Propesiya nen Isaias​—Liwawa Parad Amin a Katooan I

Katuloyan na Kapitulo Dies

Say Insipan a Prinsipe na Kareenan

Say ‘Baleg a Liwawa’

17. Panon a sinminag so ‘baleg a liwawa’ diad Galilea?

¹⁷ Balet, anto so sinalambit nen Mateo a “baleg a liwawa” diad Galilea? Saya met so inaon manlapud propesiya nen Isaias. Oniay insulat nen Isaias: “Saray kabalbaleyan a nanakar ed kabilungetan anengneng da so baleg a silew [“liwawa,” NW]: saray nanayam ed dalin na anino na patey, dia ed sikara sinminag so silew.” (Isaias 9:2) Kasabi inmunan siglo K.P., niyamot so liwawa na katuaan lapud saray paganon katilaan. Pinaloor na saray Judion papangulo na relihyon so problema diad impansiansia ra ed relihyoson tradisyon da, diad ontan et “ginawa [ra] ya andi-kakanaan so salita na Dios.” (Mateo 15:6) Saray mauyamo so alames tan awetwet, ya ontutumbok ed saray “bulag a manangibasbas.” (Mateo 23:2-4, 16) Sanen pinmatnag si Jesus a Mesias, alukasay kamataan na saray mauyamon totoo ed makapakelkelaw a paraan. (Juan 1:9, 12) Say kimey nen Jesus legan a wadiad dalin tan saray bendisyon lapud impansakripisyo to so matukotukoy ya adeskribe ed propesiya nen Isaias bilang ‘baleg a liwawa.’​—Juan 8:12.

18, 19. Anto so rason na saramay kinmiwas ed liwawa pian manggayaga a tuloy?

¹⁸ Saramay kinmiwas unong ed liwawa so walaan na dakel a rason pian manggayaga. Intuloy nen Isaias: “Pinarakel mo so nasyon, pinabaleg mo so liket da: manliket ira ed arap mo unong na liket ed panagani, singa saray totoo manliket ira sano apagen da so samsam.” (Isaias 9:3) Bilang resulta na impanpulong nen Jesus tan saray patumbok to, pinmatnag iray matuan-impanpuso, ya impanengneng dan kaliktan day mandayew ed si Jehova ed espiritu tan katuaan. (Juan 4:24) Diad kulang ya apat taon, dakerakel so anayakup ed Inkakristiano. Talonlibo so abautismoan ed agew na Pentecostes 33 K.P. Ag-abayag kayari na satan, “say bilang na lalaki sinmapot a limanlibo.” (Gawa 2:41; 4:4) Legan a maseseg ya isisindag na saray babangatan so liwawa, “say bilang na saray binangatan [so] dinmakerakel a tuloy ed Jerusalem; et baleg ya ulop na saray saserdotes so tinmulok ed pananisia.”​—Gawa 6:7.

¹⁹ Singa saramay manggayaga ed daakan ya ani odino manliket diad pangapag ed makanan samsam kayari na baleg ya impanalo ed militar, nanggayagaan na papatumbok nen Jesus so indaak. (Gawa 2:46, 47) Asabi panaon, insindag nen Jehova so liwawa to ed limog na saray nasyon. (Gawa 14:27) Kanian nanggayaga iray amin a rasa na totoo ta nilukas ed sikara so dalan pian makaasingger ed si Jehova.​—Gawa 13:48.

“A Singa dia ed Agew nen Midian”

20. (a) Diad antoran dalan a pinaneknekan na saray Midianita a sikaray kakabusol na Israel, tan panon ya impangangga nen Jehova so panamagyaw da? (b) Panon a diad arapen ya “agew nen Midian” et panganggaen nen Jesus so panamagyaw na kakabusol na totoo na Dios?

²⁰ Saray epekto na kimey na Mesias so permanente, a singa naimano tayo ed onggendan iran salita nen Isaias: “Say pako na awit to, tan say panaklay na abala to, say tayukor na manangapos to, binuyak mo a singa dia ed agew nen Midian.” (Isaias 9:4) Pigaran siglo antis na panaon nen Isaias, akinonong iray Midianita ed saray Moabita pian sagyaten a mankasalanan so Israel. (Numeros 25:1-9, 14-18; 31:15, 16) Diad saginonor, pinagyaw na saray Midianita iray Israelita diad inlusob tan impanamsam da ed saray lugar tan uma ra ed loob na pitoy taon. (Uko-ukom 6:1-6) Bangbalet, apatakyas nen Jehova iray armada na Midian panamegley na lingkor ton si Gideon. Kayari na satan ya “agew nen Midian,” anggapoy paneknek a nanirap lamet so totoo nen Jehova panamegley na saray Midianita. (Uko-ukom 6:7-16; 8:28) Diad asingger lan arapen, si Jesu-Kristo, say babaleg a Gideon, so maneral ed modernon-agew a kakabusol na totoo nen Jehova. (Apocalipsis 17:14; 19:11-21) Insan, “singa dia ed agew nen Midian,” nadampot so sigpot tan magnayon a pambiktorya, aliwan diad panamegley na biskeg na too, noag diad pakayari nen Jehova. (Uko-ukom 7:2-22) Aglan balot lamet manirap so totoo na Dios diad silong na pako na pananesdes!

21. Anto so ipapatnag na propesiya nen Isaias no nipaakar ed arapen na pambabakal?

²¹ Saray panangiparungtal na Dios ed pakapanyari to et aliwan panangitandoro ed bakal. Say pinaolin Jesus so Prinsipe na Kareenan, tan diad paneral to ed kakabusol to, itarok to so andi-anggaan a kareenan. Natan et sasalambiten nen Isaias iray kagawaan parad militar a sigpot a naderal ed apoy: “Amin ya ayura na inayuraan a too dia ed gulo [“saray yameg,” NW] tan saray kawes a nitolin dia ed dala, nipaakar ya itungo ed apoy.” (Isaias 9:5) Aglan balot nalikas iray yameg na panmamartsa  na saray sundalo. Saray madalan uniporme na agnakokosiensia iran sundalo ed bakalan so agla nanengneng. Naandi la so bakal!​—Salmo 46:9.

‘Makapakelaw a Mananimbawa’

22. Anton nanduruman mapropetikon ngaran so intawag ed si Jesus diad libro na Isaias?

²² Diad panaon na mamilagron inkianak to, say sakey a nianak pian magmaliw a Mesias so angawat na ngaran a Jesus, a kabaliksan toy “Si Jehova so Kilalaban.” Balet wala niray arum a ngaran to, mapropetiko iran ngaran a mangidadatak ed makanan betang tan ed nipaatagey a posisyon to. Sakey ed saratan a ngaran et say Emmanuel, a kabaliksan toy “Wala ed Sikatayo so Dios.” (Isaias 7:14, NW, paimano’d leksab) Deneskribe natan nen Isaias so sananey nin mapropetikon ngaran: “Dia ed sikatayo nianak so sakey ya ugaw, dia ed sikatayo sakey ya ugaw a laki so niiter; et say uley wala naani ed tapew na abala to; et say ngaran to natawag naani a Makapakelaw, Mananimbawa, Makapanyari a Dios, Andi-anggaan ya Ama, Prinsipe na Kareenan.” (Isaias 9:6) Konsideraen pa iyan nanduruman mapropetikon ngaran a napnoy kabaliksan.

23, 24. (a) Diad anton dalan a si Jesus so ‘Makapakelaw a Mananimbawa’? (b) Panon a naalig na saray Kristianon mananimbawa natan so ehemplo nen Jesus?

²³ Say mananimbawa et sakey a mangiiter na simbawa, odino bilin. Sanen wadiad dalin, si Jesu-Kristo so angitarya na makapakelaw a simbawa. Nabasa tayo diad Biblia a “dakel a katooan so nankelkelaw ed panagbanga’to.” (Mateo 7:28) Sikato so makabat tan mililikna a Mananimbawa, a walaan na ekstraordinaryon pakatalos ed inkapalsa na too. Agnigetar so pananimbawa to ed pirmin panamaat odino panagkastigo. Maslak ed satan et diad porman mangibabangat tan maaron panamilin. Say simbawa nen Jesus so alay abig lapud satan so lawas makabat, naspot, tan andiay lingo. Sano unoren, satan so mangitonton ed andi-anggaan a bilay.​—Juan 6:68.

²⁴ Say simbawa nen Jesus so aliwan basta resulta na inkautek to. Imbes, inkuanto: “Say bangat ko agko kien, balet kien na angibaki ed siak.” (Juan 7:16) Singa ed kipapasen nen Solomon, si Jehova a Dios so Lapuan na kakabatan nen Jesus. (1 Arari 3:7-14; Mateo 12:42) Say ehemplo nen Jesus so nepeg a manenyeg ed saray managbangat tan mananimbawa diad loob na Kristianon kongregasyon a lawas ibase iray simbawa ra ed Salita na Dios.​—Uliran 21:30.

“Makapanyari a Dios” tan “Andi-anggaan ya Ama”

25. Anto so ipapasabi ed sikatayo na ngaran a “Makapanyari a Dios” nipaakar ed mangatatawen a Jesus?

²⁵ Si Jesus met so “Makapanyari a Dios” tan “Andi-anggaan ya Ama.” Agkabaliksan na saya a sasamsamen to so autoridad tan posisyon nen Jehova, a “Dios ya Ama tayo.” (2 Corinto 1:2) “Sikato [si Jesus] . . . agto inisip so manamsam, salanti, pian sikatoy magmaliw a kapara na Dios.” (Filipos 2:6, NW) Sikatoy tinawag a Makapanyari a Dios, aliwan Makapanyarin-amin a Dios. Agbalot inisip nen Jesus a sikato so Dios a Makapanyarin-amin, lapud tinukoy to so Ama to a “saksakey a tuan Dios,” salanti, say alenleneg a Dios a kaukolan a dayewen. (Juan 17:3; Apocalipsis 4:11) Diad Kasulatan, say salitan “dios” so mankabaliksan na “makapanyari a sakey” odino “mabiskeg a sakey.” (Exodo 12:12; Salmo 8:5; 2 Corinto 4:4) Antis a linma diad dalin si Jesus, sikato so “sakey a dios,” a “wala ed ereng na Dios.” Kayari na inkioli to, sikatoy pinmawil ed mas atagtagey nin posisyon diad katawenan. (Juan 1:1, NW; Filipos 2:6-11) Niarum ni, say titulo a “dios” et mangipapasabi a wala niray kaaruman a kabaliksan. Saray ukom ed Israel so atawag bilang “dirios”​—ya aminsan et tinukoy nen Jesus a mismo. (Salmo 82:6; Juan 10:35) Tinuro nen Jehova si Jesus bilang Ukom, a “mangukom naani ed saray mabilay tan inatey.” (2 Timoteo 4:1; Juan 5:30) Malinew, sikato so matukoy a tinawag a Makapanyari a Dios.

26. Akin a natawag si Jesus ya “Andi-anggaan ya Ama”?

²⁶ Say titulon “Andi-anggaan ya Ama” so ontutukoy ed pakayari tan autoridad na Mesianikon Ari a mangiter ed totoo na ilalon andi-anggaan a bilay diad dalin. (Juan 11:25, 26) Say impatawir na inmunan ateng tayon si Adan et say patey. Si Jesus, say unor ya Adan, so “nagmaliw a sakey ya espiritu a manamilay.” (1 Corinto 15:22, 45; Roma 5:12, 18) No panon a si Jesus, say Andi-anggaan ya ama, so manbilay ya ando lan ando, ontan met a panggayagaan na matulok a katooan iray gunggona ed magnayon ya inkaama to.​—Roma 6:9.

“Prinsipe na Kareenan”

27, 28. Antoran alay abig a gunggona so nagawa natan tan diad arapen ed saray uuleyan na “Prinsipe na Kareenan”?

²⁷ Nilikud ed andi-anggaan a bilay, kaukolan met na too so kareenan, ed Dios tan ed kaparan too. Anggan natan, saramay manpapasakop ed uley na “Prinsipe na Kareenan” so ‘amitpit ed saray kampilan da a pinagmaliw da a dingding na lukoy, tan saray gayang da a komkompay.’ (Isaias 2:2-4) Agda eem-eman so gula lapud panduruma ed politika, teritorya, rasa, tan ekonomya. Nankakasakey ira ed panagdayew ed sakey a tuan Dios, si Jehova, tan panggugunaetan dan pansiansiaen so mareen a siglaotan ed kapara ran totoo, diad loob tan paway na kongregasyon.​—Galacia 6:10; Efeso 4:2, 3; 2 Timoteo 2:24.

²⁸ Diad manepeg a panaon na Dios, iletneg nen Kristo diad dalin so englobon kareenan, a malet a niletneg tan permanente. (Gawa 1:7) “Ed baleg na pananguley to tan kareenan anggapo naani anggaan, ed trono nen  David, tan ed panarian to, a sikato so iletneg to, tan sikato so ipaalagey to a tekep na inkatunong tan kaptekan a manlapu natan angga ed ando lan ando.” (Isaias 9:7a) Diad pangagamil ed autoridad to bilang Prinsipe na Kareenan, si Jesus so agmagmaliw a maruksa. Agto ekalan iray uuleyan to na kawayangan a mandesisyon tan agto ra puersaen ya uleyan. Imbes, amin a gawaen to et ‘diad panamegley na inkatunong tan kaptekan.’ Agaylan makarepreskon pananguman!

29. Anto so nepeg tayon gawaen no labay tayon panggayagaan so bendisyon na andi-anggaan a kareenan?

²⁹ No moriaen iray alay abig a kabaliksan na mapropetikon ngaran nen Jesus, say konklusyon nen Isaias ed sayan parte so peteg a makapalikliket. Oniay insulat to: “Say paga [“seseg,” NW] nen Jehova na saray ehersito so manumpal ed saya.” (Isaias 9:7b) On, si Jehova so onkiwas tekep na seseg. Anggapoy gagawaen to diad paspasaray a paraan. Makaseguro itayo ya antokaman so isipan to et sigpot ton tooren. Siopaman sirin, a kaliktan toy manggayaga ed andi-anggaan a kareenan, kaukolan a sikatoy manlingkor ed si Jehova tekep na interon puso. Singa si Jehova a Dios tan si Jesus, say Prinsipe na Kareenan, amin komon a lingkor na Dios so “maseseg ed maabig iran gawa.”​—Tito 2:14, NW.

[Tepetepet Parad Panagaral]