“Naamtaan Kon Siansia No Antoy Problema ed Siak!”

ONTAN so alikna na sakey a lakin taga-Tokyo sanen abasa toy estorya ed bilay diad Disyembre 1, 2000 a paway na The Watchtower. Say artikulo so apauloan na “Agyo Amta no Anto so Magmaliw a Bilay Yo Nabuas,” tan insalaysay na satan so eksperiensya na datin misionaryo a walay sakit ton “manic-depressive psychosis” unong a tawag ed medikal.

Oniay insulat na laki a taga-Tokyo ed saray manangipalapag na sayan magasin: “Saray adeskriben sintoma so eksakton ontukoy ed siak. Kanian linma ak ed ospital a psychiatry tan naamtaan kon wala so ‘manic depression’ ko. Mankelaw so doktor a nan-eksamin ed siak. Inkuan to, ‘Mataltalag ya isipen na totoon walaan na onian sakit a walay liliknaen dan onia.’ Atulongan ak a makaamta ed sakit ko antis ya onloor lan maong.”

Minilyon a totoo ed interon mundo so nagugunggonaan ed nanduruman paraan diad pambabasa ed kada paway na Say Panag-Bantayan tan say kaiba na satan a magasin ya Awake! Naiimano ran makaibangat tan makapenek iray artikulo. Say magasin a Panag-Bantayan so niiimprinta la natan ed 141 a lenguahe, tan say Awake! so nipapalapag ed 86 a lenguahe. Maseguron panggayagaan mo met so regular a pambasa na Say Panag-Bantayan tan Awake!