Tuan Pananisia—Posibli ni Kasi Itan?
Tuan Pananisia—Posibli ni Kasi Itan?
“Say pananisia et sakey a mabilay, makpel a kompiyansa ed grasya na Dios, mapekder tan segurado a say mananisia et ipusta to so bilay to nisesengeg ed satan ed maminlibon danay.”—MARTIN LUTHER, 1522.
“Amin tayo lawari so sakey lan sekular a sosyedad a ngalngalin agla napatnagan so Kristianon pananisia tan ug-ugali.”—LUDOVIC KENNEDY, 1999.
SARAY panmoria nipaakar ed pananisia so manguuman lan tuloy. Nensaman et kaslakan so walaay pananisia ed Dios. Natan et mapmaples a naaandi so tuan pananisia ed Dios tan ed Biblia diad sakey a mundo a napnoy panduaruwa tan paniirap.
Tuan Pananisia
Parad dakel, say “pananisia” so simplin mankabaliksay pakawalaan na relihyoson sisiaen odino pananumbok ed sakey a nengneng na panagdayew. Balet, unong a nausar ed Biblia, say “pananisia” so manunan mankabaliksay sigpot a panagmatalek—nagnap, agnatenyeg a kompiyansa ed Dios tan ed saray sipan to. Sakey itan a kalidad a pakabidbiran ed babangatan nen Jesu-Kristo.
Diad sakey ya inkagawa, sinalambit nen Jesus a kaukolan so pampikasi tan “ag-onsuko.” Diad panggawa ed satan, sikatoy nantepet no kasin niwala ni so tuan pananisia diad panaon tayo. Oniay intepet to: “Sano onsabi Anak na too, peteg kasin naromog to iyan pananisia ed dalin?” Akin ya intepet to so ontan?—Lucas 18:1, 8, NW, paimano’d leksab.
Naandi a Pananisia
Dakel a bengatla so nayarin pansengegan na pakaandi na totoo ed antokaman a pananisia ra. Kabiangan ed saratan iray trahedya tan pakasubokan ed inagew-agew a panagbilay. Alimbawa, si Propesor Michael Goulder et sakey a pari na parokya diad Manchester, Inglatera, sanen biglan naplag so eroplano nen 1958 diad Munich ya inkatigway na dakel ed Manchester United football team. Diad sakey a programay telebisyon ed BBC, insalaysay nen Joan Bakewell a managbalita a si Goulder so “kinmapuy sanen naimano to so paneermen na dakel a totoo.” Sakey ya epekto na satan et “naandi so pananisia to ed Dios a mibabali ed pansumpalan na too.” Imbalikas nen Goulder
so sisiaen to a “say Biblia so aliwan . . . anggapoy-lingon salita na Dios,” noag ingen, “say lingon salita na too, anganko et walaan na pigaran madibinon panangipuyan diad nanduruman pasen.”No maminsan et basta labat la onletey so pananisia. Ontan so agawa ed say managsulat tan brodkaster a si Ludovic Kennedy. Inkuanto a nanlapula’d inkaugaw et “sebang-sebang iray panduaruwa [to] tan ag-inkasegurado [nipaakar ed Dios] tan linmoor so [agto] panisia.” Mapatnag ya anggapo so makapangiter ed sikato na makapenek iran ebat ed saray tepet to. Say ag-inilaloan ya impatey na ama to diad dayat so pirmin amaloor ed dati lan makapkapuy a pananisia to. Saray pikakasi ed Dios ya “iliktar mo kami ed saray kaatapan ed dayat tan ed karawalan na say kabusol” so agnaebatan legan a say ginawan pampasaheron barko a niluganan na ama to so inataki tan dineral na pan-guerran barko na Alemanya nen Guerra Mundial II.—All in the Mind—A Farewell to God.
Saratan ya eksperiensya so kaslakan la. ‘Say pananisia,’ kuan nen apostol Pablo ‘so anggapo ed saray totoo.’ (2 Tesalonica 3:2) Antoy padesir mo? Posibli ni kasi so tuan pananisia ed Dios tan ed Salita to diad sakey a mundon ompapalalo so panduaruwa? Usisaen pa no anto so ibaga na ontumbok ya artikulo nipaakar ed sayan tema.