Say Binmalitok a Ganggan​—Praktikal Itan

Anggaman momoriaen na maslak a totoo so Binmalitok a Ganggan bilang sakey a bangat nipaakar ed moral a nanlapud si Jesus, sikaton mismo so nankuan: “Say bangat ko agko kien, balet kien na angibaki ed siak.”​—Juan 7:16.

ON, say Manangigapo na imbangat nen Jesus, pati say akabatan bilang Binmalitok a Ganggan, et samay angibaki ed si Jesus, salanti, say Manamalsa, si Jehova a Dios.

Gagala la na Dios ed gapo ya amin a katooan so mantrato ed balang sinansakey unong ed labay dan pantrato ed sikara. Impanengneng to so sankaabigan ya ehemplo ed panagpaga parad pankaabigan na arum diad paraan na impamalsa to ed totoo: “Say Dios pinalsa to so too ed indengan ton dili, dia ed indengan na Dios sikato so pinalsa to; say laki tan say bii pinalsa to ra.” (Genesis 1:27) Kabaliksan na saya a maaron kikinlongan na Dios so totoo na sankatalonggaringan iran kalidad to a mismo pian napanggayagaan da so bilay a walaay deen,  liket, tan pantutunosan​—a posiblin diad ando lan ando. Say inter na Dios a konsiensia ra, sano nipasal a susto, so mangigiya ed sikara pian tratoen so arum diad paraan a labay dan pantrato ed sikaran mismo.

Tinmalona so Inkasiblet

Lapud say katooan so walaan na ontan lan abig a gapoan, anto so agawa? Diad simplin panangibaga, nagmaliw iran makapagula lapud inkasiblet da. Maslak a totoo so mikabisado ed salaysay na Biblia ed no anto so ginawa na inmunan sanasawa, unong a nikurit ed Genesis kapitulo 3. Lapud sinagyat ira nen Satanas, say mananumpa ed amin a matunong ya estandarte na Dios, sinisiblet ya impulisay di Adan tan Eva so pananguley na Dios a mas nilabay da so inka-independente tan dilin panagdesisyon. Say sinisiblet tan rebelyoson inkiwas da so aglabat nanresulta ed pirmin inkaperdi ra noagta manresulta met ed makapasinagem iran pansumpalan parad amin a magmaliw ya ilalak da. Satan so malinew a pamatnagan na makadesyang a resulta na say pangibaliwala ed bangat ya akabatan bilang Binmalitok a Ganggan. Bilang nansumpalan, “say kasalanan linmoob ed mundo lapu ed sakey a too, tan say patey lapu ed kasalanan; et say patey ed satan linma ed amin a too, ta amin nankasalanan.”​—Roma 5:12.

Anggaman impulisay na katooan diad intiraminte so maaron paraan nen Jehova a Dios, sikaray agto inkaindan. Alimbawa, inter nen Jehova so Ganggan to ed nasyon na Israel pian mangigiya ed sikara. Satan so angibangat ed sikara a tratoen so arum unong ed labay da a pantrato ed sikaran mismo. Say Ganggan so mangiwawanwan nipaakar ed panagtrato ed saray aripen, ulila, tan balo. Indatak na satan no panon ya asikasoen so kaso na panagpatey, panagkidnap, tan panagtakew. Saray ganggan nipaakar ed kalinisan so mangaasikaso ed bunigas na arum. Wala ni ingen iray ganggan nipaakar ed saray seksual a pamaakaran. Sinegek nen Jehova so Ganggan to diad impangibaga ed totoo: “Nepeg mo ya aroen so kaparam a too unong ed sikan dili,” say balikas ya inaon nen Jesus ed saginonor. (Levitico 19:18; Mateo 22:39, 40) Sasaglawien met na Ganggan so nipaakar  ed panagtrato ed saray sankaili diad limog na Israelitas. Oniay imbilin na Ganggan: “Say sakey a mibabaley [“sankaili,” NW] agmo papairapen: ta sikayo amta yo so puso na mibabaley, bangta sikayo met akibabaley kayo ed dalin ya Ehipto.” Diad arum a panangibaga, nepeg ya ipatnag na saray Israelita so mililiknan panangasi ed saray nalalames.​—Exodo 23:9; Levitico 19:34; Deuteronomio 10:19.

Sanlegan a sitotoor a tinmulok so Israel ed Ganggan, benendisyonan nen Jehova so nasyon. Diad silong na saray uley nen David tan Solomon, inmaligwas so nasyon tan saray totoo so nanliket tan napnek. Onia so ibabaga ed sikatayo na maawaran a salaysay: “Say Juda tan Israel sikara so dakel a singa say buer a wala ed gilig na dayat dia ed karakel a mangakan tan maniinum tan manliliket. Et say Juda tan say Israel manayam a matalek, balang sakey a too ed silongan na ubasan to tan higos to.”​—1 Arari 4:20, 25.

Makapaermen ta agnambayag so kareenan tan kaligenan na nasyon. Anggaman walaan ira na Ganggan na Dios, satan so ag-inunor na Israelitas; inabuloyan dan natalonaay inkasiblet so panagpaga ra ed arum. Saya, ontan met ed apostasya, so nanresulta ed kairapan da bilang indibidual tan bilang nasyon. Diad kaunoran, diad taon 607 K.K.P., inabuloyan nen Jehova iray taga-Babilonia a maneral ed panarian na Juda, say syudad na Jerusalem, tan anggan say marakdakep a templo diman. Anto so makasengeg? “Lapud no agyo dinengel so saray salitak, nia, mangibaki ak naani tan alaen ko saray amin a pamilya ed amianen, kuan nen Jehova, et mangibaki ak naani ed kinen Nabucodonosor ya ari na Babilonia, ya aripen ko, et yakar ko ra naani sumpa ed saya a dalin, tan sumpa ed saray manaayam ed sikato, tan sumpa ed saray amin a nasyon ed liberliber; et bagbagen ko ra naani a sigpot, tan gawaen ko ra naani a sakey a pankelawan, tan maando a kibalatar.” (Jeremias 25:8, 9) Agaylan nansumpalan lapud impangikaindan da ed puron panagdayew ed si Jehova!

Sakey ya Ehemplo ya Aligen

Diad biek a dapag, si Jesu-Kristo so aglambengat angibangat ed Binmalitok a Ganggan noagta impanengneng to met so sankaabigan ya ehemplo ed panangunor ed satan. Sikatoy petepeteg a nampaga ed pankaabigan na arum. (Mateo 9:36; 14:14; Lucas 5:12, 13) Aminsan, diad asingger ed syudad na Nain, anengneng nen Jesus so sakey a biin balo a maer-ermen diad tulor na alenleneg ya anak to. Onia so inkuan na salaysay na Biblia: “Nen sikatoy anengneng na Katawan, sikato so inabagey to.” (Lucas 7:11-15) Say balikas ya “inabagey,” unong ed Vine’s Expository Dictionary of Old and New Testament Words, so mankabaliksay “pakatenyeg na akindalem a liknaan na sakey.” Alikna nen Jesus so pirmin ermen na saman a balo, tan satan so amakiwas ed sikato a gawaen so positibon kundang pian pakepaen so sakit na liknaan to. Agaylay liket na saman a biin balo sanen pinaoli nen Jesus so balolaki tan “inyawa’to ed kinen ina to”!

Diad kaunoran, mitunosan ed gagala na Dios, mabulos a nanirap si Jesus tan inter to so bilay to bilang dondon pian nibulos so katooan manlapud panangaripen na kasalanan tan patey. Saya so matalonggaring ya ehemplo ed pambilay unong ed Binmalitok a Ganggan.​—Mateo 20:28; Juan 15:13; Hebreos 4:15.

Totoon Mangiyaaplika ed Binmalitok a Ganggan

Wala ni kasi iray totoon peteg a manbibilay unong ed Binmalitok a Ganggan diad panaon tayo? On, tan aliwan sano kombeniente lambengat. Alimbawa, legan na Guerra Mundial II diad Nazi Alemanya, binenbenan a malet na saray Tastasi nen Jehova so pananisia ra ed Dios tan say aro ra ed kaparan too tan agda inkompromiso so Binmalitok a Ganggan. Anggaman impaskar na Estado so kampanya nipaakar panamusol tan panangidumaduma sumpad amin a Judio, saray Tastasi so nantultuloy ya angunor ed Binmalitok a Ganggan. Anggan sanen sikaray wala ed saray panangipangawan a kampo, intultuloy dan inyansakit iray kapara ran totoo tan innabang da so tagano ra, anggaman makisir, ed saray Judio tan aliwan-Judio a narasan. Niarum ni, anggaman ingganggan ira na Estado a mamemben na armas pian pateyen so arum, agda itan ginawa, no panon ya agda labay a sikaray pateyen na arum. Panon a nitepel dan pateyen iraman so nepeg dan aroen a singa sikaran dili? Lapud agda intulok, dakel ed sikara so aglambengat inyakar ed saray panangipangawan a kampo noagta sikaray pinatey.​—Mateo 5:43-48.

Diad pamabasam ed sayan artikulo, nagunggonaan ka manlapud sananey nin alimbawa ed ikukurang  na Binmalitok a Ganggan. Momoriaen na saray Tastasi nen Jehova a natan et dakel so totoon manasagmak na inkaandian na ilalo tan inkapakaskasi. Lapud saya, boluntaryon onkikiwas a positibo iray Tastasi pian tulongan so arum a naaralan so nipaakar ed ilalo tan say praktikal a panangiwanwan a naromog ed Biblia. Kabiangan itan ya amin na sankagloboan ya edukasyonal a kimey a nagagawa la natan ed agnaparaan a laknab. Say resulta? Unong a nipropesiya ed Isaias 2:2-4, “dakerakel a baley,” a diad tua et masulok lan anemiran milyon ya indibidual ed interon mundo, so ‘nababangatan ed saray dalan nen Jehova tan manaakar ira ed saray basbas to.’ Diad piguratibon paraan et naaaralan da a ‘pitpiten so saray kampilan da tan pagmamaliwen da a dingding na lukoy, tan saray gayang da a komkompay.’ Naroromogan da so kareenan tan kaligenan anggaman ed sarayan magulon panaon.

Komusta Ka Balet?

Molimolien pan magano so nipaakar ed ot-ot tan kairapan a nitarok ed katooan lapud panangibaliwala ed Binmalitok a Ganggan nanlapu la’d impanrebeldi ed Eden, ya insugsog nen Satanas a Diablo. Gagala nen Jehova ya umanen so kipapasen diad maganon arapen. Panon? “Lapu ed saya pinmanengneng so Anak na Dios a maneral na saray gawa na Diablo.” (1 Juan 3:8) Saya so nagawa diad silong na uley na Panarian na Dios, panamegley na makabat tan makayarin si Jesu-Kristo, say sakey ya angibangat tan nambilay unong ed Binmalitok a Ganggan.​—Salmo 37:9-11; Daniel 2:44.

Onia so inkuan nen Arin David ed kadaanan ya Israel: “Tobonbalo ak nensaman, et natan masiken ak la: agko nin balot anengneng a say matunong et apaulyan, nisay saray bini to mipabpayabol na nakan. Amin ya agew sikato mapangasi tan mamabayes; et say bini to napapalar.” (Salmo 37:25, 26) Agka ta onabobon a maslak a totoo natan so manasamsam tan mangaanamot imbes a sikara so “mapangasi tan mamabayes”? Malinew, say pangunor ed Binmalitok a Ganggan so makapangitonton ed tuan kareenan tan kaligenan lapud tutulongan na satan so sakey a panggayagaan iray bendisyon natan tan diad arapen diad silong na Panarian na Dios. Paandien na Panarian na Dios so amin a kasibletan tan karelmengan diad dalin tan say abulok a ginaway-toon totontonen ed sayan peles a sistema so salatan na sakey a balon sistema a gawaen na Dios. Insan, amin a totoo so manggayagan manbilay unong ed Binmalitok a Ganggan.​—Salmo 29:11; 2 Pedro 3:13.

[Saray litrato ed pahina 4, 5]

Aglabat imbangat nen Jesus so Binmalitok a Ganggan noagta impanengneng to met so sankaabigan ya ehemplo ed panangagamil ed satan

[Saray litrato ed pahina 7]

Say pangunor ed Binmalitok a Ganggan so makapangitonton ed tuan kareenan tan kaligenan