“Agew na Simpatya Parad Relihyon”

LAPUD naintriga ed impisingbatan ed saray Tastasi nen Jehova, say prinsipal na sakey ya eskuelaan diad Poland so angiyuksoy ed eskuelaan to na “Agew na Simpatya Parad Relihyon.” Insuheri ton saramay manboluntaryo ed limog na saray estudyante​—saray Katoliko, Buddhista, tan Tastasi nen Jehova​—so mangiparaan na saray antikey a presentasyon pian impaamta ed arum niran estudyante iray sisiaen tan agamil da. Taloran tin-edyer a Tastasi nen Jehova so namboluntaryon tampol.

Kasabi na saman ya agew, say inmunan nansalita et say 15-años a Malwina. Diad kabiangan et oniay imbaga to: “Dakel ed sikayo so makapikabat la ed sikami sakbay na inloob mi ed sayan eskuelaan lapud dinmalaw kami la ed kaabungan yo. Nayarin panuumamengan yo no akin a paulit-ulit min gagawaen itan. Lapud tutumboken mi so alimbawa nen Jesu-Kristo, say Manangiletneg na Inkakristiano. Sikatoy angipulong ed maong a balita nipaakar ed Panarian na Dios inerman so pakaromogan to ed totoo. Ontan met so ginawa na saray apostol tan arum niran inmuunan Kristiano. Diad dakel a pasen, sinungdoan na saray Tastasi nen Jehova so mairap subok na pananisia, balet ta maliket kami ta diad eskuelaan tayo et panggagayagaan mi so deen, ya amin yo so mamapawala ed saya. Pisalamatan mi kayo ed satan!”

Diad konklusyon na presentasyon to, imbaga nen Malwina: “Wala ni sakey a rason no akin ya ondadalaw kami ed abung yo. Mapaga kami ed sikayo. Ibabaga na Biblia ya asingger lan sagmaken na katooan iray makapakebbiew ya ebento ed mundo. Kanian diad ontumbok ya itoktok mi ed puerta yo, ipangasin ontalineng. Labay min ibaga ed sikayo no panon a sikatayo so saniiban manbilay ya ando lan ando diad paraison dalin.”

Say tinmumbok a nampaliwawa et si Mateusz, a 15-años met. Imbaga nen Mateusz ed saray dumerengel to a diad loob na dakel a taon et saray Tastasi nen Jehova so angusar la na nambabangil a metodo pian nikayat so maong a balita. Alimbawa, nen 1914​—legan na panaon na anggapoy tanol iran sine​—impalabas na Tastasi so “Photo-Drama of Creation,” sakey a pelikula tan slide a presentasyon a babansagan na tanol.

 Insalaysay nen Mateusz so betang na radio diad inkayat na mensahe na Panarian insan to deneskribe so nikadkaduman niprograma ed computer a multilanguage electronic phototypesetting system (MEPS) a pinawala na saray Tastasi nen Jehova. Insalaysay to met no panon a natutulongan na saray Tastasi nen Jehova iray doktor nipaakar ed saray teknik ed panagtambal ya ag-uusaran na dala. “Natan, saray bantog a Polakon doktor so paborablin mangibabalikas ed talindeg mi tan ipapabitar dan diad tinaon et ondarakel iray pasyentin aliwan Tasi ya inoperaan ya ag-inusaran na dala,” so inkuanto.

Sinampotan itan nen Mateusz diad impangisalaysay ed konstruksion na saray Kingdom Hall tan inkuanto: “Labay yo so ombisita ed Kingdom Hall mi? Libre so onloob, tan anggapoy panagkolekta na kuarta.” No nipaakar ed pankokombensionan diad Sosnowiec, inkuan nen Mateusz: “Kaukolan yon nanengneng iyan baleg tan mausar a bilding. Akin ya ag-itayo maniiban onla diman? Walay suhestion mi, tan say kaaro tayon si Katarzyna so mangibaga ed sikayo nipaakar ed satan.”

Insan, entusiastikon imbaga na 15-años a si Katarzyna: “Naabrasa kayon onla ed Sosnowiec parad distriton kombension na saray Tastasi nen Jehova. Saray teman nisisiglaot ed saray kalangweran so nasingbat.” Sinaglawi met nen Katarzyna so importantin ngilinan na saray Kristiano​—say Memoryal na impatey nen Jesu-Kristo. Pinaseseg toray dumerengel to: “Nen katantaon masulok a 14 milyon a totoo ed sankamundoan so inmatendi ed satan ya okasyon. Akin ya ag-onatendi ed ontumbok a selebrasyon?”

Kayari na saray presentasyon da, impresenta di Malwina, Mateusz, tan Katarzyna ed saray managbangat so libron Jehovah’s Witnesses​—Proclaimers of God’s Kingdom a kaibay duaran videocassette a manisingbat ed saray sisiaen tan aktibidad na saray Tastasi nen Jehova. * Misalsalamat ya inawat na saray managbangat tan insipan dan usaren iratan diad saray history class.

Diad sampot na sesyon, anogtog so 12 años a Martyna parad amin ya inmatendi ed kantan apauloan na “Misalamat Kami, Jehova.” Sarayan tin-edyer a Tastasi so ‘apabayani ira ed Dios’ tan angiter na maabig a pantasi. (1 Tesalonica 2:2) Agaylan ekselentin alimbawa parad saray malangwer a Tastasi ed inerman a pasen!

[Paimano ed leksab]

[Litrato ed pahina 26]

Pipilien nen Katarznya iray kasulatan parad presentasyon

[Litrato ed pahina 26]

Ipaparaan nen Malwina so presentasyon pigaran agew ni sakbay ya iparungtal itan ed eskuelaan