Tepetepet Manlapud Saray Managbasa

Kasin say bilin na Dios a nikurit ed Jeremias 7:16 so mankabaliksan ya ag-ipikasi na saray Kristiano so toon pinaekal ed Kristianon kongregasyon lapud sikatoy agmagbabawin managkasalanan?

Kayari na impangiyabawag nen Jehova ed panangukom to sumpad agmatoor a Juda, oniay kuan to ed si Jeremias: “Agka manpikasi a nipaakar ed saya a baley, tan agmo met itagey so ingal mo odino pikakasi nipaakar ed sikara, ta agka met manggawa na pangyesel ed siak, ta agta ka naani denglen.”​—Jeremias 7:16.

Akin ya insebel nen Jehova ed si Jeremias so pangipikasi ed saray Israelita? Mabitar, lapud parungtalan ya impanumlang da ed Ganggan to. Sikara so parungtalan tan anggapoy baing a ‘mantatakew, mamapatey, tan mikakalugoran, tan mansasamba a sititila, tan manpapasob na insenso ed Baal, tan ontutumbok ed saray sananey a dirios.’ Kanian imbaga nen Jehova ed saray agmatoor a Judio: “Ibantak ta kayo naani a manlapu ed pakanengneng ko, singa impangibantak ko ed saray amin ya agi yo, say amin lanlamang a bini na Efraim.” Maseguron agmanepeg parad si Jeremias, odino ed siopaman, ya ipikasi ed si Jehova so pamawi ed panangukom To.​—Jeremias 7:9, 15.

Mitunosan ed saya, insulat nen apostol Juan so nipaakar ed manepeg a pikakasi ed Dios. Unona, impaseguro to ed saray Kristiano: “No mankerew itayo na bengatla unong ed linawa to, sikato dengelen to itayo.” (1 Juan 5:14) Insan, nipaakar ed pangipikasi ed arum, intuloy nen Juan: “No siopaman a too nanengneng to a mankakasalanan so agi to na kasalanan ya aliwan makapatey, mankerew, tan say Dios ikdan to na bilay a nipaakar ed saray mankasalanan na aliwa a makapatey [“mansumpal ed ipapatey,” NW]. Wala so kasalanan a makapatey; agko kuan a mankerew kayo a nisesengeg ed saya.” (1 Juan 5:16) Sinaglawi met nen Jesus so nipaakar ed kasalanan ya “agnaperdona,” salanti, kasalanan sumpad masanton espiritu.​—Mateo 12:31, 32.

Kabaliksan kasi na saya ya amin ya inekal ed  Kristianon kongregasyon lapud agmagbabawin impankasalanan da so akagawa la na saray kasalanan a “mansumpal ed ipapatey” tan sirin et ag-ira nepeg ya ipikasi? Aliwa met a kaukolan ya ontan lapud diad arum a kipapasen et saratan ya impakasumlang so aliwan kaskasalanan a mansumpal ed ipapatey. Diad tua, mairap a nibaga no saratan so “mansumpal ed ipapatey.” Sakey a kaslakan ya alimbawa et si Arin Manases na Juda. Sikato so angipaalagey na saray altar parad palson dirios, angibagat ed saray mismon ilalak to, angagamil na espiritismo, tan angiyan na imbolik iran talintao diad templo nen Jehova. Diad tua, ibabaga na Biblia a si Manases tan say totoo so ‘nanggawa na mauges a lalo nen say ginawa na saray nasyon a si Jehova binagbag to ed arap na saray anak na Israel.” Lapud sayan amin, si Jehova so anusa ed si Manases a sikatoy akagulonggulong a kinautibo diad Babilonia.​—2 Arari 21:1-9; 2 Awaran 33:1-11.

Kasin mansumpal ed ipapatey iray kasalanan nen Manases, anggaman ambelbelat iratan? Mabitar ya aliwan ontan, lapud oniay intuloy na salaysay nipaakar ed sikato: “Sanen wala ed kairapan, inanap to si Jehova a Dios to, tan nampaabeba na balbaleg ed arap na Dios na saray atateng to. Et nampikasi ed sikato; et sikato so akerewan, tan dinengel to so kerew to, tan inyakar to lamet ed Jerusalem ed nanarian to. Diad saman si Manases naamtaan to a si Jehova sikato so Dios.”​—2 Awaran 33:12, 13.

Sirin, agtayo nepeg so manhusgan tampol a say too so akagawa la na kasalanan a mansumpal ed ipapatey lapu lambengat ta sikato so inekal manlapud kongregasyon. Mankaukolan itan na panaon pian napatnagan so tuan kipapasen na puso na sakey a too. Diad tua, mabetbet a nasalambit a say sakey ed saray gagala na pandispelosip et pian makanonot a siansia so sakey a nankasalanan tan ilaloan a magbabawi tan manpataoli.

Lapud say too so anggapo la ed kongregasyon, antokaman a pananguman ed puso tan awawey to so naimano ya unona na saramay maapit ed sikato, a singa say kapareha odino saray kapamilyaan. Nayarin isipen na saramay makakaimano ed saratan a pananguman a say nankasalanan so ag-akagawa na kasalanan a mansumpal ed ipapatey. Nayarin napakiwas ira a mangipikasi ed sikato a makagamor komon na biskeg manlapud apuyanan a Salita na Dios tan onkiwas si Jehova parad say nankasalanan a mitunosan ed linawa To.​—Salmo 44:21; Eclesiastes 12:14.

Anggaman panisiaan na arum a mismon makakaimano ed magenap ya ebidensya a nagbabawi la so managkasalanan, nayarin aliwan ontan so kipapasen ed interon kongregasyon. Sikara so nawetwet, nagonigon, a nigapol ni ingen no narengel da so sakey a mangipikasi ed publiko ed biang na adispelosip. Lapud sayan rason, saramay napapakiwas a mangipikasi ed nankasalanan so nepeg a manggawa lambengat ed satan diad pribadon paraan, ya ipalima ed saray responsablin mamatatken diad loob na kongregasyon so antokaman nin resulta.

[Litrato ed pahina 31]

Say ambelat iran kasalanan nen Manases so aperdona sanen sikatoy nampaabeba ed arap nen Jehova

[Picture Credit Line ed pahina 30]

Pinawala manlapud Illustrirte Pracht-Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s