Mamatatken​—Ipasal so Arum a Manakbat ed Awit

DIAD saray kongregasyon na Tastasi nen Jehova ed sankamundoan, wala so pankakkaukolan ed lalaki a makapanlingkor bilang manangasikaso. Wala so taloran rason ed sayan resulta.

Unona, susumpalen nen Jehova so sipan to a “say melag magmaliw naani a mabiskeg a nasyon.” (Isaias 60:22) Lapud agkanepegan a panangasi to, ngalngali sakey milyon a balon babangatan so abautismoan bilang Tastasi nen Jehova ed apalabas a taloran taon. Nakaukolan iray responsablin lalaki pian natulongan irayan balon abautismoan ya onaligwas ed Kristianon inkatakken.​—Hebreos 6:1.

Komadua, arum a nanlingkor bilang mamatatken ed loob na dakel a dekada so apilitan a mamawas ed sasakbaten dan responsabilidad ed loob na kongregasyon lapud itatakken odino problema ed bunigas.

Komatlo, walaray maseseg a Kristianon mamatatken natan a manlilingkor bilang membro na Hospital Liaison Committee, Regional Building Committee, odino Assembly Hall Committee. Diad arum a kipapasen et kinaukolan dan balansien so nanduruman responsabilidad da diad pangikban na arum ed saray responsabilidad da ed lokal a kongregasyon.

Panon a nakapet so pankakkaukolan na kaaruman a kualipikadon lalaki? Say tombok et say panangipasal. Papasesegen na Biblia iray Kristianon manangasikaso ya ipasal so “totoo a matoor, a sikara so manepeg a mangibangat met ed saray arum.” (2 Timoteo 2:2) Unong ed sakey a diksionaryo, say verb a “mangipasal” so mankabaliksan na “manbangat pian onnepeg, onkualipika, odino magmaliw ya onsiano.” Konsideraen tayo natan no panon so pangipasal na mamatatken ed arum a kualipikadon lalaki.

Tumboken so Alimbawa nen Jehova

Si Jesu-Kristo so maseguron ‘manepeg, kualipikado, tan onsiano’ ed kimey to​—tan agpankelawan itan! Sikato so impasal a mismo nen Jehova a Dios. Antoran sengegan so nanggawan epektibon tuloy ed sayan programa na panagpasal? Sinalambit nen Jesus so talora, unong a nikurit ed Juan 5:20: “Say Ama [1] aroen to so Anak, tan [2] ipanengneng to ed sikato so saray amin a bengatlan gawaen to lanlamang, tan [3] angkakabaleg a gawa nen saraya.” Say pangusisa ed kada sakey ed sarayan sengegan so mangitarya na aralem a pakatalos nipaakar ed panangipasal.

Imanoen so inmunan imbaga nen Jesus: “Say Ama aroen to so Anak.” Diad gapo na panamalsa, wala lay maapit a siglaotan nen Jehova tan say Anak to. Impabitar na Uliran 8:30 itan a relasyon: “Diad saman wala ak [si Jesus] ed abay to [nen Jehova a Dios], singa uloen a komikimey; tan siak nensaman so inagew-agew a panggayagaan to, a malikeliket lawas ed arap to.” Anggapoy duaruwa ed kanonotan nen Jesus a sikato so ‘panggagayagaan’ nen Jehova. Tan impatnag nen Jesus so gayagan alikna to legan a mankikimey ed dikingan nen Ama to. Agaylan abig no maapit tan maparungtal so siglaotan na saray Kristianon mamatatken tan saramay ipapasal da!

Say komaduan sengegan a sinalambit nen Jesus et “ipanengneng [na Ama] ed sikato so saray amin a bengatlan gawaen to.” Pepekderan na sarayan salita so imbaga na Uliran 8:30, salanti, si Jesus so ‘walad abay’ nen Jehova legan a napapalsa so uniberso. (Genesis 1:26) Nayarian na mamatatken a tumboken itan ya ekselentin alimbawa diad maapit a pikimey ed saray ministeryal a lingkor, ya ipanengneng ed sikara no panon dan sumpalen iray obligasyon da ed maabig a paraan. Balet, aliwan saray balon aturon ministeryal a lingkor lambengat so mankaukolan na tuloytuloy a panangipasal. Komusta balet iramay matoor ya agagin lalaki a manadampot ed pagmaliw a manangasikaso diad loob la na pigaran taon balet ta agni ra aturo? (1 Timoteo 3:1) Saray  mamatatken so nepeg a mangiyopresi na espesipikon simbawa ed saratan a lalaki ta pian naamtaan da no panon a paaligwasen iray sagpot da.

Alimbawa, say sakey a ministeryal a lingkor so nayarin napanmatalkan, onsasabi ed suston oras, tan maalwar ed panangasikaso ed saray obligasyon da. Nayarin sikato so maabig a managbangat. Diad dakel a pamaakaran nayarin ekselente so kimey to ed kongregasyon. Balet, nayarin agto namomoria a tendensia to so magasal a pidedeneng ed kaparan Kristianos. Nakaukolan ya ipatnag na mamatatken so “kaumildian a manlalapu ed kakabatan.” (Santiago 3:13, NW) Agta kaabigan diad biang na matatken no katongtongen to so ministeryal a lingkor, a malinew ton idalatdat so problema, mangiter na espesipiko iran alimbawa, tan manggawa na praktikal iran suhestion pian onaligwas? No say matatken et maalwar a ‘mangilaok na asin ed simbawa to,’ saray komento to so maseguron awaten. (Colosas 4:6) Siempre, gawaen na ministeryal a lingkor so kimey na matatken a mas maabig diad pagmaliw a lukas tan maawat ed antokaman a nisimbawa ed sikato.​—Salmo 141:5.

Diad arum a kongregasyon, saray mamatatken so mangitatarya na praktikal tan tuloytuloy a panangipasal ed saray ministeryal a lingkor. Alimbawa, itatagar daray kualipikadon ministeryal a lingkor sano ombisita ira ed mansasakit odino maedad la. Diad onian paraan, saray ministeryal a lingkor so makagamor na eksperiensya ed panagpastol a kimey. Siempre, dakel ni so nagawaan na sakey a ministeryal a lingkor pian lalon napaaligwas to so dilin espiritualidad to.​—Nengnengen so kahon ed leksab ya apauloan na “No Anto so Nagawaan na Saray Ministeryal a Lingkor.”

Say komatlon sengegan ya epektibon tuloy so inkipasal nen Jesus et si Jehova so angipasal ed sikato a sinononot ed arapen ya iyaaligwas. Inkuan nen Jesus nipaakar ed Ama ya ipanengneng to ed Anak so “angkakabaleg a gawa nen saraya.” Say eksperiensyan agamoran nen Jesus sanen wadiad dalin so tinmulong ed sikaton makabayubo ed saray kalidad a nakaukolan to pian nasumpal toray arapen ya asainmin. (Hebreos 4:15; 5:8, 9) Alimbawa, agaylan ambelat ya asainmin so magano lan awaten nen Jesus, salanti, say pamaoli tan pangukom ed binilyon a totoo ya inaatey la!​—Juan 5:21, 22.

Sano ipapasal iray ministeryal a lingkor, saray mamatatken natan so nepeg a sinononot ed arapen iran pankaukolan. Anggaman ompatnag a dakel so mamatatken tan ministeryal a lingkor a mangaasikaso ed kaplesan iran pankaukolan, ontan met kasi so kipapasen ed balobalo nin kongregasyon? Wala kasi so magenap no aporma so pigaran kongregasyon? Legan na apalabas a taloran taon, wala so masulok ya 6,000 a balon kongregasyon ed sankamundoan. Agaylan karakel a mamatatken tan ministeryal a lingkor so nakaukolan pian naasikaso iramay walad saray balon kongregasyon!

Mamatatken, kasin tutumboken yo so alimbawa nen Jehova diad pamayubo ed maapit a personal a siglaotan yo ed saray lalakin ipapasal yo? Kasin ipapanengneng yo ed sikara no panon so panumpal da ed kimey da? Kasin sinononot  kayo ed arapen iran pankaukolan? Say panumbok yo ed alimbawa nen Jehova diad impangipasal to ed si Jesus so manresulta ed mayaman a bendisyon ed karaklan.

Agmasuyat a Mangipabtang

Saray makayarin mamatatken a nipasal lan mamemben na dakel iran ambelat ya asainmin so nayarin masuyat a mangipabtang na pakauley ed arum. Nayarin sinali da la itan a ginawa ed apalabas balet ta agmakapnek iray resulta. Kanian nayarin aligen da so onian awawey, ‘No labay mon nagawan maabig so trabaho, kaukolan mon gawaen itan a mismo.’ Balet kasin mitunosan iyan awawey ed linawa nen Jehova, unong a nibalikas ed Kasulatan, a saray agtanton eksperiensyadon lalaki so ipasal na saramay mas eksperiensyado?​—2 Timoteo 2:2.

Adismaya si apostol Pablo sanen sakey ed saray managbiahen kakaiba to, si Juan Marcos, so angikaindan ed asainmin to diad Pamfilia tan sinmempet. (Gawa 15:38, 39) Balet, ag-inyabuloy nen Pablo a sikatoy nadismaya ed satan ya insaew manlapud pangipasal ni ed arum. Sikato so amili na sananey nin balolaki, si Timoteo, tan sikato so impasal to ed misionaryon kimey. * (Gawa 16:1-3) Diad Berea et asagmak na saray misionaryo so maruksan isusumpa kanian aliwa lan praktikal so pansiansia diman nen Pablo. Kanian impudir to so balon kongregasyon diad panangasikaso nen Silas, sakey a matakken lan agin laki, tan si Timoteo. (Gawa 17:13-15) Agpanduaruwaan ya akaaral a maong si Timoteo manlapud si Silas. Saginonor, sanen akaparaan la si Timoteo a mangawat na kaaruman a responsabilidad, sikato so imbaki nen Pablo ed Tesalonica pian pasesegen so kongregasyon diman.​—1 Tesalonica 3:1-3.

Say siglaotan nen Pablo tan Timoteo so aliwan ambetebetel. Wala so ampetang a siglaotan ed baetan dan dua. Sanen sinulat to so kongregasyon na Corinto, si Timoteo so tinukoy nen Pablo, ya implano to lan ibaki diman, bilang say “ana’ko ya inararok tan matoor ed Katawan.” Inyarum to ni: “[Si Timoteo] so mangipanonot ed sikayo ed saray dalan ko ed Kristo [Jesus].” (1 Corinto 4:17) Kinmiwas si Timoteo unong ed panangipasal a naawat to ed si Pablo, a nagmaliw a kualipikadon manumpal ed saray asainmin to. Dakel a kalangweran a lalaki so nagmaliw a makayarin ministeryal a lingkor, matatken, odino managbiahen manangasikaso ni ingen lapud agunggonaan ira ed panangipasal a naawat da manlapud manangiyansakit a mamasiken a walaan na peteg ya interes ed sikara, a singa ginawa met nen Pablo ed si Timoteo.

Mamatatken, Ipasal so Arum!

Petepeteg, say propesiya na Isaias 60:22 so nasusumpal natan. Si Jehova so manggagawa ed ‘melag a magmaliw a mabiskeg a nasyon.’ Ta pian mansiansian “mabiskeg” itan a nasyon, nepeg ya organisado itan a maong. Mamatatken, akin ya agnonoten iray paraan na kaaruman a pangipapasal yo ed dedikado iran lalaki a kualipikadon mangawat ed satan? Seguroen a kada ministeryal a lingkor et mikabisadon maong ed antokaman a nepeg ton paaligwasen pian ombulaslas. Tan sikayoran bautismadon agagin lalaki, anamoten yo so antokaman a personal ya atension a naaawat yo. Anamoten iray pankanawnawa pian napadaak so abilidad, pikakabat, tan eksperiensya yo. Seguradon bendisyonan nen Jehova so ontan a programa na maaron pananulong.​—Isaias 61:5.

[Paimano ed Leksab]

[Kahon ed pahina 30]

No Anto so Nagawaan na Saray Ministeryal a Lingkor

Anggaman saray mamatatken so nepeg a mangipasal ed saray ministeryal a lingkor, dakel ni so nagawaan na saray ministeryal a lingkor pian lalon onaligwas so espiritualidad da.

​—Nepeg a maseet tan napanpiyaan iray ministeryal a lingkor ed panangasikaso ed saray asainmin da. Nepeg met a bayuboan da so maong ya ugali ed panagaral. Diad malaknab a paraan, say iyaaligwas so akadependi ed panagaral tan panangiyaplika ed saray bengatlan naaralan.

​—Sano manparaan a manpaliwawa so sakey a ministeryal a lingkor diad Kristianon miting, sikatoy nepeg a mabulos ya onkerew na saray suhestion ed makayarin mamatatken no panon so pangipresenta ed materyal.

​—Nayari met a paobserbaan so ministeryal a lingkor ed sakey a matatken ed no panon so pangipaliwawa to ed Biblia tan pian naikdan na simbawa ed nepeg ton paaligwasen.

Nepeg a kerewen, awaten, tan iyaplika na saray ministeryal a lingkor so simbawa na mamatatken. Diad onian paraan, say ibubulaslas da so ‘ompatnag ed saray ganagana.’​—1 Timoteo 4:15.