Saray Makapagunggonan Epekto na Maong a Balita
Saray Makapagunggonan Epekto na Maong a Balita
“Si Jehova nilanaan to ak a mangipulong na saray maong a balita ed saray mauyamo imbaki to ak a mamedber ed puso a maermen, . . . a manligliwa ed amin a managogol.”—ISAIAS 61:1, 2.
1, 2. (a) Anto so imparungtal nen Jesus a pagmaliwan to, tan panon? (b) Antoran bendisyon so tarok na maong a balita ya inyabawag nen Jesus?
SAKEY ya agew na Sabaton ed kagapogapo na ministeryo to, si Jesus so walad sinagoga ed Nazaret. Unong ed kuritan, “initer da ed sikato so libro nen propeta Isaias. Et binuskag to so libro, tan aromog to so pasen a nisulatan na saya. Say espiritu na Katawan wala ed siak, ta nilanaan toak a mangipulong na saray maong a balita.” Intuloy ni nen Jesus a binasa so arum ni’d mapropetikon mensahe. Insan sikato so yinmurong tan inkuanto: “Natan ya agew asumpal ed kalayagan yo so sayan sulat.”—Lucas 4:16-21.
2 Diad onian paraan, imparungtal nen Jesus so inkasikato bilang nipropesiyan ebanghelisador, say manangipasabi na maong a balita tan manangitarok na ligliwa. (Mateo 4:23) Tan petepeteg a maong a balita so ipasabi nen Jesus! Oniay impaamta to ed saray onderengel ed sikato: “Siak so silew na mundo. Say ontumbok ed siak agmanakar ed kabilungetan, balet wala ed sikato so silew na bilay.” (Juan 8:12) Inkuanto met: “No mansiansia kayo ed salitak, sirin petepeteg a sikayo so babangatan ko; et nakabatan yo so katuaan, et say katuaan sikayo so gawaen to a bulos.” (Juan 8:31, 32) On, si Jesus so walaan na “saray salita na maando a bilay.” (Juan 6:68, 69) Say liwawa, bilay, kawayangan so maseguron pabpablien iran bendisyon!
3. Anton maong a balita so impulong na saray babangatan nen Jesus?
3 Kayari na Pentecostes 33 K.P., intuloy na saray babangatan so panag-ebanghelyon kimey nen Jesus. Impulong da so “ebanghelyo na panarian” diad saray Israelita tan ed totoo na saray nasyon. (Mateo 24:14; Gawa 15:7; Roma 1:16) Saramay kinmiwas so akapikabat ed si Jehova a Dios. Nibulos ira manlapud relihyoson inkaaripen tan nagmaliw iran kabiangan na balon espiritual a nasyon, say “Israel na Dios,” a saray membro na satan so walaan na ilalon manuley ya andi-anggaan diad tawen kaiba so Katawan da, si Jesu-Kristo. (Galacia 5:1; 6:16; Efeso 3:5-7; Colosas 1:4, 5; Apocalipsis 22:5) Saratan so mabmablin tuloy a bendisyon!
Say Panag-ebanghelyo Natan
4. Diad anton paraan a nasusumpal la natan so ganggan ya ipulong so maong a balita?
4 Natan, saray alanaan a Kristiano, a susuportaan na ondarakel a “baleg ya ulop” na “arum a karnero,” so tuloytuloy a manusumpal ed mapropetikon ganggan ya inmunan niiter ed si Jesus. (Apocalipsis 7:9; Juan 10:16) Bilang resulta, say maong a balita so nipupulong ed laknab ya agnin balot apamintuan. Diad 235 a daldalin tan teritorya, saray Tastasi nen Jehova so ‘mangipupulong na saray maong a balita ed saray mauyamo . . . , mamebedber ed puso a maermen, a mangiyaabawag na kawayangan ed saray dinakep, tan say kilukas na panangipangawan ed saray pinangaw; a mangiyaabawag na taon na panamalangkap nen Jehova, tan say agew na panangibales na Dios tayo; a manliligliwa ed amin a managogol.’ (Isaias 61:1, 2) Kanian, say Kristianon panag-ebanghelyon kimey so mantutultuloy a mangitatarok na saray makapagunggonan epekto ed karaklan tan puron ligliwa ed “saray wala ed bengatlan panermenan.”—2 Corinto 1:3, 4.
5. Nipaakar ed panangipulong ed maong a balita, panon a miduma iray Tastasi nen Jehova ed saray iglesia na Kakristianoan?
5 Tua ya ipapakurang na saray iglesia na Kakristianoan so nanduruman metodo na panag-ebanghelyo. Dakel so mangibabaki na saray misionaryo ed arum a dalin pian mangomberte. Alimbawa, irereport na The Orthodox Christian Mission Center Magazine so nipaakar ed kimey na saray misionaryon Orthodox diad Madagascar, abalaten ya Aprika, Tanzania, tan Zimbabwe. Balet, diad Orthodox Church, a singa ed arum niran iglesia na Kakristianoan, say karaklan ed saray membro ra so agmibibiang ed satan a kimey. Midumaan, amin a dedikadon Tastasi nen Jehova so manggugunaet a mibiang ed panag-ebanghelyo. Atalosan da a say panangiyabawag na maong a balita et pakapatnagan na inkapuro na pananisia ra. Inkuan nen Pablo: “Say too sisiaen to ed puso to so katunongan; tan say sangi so manggawa na panangipatua na onkana ed kilalaban.” Diad tua, say pananisia ya agmamapakiwas ed sakey et inatey.—Roma 10:10; Santiago 2:17.
Say Maong a Balitan Mangitatarok na Magnayon Iran Gunggona
6. Anton maong a balita so nipupulong natan?
6 Ipupulong na saray Tastasi nen Jehova so sankaabigan a balita. Bubukayen da iray Biblia ra tan ipapabitar da ed saray onderengel a si Jesus so angibagat ed bilay to pian ikdan so katooan na dalan a makaasingger ed Dios, pakaperdona na saray kasalanan, tan say ilalo ya andi-anggaan a bilay. (Juan 3:16; 2 Corinto 5:18, 19) Iyaabawag da a say Panarian na Dios so niletneg ed tawen diad silong na alanaan ya Ari, si Jesu-Kristo, tan satan so magano lan mangekal ed karelmengan manlapud dalin tan mangimaton ed kipawil na Paraiso. (Apocalipsis 11:15; 21:3, 4) Bilang kasumpalan na propesiya nen Isaias, papakabatan da iray kapara ran totoo a natan la so “taon na pamalangkap nen Jehova” a nayari nin onkiwas so katooan unong ed maong a balita. Ipapasakbay da met a magano lan onsabi so “agew na kababales na Dios tayo” sano itarok la nen Jehova so anggaan na saray agmagbabawin managgaway-mauges.—Salmo 37:9-11.
7. Anton eksperiensya so mangipapatnag ed pankakasakey na saray Tastasi nen Jehova, tan akin a panggagayagaan da so ontan a pankakasakey?
7 Diad mundon natatabek na trahedya tan desyang, saya so alenleneg a maong a balita a walaan na magnayon iran gunggona. Saramay mangawat ed satan so magmaliw a kabiangan na nankakasakey tan sankamundoan ya impanaagi na saray Kristiano ya agmangiyaabuloy ed pandurumaan na nasyon, tribu, tan ekonomya a mangapag ed sikara. ‘Ikakawes da so aro, ta satan so ayadyarin bedber na pankakasakey.’ (Colosas 3:14, NW; Juan 15:12) Saya so naimano nen imbeneg a taon diad sakey a bansa na Aprika. Sakey a kabuasan et aliing ed saray palakapak na paltog so kabiseran syudad. Peles a nagagawa so kudeta. Sanen akasentro la iray nagagawa ed saray isyun nipaakar ed etniko, asita so sakey a pamilyan Tasi lapud pamapatuloy da ed saray kaparan Tastasi a miduma so etnikon grupo ra. Inmebat so pamilya: “Tastasi nen Jehova labat so panaayamen mi diad abung mi.” Parad sikara et aliwan importante so etnikon pandurumaan; say Kristianon aro—a mangiiter na ligliwa ed saramay mankaukolan—so importante. Oniay inkomento na kanayon ya aliwan Tasi: “Saray membro na amin a relihyon so mangitatapat ed kapara ran managdayew. Saray Tastasi nen Jehova lambengat so agmanggagawa na ontan.” Ipapatnag na dakel niran mipadparan inkagawa a nireport diad saray bansan ginonigon na sibil a panlalaban a saray Tastasi nen Jehova so peteg a ‘mangaaro ed interon impanaagi.’—1 Pedro 2:17.
Uumanen na Maong a Balita Iray Totoo
8, 9. (a) Antoran pananguman so gagawaen na saramay mangaawat ed maong a balita? (b) Antoran eksperiensya so mangiyiilustra ed pakayari na maong a balita?
8 Say maong a balita so misiglaotan ed tinawag nen Pablo a “bilay a peles, tan say onsabi.” (1 Timoteo 4:8) Aliwa labat a makapakelaw tan seguradon ilalo ed arapen so iyoopresi na satan noagta mangitarok met itan na saray iyaaligwas ed “bilay a peles.” Bilang indibidual, saray Tastasi nen Jehova so igigiya na Salitay Dios, say Biblia, pian nitunos da ed linawa na Dios so kabibilay da. (Salmo 119:101) Say mismon personalidad da so apasimbalo diad pamabayubo ra ed saray kalidad a singa say inkatunong tan katooran.—Efeso 4:24.
9 Konsideraen so alimbawa nen Franco. Say problema to et sikatoy maisasanok. No walaray bengatlan agmitunosan ed panlabay to, sikato so onsanok tan mangibasigbasig ed saray kagawaan. Impaiyaralan so akulaw to ed saray Tastasi nen Jehova, tan say ehemplo ra bilang Kristiano so kalkalnan akatulong ed si Franco pian natebek to so pankaukolan a manguman. Sikato so impaiyaralan na Biblia tan diad saginonor et nipatnag to la iray bunga na masanton espiritu, salanti say kareenan tan dangka. (Galacia 5:22, 23) Sikato so sakey ed 492 ya abautismoan ed Belgium legan na 2001 a serbisyon taon. Konsideraen met si Alejandro. Sayan kalangweran so naadik ed druga a nagmaliw a mabanbanday so kipapasen to. Say pambibilayan to la et diad basuraan, a manaanap na bengatlan nilako pian pansuporta to ed pandrudruga to. Sanen sikatoy 22 años, si Alejandro so inopresian na saray Tastasi nen Jehova a manaral na Biblia, tan inawat to. Inagew-agew ton binasa so Biblia tan inatendian to iray Kristianon miting. Maples so impanguman to ed kabibilay to kanian diad loob na kulang ya anem bulan et sikato so akapibiang la ed panag-ebanghelyon kimey—sakey ed 10,115 ya akibiang ed satan a kimey nen imbeneg a taon diad Panama.
Say Maong a Balita—Makagunggona ed Saray Mauyamo
10. Siopa so onkikiwas ed maong a balita, tan panon a manguuman so panmoria ra?
10 Impropesiya nen Isaias a nipulong so maong a balita ed saray mauyamo. Siopa irayan mauyamo? Sikara imay adeskribe ed libro na Gawa bilang “tinandaan ed bilay ya andi-anggaan.” (Gawa 13:48) Saraya et mapaabeban totoo a naromog ed amin a kipapasen ed sosyedad a kinmiwas ed mensahe na katuaan. Naaralan na saratan a say panggawa ed linawa na Dios so pakagamoran na mas mayaman iran bendisyon nen say antokaman a bengatlan iyoopresi na sayan mundo. (1 Juan 2:15-17) Balet, panon a sasabien na saray Tastasi nen Jehova so kapusoan diad panag-ebanghelyon kimey da?
11. Unong ed si Pablo, panon a nepeg ya ipulong so maong a balita?
11 Bueno, konsideraen so alimbawa nen apostol Pablo, ya oniay insulat to ed saray taga-Corinto: “Agagi, sanen sinmabi ak ed sikayo, agak sinmabi ed kaatageyan na pananalita, odino dia ed kakabatan, a mangipakabat ed sikayo na panangasi Dios. Ta ninonot ko so agmangamta a balot ed sikayo, likud si Jesu-Kristo, tan sikato a nipasak.” (1 Corinto 2:1, 2) Agnanggunaetan nen Pablo a pandinayewen iray onderengel ed sikato panamegley na naaralan to. Say imbangat to lambengat et saray katuaan a petepeteg a nanlapud Dios, saray katuaan a nikurit natan ed Biblia. Imanoen met so panamaseseg nen Pablo ed kapara ton ebanghelisador a si Timoteo: “Ipulong mo so salita; manseet ka.” (2 Timoteo 4:2) Si Timoteo so kinaukolan a mangipulong ed “salita,” say mensahe na Dios. Insulat met nen Pablo ed si Timoteo: “Seetan mo a sikukuli so ompatnag a naabobonan ed arap na Dios, a singa tometeger ya anggapo so ibaing to, ya agamilen mo ed matunong so salita a tua.”—2 Timoteo 2:15.
12. Panon a tutumboken na saray Tastasi nen Jehova natan iray salita tan ehemplo nen Pablo?
12 Tinumbok na saray Tastasi nen Jehova so ehemplo nen Pablo, ontan met ed saray salita to ed si Timoteo. Binidbir da so pakayari na Salitay Dios tan inusar dan maong itan diad pangipapabitar da na matukoy iran salita na ilalo tan ligliwa ed kapara ran totoo. (Salmo 119:52; 2 Timoteo 3:16, 17; Hebreos 4:12) Tua, uusaren dan maong so literatura na Biblia ta pian nagamoran na saray interesado so nagkalalo nin pikakabat ed Biblia diad kombenientin paraan. Balet lawas dan ipapabitar ed totoo iray salita ed Kasulatan. Amta ra a say impuyan na Dios a Salita so mamakiwas ed kapusoan na saray mapaabeba. Tan say pangusar ed satan diad ontan a paraan so mamabiskeg ed mismon pananisia ra met.
‘Ligliwaen so Amin a Managogol’
13. Diad taon 2001, antoran agawgawa so amawala na malaklaknab a pankaukolan ya inabang so ligliwa ed saray managogol?
13 Walaray agawa met a desyang ed taon 2001, tan bilang resulta et dakel a totoo so mankaukolan na ligliwa. Nen imbeneg a Setyembre et naimatonan so matalonggaring ya alimbawa ed Estados Unidos, a ditan agawa so panangataki na saray terorista ed World Trade Center diad New York tan ed Pentagon diad asingger na Washington D.C. Agaylay inkatalagnaw na interon nasyon lapud saratan ya impangataki! Anggaman ed saratan ya agawgawa, nambanikelan na saray Tastasi nen Jehova a sumpalen so ganggan ed sikara a manginabang na ‘ligliwa ed amin a managogol.’ Iyilustra na pigaran eksperiensya no panon dan ginawa itan.
14, 15. Panon ya epektibon nausar na Tastasi ed duaran mandumaan ya inkagawa iray teksto pian ligliwaen iray maneermen?
14 Inasinggeran na sakey a Tasin sigpot-panaon ya ebanghelisador so sakey a biin walad gilig na dalan tan intepet to no anto so nikuan na bii ed agano nin impangataki na saray terorista. Akanangis so bii. Inkuanton panermenan ton maong itan tan pirawat to ya anggan panon et sikatoy makatulong. Imbaga na Tasi ed sikato ya interesadon tuloy so Dios ed sikatayon amin, tan imbasa to so Isaias 61:1, 2. Sarayan salita ya impuyan na Dios so ompatnag a makatunongan parad satan a bii, ya angikuan ed paneermen na balang sakey. Inawat to so sakey a tract tan kinerew to ed Tasi a sikatoy pasyaren to ed abung.
15 Duaran Tastasi ya akibiang ed panag-ebanghelyon kimey so akapitongtong ed sakey a lakin mantratrabaho ed puesto to. Impanengneng da ed sikato iray makaligliwan salita manlapud Kasulatan makasengeg ed agano nin trahedya ed World Trade Center. Sanen sikatoy inmabobon, binasa ra so 2 Corinto 1:3-7, a mangilaktip ed saray salitan: “Idaak na pakaligliwa . . . lapu ed Kristo.” Misalsalamat so laki lapud inanabang na Tasin kakaabay to so makapaligliwan bengatla ed arum tan inkuanto: “Komon ta bendisyonan na Dios so makapakelaw a kimey a gagawaen yo.”
16, 17. Anton duaran eksperiensya so mangipanengneng ed pakayari na Biblia ya ontulong ed saray indibidual a maneermen odino nagogonigon ed saray trahedya?
16 Sakey a Tasin manpapawil ed saray interesadon totoo so akapitongtong ed ilalak na sakey a biin datin angipatnag la na interes tan impaliwawa to a sikatoy mapaga ed kipapasen na saray kapara ton totoo kayarin agawa so agano nin trahedya. Mankelaw so too lapud ta impanaon na Tasi so ombisita ed totoo pian komustaen ira. Inkuanto a say pantratrabahoan to et asingsingger ed World Trade Center sanen agawa so inyataki tan naimatonan to so interon agawa. Sanen intepet to no akin ya inabuloyan na Dios so paniirap, binasa na Tasi iray bersikulo manlapud Biblia, ontan met ed Salmo 37:39, a kuanto: “Say kilalaban na saray matunong sikato so manlapu ed Jehova: sikato so biskeg da ed panaon na gulo.” Mapangasin kinomusta na laki so sankapamilyaan na Tasi, inimbitaan to ya ompawil, tan imbalikas to so impapuson apresasyon ed imbisita na Tasi.
17 Kaiba ed saray nilibon maneermen a niligliwa na saray Tastasi nen Jehova so sakey a biin akatongtong na saray Tastasi sanen ondadalaw ira ed saray kakaabay da, pigaran agew kayari na impangataki na saray terorista. Sikato so pirmin agonigon ed walan agawa tan sikatoy tinmalineng sanen binasa ra so Salmo 72:12-14: “Sikato iliktar to so naukolan no oney-ey, say makabos met, ya anggapo so mananulong ed sikato. Sikato ilagak to so makabos tan naukolan, tan ilaban to so kamarerwa na naukolan. Sikato dondonen to so kamarerwa ra a yarawi ed panamalingo tan panamasoot; et mabli naani dala ra ed mata to.” Agaylan makabkabaliksan iratan a salita! Impabasa lamet na bii ed saray Tastasi iray bersikulo tan inimbitaan to ra ed abung to pian ituloy so pantotongtong da. Nen mansumpal lay pantotongtong da, nigapo so panagaral na Biblia.
18. Panon ya akatulong so sakey a Tasi ed saray kapara ton totoo sanen inkerew da ed sikato ya idauloan to ra ed pikakasi?
18 Sakey a Tasi so mantratrabaho ed sakey a restawran ed medyo maasenson komunidad, a dati et agtanto interesado iray totoo ed maong a balita na Panarian. Kayari na inyataki na saray terorista, pinmatnag ya atalagnaw so komunidad. Diad samay Biernes kayari na inyataki, inimbitaan na manedyer na restawran so amin diad paway tan mamemben ira na kandila, pian manmolimoli a magano bilang pannodnonot ed saray biktima. Lapud marespeto ed liknaan da, pinmaway met so Tasi tan mareen ya inmalagey ed gilig na dalan. Amta na manedyer a sikatoy ministro na Tastasi nen Jehova, kanian kayari na aganon impanmolimoli, inkerew ed sikato na manedyer ya idauloan to ra ed pikakasi. Inmabuloy so Tasi. Diad pikakasi to, sinalambit to so paneermen na karaklan balet inkuanton saray maneermen et agla man-egagel ya andian na ilalo. Sinaglawi to so panaon sano naandi la iray makapasinagem a nagagawa tan inkuanto ya amin so lalon onapit ed Dios na ligliwa panamegley na suston pikakabat ed Biblia. Kayari na impangibagay “Amen,” say manedyer—a tinumbokan na masulok ya 60 a totoo a walad paway na restawran—so inmasingger ed Tasi, akisalamat, tan sikatoy nilakap to, ya inkuanto a satan so sankaabigan a pikakasin nadngelan to.
Maabig ya Epekto ed Komunidad
19. Anton eksperiensya so mangipatnag ya arum so mamibidbir ed atagey iran estandarte na saray Tastasi nen Jehova?
19 Nagkalalo la ed sarayan agew, agunggonaan iray komunidad ed aktibon kiwawala na saray Tastasi nen Jehova ed lugar da—unong ya inkomento na dakerakel. Agta magmaliw a makagunggonan impluensya so totoon mangiyaalibansa na deen, inkamatua, tan kalinisan ed moral? Diad sakey a bansa ed Sentral ya Asia, akatongtong na Tastasi so sakey a nanretiro lan opisyal na datin ahensya na state security. Inkuanto a sikatoy datin niasain a mangimbestiga ed nanduruman relihyoson organisasyon. Sanen inimbestigaan to iray Tastasi nen Jehova, sikato so nandinayew ed inkamatua tan maong a kondukta ra. Nandinayewan to so mapekder a pananisia ra tan saray bangat da so nibase ed Kasulatan. Impaiyaralan na Biblia iyan laki.
20. (a) Anto so ipapatnag na kimey ya inreport na saray Tastasi nen Jehova nen imbeneg a taon? (b) Anto so mangipabitar a dakerakel ni so kimey a gawaen, tan panon tayon moriaen so pribilehyo tayon man-ebanghelyo?
20 Unong ed pigaran eksperiensya a nidalatdat ed sayan artikulo, nilikud ni ed nilibo a nayarin isalaysay, mabitar a saray Tastasi nen Jehova so okupadon tuloy legan na 2001 a serbisyon taon. * Apitongtongan da so minilyon a totoo, niligliwa ra so dakel a maneermen, tan amawala na maabig a resulta so panag-ebanghelyon kimey da. Wala so 263,431 ya angisimbolo na dedikasyon da ed Dios diad impanpabautismo ra. Diad sankamundoan, say bilang na saray ebanghelisador so dinmaak na 1.7 porsiento. Tan say katuaan a say 15,374,986 so inmatendi ed tinaon a Memoryal na impatey nen Jesus so mangipapabitar a dakerakel ni so kimey a gawaen. (1 Corinto 11:23-26) Komon ta mantultuloy tayon anapen iray mauyamo ya ondengel ed maong a balita. Tan legan a mantutultuloy ni so taon na panamalangkap nen Jehova, mantultuloy itayo komon a manligliwa ed saray ‘puso a maneermen.’ Agaylan makapnek so kimey tayo! Maseguro ya amin tayo so mangibelyaw ed saray salita nen Isaias: “Siak manliket ak naani balbaleg ed Jehova, say kamarerwak manggayaga naani ed Dios ko.” (Isaias 61:10) Komon ta sikatayo so tuloytuloy ya usaren na Dios diad panusumpal to ed sarayan mapropetikon salita: ‘Patuboen na Katawan a Jehova so inkatunong tan panangigalang ed arapan na saray amin a nasyon.’—Isaias 61:11.
[Paimano ed Leksab]
^ par. 20 Say tsart ed pahina 19 ya anggad 22 so mangipabitar ed report na kimey na saray Tastasi nen Jehova legan na 2001 a serbisyon taon.
Kasin Nanonotan Yo?
• Panon ya agunggonaan iray mauyamo ed maong a balita ya impulong nen Jesus?
• Antoran bendisyon so sinmabi ed saramay kinmiwas ed panag-ebanghelyon kimey na saray inmunan-siglon babangatan nen Jesus?
• Panon a nabebendisyonan ed maong a balita iray mangaawat natan?
• Panon tayon moriaen so pribilehyo tayo bilang ebanghelisador?
[Tepetepet Parad Panagaral]
[Tsart ed pahina 19-22]
2001 SERBISYON TAON A REPORT NA SARAY TASI NEN JEHOVA ED SANKAMUNDOAN
(Nengnengen so tomo)
[Saray litrato ed pahina 15]
Lawas nonodnonoten na saray Tastasi nen Jehova so responsabilidad da a man-ebanghelyo
[Saray litrato ed pahina 17]
Saramay onkiwas unong ed maong a balita so magmaliw a kabiangan na nankakasakey tan sankamundoan ya impanaagi