‘Ikawes Yo so Andukey a Panagtepel’
‘Ikawes Yo so Andukey a Panagtepel’
“Kawesan yo so inkasikayo na matamoy a panamabli ya atekepan na panangabagey . . . tan andukey a panagtepel.”—COLOSAS 3:12, NW.
1. Isalaysay so sakey a maabig ya ehemplo nipaakar ed andukey a panagtepel.
SI Régis a manaayam ed abalaten-sagur a Pransya, so nagmaliw a bautismadon Tasi nen Jehova nen 1952. Diad loob na dakel a taon, inamper na akulaw to iray sagpot ton manlingkor ed si Jehova. Binutaw toray dalig na luluganan na masiken to pian agmakapiaral, tan aminsan et sikato ni ingen so tinumtumbok na akulaw to legan a manpupulong na mensahe na Biblia diad saray puerta, a binalaw to legan a mitotongtong so masiken to ed saray unabung nipaakar ed maong a balita na Panarian. Anggaman ed sayan naynay ya isusumpa, nantultuloy si Régis a nantepel. Kanian, si Régis so nagmaliw a maabig ya ehemplo parad amin a Kristiano, lapud kakaukolanen nen Jehova ya amin a managdayew ed sikato so mantepel diad pidedeneng da ed arum.
2. Anto so literal a kabaliksan na Griegon salita parad “andukey a panagtepel,” tan anto so kabaliksan na satan a salita?
2 Say Griegon salita parad “andukey a panagtepel” so literal a mankabaliksan na “inkarukey na espiritu.” Say Ingles a New World Translation so aminsamplon angipatalos ed satan a salita bilang “andukey a panagtepel,” amitlon danay ya “anos,” tan aminsan a “pangagamil na anos.” Saray Hebreo tan Griegon balikas a nipatalos ya “andukey a panagtepel” so angilaktip ed ideya ya anos, inkamasungdo, tan inkatantan a manpasnok.
3. Panon a midumaan so panmoria na Kristiano ed saray Griego nen inmunan-siglo nipaakar ed andukey a panagtepel?
3 Agmomoriaen na saray Griego nen inmunan-siglo a say andukey a panagtepel et sakey a maabig a walna. Satan a salita et agbalot inusar na saray Stoic a pilosopo. Unong ed iskolar na Biblia a si William Barclay, say andukey a panagtepel “so misunian a tuloy ed maabig a walna na saray Griego,” a mangitatangsit ed “say agpangitepel ed antokaman a pananginsulto odino panamasakit.” Insalaysay to: “Parad saray Griego say matalonggaring a too et samay manggawa ed amin a bengatla pian makabawi. Parad saray Kristiano say matalonggaring a too et samay ag-ombabawi, anggan sarag to itan a gawaen.” Say andukey a panagtepel so ipapasen na saray Griego bilang pakabidbiran na kaleteyan, balet dia, a singa ed arum niran kipapasen, say ‘kakulangkulangan ed Dios et marunong nen saray totoo, tan say kakapuyan ed Dios et mabibiskeg nen saray totoo.’—1 Corinto 1:25.
Say Ehemplo nen Kristo Nipaakar ed Andukey a Panagtepel
4, 5. Anton alay abig ya ehemplo na andukey a panagtepel so impatnag nen Jesus?
4 Bilang onkokomadua ed si Jehova, impatnag nen Kristo Jesus so alay abig ya ehemplo na andukey a panagtepel. Sanen nadedetdetan a maong, impatnag nen Jesus so makapakelaw a panagtepel. Oniay nipropesiya nipaakar ed sikato: “Sikato so inaposan, anggan sanen sikato so pinairap agto nilukasan so sangi to; singa sakey a kordero a niyarap ed panagpateyan, tan singa sakey a karnero a sikato so emel ed arap na saray mamuklis ed sikato, ontan agto nilukasan so sangi to.”—Isaias 53:7.
5 Agaylan makatantanda so andukey ya impantepel nen Jesus diad interon ministeryo to diad dalin! Inanosan to so mapalikdo iran tepet na kakabusol to tan say pananginsulto na saray onsusumpa ed sikato. (Mateo 22:15-46; 1 Pedro 2:23) Sikato so maanos ed saray babangatan to, anggano naynay so pankokolkol da no siopa so sankatalonggaringan ed sikara. (Marcos 9:33-37; 10:35-45; Lucas 22:24-27) Tan agaylan makapadinayew a panagtepel so impatnag nen Jesus diad samay labin inkitapat to sanen akateglep si Pedro tan Juan kayari na impangibaga ton ‘manpuyat kayo’!—Mateo 26:36-41.
6. Panon ya agunggonaan si Pablo ed andukey ya impantepel nen Jesus, tan anto so naaralan tayo ed saya?
6 Kayari na impatey tan inkioli to, nantultuloy si Jesus a nantepel. Si apostol Pablo so nagkalautlan mikabisado ed satan, lapud sikato so datin managpasegsegang ed saray Kristiano. Oniay insulat nen Pablo: “Matoor so saya a salita, tan manepeg ya awaten na ami-amin, a si Kristo Jesus linma dia ed mundo pian ilaban to so saray managkasalanan; a dia ed sikara siak so manunaan. Balet lapu ed saya agamoran ko so panangasi, pian dia ed siak a manunaan, si Jesu-Kristo ipanengneng to so amin ya alablabas ya anos to, pian uliran na saray manisia ed kaunoran dia ed sikato nipaakar ed bilay ya andi-angga.” (1 Timoteo 1:15, 16) Antokaman so datin kabibilay tayo, no ipapeg tayo so pananisia tayo ed si Jesus, sikato so mangitepel ed sikatayo—siempre, bangta iilaloan to itayon ‘manggawa na saray manepeg ed pagbabawi.’ (Gawa 26:20; Roma 2:4) Saray mensahe ya impasabi nen Kristo ed pitoran kongregasyon ed Asia Minor so mangipanengneng ya iilaloan ton onaligwas so awawey tayo, legan a sikatayo so itetepel to.—Apocalipsis, kapitulo 2 tan 3.
Sakey a Bunga na Espiritu
7. Anto so siglaotan na andukey a panagtepel tan masanton espiritu?
7 Diad koma-5 a kapitulo na sulat to ed saray taga-Galacia, pinandumaan nen Pablo so gawagawa na laman tan bungabunga na espiritu. (Galacia 5:19-23) Lapud say andukey a panagtepel et sakey ed saray atributos nen Jehova, sayan kalidad so nanlapud sikato tan sakey a bunga na espiritu to. (Exodo 34:6, 7) On, say andukey a panagtepel so mikapat ed impaneskribe nen Pablo ed bunga na espiritu, kalaktip so “aro, liket, deen, . . . kauyamoan, kaabigan, sisia, tayadno, dangka.” (Galacia 5:22, 23) Sano ipapatnag sirin na saray lingkor na Dios so maridios a panag-anos, odino andukey a panagtepel, gagawaen da itan ed silong na impluensya na masanton espiritu.
8. Anto so makatulong ed sikatayo pian nabayuboan so bunga na espiritu, kalaktip lay andukey a panagtepel?
8 Balet, ag-iya mankabaliksan ya ipipilit nen Jehova so espiritu to ed sakey a too. Kaukolan a mabulos itayon manpasakop ed impluensya na satan. (2 Corinto 3:17; Efeso 4:30) Abuloyan tayon onkurang so espiritu ed kabibilay tayo diad pamayubo ed saray bunga na satan diad amin a gagawaen tayo. Kayari ton indalatdat iray gawa na laman tan say bungabunga na espiritu, oniay inyarum nen Pablo: “No manbilay itayo ya unong ed espiritu, manakar itayo met komon unong ed espiritu. Agkayo komon nalingo; say Dios agnayarin naludlurey: ta say antokaman ya itanem na too satan met so anien to. Ta say mantanem na nipaakar ed laman ton dili, dia ed laman manani na kabulok; balet say mantanem na nipaakar ed espiritu, dia ed espiritu manani na bilay ya andi-angga.” (Galacia 5:25; 6:7, 8) Pian magmaliw itayon matalona diad pamayubo ed andukey a panagtepel, nepeg tayo met a bayuboan so arum a bunga a pinawala na saray Kristiano panamegley na masanton espiritu.
“Say Aro Manangitepel”
9. Akin a nayarin imbaga nen Pablo ed saray taga-Corinto a “say aro manangitepel”?
9 Impabitar nen Pablo a walay nikaduman siglaotan na aro tan andukey a panagtepel sanen inkuan to: “Say aro manangitepel.” (1 Corinto 13:4) Insuheri na sakey ya iskolar na Biblia, a si Albert Barnes, ya indanet iya nen Pablo makasengeg ed balingaan tan kolkol ya agawa ed Kristianon kongregasyon diad Corinto. (1 Corinto 1:11, 12) Oniay impabitar nen Barnes: “Say salita dia a nausar [parad andukey a panagtepel] so misunian ed bengatbengat: ed saray balikas tan kanonotan ya atekepan na sanok, tan ed inka-ingongot. Mankabaliksan itan na kipapasen na kanonotan a MAKAPANTEPEL A MABAYAG sano nalalames, papasyodoten.” Say aro tan andukey a panagtepel so lalon makatulong diad kareenan ed loob na Kristianon kongregasyon.
10. (a) Diad anton dalan a makatulong ed sikatayo so aro pian magmaliw a manangitepel, tan anton simbawa so inter nen apostol Pablo nipaakar ed saya? (b) Anto so inkomento na sakey ya iskolar na Biblia nipaakar ed andukey a panagtepel tan panangasi na Dios? (Nengnengen so paimano’d leksab.)
10 “Say aro manangitepel, tan mauyamo; say aro . . . agto anapen so kien to, agmapasnok.” Kanian, diad dakel a paraan, say aro so makatulong ed sikatayo pian makapantepel. * (1 Corinto 13:4, 5) Say aro so ontulong ed sikatayo pian manaanosan ed balang sakey tan nodnonoten ya amin tayo et ag-ayadyari tan walaan na saray kakulangan tan kalilingoan. Ontulong itan ed sikatayo pian magmaliw a makonsidera tan manamerdona. Papasesegen itayo nen apostol Pablo a mankurang a “tinekepan na amin a kaabebaan na linawa tan kauyamoan, pati panagsungdo, manuunoran so sakey tan sakey ed sikayo ed aro; a sesegan yo ya imatonan so pankakasakey na espiritu ed balor na kareenan.”—Efeso 4:1-3.
11. Akin a nagkalautlan importante so andukey a panagtepel diad limog na saray Kristiano?
11 Say andukey a panagtepel ed biang na saray membro ra so mamawala na kareenan tan liket diad limog na saray Kristiano, balanglan diad kongregasyon, ayaman a Bethel, ayaman na saray misionaryo, saray grupo na construction, odino diad saray eskuelaan a parad Kristianos. Lapud nandudumaan so personalidad, panlabay, binalegan, saray estandarte ed panangigalang, anggan say inkalinis, panapanaon ya onlesa iray makapasubok a kipapasen. Tua met itan ed limog na saray pamilya. Makanakana so pagmaliw a matantan a manpasnok. (Uliran 14:29; 15:18; 19:11) Say andukey a panagtepel—maanos a panagsungdo, diad ilalon walay pangumanan—so nakaukolan ed biang na amin.—Roma 15:1-6.
Ontulong ed Sikatayo so Andukey a Panagtepel Pian Makapansungdo
12. Akin ya importante so andukey a panagtepel legan na makapasubok iran kipapasen?
12 Say andukey a panagtepel so ontulong ed sikatayon mansungdo ed saray makapasubok a kipapasen a singano agla manunda odino andian na antokaman a tampolan a solusyon. Tua itan ed biang nen Régis, ya abitla ed gapo. Diad loob na dakel a taon, sinmumpa so akulaw to ed saray sagpot ton manlingkor ed si Jehova. Balet, sakey ya agew et sikatoy mansibsibek ya inmasingger ed sikato tan inkuanto: “Katuaan manaya iya. Tulongan mo ak. Labay koy paiyaralan na Biblia.” Sikato so abautismoan ed saginonor bilang Tasi. Oniay inkuan nen Régis: “Saya so mamaneknek a benendisyonan nen Jehova so dakel a taon na impipuligesgesan, impananos, tan impansungdok.” Atumangan so andukey ya impantepel to.
13. Anto so akatulong ed si Pablo pian sikatoy makapansungdo, tan panon itayon natulongan na alimbawa to pian makapansungdo?
13 Nen inmunan siglo K.P., si apostol Pablo so maabig ya alimbawa na andukey a panagtepel. (2 Corinto 6:3-10; 1 Timoteo 1:16) Diad pansamposampot lay bilay to sanen sisimbawaen to so malangwer nin kaiba to a si Timoteo, sikatoy pinasakbayan to ya amin a Kristiano et nidunget ed subsubok. Indalatdat nen Pablo so mismon alimbawa to tan inrekomenda to so manuna iran kalidad na Kristiano a nakaukolan pian makapansungdo. Oniay insulat to: “Sika tinumbok mon maong so bangabangat ko, say panagbilay ko, say getmak, say pananisiak, say abayag ya impantepel ko, say arok, say anos ko. Saray inkapasegsegang ko, saray irirap ko; saray bengatla ya apasabik diman ed Antioquia, ed Ikonio, ed Listra; no anto so saray impamasegsegang ya intepel ko; et dia ed sikara ya amin inlaban ak na Katawan. On, et amin so saray malabay a manbilay ed sinasanto ed Kristo Jesus, manako’ra naani pamasegsegang.” (2 Timoteo 3:10-12; Gawa 13:49-51; 14:19-22) Ta pian makapansungdo, amin tayo so mankaukolan na pananisia, aro, tan andukey a panagtepel.
Ikawes so Andukey a Panagtepel
14. Anto so angiyalilingan nen Pablo ed saray maridios a kalidad a singa say andukey a panagtepel, tan anto so insimbawa to ed saray Kristianon taga-Colosas?
14 Inyaliling nen apostol Pablo so andukey a panagtepel tan arum niran maridios a kalidad ed saray kawes a kaukolan ya isulong na Kristiano kayari ton nilakseb iray agagamil na “daan a personalidad.” (Colosas 3:5-10, NW) Insulat to: “Manpales kayo la sirin, a singa saray pinili Dios, sasanto tan inararo, sakey a puso a maabagey, maong a linawa, kauyamoan, kareenan, kasungdoan; mantetepelan so sakey tan sakey, tan manpeperdonaan so balang sakey, no say siopaman a too wala so pangidalman to ed siopaman; unong ed impamerdona na Katawan ed sikayo, ontan met so gawaen yo: tan lalo la ed saraya ya amin a bengatla ikawes yo so aro, a sikato so singer yo ed inkayadyari.”—Colosas 3:12-14.
15. Antoray resulta sano ‘ikawes’ na saray Kristiano so andukey a panagtepel tan arum niran maridios a kalidad?
15 Sano ‘ikawes’ na saray membro na kongregasyon so panangabagey, kaabigan, kaabebaan na nonot, kaumildian, andukey a panagtepel, tan aro, naresolbi da iray problema tan onabanti iran nankakasakey ed panaglingkor ed si Jehova. Nagkalautla, saray Kristianon manangasikaso so nakaukolan a magmaliw a manangitepel. Nayarin walaray panaon sano nakaukolan dan baaten so sananey a Kristiano, balet wala so nanduruman paraan diad panggawa ed saya. Deneskribe nen Pablo so sankaabigan ya awawey sanen sinulat to si Timoteo: “Mamaat ka, manimbawa ka, manbilin ka: a sitatayadno’n mabayag tan say panangibangat.” (2 Timoteo 4:2) On, say karnero nen Jehova so kaukolan a lawas tratoen tekep na andukey a panagtepel, dignidad, tan inkamatamoy.—Mateo 7:12; 11:28; Gawa 20:28, 29; Roma 12:10.
‘Andukey a Panagtepel ed Amin’
16. Anto so nayarin resulta sano sikatayo so “manangitepel ed amin”?
16 Say andukey a panagtepel nen Jehova ed katooan so mangipapasakbat ed sikatayo na moral ya obligasyon a “magmaliw a manangitepel ed amin.” (1 Tesalonica 5:14) Kabaliksan na saya so pagmaliw a maanos ed saray aliwan-Tasin kapamilyaan, kakaabay, katrabahoan, kaeskuelaan. Dakel a panangidumaduma so natatalonaan na saray Tastasi, a no maminsan mananos ira na dakel a taon lapud makapasakit iran salita odino sigpot ya isusumpa na totoo a napipilimogan da ed trabaho odino diad eskuelaan. (Colosas 4:5, 6) Oniay insulat nen apostol Pedro: “Masimpit komon so tongtongan yo ed utel na saray bugkalot, pian dia ed panalabutob da ed sikayo a singa managgawa na mauges nitandoro ra so Dios ed agew na idalaw to, lapu ed saray maong a ginawgawa yo a naimatonan da.”—1 Pedro 2:12.
17. Panon tayon aligen so panangaro tan andukey a panagtepel nen Jehova, tan akin ya ontan so kaukolan tayon gawaen?
17 Say andukey a panagtepel nen Jehova so mankabaliksan na kilalaban parad minilyon. (2 Pedro 3:9, 15) No aligen tayo so panangaro tan andukey a panagtepel nen Jehova, sikatayo so maanos a mantultuloy a mangipulong ed maong a balita na Panarian na Dios tan mangibangat ed arum a manpasakop ed uley na Panarian nen Kristo. (Mateo 28:18-20; Marcos 13:10) No ontunda itayon manpulong, singano tayo gegeteran so andukey a panagtepel nen Jehova tan agtayo bibidbiren so gagala na satan, salanti, pian niwanwan so totoo ed panagbabawi.—Roma 2:4.
18. Anto so pikakasi nen Pablo parad saray taga-Colosas?
18 Oniay insulat nen Pablo ed saray Kristiano ed Colosas, Asia Minor: “Lapu ed sayan sengegan sikami met, nanlapu ed agew ya impakadngel mi, andi tunda min mankerew tan manggawa na pikakasi a nipaakar ed sikayo, pian napano kayo komon na kakabatan na linawa to ed amin a karunongan a maespiritu tan pakatalos, mankurang kayo a makana ed Katawan ya onarap ed amin a makapaliket, mamabunga ed ganaganan maabig a gawa, tan ombaleg ed kakabatan na Dios; apabiskeg na amin a pakayari, unong ed biskeg na gloria to, nipaakar ed amin ya anos tan andukey a panagtepel a tinekepan na gayaga.”—Colosas 1:9-11.
19, 20. (a) Panon tayon napaliisan so panmoria a say abayaglan pangitetepel nen Jehova et sakey a subok ed sikatayo? (b) Antoray nagunggona ed pagmaliw tayon manangitepel?
19 Say tuloytuloy a pangitetepel, odino panaanos, nen Jehova so aliwan subok ed sikatayo sano ‘napno itayo na suston pikakabat ed linawa to,’ a diad satan et “amin a totoo [so] nilaban ira komon, tan ondago ra ed pakapikabat ed katuaan.” (1 Timoteo 2:4) Sikatayo so “mamabunga ed ganaganan maabig a gawa,” nagkalautla ed panangipulong ed “ebanghelyo na panarian.” (Mateo 24:14) No sikatayo so matoor tan mantultuloy a manggawa ed saya, sikatayo so ‘pabiskegen nen Jehova ed amin a pakayari,’ pian natulongan itayo “nipaakar ed amin ya anos tan andukey a panagtepel a tinekepan na gayaga.” No ontan so gawaen tayo, ‘mankurang itayo a makana ed Katawan,’ tan nawalaan itayo na kareenan lapud amta tayo a sikatayo so ‘makapaliket ed sikato.’
20 Kombinsido itayo komon a maong nipaakar ed kakabatan na andukey a panagtepel nen Jehova. Satan so ontulong ed kilalaban tayo tan ed kilalaban na saramay ontalineng ed panagpulong tan panagbangat tayo. (1 Timoteo 4:16) Say pamayubo ed bunga na espiritu—aro, kaabigan, kamaongan, kaumildian, tan dangka— so ontulong ed sikatayo pian magmaliw a magayagan manangitepel. Magmaong so pakapambilay tayo a mareen kaiba iray kapamilyaan tayo ontan met ed saray agagi tayo diad loob na kongregasyon. Say andukey a panagtepel so ontulong met ed sikatayo a magmaliw a maanos ed saray katrabahoan odino kaeskuelaan tayo. Tan say andukey a panagtepel tayo so walaan na gagala, salanti say pangiliktar ed saray managgaway-mauges tan panangigloria ed Dios a walaay andukey a panangitepel, si Jehova.
[Paimano ed leksab]
^ par. 10 Diad impankomento to ed balikas nen Pablo a say “aro manangitepel tan mauyamo,” oniay insulat na iskolar na Biblia a si Gordon D. Fee: “Diad teolohiya nen Pablo saratan [andukey a panagtepel tan kamaongan] so mangirepresenta ed duaran dapag na awawey na Dios ed katooan (cf. Rom 2:4). Diad biek a dapag, say maaron impananos na Dios so nipatnag diad impamokpok to ed sanok to diad impanrebeldi na too; diad biek a dapag, say kaabigan to so nanengneng ed nilibon pakapatnagan na panangasi to. Kanian say deskripsion nen Pablo ed aro so ginmapo ed sayan nankaduan panangideskribe ed Dios, a diad panamegley nen Kristo et impatnag to so panagtepel tan kaabigan ed saramay makanepegan la komon na panangukom To.”
Kasin Nipaliwawa Yo?
• Diad antoran dalan a si Kristo so alay abig ya ehemplo na andukey a panagtepel?
• Anto so ontulong ed sikatayo pian nabayuboan so andukey a panagtepel?
• Panon a makatulong so andukey a panagtepel diad loob na saray pamilya, diad limog na saray Kristiano, tan ed mamatatken?
• Panon a say pagmaliw tayon manangitepel et pakagunggonaan tayo tan say arum?
[Tepetepet Parad Panagaral]
[Litrato ed pahina 15]
Anggaman adetdetan a maong, si Jesus so maanos ed saray babangatan to
[Litrato ed pahina 16]
Saray Kristianon manangasikaso so napaseseg a mangipatnag na maong ya ehemplo diad pagmaliw a manangitepel no pidedenengan da iray agagi ra
[Litrato ed pahina 17]
No aligen tayo so panangaro tan andukey a panagtepel nen Jehova, mantultuloy tayon ipulong so maong a balita
[Litrato ed pahina 18]
Impikasi nen Pablo a saray Kristiano so ‘magmaliw a manangitepel tekep na gayaga’