Si Henry VIII tan say Biblia

DIAD libro ton History of the English-Speaking Peoples (Tomo 2), onia so insulat nen Winston Churchill: “Diad lawak na relihyon say Repormasyon so angitarok na malaknab a pananguman. Say Biblia natan so akagamor na balo tan malaknab ya autoridad. Ipapasen na akadkaunan henerasyon a say Masanton Sulat so mapeligro ed biang na saray ag-akaaral tan nepeg a basaen labat na saray pari.”

Intuloy na salaysay: “Saray kompleton niimprintan Biblia, ya impatalos ed Ingles nen Tyndal tan Coverdale, so pilpilimeron pinmaway ed pansamposampot na otonyo na 1535, tan pigaran edisyon natan so apawala. Binilin na Gobierno iray klero ya ipaseseg [da] so panagbasa na Biblia.” Kayari na saray siglo na kakulangay pikakabat ed Biblia, say Inglatera so nagkalalo lan abangatan ed Biblia, balet saya et diad tulong na gobierno nen Henry VIII, aliwan say relihyon. *

“Bilang makapasinsinagem ya agawa ed akadkaunan henerasyon, ingganggan na Gobierno diad Paris so pangimprinta na dakel iran Ingles a Biblia, a mas marakep nen say dinanman a datin edisyon, tan nen Setyembre 1538 et niganggan a kada parokya ed bansa so nepeg a manaliw na sankabalegan a Biblian Ingles, pian usaren ed kada simbaan, a saray mimimisa so nayarin nainomayan a mangusar tan manbasa ed satan. Anemiran kopya so nigana ed [Katedral] na St Paul, diad Syudad na London, tan dakerakel a totoo so dinmomog ed katedral diad sanagew pian basaen iratan, nagkalalo la ta nibaga ed sikami, sano makaromog ira na siopaman a toon walaan na makbaw a boses pian manbasan maksil.”

Makapaermen, diad pigaran nasyon, dakel so ag-anganamot ed pribilehyo ran manbasa ed Biblia a maparanay. Saya so pirmin pampagaan, lapud say Biblia labat so “impuyan na Dios sikato met so maabig a pakaaralan, pakasumalan, pakasimbawaan, tan pakapanontonan a sikato so wala ed katunongan.”​—2 Timoteo 3:16.

[Paimano ed Leksab]

[Picture Credit Line ed pahina 32]

Henry VIII: Painting ed Royal Gallery diad Kensington, nanlapud libro a The History of Protestantism (Vol. I)