Nitatarok so Totoo ed Gilead Lapud Mabulos ya Awawey

NIWALA so Watchtower Bible School of Gilead pian ipasal iray dedikadon lalaki tan bibii parad panagmisionaryon serbisyo diad arum a bansa. Sioparay kualipikadon makapan-Gilead? Saramay walaan na mabulos ya awawey. (Salmo 110:3) Peteg ya apaneknekan itan nen Setyembre 8, 2001, sanen nangraduar so koma-111 a klase.

Arum ya estudyante ed satan a klase so mabulos lan anaynan ed pamilya ra, kakaaro ra, tan dilin bansa ra pian manlingkor ed lugar a babaleg so pankaukolan. Sanen ginawa ra so ontan, asubok day inkasikara no kasin nayarian day mangiyarunsa pian manayam ed duman kaliberliber. Alimbawa, inyuksoy nen Richer tan Nathalie iray kimey da pian onalis diad Bolivia, si Todd tan Michelle et diad Dominican Republic, tan si David tan Monique et diad sakey a bansa ed Asia pian nikayat so maong a balita na Panarian na Dios. Arum ya estudyante so akapanlingkor la diad Nicaragua, Ecuador, tan Albania.

Si Christy so apaseseg a manaral na lenguahen Español diad haiskul, ya akatulong pian naparaanan to so duay taon a panayam to diad Ecuador sakbay a miasawa. Arum so akilimog ed saray kongregasyon a manguusar na sankailin lenguahe diad dilin bansa ra. Bilang pangarap ed nikaduman angat, impatnag nen Saul tan si Priscilla so mabulos ya awawey diad impanseet dan napaaligwas so Ingles da sakbay iran linma ed eskuelaan.

Maples a linmabas so 20 a simban panangipasal parad misionaryo. Sinmabi so agew na pangraduar, tan apinengnengan na saray estudyante so kakaaro tan pamilya ra, a dinmengel ed makabat a simbawa tan saray makapaseseg a balikas na panamatanir.

Say tsirman na programa et si Theodore Jaracz, a nangraduar ed komapiton klase na Gilead School tan manlilingkor natan bilang membro na Mananguley ya Ulop na saray Tastasi nen Jehova. Impabitar na saray manangilukas a salita to so katuaan a bilang sakey ya organisasyon et ag-itayon balot sinmuawi ed gagala na pangipapasal ed saray estudyante diad Gilead, salanti say pangipulong ed maong a balita na Panarian diad amin a panaayaman a dalin. (Marcos 13:10) Say Gilead so mangikinlong ed saray kualipikadon estudyante pian nagawaan da iyan kimey a panagpulong ed lalon malaknab a paraan nen say agawaan da’d apalabas tan ed paspasen na mundo a nagkalautlan nakaukolan iray nipasal a misionaryo. Binilin nen Brother Jaracz iray estudyante ya usaren dan maong so naaralan da ed Gilead legan a miiba la ra natan ed saray misionaryon peles a manlilingkor ed 19 a bansa a nibakian na saray nangraduar.

Nipanpanaon a Panonot Parad Saramay Nangraduar

Tinmumbok so sakey a serye na saray paliwawa. Si William Van de Wall, a membro na Branch Committee ed Estados Unidos, so angipaliwawa ed teman “Inkaseseg ed Panagmisionaryo​—Sakey a Tanda na Saray Tuan Kristiano.” Inyapasakey to so imano ed ganggan a ‘manggawa na saray babangatan,’ a nikurit ed Mateo 28:19, 20, tan binilin to iray estudyante: “Aligen yo si Jesus, a sinumpal toy misionaryon asainmin to tekep na seseg tan entusiasmo.” Pian natulongan iray balon misionaryo a mantultuloy a maseseg ed panmisionaryo ra, sikaray pinaseseg to: “Tumboken so praktikal ya eskedyul; mantinien so maabig ya ugali ed personal a panagaral;  kabaten a naynay iray balon teokratikon pamaakaran; tan nodnonoten lawas iray rason no akin a wala kayo ed asainmin yo.”

Say tinmumbok ed programa et si Guy Pierce, sakey a membro na Mananguley ya Ulop. Tinibukel to so teman “Mantultuloy Yon Bayuboan so ‘Pakayari na Panagkatunongan Yo.’” (Roma 12:1, NW) Sikatoy angiter na praktikal a simbawa ed say nangraduar a klase, a pinaseseg to iran mangusar ed inter na Dios ya abilidad dan mannonot tan mankatunongan. “Mantultuloy yon dalepdepen so nipaakar ed ibabaga nen Jehova ed sikayo panamegley na Salita to. Saya so manalimbeng ed sikayo,” so inkuan to. (Uliran 2:11) Sinimbawa met nen Brother Pierce so klase ya agda ipipilit iray panmoria ra ta pian agda naamper so “pakayari na panagkatunongan” da. Sarayan nipanpanaon a panonot so seguradon makatulong sano saray nangraduar so manlilingkor la bilang misionaryo.

Insan imparungtal na tsirman so sakey ed saray instruktor ed Gilead, si Lawrence Bowen, ya angipaliwawa ed teman “Desidien ya Ag-aamtaen so Antokaman a Bengatla.” Impabitar to a mitunosan ed kimey nen apostol Pablo bilang misionaryo diad Corinto, sikato so “nandesidi ya agmangamta na antokaman a bengatla . . . likud ed si Jesu-Kristo, tan sikato et impasak.” (1 Corinto 2:2, NW)  Kabat nen Pablo a say sankabiskegan a puersa ed uniberso, say masanton espiritu, so manusuporta ed mensahe a pinmatnag ed interon Biblia: say kiyalangon na inkasoberano nen Jehova panamegley na insipan a Bini. (Genesis 3:15) Apaseseg so 48 ya estudyanten nangraduar pian aligen da si Pablo tan Timoteo tan pian ontalona ira bilang misionaryo, a maapit a manutumbok ed “uliran na saray maabig a salita.”​—2 Timoteo 1:13.

Say tema na kaunoran ed serye na manangilukas iran paliwawa et “Pablien so Pribilehyo Yo, a Langkap a Nanlapud Dios.” Si Wallace Liverance, say registrar ed Gilead School, so tinmulong ed saray nangraduar pian natebek da a saray pribilehyo ed panaglingkor so panangipatnag na agkanepegan a panangasi na Dios, aliwa a lapud kanepegan da itan odino nansagpotan da itan. Diad impangaon ed alimbawa nen apostol Pablo, oniay impabitar nen Brother Liverance: “Say impamili nen Jehova ed si Pablo pian magmaliw ya apostol to ed nasyones et agdenetermina unong ed saray kimey, pian ompatnag a si Pablo so awalaan na kanepegan ed satan ya asainmin odino manepeg itan parad sikato. Ag-itan mandedependi ed kinabayag la odino eksperiensya. Diad panmoria na too, nayarin ompatnag a si Bernabe so makatunongan a pilien. Satan so ag-ibabase ed personal ya abilidad; ompatnag a magmaong a manalita si Apolos nen say si Pablo. Sakey itan a panangipatnag na grasya na Dios.” (Efeso 3:7, 8) Pinaseseg nen Brother Liverance iray nangraduar ya usaren da so langkap da, odino pribilehyo ra ed panaglingkor, pian tulongan so arum a magmaliw a kakaaro na Dios tan pian makaawat met ira ed “langkap ya andi bayar na Dios say bilay ya andi-angga ed Kristo Jesus a Katawan tayo.”​—Roma 6:23.

Kayari na saya, indaulo nen Mark Noumair, sakey nin instruktor ed Gilead, so mabilabilay ya impisingbatan ed pigaran estudyante diad teman “Say Panagparaan so Mangitonton ed Maabig Iran Resulta.” (Uliran 21:5) Inyilustra na saray eksperiensya a sano say managpulong so manpaparaan a maong parad ministeryo, nagkalalo la no iparaan to so puso to, sikatoy nawalaan na puron interes ed totoo. Sikatoy aliwan ata-ata ed ibaga to. Imbes, sikatoy mansalita tan manggawa na saray bengatlan ontulong ed sikara ed espiritual. “Saya so tombok ed pagmaliw a matalonan misionaryo,” so impabitar nen Brother Noumair, ya imbase to ed mismon eksperiensya to bilang sakey a misionaryo diad Aprika.

Panaglingkor Bilang Misionaryo​—Makapnek a Karera

Ininterbio di Ralph Walls tan Charles Woody iray pigaran eksperiensyadon misionaryo, a wadman met ed Patterson Educational Center parad espisyal a panangipasal. Indanet na saray interbio a say aro ed totoo so mangitatarok na gayaga ed panaglingkor bilang misionaryo. Sakey itan a panamaseguro ed saray estudyante tan ed saramay pamilya tan kakaaro ra ya onderengel ed sarayan eksperiensyadon misionaryo legan dan insalaysay a mismo no akin a say panaglingkor bilang misionaryo so makapenek a karera.

Impresenta nen John E. Barr, a membro na Mananguley ya Ulop, so manunan paliwawa ed saman ya agew, ya apauloan na “Ikantaan Yo si Jehova na Sakey a Balo a Kanta.” (Isaias 42:10) Impabitar nen Brother Barr a say balikas a “sakey a balo a kanta” et amin-siam a pinmatnag ed Biblia. Intepet to, “Anto so nipaakar ed sayan balo a kanta?” Insan to inebatan: “Ipaparungtal na konteksto a say balo a kanta so kinanta lapud balo iran inaligwasan ed pangiyaabawag ed inkasoberano nen Jehova.” Pinaseseg to iray estudyante a mantultuloy a mibiang ed panganta na saray panangidayew ed matalonan Panarian na Dios diad pananguley na Mesianikon Ari, si Kristo Jesus. Sinaglawi nen Brother Barr a say naawat dan panangipasal diad Gilead so akatulong ed sikara pian natalosan a nagkalalo so nanduruman aspekto na sayan “balo a kanta” nen say kapiganman. “Indanet na sayan eskuelaan so pankaukolan a sikayoy ‘manganta’ na panangidayew ed si Jehova a mitunosan ed saray agagi yo inerman so laen yo; lawas yon bayuboan so pikakasakey ed arum diad saray asainmin yo.”

Kayarin inyawat ed saray estudyante iray diploma ra, binasa na pinagkasangiyan ed klase so sulat nipaakar ed masimoon a pisasalamat da parad naawat dan panangipasal diad Gilead.

Kasin nayarian yon palaknaben so serbisyo yo ed Dios tan nagawaan yo itan a lalon mabunga? No ontan, isekar yoy inkasikayo a singa ginawa na sarayan nangraduar ya estudyante. Saya so akatulong pian sikaray onkualipika parad lawak na panagmisionaryo. Naromogan so baleg a gayaga sano malikeliket tan mabulbulos ya iyopresi na sakey so inkasikato diad panaglingkor ed Dios.​—Isaias 6:8.

[Kahon ed pahina 21]

SARAY ESTADISTIKA NA KLASE

Bilang na saray nirepresentan bansa: 10

Bilang na saray bansan angiyasainan: 19

Bilang na saray estudyante: 48

Promedyon edad: 33.2

Promedyon taon ed katuaan: 16.8

Promedyon taon ed sigpot-panaon a ministeryo: 12.6

[Litrato ed pahina 22]

Koma-111 a Nangraduar a Klase na Watchtower Bible School of Gilead

Diad listaan ed leksab, saray dasig so anumeroan a manlapud arap a pabeneg, tan saray ngaran so akalista manlapud kawigi a manpakawanan ed kada dasig.

(1) Yeomans, C.; Toukkari, A.; Nuñez, S.; Phillips, J.; Dawkin, M.; Silvestri, P. (2) Morin, N.; Biney, J.; López, M.; Van Hout, M.; Cantú, A.; Szilvassy, F. (3) Williams, M.; Itoh, M.; Van Coillie, S.; Levering, D.; Fuzel,  F.; Geissler, S. (4) Yeomans, J.; Moss, M.; Hodgins, M.; Dudding, S.; Briseño, J.; Phillips, M. (5) López, J.; Itoh, T.; Sommerud, S.; Kozza, C.; Fuzel, G.; Moss, D. (6) Williams, D.; Dudding, R.; Geissler, M.; Morin, R.; Biney, S.; Cantú, L. (7) Dawkin, M.; Hodgins, T.; Levering, M.; Silvestri, S.; Van Hout, D.; Briseño, A. (8) Van Coillie, M.; Nuñez, A.; Kozza, B.; Sommerud, J.; Toukkari, S.; Szilvassy, P.