Wala ni Kasi so Nailaloan a Kilalaban?

Say koma-20 a siglo so atawag bilang sakey ed saray sankadalaan a siglo na katooan ya akabatan ed kapiganman. Say krimen, bakabakal, etnikon panlalaban, panag-abuso ed druga, ag-inkamatua, tan karawalan so nagkalalo lan kasmak diad apalabas a pigaran dekada. Niarum ni ed saya et sasagmaken na totoo so ot-ot tan kairapan a resulta na sakit, itatakken, tan ipapatey. Siopa ta so agmanpirawat na kibulos manlapud dakerakel a problema a walad mundo natan? Sano onnengneng tayo ed arapen, wala ni kasi so nailaloan a kilalaban?

IMANOEN pa so pasingawey a nimatalek ed si apostol Juan manga 2,000 a taon lay apalabas. Insulat to: “Nia, so tabernakulo na Dios wala ed saray totoo, tan sikato so manayam naani ed sikara, tan sikara naani baley to, tan say Dios met lanlamang so wala naani ed sikara tan Dios da: Tan punasen to so amin a lua ed kamataan da; tan anggapo la naani ipatey; tan anggapo la naani onnangis o dageyem, o ot-ot: ta saray una a bengatla sikara so linmabas la.” (Apocalipsis 21:3, 4) Onia so mipadparan impasakbay nen propeta Isaias: “Inakmon to so patey ed ando lan ando; et say Katawan a Jehova punasen to naani so saray lua ya onagus ed saray amin a lupa; et say kabalawan na baley ekalen to naani a manlapu ed amin a dalin: ta si Jehova sikato so sinalita to.”​—Isaias 25:8.

Isipen pa labat no anto so kabaliksan na kasumpalan na saray sipan na Dios! Say katooan so nisalba, odino niliktar manlapu ed panaglames tan karawalan, tan ed saray epekto na kairapan tan gonigon. Agayla, anggan say sakit, itatakken, tan ipapatey so agla mansalot ed sikatayo! Isisipan na Salitay Dios, say Biblia, so andi-anggaan a bilay diad silong na ayadyari iran kipapasen ed dalin. (Lucas 23:43; Juan 17:3) Tan akatarya itan ed amin a manpipilalek ed satan. “Linawa [na Dios] ya amin a nengneng na totoo nilaban komon tan onggamor na suston pikakabat ed katuaan.”​—1 Timoteo 2:3, 4, NW.

Balet, pian nagunggonaan ed saray sipan na Dios, nepeg tayon talosan so betang nen Jesu-Kristo ed kilalaban tayo tan agamilen so pananisia ed sikato. Oniay inkuan nen Jesus a mismo: “Ontan lay  impangaro na Dios ed mundo, ya inter to so bogbogtong ya Anak to, pian siopaman a manisia ed sikato agnatawtaw, noag ingen wala so bilay ton andi-anggaan.” (Juan 3:16) Diad pangipapaimano ed makanan betang nen Jesu-Kristo ed sayan pamaakaran, inkuan nen apostol Pedro: “Anggapo so arum a kilabanan: ta anggapo so arum a ngaran ed lepsag na tawen, a niiter ed saray totoo, a nayarin kilabanan tayo.” (Gawa 4:12) Pinaseseg nen apostol Pablo tan say kaiba ton si Silas so masimoon a manuupapet: “Manisia ka ed Katawan a Jesus, et nilaban ka, sika tan say abung mo.”​—Gawa 16:30, 31.

On, si Jesu-Kristo “so Pangulon Ahente na bilay,” tan posibli lambengat so kilalaban panamegley to. (Gawa 3:15, NW) Balet panon a sayan sakey a too so magmaliw a manunan persona diad pangisalba ed sikatayo? Say pakawalaan tayo na malinew a pakatalos ed betang to ed sayan pamaakaran so mamabiskeg ed ilalo tayo ed kilalaban.

 [Picture Credit Lines ed pahina 2]

Pahina 3:Saray Eroplanon Panagbomba: USAF photo; naeerasan ya ugugaw: UNITED NATIONS/J. FRAND; napopoolan a barkon pan-guerra: U.S. Navy photo