Bayuboan so Puso Yo ya Ontakot ed si Jehova

“Wala komon so onia a nengneng na puso ed loob da, a takotan da ak, tan unoren da a naynay so amin a ganggan ko.”​—DEUTERONOMIO 5:29.

1. Panon tayon naseguro a walay panaon a panggayagaan na totoo so kawayangan manlapud takot?

 SAY takot so naynay ya onsesebang ed kanonotan na katooan diad loob na dakel lan siglo. Say takot ed eras, sakit, krimen, odino bakal so mabetbet a mangonigon ed minilyon a totoo. Lapud sayan rason, nibalikas ed manangilukas iran salita na Universal Declaration of Human Rights so pampirawat ed sakey a mundon panggayagaan na amin a totoo so kawayangan manlapud takot. * Makapaliket ta ipapaseguro ed sikatayo na Dios ya onsabi so ontan a mundo​—balet aliwan diad panamegley na saray sagpot na too. Panamegley na propeta ton si Miqueas, insipan nen Jehova ed sikatayo a diad balon mundo na inkatunong, ‘anggapo naani manaktakot ed totoo to.’​—Miqueas 4:4.

2. (a) Panon itayon papasesegen na Kasulatan a takotan so Dios? (b) Antoran tepet so nayarin onlesa sano nodnonoten tayo so obligasyon tayon ontakot ed Dios?

² Diad biek a dapag, say takot so nayari met a magmaliw a positibon impluensya. Diad Kasulatan, saray lingkor na Dios so naulit-ulit a pinaseseg ya ontakot ed si Jehova. Inkuan nen Moises ed saray Israelita: “Nepeg mo a takotan si Jehova a Dios mo; tan sikato so nepeg mo a panlingkoran.” (Deuteronomio 6:13) Kayari na pigaran siglo, oniay insulat nen Solomon: “Takotan mo so Dios, tan unoren mo so saray ganggan to; ta saya so katiponan na kanepegan na too.” (Eclesiastes 12:13) Diad panamegley na panagpulong a kimey tayo, a nagagawa ed silong na panangiwanwan na anghel, papasesegen tayo met so amin a totoo ya ‘ontakot ed Dios, tan iter ed sikato so gloria.’ (Apocalipsis 14:6, 7) Nilikud ed takot ed si Jehova, saray Kristiano so nepeg a mangaro ed sikato diad interon puso ra. (Mateo 22:37, 38) Panon tayon naaro so Dios tan ontakot met ed sikato? Akin a nakaukolan a takotan so maaron Dios? Antoran gunggona so nagamoran tayo no bayuboan tayo so maridios a takot? Pian naebatan iratan a tepet, nepeg tayon talosan ya unona no anto so kabaliksan na takot ed Dios tan no panon a sayan nengneng na takot so nawalaan na manunan betang diad relasyon tayo ed si Jehova.

Pankelkelaw, Panangigalang, tan Takot

3. Anto so kabaliksan na takot ed Dios?

³ Say takot ed Dios so nepeg a nalikna na saray Kristiano ed Nanggawa ed sikara. Say sakey ya uker na sayan nengneng na takot et “pankelkelaw tan aralem a panangigalang ed Manamalsa tan maabig a takot a sikatoy napaermen.” Say takot sirin ed Dios so mangimpluensya ed duaran importantin aspekto na kabibilay tayo: say awawey tayo ed Dios tan say awawey tayo nipaakar ed kondukta a kagula to. Mapatnag, saratan ya aspekto so importante tan makanepegan na maalwar a pangonsidera tayo. Unong ya ipapabitar na Expository Dictionary of New Testament Words nen Vine, parad saray Kristiano et sayan mapagalang a takot so ‘motibon mangimpluensya ed bilay, diad espiritual tan moral iran pamaakaran.’

4. Panon tayon nabayuboan iray liknaan a pankelkelaw tan panangigalang ed Manamalsa tayo?

⁴ Panon tayon nabayuboan iray liknaan a pankelkelaw tan panangigalang ed Manamalsa tayo? Mankelkelaw itayo no nabantag tayo so masansanting a nenengnengen, makapadinayew a waterfall, odino makapasagyat ya iseselek na agew. Ompalalo so ontan a liknaan sano natebek tayo, panamegley na mata na pananisia, a saratan so ginawa na Dios. Niarum ni, singa si Arin David  et namoria tayon anggapoy kakanaan tayo no ikompara ed makapakelkelaw a palsa nen Jehova. “No umamengen ko so saray tawen mo, kimey na saray gamegamet mo, say bulan tan saray bitewen, ya ingganam; anto ta so too a manonot ka ed sikato?” (Salmo 8:3, 4) Sayan pirmin pankelkelaw so ontundas ed panangigalang, a mamakiwas ed sikatayon misalamat tan mangidayew ed si Jehova lapud amin a ginawa to parad sikatayo. Onia met so insulat nen David: “Pisalamatan taka ta makapataktakot tan makapakelkelaw so inkagawa na inkasiak: pankelkelawan so gawagawam; tan kabat a maong na kamarerwak.”​—Salmo 139:14.

5. Akin a nepeg tayon takotan si Jehova, tan anton maabig ya ehemplo so walad sikatayo nipaakar ed saya?

⁵ Saray liknaan a pankelkelaw tan panangigalang so pansengegan na maabig tan mapagalang a takot ed pakayari na Dios bilang Manamalsa tan ed autoridad to bilang makanepegan a Mananguley ed uniberso. Diad pasingawey ya anengneng nen apostol Juan, “saray akagamor na palabo [“anaeg,” NW] ed ayep, tan say talintao to”​—saray alanaan a patumbok nen Kristo diad mangatatawen a kipapasen da​—so angiyabawag: “Angkakabaleg tan makapakelaw so saray gawam, O Katawan a Dios, a Makapanyarin-amin; maptek tan tua so saray dalan mo, Ari na saray tinaon. Siopa so ag-ontakot ed sika, O Katawan, tan agmangigalang ed ngaran mo?” (Apocalipsis 15:2-4) Say takot ed Dios, a makasengeg ed aralem a panangigalang ed karlangan to, so angitonton ed sarayan kaiban manuley nen Kristo diad Panarian ed tawen a mangigalang ed Dios bilang walaan na supremon autoridad. Sano konsideraen tayo so amin ya agawaan la nen Jehova tan say matunong a paraan na panuuley to ed uniberso, agta walaan itayo na dakerakel a rason pian ontakot ed sikato?​—Salmo 2:11; Jeremias 10:7.

6. Akin a nakaukolan itayon nawalaan na maabig a takot a napaermen si Jehova?

⁶ Balet, niarum ed pankelkelaw tan panangigalang, say takot ed Dios so nepeg a mangilaktip ed maabig a takot a sikatoy napaermen odino say pagmaliw a matunganga ed sikato. Akin? Lapud anggano si Jehova et “matantan ya onsanok tan daakan ed maaron-panangasi,” nepeg tayon nodnonoten ya “anggapo so ipupuera to ed pananusa.” (Exodo 34:6, 7, NW) Anggaman maaro tan mapangasi, agkokonsintien nen Jehova so ag-inkatunong tan sigagagalan managgaway-mauges.  (Salmo 5:4, 5; Habacuc 1:13) Nadusa iramay sigagagala tan agmagbabawin manggagawa na karelmengan ed imaton nen Jehova tan onsusumpa ed sikato. Unong ya inkuan nen apostol Pablo, “makapataktakot a pamaakaran so napelag ed saray lima na Dios a mabilay.” Say pakawalaan na maabig a takot ed kapelag ed ontan a kipapasen so pakasalimbengan tayo ed kaunoran.​—Hebreos 10:31.

“Ompeket Kayo ed Sikato”

7. Antoran rason so walad sikatayo pian manmatalek ed manangiliktar a pakapanyari nen Jehova?

⁷ Say mapagalang a takot ed Dios tan pikabisadon maong ed makapakelkelaw a pakapanyari to so gapoan na panmatalek tan pankompiyansa ed si Jehova. No panon a say melag ya ugaw et maligeligen sano kaabay to so ama to, ontan met a kaligenan tan kompiyansa so nalilikna tayo ed silong na panangantabay nen Jehova. Imanoen pa so inkiwas na saray Israelita kayari na impangibulos ed sikara nen Jehova manlapud Ehipto: “Anengneng na Israel so sankabalegan a kanonotan a ginawa nen Jehova ed saray Ehipsio, et saray katooan tinmakot ira ed Jehova; tan anisia ira ed Jehova.” (Exodo 14:31) Say eksperiensya nen Eliseo so mamaneknek met ed katuaan a “say anghel nen Jehova mankampamento ed liberliber na saray ontakot ed sikato, tan iliktar tora.” (Salmo 34:7; 2 Arari 6:15-17) Say modernon-agew ya awaran na totoo nen Jehova tan nayarin say eksperiensya tayon mismo so mamekder ya uusaren na Dios so pakapanyari to nisesengeg ed saramay manlilingkor ed sikato. (2 Awaran 16:9) Namoria tayo sirin a diad “takot ed Jehova wala so mabiskeg a panmatalek.”​—Uliran 14:26.

8. (a) Akin a say takot ed Dios so mamakiwas ed sikatayo a mankurang ed saray dalan to? (b) Ipaliwawa no panon itayon “ompeket” ed si Jehova.

⁸ Say maabig a takot ed Dios et aliwa lambengat a pansengegan na talek tan kompiyansa ed sikato noagta mamakiwas met ed sikatayo a mankurang ed saray dalan to. Sanen inaguraan nen Solomon so templo, oniay impikasi to ed si Jehova: “Ontakot [so Israel] ed sika, a manakar ira ed saray dalan mo, leleg na pambilay da ed dalin ya inter mo ed saray atateng mi.” (2 Awaran 6:31) Asakbay ni et pinaseseg la nen Moises iray Israelita: “Nepeg yo so manakar unong ed linawa nen Jehova a Dios yo, tan takotan yo, tan unoren yo so saray ganggan to, tan ontulok kayo ed boses to tan manlingkor kayo ed sikato, tan ompeket kayo ed sikato.” (Deuteronomio 13:4) Unong a malinew ya ipapabitar na saratan a bersikulo, say pilalek a mankurang ed saray dalan nen Jehova tan diad ‘ipeket’ ed sikato so resulta na panagmatalek tan kompiyansa ed Dios. On, say maridios a takot so mangitonton ed sikatayo a mangunor ed si Jehova, manlingkor ed sikato, tan ompeket ed sikato, a singa melag ya ugaw a literal ya ompeket ed ama ton panmamatalekan tan pankokompiyansaan ton maong.​—Salmo 63:8; Isaias 41:13.

No Aroen Tayo so Dios, Takotan Tayo Met

9. Anto so siglaotan na aro ed Dios tan takot ed Dios?

⁹ Unong ed Makasulatan a punto de bista, say itakot ed Dios et agmangamper ed pangaaro tayo ed sikato. Midumaan, saray Israelita so abilin ya ‘ontakot ed si Jehova . . . pian manonton ira ed saray amin a daladalan to, tan sikato so aroen da.’ (Deuteronomio 10:12) Kanian maapit a mansiglaotan so takot ed Dios tan aro ed Dios. Say takot ed Dios so mamakiwas ed sikatayon onkurang ed daladalan to, tan bilang epekto et saya so mamaneknek ed panangaro tayo ed sikato. (1 Juan 5:3) Saya so makatunongan lapud sano inaro tayo so sakey, manepeg labat ya ontakot itayon mamaermen ed sikato. Si Jehova so pinaimbel na saray Israelita lapud rebelyoso iran kurang da diad kalawakan. Maseguron agtayo labay so manggawa na bengatlan mamaermen ed mangatatawen ya Ama tayo. (Salmo 78:40, 41) Diad biek a dapag, lapud “si Jehova naroyroyo ed saray ontatakot ed sikato,” say katutulok tan inkamatoor tayo so mamaliket ed sikato. (Salmo 147:11; Uliran 27:11) Say aro ed Dios so mamakiwas ed sikatayon mamaliket ed sikato, tan say takot ed Dios so mangamper ed sikatayon mamaermen ed sikato. Saratan a kalidad et mantunosan, aliwan mansumlangan.

10. Panon ya impatnag nen Jesus a nanliketan to so takot ed si Jehova?

¹⁰ Say kurang na impanbilay nen Jesu-Kristo so malinew a mangiyiilustra ed no panon tayon aroen tan takotan so Dios. Oniay insulat nen propeta Isaias nipaakar ed si Jesus: “Say espiritu nen Jehova manayam naani ed tapew to, say espiritu na kakabatan tan pakatalos, say espiritu na pananimbawa tan pakapanyari, say espiritu na pikakabat tan  say takot ed si Jehova. Et say liket to wala naani ed takot ed Jehova.” (Isaias 11:2, 3) Unong ed sayan propesiya, say espiritu na Dios so amakiwas ed si Jesus ya ontakot ed mangatatawen ya Ama to. Niarum ni, naimano tayo a sayan takot et panlapuan na inkapnek tan aliwan mapegpeget. Si Jesus so akaromog na liket diad impanumpal to ed linawa na Dios tan ed impamaliket to ed sikato, anggan ed sankairapan iran sirkumstansya. Sanen sikatoy nidunget ed asingger lan ipatey to ed panamairapan a kiew, oniay kuan to ed si Jehova: “Aliwan unong ed kaliktan ko, ingen unong ed kaliktan mo.” (Mateo 26:39) Lapu ed sayan maridios a takot, tekep na pabor a tinalineng nen Jehova iray ey-ey na Anak to, a sikatoy pinabiskeg to, tan inlaban to ed patey.​—Hebreos 5:7.

Aralen so Ontakot ed si Jehova

11, 12. (a) Akin a nepeg tayon aralen so ontakot ed Dios? (b) Panon so pangibabangat ed sikatayo nen Jesus ya ontakot ed si Jehova?

¹¹ Aliwan singa say sipor a pankelaw tayo sano naimatonan tayo so pakayari tan karlangan na palsa, ag-automatiko so pakawalaan na takot ed Dios. Satan no akin a mapropetikon innatnat ed sikatayo na Babaleg a David, si Jesu-Kristo, so imbitasyon a: “Gali dia, sikayo anak, talineng kayo ed siak: ibangat ko ed sikayo so itakot ed Jehova.” (Salmo 34:11) Panon itayon makaaral ed si Jesus ya ontakot ed si Jehova?

¹² Imbangat itayo nen Jesus a takotan si Jehova diad impanulong to ed sikatayon makatalos ed makapakelaw a personalidad na mangatatawen ya Ama tayo. (Juan 1:18) Say mismon alimbawa nen Jesus so mangipaparungtal ed panag-isip na Dios tan no panon so pidedeneng to ed arum, lapud naspot ya impatnag nen Jesus so personalidad nen Ama to. (Juan 14:9, 10) Niarum ni, diad panamegley na bagat nen Jesus, makapitongtong itayo ed si Jehova panamegley na pikakasi sano onkekerew itayo na panamerdona ed saray kasalanan tayo. Sayan matalonggaring a panangipatnag na panangasi na Dios so mabiskeg a rason pian sikatoy takotan. Oniay insulat na salmista: “Wala so panamerdona ed sika, pian sika so takotan.”​—Salmo 130:4.

13. Antoran kundang a nidatak ed libro na Uliran so makatulong ed sikatayo pian nawalaan na takot ed si Jehova?

¹³ Indatak na libro na Uliran so nantutumbokan a kundang pian natulongan itayon mamayubo ed maridios a takot. “Ana’ko no awaten mo so saray salitak, tan yatol mo so saray ganggan ko ed sika; a singa pangikiling mo na layag mo ed kakabatan, tan ipeket mo so pusom ed pakatalos; on, no kelyawan mo so kaisipan, tan itagey mo so boses mo nipaakar ed pakatalos . . . diad ontan natalosan mo so takot ed Jehova, tan naromog mo so pikakabat ed Dios.” (Uliran 2:1-5) Kanian nepeg tayo sirin ya aralen so Salita to, a panggunaetan a talosan so panangibangat to, insan imanoen a maong so walan simbawa na satan pian nawalaan itayo na takot ed Dios.

14. Panon tayon tumboken so simbawan niiter ed saray arari ed Israel?

¹⁴ Balang ari ed kadaanan ya Israel so abilin a mankopya na Ganggan tan ‘basaen to itan ed amin ya agew na pambilay to; pian naaral to so ontakot ed kinen Jehova a Dios to, ta pian agamilen to so amin a sasalitaen na saya a panamatontonan.’ (Deuteronomio 17:18, 19) Say panagbasa tan panagaral ed Biblia so makanakana met ed sikatayo no aralen tayo so ontakot ed si Jehova. Diad pangiyaplika tayo ed saray prinsipyo na Biblia ed bilay tayo, kalkalna itayon makagamor na madibinon  kakabatan tan pikakabat. ‘Natalosan tayo so takot ed si Jehova’ lapud nanenengneng tayo iray maong a resulta a papawalaen na satan ed bilay tayo, tan papablien tayo so siglaotan tayo ed Dios. Niarum ni, diad regular a pantitipon kaiba iray kapananisiaan, narengel na saray kalangweran tan maedad la so ibabangat na Dios, makaaral ira ya ontakot ed Dios, tan mankurang ira ed saray dalan to.​—Deuteronomio 31:12.

Maliket so Amin ya Ontatakot ed si Jehova

15. Diad antoran dalan a nisiglaot so takot ed Dios diad panagdayew tayo ed sikato?

¹⁵ Manlapu la’d gapo, naimano tayo a say takot ed Dios et maabig ya awawey a nepeg tayon amin a bayuboan, lapud satan so makanan kabiangan na panagdayew tayo ed si Jehova. Satan so mangitonton ed sikatayo a manmatalek a maong ed sikato, mankurang ed saray dalan to, tan ompeket ed sikato. Singa met ed biang nen Jesu-Kristo, say takot ed Dios so mamakiwas met ed sikatayon manumpal ed dedikasyon tayo natan tan ed andi-anggaan.

16. Akin a sikatayo so papasesegen nen Jehova ya ontakot ed sikato?

¹⁶ Say maridios a takot et aliwan makapataktakot odino mapegpeget. “Mapalar [“maliket,” NW] so balang sakey ya ontakot ed Jehova, a manakar ed saray basbas to.” (Salmo 128:1) Papasesegen itayo nen Jehova a sikatoy takotan tayo lapud amta to a sayan kalidad so manalimbeng ed sikatayo. Naimano tayo so maaron panangiyansakit to diad saray salita to ed si Moises: “Wala komon so onia a nengneng na puso ed loob da [saray Israelita], a takotan da ak, tan unoren da a naynay so amin a ganggan ko pian makapaabig ed sikara, tan dia ed saray anak da a siansia lawas!”​—Deuteronomio 5:29.

17. (a) Antoran gunggona so nagamoran tayo diad itakot ed Dios? (b) Antoran aspekto na maridios a takot so nakonsidera ed ontumbok ya artikulo?

¹⁷ Mipadpara, no bayuboan tayo ed puso tayo so takot ed Dios, makagunggona itan ed sikatayo. Diad antoran dalan? Unona ed amin, say ontan ya awawey so mamaliket ed Dios tan lalo itayon onapit ed sikato. Amta nen David unong ed mismon naeksperiensya to a “gawaen to so pilalek na saray ontakot ed sikato; sikato denglen to met so akis da, tan ilaban tora.” (Salmo 145:19) Komadua, say maridios a takot so mangunggona ed sikatayo lapud apektaen na satan so awawey tayo ed no anto so mauges. (Uliran 3:7) Say ontumbok ya artikulo so mangusisa ed no panon a makasalimbeng iyan takot ed sikatayo manlapud espiritual a kapeligroan, tan irepaso na satan so pigaran Makasulatan ya alimbawa na lalaki a tinmakot ed Dios tan pinmaliis ed mauges.

[Paimano ed leksab]

Kasin Naebatan Yo so Onggendan?

• Anto so kabaliksan na takot ed Dios, tan panon itayon naapektaan ed satan?

• Anto so siglaotan na itakot ed Dios tan panakar a kaiba so Dios?

• Panon a say alimbawa nen Jesus so mangipatnag a say takot ed Dios so misiglaotan ed aro ed Dios?

• Diad antoran dalan a nabayuboan tayo ed puso tayo so takot ed si Jehova?

[Tepetepet Parad Panagaral]

[Litrato ed pahina 17]

Niganggan iray Israelitan arari a kopyaen dan mismo so Ganggan tan inagew-agew dan basaen itan

[Litrato ed pahina 18]

Say takot ed si Jehova so mangitonton ed sikatayo a manmatalek ed sikato a singa sakey ya anak a manmamatalek ed ama to

[Picture Credit Line ed pahina 15]

Bibitewen: Photo by Malin, © IAC/RGO 1991