Nakaukolan Mo so Nipasal a Konsiensia

Sakey a makatantandan agew so manatalaran ed saray pasahero tan tripulante ya akalugan ed Air New Zealand Flight 901 a paonla’d Antarktika. Akaparaan laray kamera, tan pirmi so panliket legan a manasingger la so DC-10 ed amputin kontinente a marakerakep so banbantagen da lapud abeban tekkiab na eroplano.

SAY kapitan, a 15-taon lan piloto, so akapangusar la na masulok a 11,000 oras ed panagpatekkiab na eroplano. Sakbay ya ontekkiab, maal-alwar ton inloob ed computer na eroplano to so plano ed pamatekkiab, ya agto amtan say direksion na rota a niiter ed sikato et aliwa. Legan a walad tagey ya ontetekkiab ed kalureman diad kulang a 600 metron katagey, say DC-10 so binmasig ed palusor iran pukdol na Mount Erebus, tan atigway ya amin so 257 ya akalugan.

No panon a saray eroplano natan et ondedependi ed saray computer pian igiya iratan diad katawenan, say totoo met so naikdan na konsiensia pian mangigiya ed sikara diad basbas da ya ompugta ed bilay. Tan no nipaakar ed konsiensia tayo, say makapasinagem a trahedya ed Flight 901 so pakaaralan tayo na pigaran mabiskeg a leksion. Singa bilang, no panon a say seguridad ed pamatekkiab so mandedependi ed dugan iyaandar na sistema parad nabigasyon tan ed saray pihon pangibabasian, ontan met a say espiritual, moral, tan anggan say pisikal a pankaabigan tayo so mandedependi ed alerton konsiensia ya igigiya na saray dugan pangibabasian ed moral.

Makapaermen ta diad mundo natan et maples a naaandi odino nibabaliwala iratan a pangibabasian. Sakey ya Amerikanan edukador so nankuan: “Mabetbet a narerengelan tayo natan so nipaakar ed sakey a kabkaabigay-impanutek ya estudyante diad Estados Unidos no panon a sikatoy agmakabasa, agmakasulat, tan agto amtan anapen so Pransya diad mapa. Tua met ya agnibiig na sayan estudyante so duga manlapud aliwa. Nilikud ed kakapuyan ed panagbasa tan panagsulat tan ed panagkuenta, say pirmin kawewetwet ed moral so nepeg tayon iyarum ed listaan na saray problema nipaakar ed edukasyon.” Inkuan to ni a “saray kalangweran natan so manbibilay ed makilot ya estandarte. No tepetan mo so sakey ed sikara no wala kasi iray nikaduman estandarte parad ‘duga tan aliwa’ et biglan sikatoy nawetwet, agmakasel, nanerbiyos, tan napagaan. . . . Sayan inkawetwet so onloloor imbes ya onaligwas komon bektaman a mankolehyo lara.”

Say sakey a sengegan na sayan kawewetwet et say moral relativism, say kasmak a panmoria a manduruma iray estandarte unong ed personal iran panlabayan odino unong ed kultura. Isipen pa no anto kasi nagawa no mamatekkiab iray piloto, ya aliwan diad panamegley na espesipikon pangibabasian, noagta diad panamegley na silew a pansenyas ya alis-alis tan no maminsan et nakatsep ya amin! Seguradon desyang so pansumpalan a singa say agawa ed Mount Erebus. Mipadpara, lapud agla tutumboken iray espesipikon estandarte ed moral, say mundo so manaani na makapasinagem tan dakerakel a kaermenan tan ipapatey legan a saray pamilya so bubuyaken na ag-inkamatoor na asawa tan minilyon so manasagmak na AIDS odino arum nin makaalis a sakit ed sekso.

Singano inkamakabat ed mundo so moral relativism, balet diad tua saramay manutumbok ed satan et singara saray taga-Ninive nensaman ya agda amta so ‘kawanan tan kawigi a lima ra.’ Saramay mangaagamil na moral relativism so mipadpara ed saray apostatan Israelita ya ibabaga ran say ‘mauges so maong tan maong so mauges.’​—Jonas 4:11; Isaias 5:20.

Kanian iner so pakaromogan tayo na malinew, tan aliwan makilot iran ganggan tan prinsipyo a pangipasalan tayoy konsiensia tayo bilang maong a giya? Naroromogan na minilyon a say Biblia  so nagnap a mamepenek ed satan a pankaukolan. Manlapud moralidad angga ed maong ya ugali ed panagkimey tan manlapud pangipasal ed ugugaw angga ed pandayew ed Dios, lugan na Biblia so amin ya importante. (2 Timoteo 3:16) Apaneknekan lan sigpot a napanmatalekan itan diad loob la na dakel a siglo. Lapud saray estandarte na Biblia ed moral so inletneg na sankatageyan ya autoridad, say Manamalsa tayo, makanakana iratan parad amin a totoo. Kanian, agtayo manbibilay ya andian na pikakabat ed no anto so maong tan mauges.

Balet, aliwan singa nensaman, say konsiensiam so mas lalo la natan a naaataki. Panon itan a posibli? Tan panon mon nasalimbengan so konsiensiam? Say makabat a kundang a gawaen et say pangamta no siopa so mangaataki tan saray taktika to. Saya so nasingbat ed ontumbok ya artikulo.