Propesiya nen Isaias​—Liwawa Parad Amin a Katooan I

Kapitulo Trese

Kilalaban tan Gayaga Diad Silong na Uley na Mesias

Isaias 11:1-12:6

1. Deskribien so espiritual a kipapasen na totoon akisipan ed Dios diad panaon nen Isaias.

 DIAD panaon nen Isaias, say espiritual a kipapasen na totoon akisipan ed Dios so mauges. Anggan diad impanuley na matoor ya arari a singa si Uzias tan Jotam, dakel ed saray totoo so nandayew ed atagey iran pasen. (2 Arari 15:1-4, 34, 35; 2 Awaran 26:1, 4) Sanen nagmaliw ya ari si Hezekias, kinaukolan ton ekalen manlapud bansa iray uusaren tan agamil a misiglaotan ed panagdayew ed Baal. (2 Awaran 31:1) Agpankelawan a pinaseseg nen Jehova so totoo ton ompawil ed sikato tan pinasakbayan to ra ed onsabin pananusa!

2, 3. Anton panamaseseg so iiter nen Jehova ed saramay manpilalek a manlingkor ed sikato anggaman kasmak so ag-inkamatoor?

² Anggaman ontan, aliwan amin et sigpot lan rebelde. Walaray matoor a propeta nen Jehova, tan maseguron walaray pigaran Judio a dinmengel ed sikara. Si Jehova so walaan na makaligliwa iran salita parad saraya. Kayarin indeskribe nen propeta Isaias so makapasinagem a panamsam a nasagmak na Juda legan na ilusob na Asiryano, sikato so pinuyanan a mangisulat ed sakey ed saray sankarakpan a balikas ed interon Biblia, say impaneskribe ed saray bendisyon ya onsabi diad silong na uley na Mesias. * Saray arum ya aspekto na sarayan bendisyon so walaan na melag a kasumpalan sanen pinmawil iray Judio manlapud inkakautibo ra ed Babilonia. Balet, diad intiraminte, say propesiya so walaan na baleg a kasumpalan natan. Tua, saratan a bendisyon so agla anengneng di Isaias tan saray arum a matoor a Judio ed panaon to. Balet inilaloan da iraya tekep na pananisia tan nanengneng da so kasumpalan na saray salita nen Isaias diad kioli ra.​—Hebreos 11:35.

³ Saray totoo nen Jehova natan so mankakaukolan met na panamaseseg. Say ikakasmak na abulok iran estandarte ed moral na mundo, say maramsak ya isusumpa ed mensahe na Panarian, tan say dili iran kakapuyan so makapaangat ed sikaran amin. Saray alay abig a salita nen Isaias nipaakar ed Mesias tan say uley to so mamabiskeg tan ontulong ed totoo na Dios a mangarap ed sarayan angat.

Mesias​—Sakey a Makayarin Lider

4, 5. Anto so impropesiya nen Isaias nipaakar ed isabi na Mesias, tan anton panangiyaplika ed saray salita nen Isaias so mapatnag a ginawa nen Mateo?

⁴ Pigaran siglo antis na panaon nen Isaias, walaray Hebreon managsulat na Biblia ya anukoy ed isabi na Mesias, say tuan Lider, ya ibaki nen Jehova ed Israel. (Genesis 49:10; Deuteronomio 18:18; Salmo 118:22, 26) Natan diad panamegley nen Isaias et inter nen Jehova so kaaruman niran detalye. Oniay insulat nen Isaias: “Ompaway naani so melag a sanga manlapu ed sengeg nen Jesse; tan manlapu ed saray lamot to manbunga naani so simit.” (Isaias 11:1, NW; ikompara so Salmo 132:11.) Namparan ipapatnag na “melag a sanga” tan “simit” a say Mesias so magmaliw a kapolian nen Jesse panamegley na ilalak ton si David, a nilanaan na larak bilang ari na Israel. (1 Samuel 16:13; Jeremias 23:5; Apocalipsis 22:16) Sano onsabi so tuan Mesias, sayan “simit,” a manlalapud abung nen David, so mamawala na maabig a bunga.

⁵ Say insipan a Mesias et si Jesus. Say managsulat na ebanghelyo a si Mateo so anukoy ed saray salita ed Isaias 11:1 sanen inkuanto a si Jesus a tinawag a “sakey a Nazareno” so anumpal ed saray salita na saray propeta. Lapud si Jesus so binmaleg ed baley  na Nazaret, sikato so tinawag a Nazareno, ngaran a mabitar a misiglaotan ed Hebreon salita ya inusar ed Isaias 11:1 parad “simit.” *​—Mateo 2:23, NW, paimano’d leksab; Lucas 2:39, 40.

6. Anton klase na manuley so nipropesiyan pagmaliwan na Mesias?

⁶ Anton klase na manuley so pagmaliwan na Mesias? Kasin sikato so singa say maruksa tan mapasang ya Asiryano ya aneral ed samploran tribu na mamaamianen ya Israel? Siempre, andi. Oniay inkuan nen Isaias nipaakar ed Mesias: “Say espiritu nen Jehova manayam naani ed tapew to, say espiritu na kakabatan tan pakatalos, say espiritu na pananimbawa tan pakapanyari, say espiritu na pikakabat tan takot ed Jehova. Et say liket to wala naani ed takot ed Jehova.” (Isaias 11:2, 3a) Say Mesias so agnilanaan na larak noagta diad masanton espiritu na Dios. Saya so agawa diad bautismo nen Jesus, sanen anengneng nen Juan a Managbautismo ya onaakseb ed si Jesus so masanton espiritu na Dios a singa malapati. (Lucas 3:22) Say espiritu nen Jehova so ‘nanayam ed tapew’ nen Jesus, tan saya so pinaneknekan to sanen sikatoy kinmiwas a walaay kakabatan, pakatalos, simbawa, inkabiskeg, tan pikakabat. Agaylan ekselente iran kalidad parad sakey a manuley!

7. Anto so insipan nen Jesus ed saray matoor a patumbok to?

⁷ Saray patumbok met nen Jesus so makaawat na masanton espiritu. Diad sakey ed saray diskurso nen Jesus et oniay inyabawag to: “No sikayo sirin, anta mauges kayo, amta yo so mangiter na saray maong a panangaro ed saray anak yo agkasi nagkalalo a say Ama yo a mangatatawen mangiter na espiritu santo ed saray onkerew ed sikato?” (Lucas 11:13) Kanian agtayon balot komon masuyat ya onkerew ed Dios na masanton espiritu, nisay ontundan mamayubo ed maabig iran bunga na satan, salanti, say “aro, liket, deen, kasungdoan, kauyamoan, kaabigan, sisia, tayadno, dangka.” (Galacia 5:22, 23) Insipan nen Jehova ya ebatan to so kerew na saray patumbok nen Jesus parad ‘kakabatan a manlapud tagey’ pian natulongan iran matalonan mangarap ed saray problema ed bilay.​—Santiago 1:5; 3:17.

8. Panon a panggagayagaan nen Jesus so takot ed si Jehova?

⁸ Anton takot ed si Jehova so impatnag na Mesias? Maseguron si Jesus so agnatatalagnaw ed Dios, a natatakot ed panangondena to. Imbes, say Mesias so walaan na mapagalang a takot ed Dios, a walaan na maaron panangigalang ed sikato. Say sakey a toon matakot ed Dios et lawas a kaliktan ton ‘gawaen so saray bengatla a makapaliket ed sikato,’ a singa ginawa nen Jesus. (Juan 8:29) Imbangat nen Jesus, panamegley na salita tan ehemplo, ya anggapo lay babaleg a gayaga nen say panakar ya inagew-agew diad maabig a takot ed si Jehova.

Sakey a Matunong tan Mapangasin Ukom

9. Anton alimbawa so impanengneng nen Jesus ed saramay apabtangan a mangukom ed saray pamaakaran diad loob na Kristianon kongregasyon?

⁹ Intuloy nin impasakbay nen Isaias iray walna na Mesias: “Agnaani mangukom unong ed pakanengneng na saray mata to, agmet mangigeter unong ed pakadngel na saray layag to.” (Isaias 11:3b) No sika so onarap ed sakey a korte, agka kasi misalsalamat ed ontan ya ukom? Lapud kapasidad to bilang Ukom na amin a katooan, say Mesias so agnisuawi na palso iran argumento, masilib iran taktika ed korte, saray dengel-dengel, odino ataptapew iran sengegan, a singa say kayamanan. Nalikas to so panamalikdo tan nanengneng to so mas nen say agpaborablin akinpaway iran itsura, a natebek to so “sekreton inkatoo na puso,” “say niamot ya inkatoo.” (1 Pedro 3:4, NW, paimano’d leksab) Say sankatalonggaringan ya alimbawa nen Jesus so onkanan ehemplo parad amin ya apabtangan a mangukom ed saray pamaakaran diad loob na Kristianon kongregasyon.​—1 Corinto 6:1-4.

10, 11. (a) Diad anton paraan a baaten nen Jesus iray patumbok to? (b) Anton panangukom so ipaakseb nen Jesus ed marelmeng?

¹⁰ Panon a naimpluensyaan na sankatalonggaringan iran kalidad na Mesias iray hudisyal a desisyon to? Oniay insalaysay nen Isaias: “Dia ed kaptekan ukomen to so duka, tan mangigeter a situtunong nipaakar ed saray mauyamo ed dalin; et bakbaken to so dalin ed pekpek na sangi to; et lapu ed panlinawa na saray bibil to pateyen to so marelmeng. Et say kaptekan sikato naani so balkes na awak to, tan say katooran so balkes na saray banel to.”​—Isaias 11:4, 5.

¹¹ Sano kaukolan na saray babangatan to so panamaat, satan so iter nen Jesus diad paraan a  mangunggonan tuloy ed sikara​—sakey ya ekselentin ehemplo parad saray Kristianon mamatatken. Diad biek a dapag, saramay mangaagamil na kaugsan so makapantalaran ed ambelat a panangukom. Sano mikuentaan la so Dios ed sayan sistema na bengabengatla, say Mesias so ‘mamakbak ed dalin’ panamegley na makapanyarin boses to, a mangipaakseb na panangukom na kadederal parad amin a marelmeng. (Salmo 2:9; ikompara so Apocalipsis 19:15.) Agmanbayag, anggapo lay natilak a marelmeng a totoo a manigensigen ed kareenan na katooan. (Salmo 37:10, 11) Si Jesus, ya abalkesan so awak tan banel to na kaptekan tan katooran, so walaan na pakayarin manumpal ed saya.​—Salmo 45:3-7.

Anguman Iran Kipapasen Diad Dalin

12. Antoray nayarin pampagaan na sakey a Judio sano maniisip ya ompawil ed Insipan a Dalin manlapud Babilonia?

¹² Isipen pay sakey ya Israelitan kaam-amta to ni labat ed ganggan nen Ciro ya ompawil la ray Judio ed Jerusalem tan ipaalagey da lamet so templo. Kasin taynan to so kaligenan ed Babilonia pian manbaroy na arawi a pasempet? Legan na 70-taon ya inkaandi na Israel, saray ataynan ya uma so nagmaliw lan marika-rika. Saray lobo, leopardo, leon, tan oso so bulos lan manaakar-akar ed saratan ya uma. Manaayam met ditan iray kobra. Saray ompawil a Judio so kaukolan a mandependi ed saray ayayep pian nabilay​—saray pulok tan papastolan so mangitarya na gatas, kawesen, tan karne tan saray baka so pambaka. Kasin magmaliw a biktima iraya na saray atap ya ayep? Kasin ketketen na saray uleg iray ugugaw? Komusta so peligro a sikaray natambangan sano manbabaroy?

13. (a) Anto so makapaligsay-puson inlitrato nen Isaias? (b) Panon tayon amta a say kareenan ya indeskribe nen Isaias et lalanoren to so nagkalalo nen say inkaligen manlapud saray atap ya ayep?

¹³ Dedeskribien natan nen Isaias so makapaligsay-puso iran kipapasen ya itarok na Dios ed bansa. Inkuanto: “Say lobo miayam naani ed kordero, tan say leopardo miakdol naani ed kanding; et say kilaw na baka tan kilaw na leon tan say pinataba mantitipon ira; et sakey a melag ya ugaw so mangitonton ed sikara. Et say baka tan say oso mankabkab ira naani; saray kilaw da ondukol ira a mantitipon; et say leon mangan naani na dayami a singa say baka. Et say mansuso ya ugaw manggalaw naani ed abot na uleg ya aspid, tan say pinakso ya ugaw ikaot to naani lima to ed balaong na tadyuko. Ag-ira naani mamaunong odino mamagbag dia ed amin a masanto a palandey ko; ta say dalin napano naani ed pikakabat ed Jehova, singa saray danum sakbongan da so dayat.” (Isaias 11:6-9) Agta makapaligsay puso irayan salita? Imanoen a say kareenan a deneskribe dia so resulta na pikakabat ed si Jehova. Kanian, mas ni so nalalanor nen say inkaligen manlapud saray atap ya ayep. Say pikakabat ed si Jehova so agmamasimbalo ed ayayep, balet satan so mangapekta ed totoo. Agla kaukolan ya ontakot iray Israelita ed saray atap ya ayep odino ed saray singa-ayep a totoo diad isempet da odino diad nipawil a bansa ra.​—Esdras 8:21, 22; Isaias 35:8-10; 65:25.

14. Anto so babaleg a kasumpalan na Isaias 11:6-9?

¹⁴ Balet, sayan propesiya so walaan na babaleg a kasumpalan. Nen 1914, si Jesus, say Mesias, so nitrono ed mangatatawen a Palandey Sion. Nen 1919 saray akeraan na “Israel na Dios” so nibulos manlapud Binababilonian inkakautibo tan akibiang ira diad panangipawil ed tuan panagdayew. (Galacia 6:16) Bilang resulta, alukasan so dalan parad modernon-agew a kasumpalan na propesiya nen Isaias nipaakar ed Paraiso. Say “suston pikakabat,” say pikakabat nen Jehova, so anguman ed saray personalidad. (Colosas 3:9, 10, NW) Saray totoon datin marawal so nagmaliw lan mareen. (Roma 12:2; Efeso 4:17-24) Sarayan inyaligwas so angapekta natan ed saray minilyon lapud kabiangan ed propesiya nen Isaias so maples ya idaraak na Kristianos a walaan na mangaraldalin ya ilalo. (Salmo 37:29; Isaias 60:22) Naaralan na saraya so mantalaran ed panaon sano say interon mundo so nipawil la bilang maligen tan mareen a paraiso, unong ed orihinal a gagala na Dios.​—Mateo 6:9, 10; 2 Pedro 3:13.

15. Kasin makatunongan ya ilaloan tayo a walaan na literal a kasumpalan iray salita nen Isaias diad balon mundo? Ipaliwawa.

¹⁵ Diad satan a nipawil a Paraiso, kasin say propesiya nen Isaias so walaan na kaaruman, a nayarin mas literal nin kasumpalan? Ompatnag a makatunongan so panisip na ontan. Iiter na propesiya ed amin a manbilay ed silong na uley na Mesias so ontan met a panamaseguro a niiter ed saray ompapawil ya Israelita; sikara tan saray ilalak da so agnasesga a sakitan na anggan anto​—too man odino ayep.  Diad silong na uley na Panarian na Mesias, panggayagaan na amin a manaayam ed dalin so mareen iran kipapasen a singa samay nanggayagaan di Adan tan Eva diad Eden. Siempre, ag-ibabaga na Kasulatan so kada detalye ed no anto so bilay diad Eden​—odino no anto so bilay diad Paraiso. Balet, makapanmatalek itayo a diad silong na makabat tan maaron uley na Arin Jesu-Kristo, amin a bengatla so wala’d kinepeg to.

Nipawil so Tuan Panagdayew Panamegley na Mesias

16. Anto so kinmana bilang tanda parad totoo na Dios nen 537 K.K.P.?

¹⁶ Inmunan inataki so tuan panagdayew diad Eden sanen matalonan inimpluensyaan nen Satanas si Adan tan Eva ya ontunganga ed si Jehova. Anggad sayan panaon, si Satanas so agni sinmuko ed kalat ton pabenegen so dakel anggad posibli manlapud Dios. Balet agbalot abuloyan nen Jehova a naandi so tuan panagdayew ed dalin. Nalalanor so ngaran to, tan inaro to iramay manlilingkor ed sikato. Kanian diad panamegley nen Isaias et makatantandan insipan to: “Nagawa dia ed satan ya agew, a say lamot nen Jesse, ya akaalagey a nipaakar a tanda na saray baley, sikato so anapen na saray nasyon; et say panagpainawaan to a pasen sikato naani magaygayaga.” (Isaias 11:10) Nen 537 K.K.P., say syudad a Jerusalem a ginawa nen David a kabisera na nasyon, so kinmana bilang tanda, a manatawag ed matoor a nakdaan na saray nikaykayat a Judio ya ompawil tan ipaalagey lamet so templo.

17. Panon a ‘binmangon si Jesus pian manuley ed nasyones’ diad inmunan siglo tan diad panaon tayo?

¹⁷ Balet, mas ni nen say satan so tutukoyen na propesiya. Unong ed naimano tayo la, satan so manutukoy ed uley na Mesias, say sakey a peteg a Lider parad totoo na amin a nasyones. Si apostol Pablo so angaon ed Isaias 11:10 pian ipanengneng a diad panaon to et saray totoo ed nasyones so nawalaan na pasen diad Kristianon kongregasyon. Bilang pangaon ed patalos na Septuagint ed sayan bersikulo, oniay insulat to: “Inkuan nen Isaias: ‘Wala naani so lamot nen Jesse, tan wala so ombangon a manuley ed nasyones; diad sikato so panilaloan na nasyones.’” (Roma 15:12) Niarum ni, say propesiya et linmaknab ni​—anggad panaon tayo sano saray totoo na nasyones so mangipatnag na panangaro ra ed si Jehova diad panusuporta ed alanaan ya agagi na Mesias.​—Isaias 61:5-9; Mateo 25:31-40.

18. Diad panaon tayo, panon a nagmaliw si Jesus a sentron pantutugyopan?

¹⁸ Diad modernon-agew a kasumpalan, “satan ya agew” a tinukoy nen Isaias so ginmapo sanen say Mesias so nitrono bilang Ari na mangatatawen a Panarian na Dios nen 1914. (Lucas 21:10; 2 Timoteo 3:1-5; Apocalipsis 12:10) Manlapu la’d saman, si Jesus so nagmaliw a malinew a tanda, sakey a sentron pantutugyopan, parad espiritual ya Israel tan parad totoo na amin a nasyones a manpipirawat ed matunong a gobierno. Diad silong na panangiwanwan na Mesias, say maong a balita na Panarian so nipasabi ed amin a nasyones, unong ya impasakbay nen Jesus. (Mateo 24:14, Marcos 13:10) Sayan maong a balita so walaan na mabiskeg ya epekto. “Sakey a baleg ya ulop, a sikato so agnayari a bilangen na too a nanlapu ed balang nasyon” so manpapasakop ed Mesias panamegley na piuulop da ed alanaan a nakdaan diad puron panagdayew. (Apocalipsis 7:9) Legan a dakel a balo ni so mantutultuloy a mililimog ed nakdaan diad espiritual ya “abung [nen Jehova] a panagpikasian,” sikaray niaarum a dayew ed ‘panagpainawaan a pasen’ na Mesias, say baleg ya espiritual a templo na Dios.​—Isaias 56:7; Aggeo 2:7.

Nankakasakey a Totoon Manlilingkor ed si Jehova

19. Diad anton duaran inkagawa ya impawil nen Jehova so nakdaan na totoo to a nikaykayat diad interon dalin?

¹⁹ Sinmublay ya impanonot nen Isaias ed saray Israelita ya aminsan nensaman et inliktar ira nen Jehova sanen say nasyon so papairapen na mabiskeg a kabusol. Satan a kabiangan na awaran na Israel​—say impangibulos nen Jehova ed nasyon manlapud inkakautibo diad Ehipto​—so papablien na amin a matoor a Judio. Insulat nen Isaias: “Nagawa dia ed satan ya agew, a say Katawan ipasen to so lima to lamet ed komadua a danay pian nabawi to so nakdaan ed baley to, saray natilak naani, manlapud Asirya, tan manlapu ed Ehipto, tan manlapu ed Patros, tan manlapu ed Kus, tan manlapu ed Elam, tan manlapu ed Sinar, tan manlapu ed Hamat, tan manlapu ed saray polo ed dayat. Et mangipaalagey naani na tanda nipaakar ed saray nasyon, tan tiponen to so saray nibantak a manlapu ed Israel, tan tiponen to so saray asiyansiyan ed Juda a manlapu ed saray apatiran  suyok na dalin.” (Isaias 11:11, 12) Iwanwan nen Jehova so matoor a nakdaan na Israel tan Juda, a singa to ra itatabin, ya ompaway manlapud saray nasyon a nikaykayatan da tan maligen to iran isempet. Diad melag a kasumpalan, saya so agawa nen 537 K.K.P. Balet, agaylan nagkalalon magloria so baleg a kasumpalan! Nen 1914, pinatalindeg nen Jehova so nitronon si Jesu-Kristo bilang “tanda nipaakar ed saray nasyon.” Nanlapu la nen 1919, saray nakekeraan na “Israel na Dios” so ginmapon dinmagup ed sayan tanda, a magunaet a mibiang ed puron panagdayew diad silong na Panarian na Dios. Sayan nikaduman espiritual a nasyon so nanlapu “ed balang kailalakan, tan salita tan baley tan nasyon.”​—Apocalipsis 5:9.

20. Anton pankakasakey so panggayagaan na totoo na Dios diad ipawil da manlapud Babilonia?

²⁰ Natan et deneskribe nen Isaias so pankakasakey na nipawil a nasyon. Oniay inkuan to diad panutukoy ed mamaamianen a panarian bilang Efraim tan ed mamaabalaten a panarian bilang Juda: “Say siblet met na Efraim onandi, tan saray amairap ed Juda napegpeg ira: say Efraim agto naani sibletan so Juda, tan say Juda agto met naani pairapen so Efraim. Et ontekkiab ira ed tapew na abala na saray Filisteo ed dapit sagur; mantitipon a samsamen da so saray anak na bukig: yunat da so lima ra ed tapew na Edom tan Moab; et sikara so unoren na saray anak nen Amon.” (Isaias 11:13, 14) Sano ompawil iray Judio manlapud Babilonia, ag-ira la naapag lamet bilang duaran nasyon. Amin a membro na saray tribu na Israel so ompawil a mankakasakey ed dalin da. (Esdras 6:17) Agla ra manimbel tan mankokolkol ed balang sakey. Bilang nankakasakey a totoo, sikara so matalonan ontalindeg sumpad kakabusol da diad kaliberliber a nasyones.

21. Panon a peteg a matalonggaring so pankakasakey na totoo na Dios natan?

²¹ Say nagkalalo nin makapadinayew et say pankakasakey na “Israel na Dios.” Panggagayagaan la na 12 simbolikon tribu na espiritual ya Israel diad loob la na ngalngali 2,000 a taon so pankakasakey a nibase ed panangaro ed Dios tan ed agagi ra’d espiritual. (Colosas 3:14; Apocalipsis 7:4-8) Natan, panggagayagaan na totoo nen Jehova​—namparan say espiritual ya Israelitas tan saramay walaan na mangaraldalin ya ilalo​—so kareenan tan sankamundoan a pankakasakey diad silong na uley na Mesias, saray kipapasen ya agnaeeksperiensya na saray iglesia na Kakristianoan. Saray Tastasi nen Jehova so walaan na nankakasakey ya espiritual a samben sumpad saray sagpot nen Satanas a mangamper ed panagdayew da. Bilang nankakasakey a totoo, susumpalen da so ganggan nen Jesus ya ipulong tan ibangat so maong a balita na Panarian na Mesias diad amin na saray nasyon.​—Mateo 28:19, 20.

Saray Babeng so Natalonaan

22. Panon a ‘putoten nen Jehova so dila na dayat na Ehipto’ tan ‘yayag so lima to ed Ilog’?

²² Dakel iray literal tan piguratibon babeng a mangamper ed ipawil na Israelitas manlapud impakadestiero. Panon irayan natalonaan? Inkuan nen Isaias: “Si Jehova sigpot a bagbagen [“putoten,” NW] to so dila na dayat na Ehipto; et lapu ed panamegley na makakalot a dagem yayag to so lima to ed tagey na Ilog, tan sikato so kabilen to a pankapitoen a kulos, tan gawaen to so totoo a manakar ed kamagaan.” (Isaias 11:15) Si Jehova so mangekal ed amin a pakasbelan ed ipawil na totoo to. Anggan say babeng a makapataktakot a singa say dila na Ambalangan Dayat (singa say Gulpo na Suez) odino singa say agnadalan ya abalbaleg ya Ilog Eufrates so namaga, a singa panangibaga, pian makabaliw so too ya agla anggan mangekal na sandalyas to!

23. Diad anton paraan a ‘wala naani maawang a kalsada a manlapu ed Asirya’?

²³ Diad panaon nen Moises, nanggaway paraan si Jehova pian makapaway so Israel ed Ehipto tan mamaarap ira ed Insipan a Dalin. Ontan met so gawaen to natan: “Wala naani pulong [“maawang a kalsada,” NW] a nipaakar ed saray nakdaan ed baley to, a natilak ira, a manlapu ed Asirya; singa say wala nensaman nipaakar ed Israel dia ed agew ya intatdang to a nanlapu ed dalin na Ehipto.” (Isaias 11:16) Iwanwan nen Jehova iray ompapawil ya adestiero a singa ira manaakar ed maawang a kalsada manlapud pasen na impakadestieroan da ya anggad nianakan dan dalin. Salien na saray onsusumpa a patundaen ira, balet say Dios da a Jehova so ontulong ed sikara. Saray alanaan a Kristiano tan saray kaulop da natan so nipapaarap met ed maruksan panangataki, balet makmakpel iran onaabanti! Pinmaway la ra manlapud modernon Asirya, say mundo nen Satanas, tan tutulongan daray arum a manggawa met na ontan. Amta ra a say puron  panagdayew so ontalona tan ombulaslas. Aliwa itan a kimey na too, noagta kimey na Dios.

Magnayon a Gayaga Parad Saray Uuleyan na Mesias!

24, 25. Antoran balikas na panangidayew tan pisasalamat so ikelyaw na totoo nen Jehova?

²⁴ Diad magayagan panagsalita, idedeskribe natan nen Isaias so panlikliket na totoo nen Jehova lapud kasumpalan na salita To: “Dia ed satan ya agew ikuan mo, Misalamat ak ed sika, O Jehova; ta anggan asanokan ka lapud siak, say sanok mo inmandi, tan niligliwa moak.” (Isaias 12:1) Pirmi so impanisiplina nen Jehova ed bangar a totoo to. Balet asumpal so gagala na satan a paabigen so siglaotan na nasyon ed sikato tan ed pangipawil ed puron panagdayew. Pinaseguroan lamet nen Jehova iray matoor a managdayew to a diad kaunoran et iliktar to ra. Agpankelawan no akin ya imbalikas day pisasalamat da!

²⁵ Saray nipawil ya Israelita et sigpot dan pinaneknekan so panagmatalek da ed si Jehova, tan inkelyaw da: “Nia, say Dios sikato so Manangilaban ko; manilalo ak, tan agak antakot; ta si [“Jah,” NW] Jehova, si Jehova lambengat, sikato so kasil ko tan kantak; et sikato so nagmaliw a manangilaban ko.” (Isaias 12:2, 3) Say Hebreon salita a nipatalos a ‘kanta’ diad bersikulo 2 so mankabaliksan met na “melodya” tan “dayew.” Saray managdayew so kinmelyaw ya anganta lapud kililiktar manlapud si “Jah Jehova.” Bilang pinatikey a porma na ngaran a Jehova, say “Jah” so inusar ed Biblia pian ipasabi so aralem a liknaan na panangidayew tan pisasalamat. Say pangusar ed balikas a “Jah Jehova”​—a dinoble so madibinon ngaran​—so mamapalalo ed panangidayew ed Dios ed atagtagey ni ingen a paraan.

26. Siopa so mangipapaamta natan ed saray pidedeneng na Dios diad limog na saray nasyon?

²⁶ Agniyamot na saray managdayew nen Jehova so gayaga ra. Impasakbay nen Isaias: “Dia ed satan ya agew ikuan yo, Misalamat kayo ed si Jehova, tawagan yo so ngaran to, ipaliwawa yo so saray gawa to ed nanleleetan na balbaley, uliten yo a say ngaran to nitandoro. Kantaan yo si Jehova; ta nanggawa na ankabli ran bengabengatla: saya komon so nakabatan na amin a dalin.” (Isaias 12:4, 5) Manlapu la nen 1919, saray alanaan a Kristiano​—a diad saginonor et tinulongan na saray ‘arum a karnero’ a kaulop da​—so ‘mangibebelyaw na karlangan na saman so angekal ed sikara ed kabilungetan, ta tinawag tora ed makapakelaw a silew to.’ Sikara so “apili a kapolian, . . . masantos a nasyon” a nibiig parad sayan gagala. (Juan 10:16; 1 Pedro 2:9) Iyaabawag na saray alanaan a say masanton ngaran nen Jehova so nipaatagey tan mibibiang ira diad pangipapaamta ed satan diad interon dalin. Iwawanwan da so amin a mandadayew ed si Jehova a manggayaga ed probisyon to parad kilalaban da. Satan so unong a singa inkelyaw nen Isaias: “Oningal tan onkelyaw ka, sika manaayam ed Sion; ta baleg dia ed pegley mo so Santo na Israel”! (Isaias 12:6) Say Santo na Israel et si Jehova a Dios a mismo.

Manilalo ed Arapen Tekep na Panagmatalek!

27. Legan ya aalagden na saray Kristiano so kagawa na iilaloan da, anto so panmamatalekan da?

²⁷ Natan et minilyon la so dinmagup ed “tanda na saray baley”​—si Jesu-Kristo a nitrono ed Panarian na Dios. Panggagayagaan da so pagmaliw ya uuleyan na satan a Panarian tan maliket iran akapikabat ed si Jehova a Dios tan ed say Anak to. (Juan 17:3) Aromog da so pirmin liket diad nankakasakey a Kristianon panlilimog da tan panggugunaetan dan pansiansiaen so kareenan a tanda na saray tuan lingkor nen Jehova. (Isaias 54:13) Lapud kombinsido ira a si Jah Jehova so Dios a manotoor ed saray sipan to, sikaray manmamatalek ed ilalo ra tan panggagayagaan da so panginabang ed satan ed arum. Balang sakey a managdayew nen Jehova so mantultuloy komon a mansagpot pian panlingkoran so Dios tan tulongan so arum a manggawa met na ontan. Ipapuso na amin komon iray salita nen Isaias tan manggayaga ed kilalaban panamegley na Mesias nen Jehova!

[Saray paimano ed leksab]

[Tepetepet Parad Panagaral]