“Puyok na Matamatam a Pamuyok Mo na Matam”

SATAN a risita so inyopresi nen Jesu-Kristo ed inmunan-siglon Kristianon kongregasyon diad Laodicea, Asia Minor.

Inkuan nen Jesus: “Manaliw ka na . . . puyok na matamatam a pamuyok mo na matam, pian makanengneng ka.” Aliwan literal itan a sakit ed mata, noagta inkabulag ed espiritual a kaukolan a natambal. Saray Kristiano ed Laodicea so naimpluensiaan la ed say espiritu na maaligwas ed materyal a syudad a panaayaman da tan sikaray nagmaliw lan paspasaray nipaakar ed tuan espiritual iran pankaukolan da.

Diad impanaglawi a saya so sengegan na inkabulag da, oniay inkuan nen Jesus: “Sika kuan mo, Siak mayaman ak, tan akala ak na kaykayamanan, tan anggapo so kaukolan ko a bengatla; tan agmo kabat a sika sakey ka a pakaskasi tan makibot tan duka tan bulag tan labos-lakseb.” Anggaman agda nalilikas itan, saray membro na kongregasyon so mankakaukolan na ‘puyok na matamata’ a nagamoran lambengat no sikaray paibangat tan padisiplina ed si Jesu-Kristo. “Manaliw ka ed siak,” kuan nen Jesus.​—Apocalipsis 3:17, 18.

No panon a tua itan ed saramay taga-Laodicea, kaukolan a manalwar iray tuan Kristiano natan ya agbastabasta paiimpluensyaan, a nayarin diad agnaam-amtaan a paraan, ed materyalistiko tan mapaglet ed liket a kaliberliber da. Say risita pian napansiansia so mabunigas a panmoria ed espiritual so nipabitar ed simbawan: “Manaliw ka ed [si Jesus] na . . . puyok na matamatam a pamuyok mo na matam, pian makanengneng ka.”

Say makatantanda ed sayan ‘puyok na matamata’ et kaukolan itan a saliwen. Wala so nalalanor a pansagpot. Nepeg a nausar so panaon pian manaral tan mandalepdep ed Salita na Dios. Ipapaseguro na salmista ed sikatayo a sayan Salita “so malinlinew, liwawaan to so saray [espiritual a] mata.”​—Salmo 19:8.