“Dia ed Liwawam so Pakanengnengan Mi na Liwawa”

SAY liwawa so mabetbet tayon nibabaliwala anggad nasabi punton nakatsep so koryenti et biglan ombilunget so interon komunidad tayo. Makapalikliket ta say “planta na koryenti” ed tagey​—say banwa​—so sigpot a napanmatalkan. Tan diad tulong na liwawan manlalapud banwa et nayarian tayo so onnengneng, mangan, onlinawa, tan manbilay.

Lapud say liwawa so makanakana parad bilay, agtayo nasurprisa no nabasa tayo ed Genesis a say liwawa et apawala ed inmunan agew na panamalsa. “Say Dios inkuanto, Onlesa komon so liwawa: et linmesa so liwawa.” (Genesis 1:3) Lawas binidbir na saray galgalangen a totoon singa si Arin David a si Jehova so lapuan na bilay tan liwawa. “Dia ed sika so kawalaan na subol na bilay,” insulat nen David. “Dia ed liwawam so pakanengnengan mi na liwawa.”​—Salmo 36:9.

Namparan diad literal tan piguratibon paraan so kiyaaplikaan na saray salita nen David. Oniay idadanet na say Encyclopædia Britannica: “Peteg, a say liwawa, so makasengeg ed ikukurang na pakanengneng.” Insan intuloy na satan: “Dakel ya impormasyon so onsasabi ed utek na too diad panamegley na saray mata nen say diad antokaman nin organo ed pakalikna.” Lapud dakel ed naaaralan tayo so mandedependi ed langkap a pakanengneng​—a mankakaukolan na liwawa pian sustoy ikurang to​—nauusar met so liwawa ed Kasulatan diad piguratibon paraan.

Kanian, imbaga nen Jesus ed saray babangatan to: “Siak so silew na mundo. Say ontumbok ed siak agmanakar ed kabilungetan, balet wala ed sikato so silew na bilay.” (Juan 8:12) Say tinukoy nen Jesus a piguratibon liwawa et say mensahe na katuaan ya impulong to, a nayarin onsinag ed saray kanonotan tan kapusoan na saray ontalineng ed sikato. Kayari na saray taon ed espiritual a kabilungetan, atalosan a siansia na saray babangatan nen Jesus so gagala na Dios parad katooan tan say ilalo na Panarian. Talagan saya so “silew na bilay,” ta satan a pikakabat so nayarin mangitonton ed magnayon a bilay. “Saya sikato so andi-anggaan a bilay,” inkuan nen Jesus diad pikakasi ed mangatatawen ya Ama to, “a naamtaan da ka a saksakey a tuan Dios, tan saman so imbakim, salanti Jesu-Kristo.” (Juan 17:3) Agtayon balot komon ibabaliwala iyan espiritual a liwawa!