Say Manangiter-Bilay a Danudanum so Onaagus diad Andes

Say Kapalandeyan ya Andes so onnatnat a pandukey ed pegley na Peru, ya angeteg ed bansa a diad sagur et say kelang ya aplayan rehyon tan diad bukig et say mabuna tan malinaew a katakelan. Diad sayan atalunton a kapalandeyan so panaayaman na masulok a kakatlo ed 27 milyon a totoo ed Peru. Sikaray manaayam diad saray patar ed tagey tan ed mapareng iran gilig na palandey na Andes odino ed saray araralem a kelas tan ed saray mabunan alosadsar na satan a kapalandeyan.

 LAPUD nikutkutlaong a kapalandeyan na Andes, mairap so onloob ditan. Bilang resulta, saray minilyon a manaayam ditan so ompatnag a nisian, a kaslakan so ag-apektado ed saray nagagawa odino iyaaligwas ed paway na nasasakopan da.

Niwala iray ankelag a purok diad saray pangdel na ilog pian asingger ed danum a nakaukolan parad saray tanem da tan saray pulok na llama, alpaca, vicuña, tan saray karnero. Balet, wala so sananey a klase na makanakanan danum ya onaagus diad Andes​—say makarepreskon espiritual a danudanum a manlalapud si Jehova, “say subol na saray danum a mabilay.” (Jeremias 2:13) Uusaren na Dios iray Tastasi to pian tulongan iray totoo na saray barangay a walad Andes pian diad ontan et nagamoran da so suston pikakabat nipaakar ed sikato tan ed saray gagala to.​—Isaias 12:3; Juan 17:3.

Lapud linawa na Dios ya “amin a totoo [et] nilaban ira komon, tan ondago ra ed pakapikabat ed katuaan,” gagawaen na sarayan ministro so anggaay nayarian da pian nabisita iray mairap a sabien a komunidad a tarok so manangiter-bilay a mensahen manlalapud Biblia. (1 Timoteo 2:4) Sayan nibase’d Biblia a mensahe so pakaliwawaan tan matalonggaring. Ibubulos na satan iray totoo diman manlapud saray anito, kustombre, tan ideya a katatakotan da ed saray inatey, mauges iran espiritu, tan ed saray puersa na palsa. Nagkalalon importante, sayan mensahe so mangiiter ed sikara na maglorian ilalo a magnayon a bilay ed paraison dalin.

Pansasagpot

Saray manangipulong na Panarian ya ombibisita ed sarayan niyarawin rehyon so kaukolan a manggawa na dakel a panangiyarunsa. Pian nipasabi so mensahe na Biblia ed kapusoan na saray totoo, kaukolan a walay amta na saray managbangat na Biblia nipaakar ed Quechua odino Aymara, say duaran pansasalita diman.

Aliwan mainomay so pakarateng ed saray purok ed Andes. Dagdaiset iray riles ed saratan a lugar. Agnaseguro so transportasyon tan depende ed mauges a klima tan nikadkaduman topograpiya. Panon sirin a sasabien na saray Tastasi so totoo pian itarok ed sikaray mensahe nipaakar ed Panarian?

Inawat na saray makpel a managpulong na maong a balita so angat tan kinmiwas ira unong ed espiritu nen propetan Isaias: “Wadia ak; ibaki moak.” (Isaias 6:8) Manguusar ira na taloran mobile home pian manbiahen mamaarap ed amianen, sentral, tan bandad abalaten iran lugar. Lapud saratan so napno na dakel a karton na saray Biblia tan literaturay Biblia, saray maseseg a payunir, odino sigpot-panaon iran ministro so angitanem la na saray bini na katuaay Biblia ed saray makaaro, maparawes, tan matuan-impanpuson totoon manaayam diman.

Saray kurbadan karsada ed palandey so nagkalalo lan mapeligro. Pian makadalan ed saratan a karsada et kaukolan a saray luluganan so maniwis-iwis. Legan na ontan a panangimaneobra, adunglawan na sakey a misionaryo ya akayurong ed benegan so sakey ed saray dalig ed beneg a wala la’d tambib na kelas a masulok a 190 metro! Inlikdem toray mata to anggad akadalan lay luluganan.

Walaray karsadan aderalderal tan masupit a maong. Diad idadalan ed ontan a nikutkutlaong a dalin, sakey ed saray mobile home so palasor ed masupit a karsada sanen walay kasabatan a trak a patatdang. Kaukolan ya ipaatras a patatdang so mobile home ya anggad makadalan so duaran luganan.

Anggaman kuan, saray resulta na ontan iran magunaet a sagpot so maabig a tuloy. Labay yo ta nin naamtaan so nipaakar ed saratan ya impansagpot?

“Panagsalog” ed Linok na Titicaca

Naromog ed leksab na Kapalandeyan na Andes a 3,800 a metro manlapud dantal na dayat so Linok na Titicaca, say sankaatageyan a nayarin nadalan na barko a danum diad interon mundo. Say nasasakbongan na niebe iran toktok na palandey, ya arum ed saratan a niebe so 6,400 a metro ed katagey, so panlalapuan na maslak ed 25 ya ilog ya onaagus ed Titicaca. Lapud atagtagey, say klima so ambetel, tan saramay aliwan taga diman so man-elew.

Diad apalabas et sakey a grupo na saray payunir a mansasalita na Quechua tan Aymara so  nambiahen amaarap ed saray islan Amantani tan Taquile diad Linok na Titicaca. Inawit da met so presentasyon ya slide ya apauloan na “A Closer Look at the Churches,” a diretsaan a panangusisa ed katilaan na Kakristianoan. Say reaksion so paborabli. Sakey a laki so angabrasa ed saray agagi tan inyopresi to ni ingen so maawang a kuarto ed abung to no iner a nayarian day manpundo tan manbangat nipaakar ed Biblia.

Say primeron miting ed Amantani so inatendian na 100 a totoo; say miting ed Taquile so inatendian met na 140. Say presentasyon et agawa ed lenguahen Quechua. Sakey a sanasawan datin nanayam ed baley so nankuan: “Panaon la pian sikayoran Tastasi nen Jehova et makanonot ed sikami. Ipipikasi min onsabi kayo.”

Nilikud ed sarayan duaran babaleg ya isla, pigara ed saray akalkulan 40 a “manletletaw” iran isla ed Linok na Titicaca so apasabian met na maong a balita. Manletletaw iran isla? On, saraya so ginawa ed totoras, tanobong a tinmutubo ed medyo atapew iran lugar na linok. Ombaleg iray totoras tan onlampas ed tapew na danum. Pian makapanggawa na sakey ya isla, baloken na saray taga diman iray tanobong, a siansian akalamot ni ed dalem na linok, tan saratan so panlalagaen pian mamorma na entablado. Insan say entablado so tambakan da na saray pitek tan pabenlagan da na kaaruman ya abatang iran tanobong. Saray totoo so manaayam ed saray kobong-kobong a tanobong ya impaalagey ed tapew.

Saray Tastasi nen Jehova so analiw na sakey a baloto pian pulongan iray totoo ed saray isla na Linok na Titicaca. Say baloto so makapangilugan na 16 a totoo. Kayari idaong da ed manletletaw iran isla, onakar iray Tastasi ed entabladon tanobong manlapud sakey a kobong-kobong ya onla ed sananey a kobong-kobong. Ibabaga ran kaslakan lan nalilikas da so igagalaw a daiset na gagatinan da. Agnayari ed sayan lugar iramay mieelew!

No nipaakar ed populasyon a mansasalita na Aymara, manaayam ira ed dakel a komunidad tan purok diad gilig na saray ilog tan ed saray isla a wala ed linok. Mas nasabi iraya diad panamegley na baloto nen say diad luluganan. Ami-amin et akalkulan ngalngali 400,000 a totoo so manaayam diad rehyon ya apasabian na mensahe na Panarian panamegley na sarayan baloto. Saray baloto so pirmin nausar a manbayag ni insan makapawil.

Panrepresko ed Espiritual a Kapgaan

Si Flavio so manaayam ed purok na Santa Lucia, ya asingger ed Juliaca, diad Andes. Diad relihyon ton Evangelical Church et nibangat ed sikato so doktrinan impiernon-apoy. Diad loob na pigaran taon et sikatoy nambilay tekep na takot ed magnayon tan mangapuy-apoy a kadusa. Mabetbet ton panumamengan no panon a say Dios na aro et magnayon ton pairapen so totoo diad apoy. Sanen binmisita ed saman a lugar si Tito, sakey a sigpot-panaon a ministro na saray Tastasi nen Jehova, dinalaw to si Flavio.

Sakey ed saray tepet ya intepet nen Flavio et, “Kasin say relihyon yo et ibabangat ton say totoo so napairap ed mangapuy-apoy ya impierno?” Inmebat si Tito a say ontan ya ideya so kagula na Manamalsa tan mamabalaw met itan ed ngaran nen Jehova, say Dios na aro. Diad impangusar ed mismon bersion na Biblia nen Flavio, impanengneng nen Tito ed sikato a saray inatey so andian lay liknaan a balot tan tatalaranan da so mangaraldalin a kikioli ed silong na Panarian na Dios. (Eclesiastes 9:5; Juan 5:28, 29) Saya so anagyat ed si Flavio. Tampol ton inawat so panangiyaral na Biblia tan ag-abayag et nagmaliw lan bautismadon Kristiano.

Sakey a Maapresyan Purok

Isipen pa so gayaga ed pangitarok na Kasulatan ed saray taga-purok ya agnin balot akanengneng na kopya na Biblia odino ed pampulong ed saray purok a ditan et agnin balot arengel na totoo so nipaakar ed saray Tastasi nen Jehova odino ed maong a balitan ipupulong da! Ontan so eksperiensya na taloran payunir ya agagin bibii​—di Rosa, Alicia, tan Cecilia​—a nampulong ed saray purok na  Izcuchaca tan Conayca, a naromog ed sentral Peru a say kinaatagey na satan et masulok a 3,600 a metro.

Kasabi ra ed primeron purok et anggapoy natuloyan da. Akitongtong ira ed lokal a komander na polisya, ya insalaysay da so rason na ibibisita ra. Say resulta? Pinatuloy toran sanlabi ed istasyon na polisya. Diad kaimbuasan, saray payunir so akaromog na mas permanentin pampundoan a nagmaliw iyan sentro na saray kimey da.

Ag-abayag et sinmabi so panaon parad tinaon a Memoryal na impatey nen Kristo. Binisita na saray payunir so amin ya abung ed purok na Izcuchaca, angipalima na dakel a Biblia, tan akapangigapo na dakel a panangiyaral na Biblia. Sakbay na Memoryal, angipatulor ira na saray imbitasyon parad sayan ebento, ya insalaysay da so gagala tan kabaliksan na saray emblema ya usaren legan na okasyon. Sakey a grupo na agagi so naimbitaan ya ontulong parad okasyon, tan sakey ed sikara so angiter na paliwawa. Alay liket so pakanengneng a 50 totoo manlapud saman a melag a purok so presente ed sayan espisyal ya okasyon! Diad inmunan pankanawnawa et atalosan da so peteg a kabaliksan na Pangdem na Katawan. Ontan met, agaylan pabpablien da so impakawalaan da na Salitay Dios!

Nibulos Manlapud Saray Pabelat

Say pangitarok na makarepreskon danum na katuaan na Biblia ed saray akautibo na palson relihyon so lawas sakey a gayaga. Say Pisac et sakey a balwarte na kadaanan ya Empiryo na Inca. Maslak a totoon manaayam ditan natan so abangatan na agmakasulatan a bangat ya impiernon-apoy. Ibabaga na saray pari ra a sikaray makaonla lambengat ed tawen diad pangidasal na papari.

On, say ontan a totoo so napgaan parad makarepreskon danudanum na katuaan ed Biblia. Legan a mankakabkaabungan, si Santiago, sakey a sigpot-panaon a ministro na Tastasi nen Jehova, so awalaan na pankanawnawa pian isalaysay ed sakey a too a saray matunong so nitalagan manbilay ed paraison dalin. (Salmo 37:11) Impanengneng nen Santiago ed Biblia a saray inatey so napaoli tan say katooan so nibangat ed saray naspot a dalan nen Jehova tekep na panilalo ed andi-anggaan a bilay ed arapen. (Isaias 11:9) Antis na saman, et say too so sakey a debosyonadon Katoliko, mibibiang ed espiritismo, tan mainum na alak. Natan et walaan la na nibase’d Biblia ya ilalo tan sakey a kalat ed bilay​—pambilay diad Paraiso. Pinoolan ton amin so espiritistikon kagkagawaan to tan intunda to lay panagbuanges. Dinagup toy pamilya to tan impaiyaralan ira na Biblia. Asabi panaon, say interon pamilya so angidedika na inkasikara ed si Jehova a Dios tan sikaray abautismoan.

Inabrasa so Panagparawes

Saray totoon taga palandey so maparawes a tuloy. Anggaman ankekelag labat iray abung da tan saray totoo et anggapoan da, oopresian daray bisita na bengatlan walad sikara. Sakbay a naaralan toray atagey ya estandarte na Biblia, say akan-abung so nayarin mangiyopresi ed bisita na lawer pian gagalen legan a mantotongtong ira. Balet sano sikato lay nagmaliw a Tasi, nayarin say iyopresi to et sakey a kutsaran masamit, a misimbangan ed balor na saray lawer diad saray nisulinek a probinsya.

Impaibaan so sakey ya agin laki ed misionaryo diad sakey a panagpawil. Kayari na alay irap ya intatdang ed mapareng a basbas ed palandey, sikaray nantipak pian ipaamta ed unabung a sikara lay akasabi. Sikaray pinaloob ed naatepay-tegmel ya abung, a kaukolan day onyuko pian makaloob ed abebbeban lolooban. Siaalwar iran dinmakat ed liber na pegley na dalin a datal, a nankotkotay ina na sakey ya abot, kinargaan to na ules, tan inyan to so kapangiyanak to. Lapud agmakapaway, sayan kapangiyanak so kontento tan maliket lan manggalgalaw a bukor, bangta mantotongtong iray angkakabaleg. Kayari na mabilabilay ya impantotongtong da nipaakar ed saray bendisyon na Panarian, angipaway so bii na pandukey a kargaan na lokal ya iinumen. Ag-abayag et linmeksab la iray agagi ed gilig na palandey pian ondalaw ni.

Daakan a Panagani

Natan diad sayan rehyon et wala lay manga sanlasus a nisulinek iran grupo na masulok a sanlibon totoon iyaaralan na saray Tastasi nen Jehova nipaakar ed Biblia. Saray nangraduar ed Ministerial Training School diad Lima so nibabaki pian pagmaliwen irayan grupo a kongregasyon. Saray maptek-impanpuson indibidual ya abayag lan akautibo ed palson relihyon tan saray anito so akaromog na kawayangan diad panamegley na maong a balita na Panarian! (Juan 8:32) Say kapepegaan da ed danudanum na katuaan so napepenek.

[Litrato ed pahina 10]

Panagpulong ed “manletletaw” iran isla ed Linok na Titicaca