Si Jehova so Salimbengan Tayo

“Lapud inkuan mon: ‘Si Jehova so salimbengan ko,’ . . . anggapo so desyang a nagawa ed sika.”​—SALMO 91:9, 10, NW.

1. Akin a nibaga tayon si Jehova so salimbengan tayo?

 SI Jehova so tuan salimbengan na saray totoo to. No sigpot itayon debosyonado ed sikato, nayarin sikatayo so ‘naeletan ed balang diking et agnairapan, manduaruwa et agnaekalan na ilalo, nausil-usilan et ag-akaindan; gineba et ag-abagbag.’ Akin? Lapud ipapagamor ed sikatayo nen Jehova so “sankatageyan ya inkabaleg na pakayari.” (2 Corinto 4:7-9) On, say mangatatawen ya Ama tayo so ontulong ed sikatayo pian nagegemtan so maridios a bilay, tan ipapuso tayo iray salita na salmista: “Lapud inkuan mon: ‘Si Jehova so salimbengan ko,’ ginawam ya ayaman mo so mismon Sankatageyan; anggapo so desyang a nagawa ed sika.”​—Salmo 91:9, 10, NW.

2. Anto so nibaga nipaakar ed Salmo 91 tan anto so isisipan na satan?

² Saratan a salita na Salmo 91 so nayarin insulat nen Moises. Sikato so tinukoy na superskipsion bilang anibukel ed koma-90 a Salmo, tan tinmumbok ed satan so Salmo 91 ya ag-asaletan na dinanman a balikas a manutukoy ed sananey a managsulat. Nayarin alawatan so impanganta ed Salmo 91; salanti, nayarin anganta nin unona so sakey a  too (91:1, 2), insan inebatan na sakey a koro (91:3-8). Nayarin walay sakey nin nansolo a tinmumbok ya anganta (91:9a) tan inebatan na sakey a grupo (91:9b-13). Insan nayarin walay sakey a komakanta ya angansion ed unor iran salita (91:14-16). Antokaman so paraan na impangansion, say koma-91 a Salmo so mangisisipan na espiritual a kaligenan ed saray alanaan a Kristiano bilang sakey a grupo tan angitarya na mipadparan panamaseguro ed saray dedikadon kakaiba ra bilang sakey a grupo. * Konsideraen tayo iyan salmo manlapud punto de bista na amin na saratan a lingkor nen Jehova.

Maligen ed ‘Maamot a Pasen na Dios’

3. (a) Anto so “maamot a pasen na Sankatageyan”? (b) Anto so naeksperiensya tayo diad ‘pansiansia ed silong na sirum na Makapanyarin-amin’?

³ Oniay inkanta na salmista: “Say manayam ed maamot a pasen na Sankatageyan mansiansia ed silong na sirum na Makapanyarin-amin. Salitaen ko so nipaakar ed Jehova, Sikato so salimbeng ko tan kiyagelan ko; Dios ko, dia ed sikato so panmatalkan ko.” (Salmo 91:1, 2) Say “maamot a pasen na Sankatageyan” so piguratibon pasen a pakasalimbengan tayo, tan nagkalautla ed saray alanaan, a manunan pupuntiryaen na Diablo. (Apocalipsis 12:15-17) Naderal to itayon amin no anggapoy proteksion a panggayagaan tayo a singa say panaayam tayo ed Dios bilang espiritual iran bisita to. Diad ‘pansiasiansia ed silong na sirum na Makapanyarin-amin,’ naeksperiensya tayo so mananalimbeng a sirum, odino anino na Dios. (Salmo 15:1, 2; 121:5) Anggapo lay mas liktar a salimbengan odino mas malet a pakdaal nen say Soberanon Katawan tayo, si Jehova.​—Uliran 18:10.

4. Antoran paraan so uusaren na “manangalot,” a si Satanas, tan panon itayon makalegyas?

⁴ Oniay inyarum na salmista: “Iliktar to ka [nen Jehova] ed patit na manangalot, tan dia ed makarongol a salot [“salot a pansesengegan na ir-irap,” NW].” (Salmo 91:3) Say panagpatit na manok diad kadaanan ya Israel so mabetbet a mangerel ed saray manok diad pangusar na saray patit odino kalot. Arum ed saray patit na “manangalot,” a si Satanas, et say mauges ya organisasyon to tan “saray masilib a gawa” to. (Efeso 6:11, NW, paimano’d leksab) Nipaleg iray akaamot a patit diad dalan tayo a managyat ed sikatayo ed karelmengan tan pansengegan na espiritual a kabagbag tayo. (Salmo 142:3) Anggaman ontan, lapud kinondena tayo la so ag-inkatunong, “say kamarerwa tayo nibatik a singa sakey a manok-atap ya akapaway [“akalegyas,” NW] ed patit.” (Salmo 124:7, 8) Agaylay pisasalamat tayo ta si Jehova so mangililiktar ed sikatayo manlapud marelmeng a “manangalot”!​—Mateo 6:13.

5, 6. Anton “salot” so nansengegan na “ir-irap,” balet akin ya agnidunget ed satan so totoo nen Jehova?

⁵ Indatak na salmista so “salot a pansesengegan na ir-irap.” Singa makaalis a sakit ya onkakamayat, wala so bengatlan pansengegan na “ir-irap” parad sankatooan tan parad saray manangitandoro ed inkasoberano nen Jehova. Nipaakar ed saya, oniay insulat na manag-awaran a si Arnold Toynbee: “Nanlapula’d impangangga na Guera Mundial II say nasyonalismo so anoble ed bilang na saray lokal ya independentin estado na bansa . . . Say kaplesan ya awawey na katooan so lalon naaapag.”

⁶ Diad loob na saray siglo, walaray mananguley ya amaloor ed pansisiblangan na nanduruman bansa a nansengegay inkaapag-apag. Kekerewen da met a galangen ira odino saray nanduruman imahen odino simbolo. Balet agbalot inyabuloy nen Jehova a nidunget so matoor a totoo to ed ontan a “salot.” (Daniel 3:1, 2, 20-27; 6:7-10, 16-22) Bilang maaron internasyonal ya impanaagi, iter tayo ed si Jehova so nikabkabiig a debosyon, mantinien so neutralidad ya idadanet na Kasulatan, tan bidbiren ya anggapoy panangidumaduma a ‘diad balang nasyon et akoen [na Dios] so antakot ed sikato tan manggawa na matunong.’ (Gawa 10:34, 35; Exodo 20:4-6; Juan 13:34, 35; 17:16; 1 Pedro 5:8, 9) Anggaman managmak itayo na “ir-irap” diad nengneng na panamasegsegang bilang Kristianos, manliket itayo tan maligen itayo ed espiritual diad “maamot a pasen na Sankatageyan.”

7. Panon itayon salimbengan nen Jehova ‘panamegley na saray bagobago to’?

⁷ Lapud si Jehova so salimbengan tayo, naligliwa itayo ed saray salitan: “Sikato sakbongan to ka na saray bagobago to, et dia ed silong na saray payak  to manmatalek ka: say katuaan [“inkamatua,” NW] to sikato so kinlong tan kalasag mo.” (Salmo 91:4) Sikatayo so sasalimbengan na Dios, no panon a say nganak et protektaan toy sibong to. (Isaias 31:5) ‘Panamegley na bagobago to et saniban to itayo.’ Diad malaknab a paraan, “saray bagobago” na sakey a manok et saray payak to. Panamegley na saratan et sakoban na manok iray sibong to, a salimbengan to ra manlapud saray managsibar. Singa saray sibong, maligen itayo ed silong na saray piguratibon payak nen Jehova lapud pasasalimbengan itayo ed tuan Kristianon organisasyon to.​—Rut 2:12; Salmo 5:1, 11.

8. Panon a say “inkamatua” nen Jehova et sakey a baleg a kinlong tan balwarte?

⁸ Manmatalek itayo ed “inkamatua,” odino inkamatoor. Singa itan baleg a kinlong diad kadaanan iran panaon, a singa kabaleg na puerta tan malapar a tuloy a manakbong ed interon laman na too. (Salmo 5:12) Say panmatalek tayo ed ontan a proteksion so mangibulos ed sikatayo manlapud takot. (Genesis 15:1; Salmo 84:11) Singa say pananisia tayo, say inkamatua na Dios et sakey a baleg a mananalimbeng a kinlong a mangamper ed saray mandarlang a gayang nen Satanas tan mangipulisay ed saray panangataki na kabusol. (Efeso 6:16) Sakey met itan a balwarte, sakey a malet a panagdepensan pukdol a diad beneg na satan so talindegan tayon malet.

‘Agtayo Ontakot’

9. Akin a say labi et makapataktakot a panaon, balet akin ya agtayo ontakot?

⁹ Nipaakar ed pananalimbeng na Dios, oniay kuan na salmista: “Sika agka naani antakot ed kaatapan no labi, nisay dia ed pana a mantekkiab no agew; nisay salot a manaakar ed kabilungetan, nisay kabagbag a manderal no pegley-agew.” (Salmo 91:5, 6) Lapud aagamilen ed kabilungetan so dakel iran mauges a gawa, say labi so makapataktakot a panaon. Diad utel na espiritual a kabilungetan natan a manasakbong ed dalin, saray kabusol tayo so mabetbet a manguusar na maamot iran paraan pian deralen so espiritualidad tayo tan patundaen so panagpulong a kimey tayo. Balet ‘ag-itayo antakot ed kaatapan na labi’ lapud babantayan itayo nen Jehova.​—Salmo 64:1, 2; 121:4; Isaias 60:2.

10. (a) Anto so ompatnag a kabaliksan na “pana a mantekkiab no agew,” tan panon itayon onkiwas ed satan? (b) Anto so nengneng na “salot a manaakar ed kabilungetan,” tan akin ya agtayo ontakot ed satan?

¹⁰ Say “pana a mantekkiab no agew” so ompatnag a mankabaliksan na insalitan panangataki. (Salmo 64:3-5; 94:20) No mantultuloy itayon mangiparungtal ed matuan impormasyon, anggapoy kakanaan na satan a parungtalan ya isusumpa ed sagradon serbisyo tayo. Niarum ni, agtayo takotan so “salot a manaakar ed kabilungetan.” Saya so piguratibon salot a linmesa ed utel na kabilungetan na sayan mundon mansasakit ed moral tan relihyoson paraan a wala’d pakayari nen Satanas. (1 Juan 5:19) Mamapawala itan na makapatey a kipapasen na nonot tan puso, a magmamaliw ya ignorante so totoo nipaakar ed si Jehova, ed saray gagala to, tan ed maaro iran probisyon to. (1 Timoteo 6:4) Diad utel na sayan kabilungetan, ag-itayo natatakot,  lapud panggagayagaan tayo so daakan ya espiritual a liwawa.​—Salmo 43:3.

11. Anto so nagawa ed saramay makasagmak na ‘kabagbag ed pegley-agew’?

¹¹ Say “kabagbag a manderal no pegley-agew” so agmangebbiew met ed sikatayo. Say “pegley-agew” so nayarin mankabaliksan na tatawagen a pakaliwawaan ed mundo. Saramay paimpluensiaan ed materyalistiko iran panmoria na satan so managmak na espiritual a kabagbag. (1 Timoteo 6:20, 21) Legan na makpel a pangiyaabawag tayo ed mensahe na Panarian, agtayo tatakotan so dinanman ed saray kakabusol tayo, lapud si Jehova so Mananalimbeng tayo.​—Salmo 64:1; Uliran 3:25, 26.

12. Diad siopan dikingan so ‘pankibaktaran’ na nilibo, tan diad anton paraan?

¹² Oniay intuloy na salmista: “Say sanlibo nabaktar ed dikingan mo; tan say samplon libo nabaktar ed nikawanan mo; balet ag-ira makasabi ed sika. Saray matamatam labat so pannengneng mo, et nanengneng mo so gunggona na bagel.” (Salmo 91:7, 8) Lapud agda ginawan salimbengan si Jehova, dakel so ‘abaktar’ ed espiritual a patey diad mismon “dikingan” tayo. Bilang resulta, “samplon libo” so nabaktar ed “nikawanan” na saray espiritual ya Israelita natan. (Galacia 6:16) Balet balanglan alanaan itayon Kristiano odino dedikado itayon kakaiba ra, maligen itayo ed ‘maamot a pasen’ na Dios. ‘Nanengneng tayo labat so gunggona  na bagel,’ a manaani na problema ed komersyal, relihyoso, tan arum niran paraan.​—Galacia 6:7.

‘Anggapo so Desyang ya Onsabi ed Sikatayo’

13. Antoran desyang so ag-onsabi ed sikatayo, tan akin?

¹³ Anggaman nakukusbo la so kaligenan na sayan mundo, iyuna tayo so Dios tan manpakpel itayo lapud saray salita na salmista: “Lapud inkuan mon: ‘Si Jehova so salimbengan ko,’ ginawam ya ayaman mo so mismon Sankatageyan; anggapo so desyang ya onsabi ed sika, tan anggan sakey a salot et agmakaasingger ed toldam.” (Salmo 91:9, 10, NW) On, si Jehova so salimbengan tayo. Balet gawaen tayo met so Sankatageyan bilang “ayaman” tayo, a pakaromogan tayo na kaligenan. Itandoro tayo si Jehova bilang Sankatalbaan a Soberano, ‘manayam’ tayo ed sikato bilang Lapuan na kaligenan tayo, tan iyabawag tayo so maong a balita na Panarian to. (Mateo 24:14) Kanian ‘anggapo so desyang ya onsabi ed sikatayo’​—anggapo ed saray desyang ya akadkauna lan adeskribe ed sayan salmo. Anggano nasagmak tayo iray kalamidad a singa say yegyeg, bagyo, delap, eras, tan makadesyang iran pambabakal, saraya so agmaneral ed pananisia tayo odino ed espiritual a kaligenan tayo.

14. Bilang lingkor nen Jehova, akin ya agtayo naimpluensyaan na makapatey iran salot?

¹⁴ Saray alanaan a Kristiano et singa sankailin manaayam ed saray tolda a biig ed sayan sistema na bengabengatla. (1 Pedro 2:11) ‘Anggapoy salot ya onsabi ed tolda ra.’ Balanglan say ilalo tayo et mangatatawen odino mangaraldalin, ag-itayo kabiangan na mundo, tan ag-itayo naimpluensyaan na saratan a salot a makapatey ed espiritual a singa say imoralidad, materyalismo, palson relihyon, tan panagdayew ed “atap ya ayep” tan say “talintao” na satan, say Nasyones Unidas.​—Apocalipsis 9:20, 21; 13:1-18; Juan 17:16.

15. Diad antoran paraan a panggayagaan tayo so tulong na anghel?

¹⁵ Nipaakar ed salimbengan a panggagayagaan tayo, oniay inyarum na salmista: “Sikato [si Jehova] iter to ed saray angheles to so pangumponi ra ed sika, tan mangapiger ed sika ed saray amin a dalan mo. Sikara sampaten da ka ed saray limalima ra, ompan nisapigar mo so salim ed sakey a bato.” (Salmo 91:11, 12) Naikdan na pakayari iray anghel a manalimbeng ed sikatayo. (2 Arari 6:17; Salmo 34:7-9; 104:4; Mateo 26:53; Lucas 1:19) Babantayan da itayo diad ‘amin a dalan tayo.’ (Mateo 18:10) Panggagayagaan tayo so panangigiya tan panagbantay na anghel bilang manangiyabawag na Panarian tan agtayo nagapol ed espiritual a paraan. (Apocalipsis 14:6, 7) Anggan ‘saray bato’ a singa saray pananebel ed kimey tayo so agmakapangigapol ed sikatayo tan agnaandi so pabor na Dios ed sikatayo.

16. Panon a mandumaan so iyaataki na “kilaw a leon” tan “tadyuko,” tan panon itayon onkiwas ed saratan?

¹⁶ Intuloy na salmista: “Sika onggatin ka ed beneg na leon tan tadyuko: say kilaw a leon tan say uleg yarakyaraken mo ra ed silong na saray salisalim.” (Salmo 91:13) No panon a say kilaw a leon so parungtalan, arap-arapan ya onaataki, arum ed kakabusol tayo so mapalaway ya onsusumpa diad pangipapasa ra na saray ley a denesinyon mangamper ed panagpulong a kimey tayo. Balet nagagawa met ed sikatayo so ag-iilaloan iran panangataki a singa say tadyuko a mangetket manlapud maamot a pasen. Diad agnaim-imano iran paraan, say klero so mangaataki ed sikatayo no maminsan panamegley na saray managgaway-ley, saray huis, tan arum nira. Balet diad tulong nen Jehova, mareen tayon aanapen so pakainawaan diad saray korte, ya ‘idedepensa tan legal ya ileletneg so maong a balita.’​—Filipos 1:7, NW; Salmo 94:14, 20-22.

17. Panon tayon gatin-gatinan so “kilaw a leon”?

¹⁷ Sinalambit na salmista so pangiyarakyarak ed “say kilaw a leon tan say [baleg ya] uleg.” Nayarin masebeg so kilaw a leon, tan abalbaleg so sakey ya uleg. (Isaias 31:4) Balet, anggan panon lay kasebeg na kilaw a leon sano arap-arapan ya onataki, piguratibo tayon gatin-gatinan itan diad pangunor ed Dios imbes ed say singa-leon a totoo odino saray organisasyon. (Gawa 5:29) Kanian say manesesgan “leon” so agmamasakit ed sikatayo ed espiritual a paraan.

18. ‘Say baleg ya uleg’ so nayarin mangipanonot ed sikatayo ed siopa, tan anto so nakaukolan tayon gawaen no aatakien to itayo?

¹⁸ Diad Griegon Septuagint, ‘say baleg ya uleg’ so tinawag a “dragon.” Saya so mangipanonot ed sikatayo nipaakar ed “baleg a dragon, say daan ya uleg, a manngaran na Diablo tan . . . Satanas.” (Apocalipsis 12:7-9; Genesis 3:15) Sikato so singa  abalbaleg ya uleg a makayarin manemek tan mangakmon ed biktima to. (Jeremias 51:34) Sano sasalien itayo nen Satanas a potipotan, a buyaken to itayo panamegley na saray pananesdes na sayan mundo, tan akmonen to itayo, komon ta onlukpos itayo la tan gatin-gatinan tayo iyan ‘baleg ya uleg.’ (1 Pedro 5:8) Say alanaan a nakdaan so nepeg a manggawa ed saya pian mibiang ira ed kasumpalan na Roma 16:20.

Si Jehova so Panlalapuan na Kilalaban Tayo

19. Akin a pasasalimbengan itayo ed si Jehova?

¹⁹ Nipaakar ed tuan managdayew, inrepresenta na salmista so Dios a mangibabagan: “Nisengeg ed impasen to so aro to ed siak, kanian sikato so iliktar ko: sikato so ipasen ko ed tagey [“sikato so salimbengan ko,” NW], nisengeg ed kinabat to so ngaran ko.” (Salmo 91:14, NW) Say balikas a “sikato so salimbengan ko” so literal a mankabaliksan na “ipasen ko ed tagey,” a literal ya agnagawat. Sikatayo so pasasalimbengan ed si Jehova bilang managdayew ed sikato nagkalalo la lapud ‘sikato so aaroen tayo.’ (Marcos 12:29, 30; 1 Juan 4:19) Bilang resulta, ‘sikatayo so iliktar met na Dios’ manlapud saray kabusol tayo. Agtayon balot napagit ed tapew na dalin. Imbes, nilaban itayo lapud kabat tayo so ngaran na Dios tan ontatawag itayo ed satan a ngaran tekep na pananisia. (Roma 10:11-13) Tan determinado itayon ‘mankurang ed ngaran nen Jehova diad andi-anggaan.’​—Miqueas 4:5; Isaias 43:10-12.

20. Diad pansampot na Salmo 91, anto so insipan nen Jehova ed matoor a lingkor to?

²⁰ Diad pansampot la na Salmo 91, oniay kuan nen Jehova ed matoor a lingkor to: “Sikato ontawag ed ngaran ko et sikato so ebatan ko: miayam ak naani ed sikato no peles na gonigon: sikato naani iliktar ko, tan sikato so pagalangan ko. Sikato so peneken ko na andukey a bilay, tan ipanengneng ko ed sikato so panangilaban ko.” (Salmo 91:15, 16) Sano ontawag itayo ed Dios diad pikakasi unong ed linawa to, ebatan to itayo. (1 Juan 5:13-15) Nilabasan tayo la so dakerakel a gonigon lapu ed isusumpan papawalaen nen Satanas. Balet saray salitan “miayam ak naani ed sikato no peles na gonigon” so mangiparaan ed sikatayo diad arapen iran subok tan mangipaseguro itan a say Dios so manustine ed sikatayo sano naderal iyan marelmeng a sistema.

21. Panon lan nigloria so alanaan?

²¹ Anggaman ed masanok ya isusumpa nen Satanas, say pagmaliw a nagnap na saray alanaan ed limog tayo so nigloria ed tawen diad nigeter a panaon nen Jehova​—kayari na “andukey a bilay” diad dalin. Ingen, saray makatantandan impangiliktar na Dios so kigloriaan na saray alanaan diad espiritual a paraan. Tan agaylan napapagalangan ira ed pangidadaulo ra bilang Tastasi nen Jehova diad dalin ed sarayan kaunoran ya agew! (Isaias 43:10-12) Say sankatalonggaringan a pangiliktar nen Jehova ed totoo to so nagawa legan na baleg a bakal na Armagedon sano iyalangon to so inkasoberano to tan pasantosen to so masanton ngaran to.​—Salmo 83:18; Ezequiel 38:23; Apocalipsis 16:14, 16.

22. Siopa so ‘makanengneng ed panangilaban nen Jehova’?

²² Balanglan alanaan itayon Kristianos odino dedikadon kakaiba ra, manilalo itayo ed Dios parad kilalaban. Legan na “baleg tan makapataktakot ya agew nen Jehova,” saramay matoor a manlilingkor ed Dios so niliktar. (Joel 2:30-32) Sikatayon manugyop na “baleg ya ulop” na saray akaliktar ed balon mundo na Dios tan mansiansian matoor legan na unor a subok so ‘peneken to na andukey a bilay’​—bilay ya andi-anggaan. Paolien to met so dakerakel. (Apocalipsis 7:9; 20:7-15) Panliketan a maong nen Jehova so ‘pangipanengneng to ed sikatayo na panangilaban to’ panamegley nen Jesu-Kristo. (Salmo 3:8) Tekep na saratan ya engranden ilalo tayo, komon ta mantultuloy itayon manilalo ed tulong na Dios diad pamilang tayo ed saray agew tayo parad kigloriaan to. Diad panamegley na saray salita tan gawa tayo, komon ta mantultuloy tayon paneknekan a si Jehova so salimbengan tayo.

[Paimano ed leksab]

Panon Yon Ebatan?

• Anto so “maamot a pasen na Sankatageyan”?

• Akin ya agtayo ontakot?

• Panon ya ‘anggapo so desyang ya onsabi ed sikatayo’?

• Akin a nibaga tayon si Jehova so panlalapuan na kilalaban tayo?

[Tepetepet Parad Panagaral]

[Litrato ed pahina 17]

Kasin kabat yo a say inkamatua nen Jehova et baleg a salimbeng ed sikatayo?

[Saray litrato ed pahina 18]

Tutulongan nen Jehova iray lingkor to a manumpal ed ministeryo ra anggaman ed ag-iilaloan iran panangataki tan parungtalan ya isusumpa

[Credit Line]

Cobra: A. N. Jagannatha Rao, Trustee, Madras Snake Park Trust