so amin a ginagala na Dios. Kaunongan kabayag itan a panagpainawa?

No pawilen tayo so imbalikas nen Pablo diad Hebreos, naimano tayon impabitar to a “wala so nakdaan . . . a sakey a pampainawa nipaakar ed baley na Dios,” tan pinaseseg to iray kapara ton Kristiano a gawaen day anggaay nayarian da ya ‘onloob ed saman a panagpainawaan.’ Ipapatnag na saya a sanen insulat nen Pablo irayan salita, say “komapito ya agew” na panagpainawa na Dios, a ginmapo la manga 4,000 taon ed asasakbay, so tuloy-tuloy ni. Ag-itan manampot anggad sigpot a nasumpal so gagala na Dios nipaakar ed katooan tan say dalin diad sampot na Sanlibon Taon ya Uley nen Jesu-Kristo, a “Katawan na sabaton.”​—Mateo 12:8; Apocalipsis 20:1-6; 21:1-4.

Tekep na satan ya alay abig ya iilaloan ed arapen, insalaysay nen Pablo no panon a makaloob so sakey ed panagpainawaan na Dios. Oniay insulat to: “Say linmoob ed panpainawa [na Dios], dili a sikato nampainawa met ed saray kimey to.” Ibabaga na saya ed sikatayo ya anggaman ayadyari so gapoan tayo, amin a katooan so ag-akaloob ed panagpainawaan na Dios. Saya et lapud agnantultuloy a nginilinan di Adan tan Eva so panagpainawa na Dios diad “komapito ya agew” panamegley na pangawat na uksoyan to parad sikara. Imbes, sikaray nanrebelde tan nilabay day magmaliw ya independente ed Dios. Diad tua, sikaray akinonong ed mauges a getma nen Satanas ed saray bengatla imbes ya awaten so maaron panangiwanwan na Dios. (Genesis 2:15-17) Bilang resulta, abalang da so ilalo a pambilay a maando diad paraison dalin. Nanlapu la’d saman, amin a katooan so naaripen ed kasalanan tan patey.​—Roma 5:12, 14.

Say impanrebeldi na katooan so ag-angamper ed gagala na Dios. Say agew na panagpainawa to so mantultuloy. Siansia, si Jehova so nanggawa na maaron probisyon​—say dondon​—panamegley na Anak to, si Jesu-Kristo, pian amin a mangawat ed satan unong ed pananisia so makapanilalo a nibulos tan manpainawa ed pakabebelatan lapud kasalanan tan patey. (Roma 6:23) Satan no akin a sinimbawa nen Pablo iray kapara ton Kristiano a ‘manpainawa ed saray kimey da.’ Kinaukolan dan awaten so probisyon na Dios parad kilalaban tan agda sasalien a pankimeyan so dilin arapen da diad dilin paraan da, a singa ginawa nen Adan tan si Eva. Kinaukolan da met a paliisan so  panumbok ed mismon kurang na dilin-panangikatunongan.

Say pangipulisay ed sinisiblet tan minumundo iran gegemtan na sakey pian gawaen so linawa na Dios so peteg a makaparepresko tan makapainawa. Ipapakabat nen Jesus iyan imbitasyon: “Dago kayo’d siak, amin yon nasasagpotan tan nabebelatan, et ikdan ta kayoy pampainawa. Ala yoy pakok ed sikayo, tan manaral kayo’d siak; ta mauyamo ak tan mapaabeba ak a puso; et naromog yoy inawa nipaakar ed saray kamarerwa yo. Ta say pakok mainomay, tan anlemew so awit ko.”​—Mateo 11:28-30.

Maseguron say pangisasalaysay nen Pablo nipaakar ed panagpainawa na Dios tan no panon a makaloob so sakey ed satan so akapaseseg ed saray Hebreon Kristiano ed Jerusalem, a nansungdo ed dakel a panamasegsegang tan panagbalaw lapud pananisia ra. (Gawa 8:1; 12:1-5) Mipadpara, saray salita nen Pablo so nayarin makapaseseg ed saray Kristiano natan. Diad pakamorian asingsingger la so kasumpalan na sipan na Dios a gawaen ton paraiso so dalin diad silong na matunong a Panarian to, nepeg a sikatayo met so manpainawa manlapud saray dilin kimey tayo tan gawaen tayo so anggaay nayarian tayo pian makaloob ed satan a panagpainawaan.​—Mateo 6:10, 33; 2 Pedro 3:13.

[Saray litrato ed pahina 31]

Say sipan na Dios a mangaraldalin a paraiso so nasumpal diad sampot na agew na painawa to