Tepetepet Manlapud Saray Managbasa

Kasin diad Ur odino diad Haran so akisipanan nen Jehova ed si Abraham?

Say sankaunaan a salaysay na impisipanan nen Jehova ed si Abraham so nabasa diad Genesis 12:1-3 unong ed New World Translation, a mangibabagan: “Inkuan nen Jehova ed si Abram: ‘Taynan ka dia ed dalin mo tan ed kakanayon mo tan ed abung nen amam ya onla ka ed dalin ya iturok ed sika; tan dia ed sika so panggawaan ko na sakey a baleg a nasyon . . . Tan napapalar so amin a pamilya diad dalin ed panamegley mo.’” * Nayarin ginawa nen Jehova iyan impisipanan ed si Abraham legan a walad Ur tan pinekderan To lamet itan sanen wala la’d Haran si Abraham.

Nen inmunan siglo, tinukoy nen Esteban so ganggan nen Jehova a si Abraham so nepeg ya onla ed Canaan. Diad arap na Sanhedrin, et oniay inkuanto: “Say Dios na gloria pinmatnag ed inmunan ateng tayo a si Abraham, legan a wala’d Mesopotamia, antis a nanayam ed Haran, tan inkuan to ed sikato, ‘Taynan ka dia ed dalin mo tan ed kakanayon mo tan ed abung nen amam ya onla ka ed dalin ya iturok ed sika.’” (Gawa 7:2, 3, NW) Si Abraham so datin taga-Ur, tan unong ya impabitar nen Esteban, ditan to inmunan nadngel so ganggan ya onla ed Canaan. (Genesis 15:7; Nehemias 9:7) Agsinalambit nen Esteban so sipanan na Dios ed si Abraham, balet diad Genesis 12:1-3, satan a sipanan so nisiglaot ed say ganggan ya onla ed Canaan. Kanian makatunongan a panisiaan a diad Ur so akisipanan nen Jehova ed si Abraham.

Balet, no basaen tayon maong so salaysay na Genesis et isusuheri na satan ya inulit ya imbaga nen Jehova so sipanan to’d si Abraham diad Haran, no panon ya inulit tan impalinew to iray aspekto na satan diad aminpigan inkagawa diad Canaan. (Genesis 15:5; 17:1-5; 18:18; 22:16-18) Unong ed Genesis 11:31, 32, say ama nen Abraham, a si Tare, so anaynan ed Ur pian onla ed Canaan, a kaiba to si Abraham, Sara, tan Lot. Akasabi ira ed Haran tan nanayam ira diman anggad impatey nen Tare. Say impanayam nen Abraham ed Haran so mabayag lan tuloy pian makala na dakel a kayamanan. (Genesis 12:5) Tan sinmabi panaon, a si Nacor, ya agi nen Abraham, so linma met diman.

Kayarin nikurit so impatey nen Tare, insalaysay na Biblia iray salita nen Jehova ed si Abraham tan oniay intuloy ya inkuan na satan: “Kanian si Abram sinmipot unong na imbaga nen Jehova ed sikato.” (Genesis 12:4) Kanian, say Genesis 11:31–12:4 so mangiiter na malinew ya ideya a saray salitan nikurit ed Genesis 12:1-3 et imbalikas nen Jehova kayari na impatey nen Tare. No ontan sirin, sinmipot si Abraham ed Haran tan linma ed dalin ya angituroan nen Jehova bilang pangunor ed ganggan a kadkangel to, ontan met ed samay inmuna lan nadngel to diad Ur pigaran taon ed asasakbay.

Unong ed Genesis 12:1, ingganggan nen Jehova si Abraham: “Taynan ka dia ed dalin mo tan ed kakanayon mo tan ed abung nen amam.” Diad Ur so “dalin” nen Abraham ed saman, tan wadman so “abung” nen ama to. Balet, inyalis na ama nen Abraham so sankaabungan to diad Haran, tan tinawag nen Abraham itan a lugar a dalin to. Kayari na dakel iran taon ed Canaan, sanen imbaki toy mayurdomo to diad ‘dalin tan kakanayon to’ pian mananap na asawaen nen Isaac, say mayurdomo so linma ed “syudad na Nacor” (balanglan diad Haran odino ed kabangibang na satan). (Genesis 24:4, 10) Aromog diman na mayurdomo si Rebeca ed limog na kakanayon nen Abraham, say baleg a boleg nen Nacor.​—Genesis 22:20-24; 24:15, 24, 29; 27:42, 43.

Diad pampapaliwawa nen Esteban ed arap na Sanhedrin, oniay inkuanto: “Sanen inatey so ama to, sikato so inyalis na Dios ed sayan dalin a dia so panaayaman tayo natan.” (Gawa 7:4, NW) Saya so pakapatnagan ya akisalita si Jehova ed si Abraham diad Haran. Makatunongan labat a panisiaan a diad satan ya inkagawa et inulit lamet ya imbaga nen Jehova so sipanan to ed si Abraham a singa nisalaysay ed Genesis 12:1-3, lapud inmepekto so sipanan sanen wala la’d Canaan si Abraham. Sirin, say pangusisa tayo ed amin a katuaan so mansumpal ed konklusyon a si Jehova so malinew ya akisipanan ed si Abraham diad Ur tan pinekderan to lamet itan diad Haran.

[Paimano ed leksab]