Say Tombok ed Maliket a Mundo

“SAY alenleneg a sankamakapanyarian a toon nambilay​—aliwa labat ed sayan duaran milenyo noagta diad interon awaran na too​—et si Jesus na Nazaret,” so inkuan na magasin a Time. Sanen wadiad dalin si Jesus, nilibon matuan-impanpuson totoo so amidbir ed panangiyansakit to ed arum, ya aliwa labat lan say inkamatalonggaring to. Kanian, agpankelawan a sikatoy labay dan gawaen ya ari. (Juan 6:10, 14, 15) Ingen, unong ya asalambit ed inmunan artikulo, ag-akibabali si Jesus ed politika.

SAY inkiwas nen Jesus so nibase ed taloran sengegan: say panmoria na Ama to ed saray panangipatnag na too ed dilin-determinasyon, a pati say uley na too; say pikabat nen Jesus a walaray mabiskeg, agnanengneng a puersa ya onsusumpa ed anggan say sankaabigan iran sagpot na too ed pananguley; tan say gagala na Dios ya iletneg so mangatatawen a gobierno pian manguley ed interon dalin. Legan tayon usisaen a nagkalalo irayan taloran punto, natalosan tayo no akin ya onsasaew iray sagpot na katooan pian pagmaliwen a magmaong a pasen so mundo. Natalosan tayo met no panon a nadampot so itatalona.

Kasin Nauleyan na Totoo so Inkasikara?

Sanen pinalsa na Dios so totoo, sikaray inikdan to na pakauley ed amin a klase na ayayep. (Genesis 1:26) Balet nisilong so katooan ed inkasoberano na Dios. Nepeg a paneknekan na inmunan laki tan bii so panagpasakop da ed Dios diad itulok dan agpangan ed bunga na sakey a kiew, “say kiew a pakaamtaan na maong tan mauges.” (Genesis  2:17) Makapaermen, inabuso nen Adan tan Eva so kawayangan dan manpili tan tinmunganga ira ed Dios. Say impangala ra na isesebel a bunga et aliwa lambengat a panagtakew. Satan so mangilalanor ed panagrebeldi ed inkasoberano na Dios. Isasalaysay na paimano’d leksab ed Genesis 2:17 na The New Jerusalem Bible ya inako nen Adan tan Eva so “nagnap a kawayangan ed moral ya agbidbiren na too so kipapasen to bilang sakey a pinalsa . . . Say inmunan kasalanan et sakey a panangataki ed inkasoberano na Dios.”

Lapud nalalanor iray seryoson isyu nipaakar ed moral, inabuloyan na Dios si Adan tan Eva tan saray kailalakan da a pilien so dilin dalan na bilay da, tan angiletneg ira na dili ran estandarte nipaakar ed duga tan aliwa. (Salmo 147:19, 20; Roma 2:14) Manuna et ginmapo la’d saman so impan-eksperimento na too ed dilin-determinasyon to. Nagmaliw kasi itan a matalona? Unong a natebek tayo ed walan kipapasen diad inlabas na nilibon taon, nibaga tayon andi! Oniay ibabaga na Eclesiastes 8:9: “[Say] too walaan na pakayari ed sananey [parad] kaugsan to.” Sayan makapasinagem a rekord na dilin-pananguley na too so mamepekder ed katuaan na Jeremias 10:23: “O Jehova, amtak a say dalan na too anggapo ed sikato lanlamang; aliwa a wala ed too a manakar a mangitonton ed saray kurang to.” Unong ed awaran et apaneknekan la ya agnayarian na totoo so matalonan manguley ya anggapoy tulong na Manamalsa ra.

Sigpot ya inmabobon si Jesus. Say pagmaliw ya independente ed Dios so karimdimla ed sikato. “Anggapo so gawaen ko ed inkasiak,” so inkuanto. “Gawaen ko lawas so saray bengatla a makapaliket ed [Dios].” (Juan 4:34; 8:28, 29) Kanian, ag-anggan ninonot nen Jesus ya awaten itan lapud anggapo so autorisasyon na Dios pian awaten so pakauley manlapud totoo. Anggaman ontan, agkabaliksan na saya a sikatoy agmabulos ya ontulong ed kapara ton too. Diad kasunian, ginawa to so amin a nayarian to pian tulongan so totoo a naromog so sankabalegan a liket ed saman tan diad arapen. Inter to ni ingen so bilay to parad katooan. (Mateo 5:3-11; 7:24-27; Juan 3:16) Balet amta nen Jesus ya “amin a bengatla wala so [aturon] panaon,” pati say panaon na Dios pian pekderan to so inkasoberano to ed katooan. (Eclesiastes 3:1; Mateo 24:14, 21, 22, 36-39) Ingen, tandaan a diad Eden et nampasakop so inmunan atateng tayo ed linawa na sakey a marelmeng ya espiritun pinalsa a nansalita panamegley na sakey a nanengneng a serpiente. Saya so mangipaarap ed sikatayo ed komaduan rason no akin ya ag-akibabali si Jesus ed politika.

Say Ag-kabat a Manuley na Mundo

Ibabaga ed sikatayo na Biblia ya inyopresi nen Satanas ed si Jesus so “amin a panarian na mundo, tan say dayew da,” bilang kasalat na sakey a gawa na panagdayew ed sikato. (Mateo 4:8-10) Inmuna, si Jesus so inopresian na pakauley ed mundo​—balet wala so kondisyon na Diablo. Si Jesus so agnampakalot ed sayan pananukso. Balet, talaga kasin pananukso itan? Peteg kasin nagawaan nen Satanas so ontan ya abalbaleg ya opresi? On, lapud tinawag a mismo nen Jesus so Diablo a “say prinsipe na mundo,” tan sikatoy deneskribe nen apostol Pablo bilang “say dios na sayan panaon.”​—Juan 14:30; 2 Corinto 4:4; Efeso 6:12.

Siempre, kabat nen Jesus ya anggapo so panangiyansakit na Diablo ed pankaabigan na katooan. Deneskribe to si Satanas bilang “say managpatey” tan “say ama na katilaan tan amin a bengatlan palso.” (Juan 8:44, The Amplified Bible) Mapatnag, say mundon “mandukdukol ed pakayari” na satan a marelmeng ya espiritu so agbalot magmaliw a tuan maliket. (1 Juan 5:19) Balet agmantultuloy iyan pakauley na Diablo. Si Jesus, a makapanyarin espiritun pinalsa natan so magano lan maneral ed si Satanas tan sigpot lan naandi so panangimpluensya to.​—Hebreos 2:14; Apocalipsis 20:1-3.

Amta nen Satanas a mismo a say panaon to bilang manuley na mundo so maganggano lan manampot. Kanian, determinadon manggawa na amin a polaing pian impluensyaan na mauges so totoo pian agla manguman, a singa ginawa to sakbay na Delap ed panaon nen Noe. (Genesis 6:1-5; Judas 6) “Kasi lara so dalin tan dayat,” kuan na Apocalipsis 12:12, “ta say Diablo inmakseb ed sikayo, a wala ed baleg a sanok to, ya amta to a daiset la so panaon to.” Ipapatnag na propesiya na  Biblia tan saray ebento ed mundo a manbibilay itayo la’d kasampotan na sayan ‘daiset la a panaon.’ (2 Timoteo 3:1-5) Asingsingger la so pakainawaan.

Sakey a Gobierno a Mangitarok na Liket

Say komatlon rason no akin ya ag-akibiang si Jesus ed politika et lapud kabat to a diad nigetar a panaon ed arapen, say Dios so mangiletneg na mangatatawen a gobierno a manguley ed dalin. Tatawagen na Biblia iyan gobierno bilang Panarian na Dios, tan satan so manunan tema na bangat nen Jesus. (Lucas 4:43; Apocalipsis 11:15) Binangatan nen Jesus iray babangatan ya ipikasi ran onsabi iyan Panarian, lapud dia lambengat ed silong na satan a pananguley so ‘kagawa na linawa na Dios, unong ed tawen, ontan met ed dalin.’ (Mateo 6:9, 10) Nayarin panuumamengan mo, ‘No uleyan na sayan Panarian so interon dalin, anto so nagawa ed ginaway-too iran gobierno?’

Say ebat so naromog diad Daniel 2:44: “Dia ed agew na saraman ya arari [manuuley diad sampot na say peles a sistema], say Dios na tawen mamaalagey naani na sakey a panarian ya anggan kapigan agnaani naderal tan say pananguley to agnaani niiter ed sananey a baley: balet buybuyaken to naani tan upoten to naani so saraya ya amin [a ginaway-too] a panarian, et sikato so mansiansia lawas.” Akin a “buybuyaken” na Panarian na Dios so mangaraldalin iran pananguley? Lapud ipapasoot na saraya a pansiansiaen so sumpa ed Dios ya awawey a dilin-determinasyon ya inyalibansa la nen Satanas diad hardin na Eden. Niarum ni ed panusumlang ed saray manunan pankaabigan na katooan, ipapaarap na saratan a mamapasiansia ed satan ya awawey so inkasikara diad pilaban ed Manamalsa. (Salmo 2:6-12; Apocalipsis 16:14, 16) Kanian, nepeg tayon tepetan so inkasikatayo, ‘Kasin sikatayoy sakop odino sumpa ed uley na Dios?’

Siopan Inkasoberano so Pilien Mo?

Pian natulongan so totoon makapandesisyon a nibase’d suston pikakabat nipaakar ed pananguley, ingganggan nen Jesus iray babangatan to ya ipulong so “maong a balita na Panarian . . . ed amin a panaayaman a dalin ya onkanan pantasi ed amin a nasyon” antis ya onsabi so anggaan na sayan peles a sistema na bengabengatla. (Mateo 24:14, NW) Siopara natan so kabkabat ed sankamundoan a mangipupulong ed Panarian na Dios? Saray Tastasi nen Jehova. Diad tua et abayag lan akasulat ed arap ya apis na sayan babasaen iray balikas a “Mangipapalapag na Panarian nen Jehova.” Natan et manga anemiran milyon a Tastasi ed masulok ya 230 a daldalin so ontutulong ed totoo pian nagamoran day suston pikakabat ed satan a Panarian. *

Saray Bendisyon Parad Saray Sakop na Panarian

Lawas ginawa nen Jesus iray bengatla unong ed paraan na Dios. Kanian, imbes a pilien so independentin kurang tan salien a tulongan odino paaligwasen iyan peles a sistema na bengabengatla diad mapolitikan paraan, nambanikelan ton inyabante so intereses na Panarian na Dios, say alenleneg  a solusyon ed saray problema na mundo. Lapud katooran to, sikatoy atumangan na maglorian trono ed tawen bilang say mismon Ari ed satan a Panarian. Agaylan abig a tumang lapud panagpasakop to ed Dios!​—Daniel 7:13, 14.

Minilyon natan a mangaalig ed si Jesus diad pangiyuuna ed Panarian na Dios tan diad pampapasakop ed linawa na Dios so manggagayaga met ed alay abig a regalo​—say pribilehyo a magmaliw a mangaraldalin a sakop na Panarian na Dios. (Mateo 6:33) Diad silong na maaron pananguley na satan, sikaray nitandoro ed inkayadyari bilang too, tekep na ilalon pambilay ya andi-anggaan. (Apocalipsis 21:3, 4) Oniay ibabaga na 1 Juan 2:17: “Say mundo mangangga, tan saray penel to: sabalet so mangunor ed linawa na Dios onsiansia lawas.” Agaylan makapagayaga so pansiansia dia ya ando lan ando, lapud napagit la ed satan si Satanas tan saray ontutumbok ed sikato tan say dalin so magmaliw lan paraiso ed interon globo ya anggapo lay mangapag-apag a nasyonalismo, abulok a sistemay komersyo, tan palson relihyon!​—Salmo 37:29; 72:16.

On, say Panarian na Dios so peteg a tombok ed tuan maliket a mundo, tan say mensahen iyaabawag na satan so matukotukoy ya adeskribe bilang maong a balita. No agmo ni agawaan itan, diad ontumbok ya idalaw ed sika na sakey ed saray Tastasi nen Jehova, akin ya agtalinengen iyan maong a balita ya itatarok da ed sika?

[Paimano ed leksab]

[Saray litrato ed pahina 7]

Imbangat nen Jesus a diad silong na uksoyan na Panarian na Dios, say mundo so magmaliw ya alay abig a pasen