Napagmaliw Mo Kasin Magmaong a Pasen so Mundo?

I-PLAY

Napagmaliw Mo Kasin Magmaong a Pasen so Mundo?

“Agnayarian na politika ya ipawil so inkauksoy ed sosyedad. Anggapoy pakayari na satan ya ibangon lamet so tradisyonal a sisisiaen ed moral. Agnayarian na saray sankaabigan a totontonen ya ipawil iray atagey ya estandarte ed paniinaroan odino panamaley, agto napagmaliw a responsable iray kaamaan ed saray ilalak da, agto nipalikna lamet so apalabas ya insanok odino inkabaingan . . . Agnayarian na ley a paandien so karaklan iran problema ed moral a mangogonigon ed sikatayo.”

KASIN mipakna ka ed saratan ya imbalikas na datin katulongan na gobiernoy E.U.? No ontan, anto so solusyon ed dakdakel a problema natan a resulta na inkaagum, kaandiay panangaro ed saray kapamilyaan, malukak iran moral, inka-ignorante, tan arum nin makaderal a sengegan a mamubuyak ed sosyedad? Isipen na arum a totoo ya anggapo so solusyon, kanian sikaray basta labat mantatalikarkar a manbilay. Arum so maniilalo a nasabi panaon et niwala so makapasagyat tan marunong a lider, a nayarin relihyoson lider ni ingen, pian mangigiya ed sikara diad dugan direksion.

Diad tua, duan libon taon lay apalabas, labay na totoo a gawaen si Jesu-Kristo ya ari ra lapud atebek dan sikatoy imbaki na Dios tan kualipikadon manuley. Anggaman kuan, sanen atebek nen Jesus iray getma ra, tampol ya imbatikan tora. (Juan 6:14, 15) Onia so insalaysay to ed Romanon gobernador diad saginonor: “Say panarian ko aliwan taga dia ed mundo.” (Juan 18:36) Balet, natan, dagdaiset so mangaala na talindeg a singa ginawa nen Jesus—anggan saray relihyoson papangulo a mankuan a papatumbok to. Sasalien na arum ed saraya a pagmaliwen iyan mundo a magmaong a pasen, balanglan diad panasalin pangimpluensya ed saray sekular a manuley odino diad pamemben dan mismo na posisyon ed politika. Naimano tayo iya diad inengneng ed saray agawgawa ed dekada na 1960 tan 1970.

Saray Sagpot na Relihyon Pian Napaaligwas so Mundo

Diad bandad saginonor lay dekada na 1960, akipuligesgesan so pigaran teologo ed saray bansa na Latin-Amerika nisesengeg ed saray mairap-bilay tan nalalames. Pian nagawaan iya, sikaray anibukel na “liberation theology,” a mangipapaliwawan si Kristo so manangisalba ya aliwa lambengat a diad Biblikon pantalos noagta ontan met diad mapolitika tan ekonomikon aspekto. Diad Estados Unidos, pigara ed saray lider na relihyon a pirmin nampaga nipaakar ed kakukusbo na atagey ya estandarte ed moral so anibukel na organisasyon a tatawagen na Moral Majority. Say gagala na satan et pian naikdan na posisyon ed politika iray totoon manggagaway ley parad maabig iran estandarte ed pamilya. Mipadpara, diad dakel a Muslim a daldalin, sinali na saray grupo ya amperen so inkabulok tan inka-alablabas diad pangiyaalibansa na mas maapit ya itutumbok ed Koran.

Kasin panisiaan mon say mundo so magmaong a pasen lapud saratan a sagpot? Ipapabitar na katuaan a diad inkalapagan et saray estandarte ed moral so mantutultuloy ya onaabeba tan mantutultuloy ya onaawang so baet na mayaman tan mairap-bilay, laktip la iraman so walad bansan matalonggaring so “liberation theology.”

Lapud sinmaew so Moral Majority ed manuna iran gagala na satan diad Estados Unidos, say organisasyon so binuyak na say angiletneg ed satan, a si Jerry Falwell, nen 1989. Satan so sinandian na arum iran organisasyon. Anggaman kuan, oniay insulat nen Paul Weyrich, a manunan angusar ed terminon “moral majority,” diad magasin a Christianity Today: “Anggan sano manalo itayo ed saray politika, saray impanalo tayo so agmakapangiyalibansa ed saray totontonen a sisiaen tayon importante.” Inyarum ton insulat: “Say kultura so magmamaliw lan sankaabebaan a kipapasen na bilay na too.” Sikatayo so apilanor ed kakukusbo na kultura ed makatantandan inkalaknab, pirmin kakukusbo a mangilelereg ed saray politika.”

Si Cal Thomas, a kolumnista tan autor, so angiparungtal ed bengatlan minoria ton sakey a manunan depekto ed panasalin itandoro so sosyedad panamegley na saray politika: “Say peteg a pananguman so manlapud balang sinansakey, aliwan manlapud pananalo ed eleksion, lapud saray manunan problema tayo et aliwan say ekonomya tan politika noagta say moral tan espiritual.”

Balet panon mo kasin resolbien so moral tan espiritual iran problema diad mundon anggapo iray pananontonan tan saray totoo so mandedesidi parad inkasikaran dili no anto so duga tan aliwa? No agnayarian na saray totoon maimpluensya tan walaay maong a getma—relihyoso man odino andi—a pagmaliwen a talagan magmaong a pasen iyan mundo, siopa so makayari? Wala so ebat, a singa imanoen tayo so onsublay ya artikulo. Diad tua, say ebat so manunan rason no akin ya inkuan nen Jesus a say Panarian to so agkabiangan na sayan mundo.

[Picture Credit Lines ed pahina 2]

[Picture Credit Lines ed pahina 3]

SAY PANAG-BANTAYAN—PANARALAN YA EDISYON