Mangisasalba si Jesus​—Panon?

“Mangisasalba si Jesus!” “Si Jesus so Manangilaban tayo!” Diad dakel iran bansa ed interon mundo, saratan a mensahe so nabasa ed saray padir na bilding tan arum niran publikon lugar. Masimoon a panisiaan na minilyon a totoo a si Jesus so Manangilaban da. No sikaray tepetan mo, “Panon itayon isasalba nen Jesus?” nayarin onia so iyebat da, “Inatey si Jesus nisengeg ed sikatayo” odino, “Inatey si Jesus nisengeg ed saray kasalanan tayo.” On, say impatey nen Jesus so nanggawan posibli a sikatayoy nilaban. Balet panon a say impatey na sakey a too et nabayaran toy kasalanan na amayamay? No sikay tepetan na, “Panon a makapangisalba ed sikatayo so impatey nen Jesus?” anto so iyebat mo?

SAY ebat na Biblia ed sayan tepet et simple labat balet malinew tan napno na kabaliksan. Ingen, pian natebek so kaimportantian na satan, nakaukolan ya unonan talosan tayo so bilay tan impatey nen Jesus bilang solusyon ed mairap a tuloy a problema. Diad satan labat a paraan a natalosan tayon susto so kablian a tuloy na impatey nen Jesus.

Diad impangiter to ed bilay nen Jesus, say Dios so midedeneng ed sakey a kipapasen a linmesa sanen nankasalanan si Adan. Agaylan makapasinagem itan a kasalanan! Ayadyari so sankaunaan a laki tan say asawa to, si Eva. Say ayaman da et diad marakerakep a hardin na Eden. Inikdan ira na Dios na makabaliksan a kimey ya asikasoen  da so hardin ya ayaman da. Nepeg dan uleyan ed maaron paraan so arum niran mabilay a pinalsa diad dalin. Tan legan a paparakelen tan papanoen na totoo so dalin na minilyon ya ananak da, nepeg dan inatnat so paraiso anggad kasampotan na dalin. (Genesis 1:28) Agaylan makapagayaga tan makapaliket a kimey so niiter ed sikara! Sakey ni et walaan ira na maaron panuulopan. (Genesis 2:18) Anggapo lay kulang da. Wala ed arapan da so maliket tan magnayon a bilay.

Agbalot naisip no panon a si Adan odino si Eva et makapankasalanan. Balet say inmunan paris na too so nanrebeldi ed samay mismon amalsa ed sikara​—si Jehova a Dios. Diad impangusar ed sakey ya uleg et pinalikdo na espiritun pinalsa a si Satanas a Diablo si Eva pian ontunganga ed si Jehova, tan tinmumbok ed sikato si Adan.​—Genesis 3:1-6.

Agnasuppiat no anto so gawaen na Manamalsa ed si Adan tan si Eva. Impasakbay to la so pansumpalan na itutunganga, a kuan ton: “Nayarian mo so mangan na labay mo ed amin a kiew na tanamanan. Ingen ta say kiew na pakaamtaan mo na maong tan mauges, agmo nepeg a panganan: ta dia ed agew a pangan mo ed satan ompatey ka.” (Genesis 2:16, 17) Say tepet a nagkalalon importante natan et mankakaukolay ebat.

Aarapen na Katooan so Mairap a Problema

Say inmunan kasalanan so amalesa na seryoson tuloy a problema parad katooan. Ginmapon nambilay si Adan bilang sakey ya ayadyarin too. Sirin, napanggayagaan komon na ilalak to so ayadyarin bilay ya andi-anggaan. Balet, nankasalan si Adan sakbay a nanilalak. Say interon rasa na katooan so wala ni ed banel to sanen naawat to so dusan: “Dia ed linget na lupam so panganan mo na tagano ya angga ed ipawil mo ed dalin; ta sikato so angalaan ed sika: lapu’d sika et dabok ka, dia ed dabok ompawil ka.” (Genesis 3:19) Kanian sanen nankasalanan si Adan tan inatey unong ya imbaga na Dios a pansumpalan to, amin a katooan so apilanor ed sikato ya asentensyaan ed patey.

Matukotukoy ya insulat nen apostol Pablo diad kaunoran: “Say kasalanan linmoob ed mundo lapu ed sakey a too [si Adan], tan say patey lapu ed kasalanan; et say patey ed satan linma ed amin a too, ta amin nankasalanan.” (Roma 5:12) On, lapud orihinal a kasalanan, saray ilalak a nianak komon ya ayadyari a walad arapan da so bilay ya andi-angga et nianak tekep na ilalon mansakit, ontakken, tan ompatey.

“Agmakatunongan itan,” so nayarin ikuan na sakey. “Agmi pinili so ontunganga ed Dios​—si Adan so tinmunganga. Akin et kaukolan a naandian kami na ilalon manbilay tan manliket ya andi-anggaan?” Amta tayo a no ipriso na korte na ley so anak lapud impantakew na ama to na kotsi, say anak so makanepegan a mangireklamon: “Agmakatunongan itan! Anggapo so kasalanan ko.”​—Deuteronomio 24:16.

Diad impanangguyor nen Satanas a mankasalanan so inmunan laki tan bii, nayarin isisipen ton anggapo lay nagawaan na Dios. Inmataki so Diablo diad kagapon tuloy na awaray rasa na too​—sakbay a nianak so siopaman. Diad bektan impankasalanan nen Adan, say importantin tepet et, Anto so gawaen nen Jehova ed saray magmaliw ya ilalak nen Adan tan si Eva?

Ginawa nen Jehova no anto so maptek tan makatunongan. Onia so inyabawag na matunong a lakin si Elihu: “Arawi ed Dios, a sikato manggawa na karelmengan, tan ed Makapanyarin-amin a manggawa na inkauges!” (Job 34:10) Tan nipaakar ed si Jehova, nansulat si propeta Moises: “Say Dampay, ayadyari so gawa to: sakey a Dios a napanmatalkan tan anggapo so kaugsan, sikato so matunong tan maptek.” (Deuteronomio 32:4) Say solusyon ya intarya na tuan Dios ed probleman pinawala na kasalanan nen Adan so agmamaandi ed pankanawnawa tayon manbilay ya andi-anggaan diad paraison dalin.

 Itatarya na Dios so Nagnap a Solusyon

Imanoen pa so solusyon ya intalaga na Dios diad impanentensya to ed si Satanas a Diablo. Inkuan nen Jehova ed si Satanas: “Mangiyan ak na gulaan ed sika tan say bii [mangatatawen ya organisasyon na Dios], tan gulaan ed saray ilalak mo [say mundon walad panangontrol nen Satanas] tan ilalak to [Jesu-Kristo]; sikato sugaten to so ulom [Satanas], et sika sugaten mo so mukor to [impatey nen Jesus].” (Genesis 3:15) Diad sayan primeron propesiya na Biblia, tinukoy nen Jehova so gagala to ya imbaki toy mangatatawen ya espiritun Anak to diad dalin pian manbilay bilang ayadyarin toon Jesus insan ompatey​—nasugat ed mukor​—ed onman ya andi-kasalanan a kipapasen.

Akin a kinaukolan na Dios so ipatey na sakey ya ayadyarin too? Bueno, anto so dusa nen Jehova a Dios ed si Adan no sikatoy mankasalanan? Agta say patey? (Genesis 2:16,17) “Say bayar na kasalanan say patey,” so insulat nen apostol Pablo. (Roma 6:23) Abayaran nen Adan so kasalanan to diad mismon impatey to. Sikatoy inikdan na bilay, balet pinili to so mankasalanan, tan sikato so inatey bilang bayar na kasalanan to. (Genesis 3:19) Komusta balet so nipaakar ed impakakondena a nepeg a sungdoan na interon rasa na too lapud satan a kasalanan? Kaukolan a walay ompatey pian nasakbongan iray kasalanan da. Balet siopan ipapatey so makayarin manakbong ed saray impakalukso na amin a katooan?

Kinaukolan ed Ganggan na Dios diad kadaanan a nasyon na Israel so “bilay ya ombayar ed bilay.” (Exodo 21:23) Unong ed sayan legal a prinsipyo, say patey a makayarin manakbong ed saray impakalukso na katooan et nepeg a kasimbangan na balor a pinirdi nen Adan. Say ipatey lambengat na sananey ya ayadyarin too so makabayar ed kasalanan. Satan a too et si Jesus. On, si Jesus so “kasimbangan a dondon” parad kisalba na amin a dondonen a katooan ya inilalak nen Adan.​—1 Timoteo 2:6, NW; Roma 5:16, 17.

Mabalor a Tuloy so Impatey nen Jesus

Say impatey nen Adan et andian na balor; kanepegan toy ompatey lapud impankasalanan to. Balet, say impatey nen Jesus et mabalor a tuloy lapud sikatoy inatey ed andi-kasalanan a kipapasen. Sarag nen Jehova a Dios ya awaten so balor na ayadyarin bilay nen Jesus bilang panondon ed saray matulok a kailalakan nen makasalanan ya Adan. Tan aglabat onkana so balor na bagat nen Jesus parad pambayar ed apalabas iran kasalanan tayo. Ta no ontan, anggapo lay ilalo tayo ed arapen. Lapud ninginew itayo ed kasalanan, naaripen tayo lamet ed kalilingo. (Salmo 51:5) Agaylan misalsalamat itayo lapud say impatey nen Jesus so angiter ed sikatayo na pankanawnawan gamoran so inkayadyari a ginetma nen Jehova ed gapo parad ilalak nen Adan tan si Eva!

Nayarin niyaliling si Adan ed sakey ya aman inatey tan sikatayoy inlereg to ed otang ed pinansyal (kasalanan) ya anggapon balot so pakayari tayon makaagwat ed satan ya otang. Diad biek a dapag, si Jesus et singa sakey a maong ya aman inatey tan pinatawiran to itayo na kayamanan ya aglabat angibulos ed sikatayo manlapud baleg ya otang ya impasakbat ed sikatayo nen Adan noagta angitarya met ed sikatayo na magenap pian manbilay itayon magnayon. Say impatey nen Jesus so aglambengat amaandi ed apalabas iran kasalanan; satan met so alay abig a probisyon parad arapen tayo.

Mangisasalba si Jesus lapud sikatoy inatey nisesengeg ed sikatayo. Tan agaylan mabmablin probisyon so impatey to! Sano natetebek tayon kabiangan itan ed solusyon na Dios parad say komplikadon problema nipaakar ed kasalanan nen Adan, napabiskeg so pananisia tayo ed si Jehova tan ed paraan na panggagawa toy bengabengatla. On, say impatey nen Jesus et sakey a paraan pian nisalba so “siopaman a manisia” ed sikato manlapud kasalanan, sakit, itatakken, tan ipapatey a mismo. (Juan 3:16) Kasin misalsalamat kayo ed Dios lapud impanggawa to ed sayan maaron uksoyan parad kilalaban tayo?

[Litrato ed pahina 5]

Intarok nen Adan so kasalanan tan patey ed katooan

[Litrato ed pahina 6]

Intarya nen Jehova so nagnap a solusyon