Saray Managderal ed Kakiewan

DIAD panaon na Biblia, saray kiew so papablien a tuloy. Alimbawa, sanen analiw si Abraham na dalin a pangiponponan ed say inararo ton asawa a si Sara, saray kiew so impisakop ed paknaan parad pangiyalis na pankayarian.​—Genesis 23:15-18.

Ontan met natan, saray kiew so papablien a tuloy, tan iimanoen a maong na nanduruman bansa so nipaakar ed kipreserba na katakelan. Onia so inkuan na libron State of the World 1998: “Anggaman dakel a totoo ed saray bansa ed amianen so mangiyaagel ed tropikon katakelan, nayarin agda namamamtaan a diad amin a klase na takel et saray takel ed mismon bansa ra a nipasen ed ambetel a klima so walad nanduruman lugar tan magmainomay a naderal.” Anto so manesesga ed maabig a kipapasen na saray takel ed saraman ya amianen a bansa diad Europa tan Amianen Amerika? Itetetel na dakel a totoo so panagpopo ed kakiewan, balet wala niray arum ya elemento a pirmin manederal ed kakiewan, a nasasansakey, a singa panangibaga. Anto iratan? Polusyon ed dagem tan asidon uran. Sarayan polusyon so kalkalnan mamapalupok ed kakiewan, a mainomay iratan a napeste tan nasakitan.

Dekadekada lan mamapasakbay iray environmentalist tan arum nin mapagan mibabaley nipaakar ed pankaukolan a protektaan so ecosystem na dalin. Diad saray dekada na 1980, kayarin inaral na saray sientista ed Alemanya iray epekto na say polusyon ed dagem tan asidon uran diad kaliberliber, sikaray nankuan: ‘No anggapo so nagawaan, nipaakar ed taon 2000, magmaliw a makapasagyat labat la ed totoo so pakanengneng ed saray takel diad saray daan a retrato tan diad saray pelikula.’ Makapaliket ta mabiskeg a tuloy so pakayari na dalin a mamatubo ya anggan panon et nasusungdoan na takel so dakel ed nipasakbay lan makaderal.

Balet, diad kaunoran, say Dios so manunan mangipreserba ed ecosystem tayo. “Sikato salogen to so pukpukdol a manlapu ed saray silisilir to” tan “patuboen to so dika ya onkana ed saray ayayep, tan say tanaman ya onkana a paninawaan na too.” Tan insipan to a “bagbagen iraman so mamabagbag ed dalin.” (Salmo 104:13, 14; Apocalipsis 11:18) Agaylan makapalikliket itan sano saray manaayam ed dalin so makapanggayaga ed mundon andian lay polusyon diad ando lan ando!​—Salmo 37:9-11.