Report na Saray Manangiyabawag na Panarian

“Aliwa so Atawagan Mon Numero”

DIAD Johannesburg, South Africa, mansusublayan si Leslie tan si Caroline a manpulong panamegley na telepono ed totoon manaayam ed sakey a purok na saray retirado lan totoo a walaan na guardiadon maong a lolooban. Dagdaiset iray wala ed abung tan agtanton interesado ed Kristianon mensahe ra, kanian si Caroline so apaseseg sanen inmebat so sakey a bii.

“Si Mrs. B iya​—?” so intepet nen Caroline.

“Ah, andi,” so kuan na makaaron boses, “Siak si Mrs. G​—. Aliwa so atawagan mon numero.”

Lapud naimano nen Caroline a maligsa so boses to, oniay inkuanto: “Bueno, abuloyan yo ak pan mangipaliwawa ed say labay ko lawarin ibaga ed si Mrs. B​—.” Insan to intongtong so nipaakar saray bendisyon ed onsabin Panarian na Dios. Kayari impanpaknaan da pian iyakar so brosyur ya Anto so Kakaukolanen na Dios ed Sikatayo?, intepet nen Mrs. G​—: “Antoman manayay relihyon mo?”

“Sikami’ray Tastasi nen Jehova,” so inyebat nen Caroline.

“O, andi, aliwan satan a relihyon! Agko la labay so minengneng ed sika.”

“Balet Mrs. G​—,” ya akikasi si Caroline, “diad loob na 20 minutos a linmabas, innabang ko ed sikayo so alay abig a tuloy ya ilalo, a pinaneknekan ko ed Biblia no anto so magano lan gawaen na Panarian na Dios parad katooan. Malikeliket kayon akarengel ed sarayan bengatla, pirawrawat yo ni ingen tan labay yo so makaaral ni na dakel. Anto ta so talagan amta yo nipaakar ed saray Tastasi nen Jehova? No sikayo bilang so mansasakit, kasin onla kayo ed sakey a mekaniko? Akin ya agyo ak abuloyan ya ibaga ed sikayo no antoy panisiaan na saray Tastasi nen Jehova?”

Kayari indeen ya agano sikatoy inmebat: “Diad padesir ko duga ka. Magmaong laingen a laka dia. Balet ipasipor ko la’d sika, siak so agmon balot nakomberti!”

“Mrs. G​—, agta kayon balot nakomberti anggano labalabay ko,” so inyebat nen Caroline. “Si Jehova labat so makagawa ed satan.”

Maong so nansumpalan na indalaw pian itulor so brosyur, tan si Mrs. G​—(Betty) so inmabobon a dalawen lamet. Kapawil nen Caroline, inkuan nen Betty ya imbaga to ed saray bibiin kaiba to ed pananganan a sikatoy akapitongtong ed saray Tastasi nen Jehova. “Panon ya agawaan mo so ontan?” so intepet da, ya ipupukay day lima ra. “Saratan a totoo et agda anggan panisiaan si Jesus!”

Impanonot a tampol nen Caroline imay manunan punto ya apantongtongan da nen imbeneg nipaakar ed Panarian na Dios.

“Siopa so magmaliw ya Ari?” so intepet nen Caroline.

“Siempre, si Jesus,” so inyebat nen Betty.

“Peteg,” kuan nen Caroline. Insan to impaliwawa a panisiaan na saray Tastasi nen Jehova a si Jesus so Anak na Dios, balet sikatoy agmipara ed Dios bilang kabiangan na Trinidad.​—Marcos 13:32; Lucas 22:42; Juan 14:28.

Kayari na pigara nin indalaw, sankaimano ya anggaman sikatoy walaan na positibo tan maliket ya awawey, si Betty so walaan na maletey a bunigas. Diad tua, wala so kanser to tan sikatoy antakot ya ompatey. “Komon ta arengelan ko la irayan bengatla nensaman ni pian awalaan ak la na pananisia ed Dios a singa sika,” so impatua to. Sikatoy niligliwa nen Caroline diad impangibasa ed sikato na saray teksto a manideskribe ed patey a singa labat maitlep ya ugip a dia et nayarian na sakey so ombangon diad kioli’d bilay. (Juan 11:11, 25) Saya so akapasesegan a maong nen Betty, a panggagayagaan to la natan so regular a panagaral ed Biblia. Say makapuy a bunigas to so mamupuger labat ed sikato ed iyatendi ed saray miting diad Kingdom Hall.

Onia so inkuan nen Caroline: “Malinew ed siak a saray anghel so mangiwawanwan ed sayan kimey. ‘Aksidente so impakatawag ed numeroy telepono’ nen Betty, tan isipen pa labat, sikatoy 89-años la!”​—Apocalipsis 14:6.