Talaga Kasin Posibli so Sosyedad ya Anggapoy Duma ed Kipapasen?

SI John Adams, a komaduan nanpresidente ed Estados Unidos, so sakey ed saray nampirma ed maawaran a Declaration of Independence, ya angilaktip ed sarayan makatantandan balikas: “Ibilang tayon mabitabitar la irayan katuaan, ya amin a totoo so apalsan parepareho.” Anggaman kuan, mapatnag a panduaruwaan nen John Adams no kasin saray totoo so talagan parepareho, lapud insulat to: “Ontanlan inletneg na Makapanyarin-amin a Dios so Ag-inkaparpareho na Isip tan Indengan diad Impamalsa to na Inkatoo ya anggapon balot so onsianon plano odino totontonen a makapanggawa ed saratan a parepareho.” Diad pidumaan, ayarian na Britanon manag-awaran a si H. G. Wells ya inlitrato’d kanonotan to so egalitarian society (sakey a sosyedad a magmaliw a parepareho so amin a totoo) base ed taloran bengatla: saksakey balet puro tan ag-amatikan a relihyon na mundo, pareparehon edukasyon parad amin, tan anggaporay puersa na armada.

Angga ni’d natan, agni akapawala so awaran na egalitarian a sosyedad ya inisip nen  Wells. Say totoo so talagan agmanpadpara, tan siansia nin say panduruma na kipapasen so manunan nagagawa ed sosyedad. Akapangitarok kasi na antokaman iran gunggona iratan a kipapasen ed sosyedad bilang intiraminte? Andi. Nanaapag-apag so totoo lapud saray sisteman panduruma ed sosyedad, a manreresulta ed ibeg, panamusol, sakit na linawa, tan pirmin panagpaagus na dala. Say datin mentalidad a matalonggaring so amputi diad Aprika, Australia, tan Amianen ya Amerika so angitarok na kaermenan ed saray aliwan amputi​—pati say palanit ya impamatey ed saray Aborigine diad Van Diemen’s Land (Tasmania natan). Diad Europa, say inkiduma na saray Judio bilang abebbeba et sakey a gapoan ed Holocaust. Say dakel a kayamanan na saramay walad atagey a kipapasen tan say agpakapepenek ed limog na saray abebbeba tan walad kapegleyan et nansengegan iraya na Rebolusyon ed Pransya nen koma-18 a siglo tan Rebolusyon ed Bolshevik nen koma-20 a siglo diad Russia.

Insulat na makabat a too nensaman: “Sakey a too walaan na pakayari ed sananey pian kaugsan to.” (Eclesiastes 8:9) Saray salita to so tua balanglan saramay manodomina et indibidual odino grupo. Sano ipaatagey na sakey a grupo na totoo so inkasikato manlapud sananey, seguradon manresulta itan ed kaermenan tan kairapan.

Amin so Parepareho ed Imaton na Dios

Kasin sipor lan atagtagey so arum a grupo na totoo ed sananey iran grupo? Andi diad imaton na Dios. Oniay ibabaga na Biblia: “Dia ed saksakey a too ginawa [na Dios] a pansengegan na amin a nasyones na saray totoo, pian manayam ira ed amin a tapew na dalin.” (Gawa 17:26) Niarum ni, say Manamalsa ‘agto lalabien so inkatoo na saray prinsipe, odino agto imatleken so mayaman a lalo nen say duka. Ta sikara ya amin so gawa na saray lima to.’ (Job 34:19) Amin a totoo so sanaagi, tan nianak a parepareho ed imaton na Dios.

Nonoten met a sano ompatey so too, naandi so amin a panisip ton sikatoy atagtagey nen say arum. Ag-itan panisiaan na saray taga-Ehipto nensaman. Sanen inatey so Faraon, inyan da so ankabli iran bengatla ed pantyon to pian napanggayagaan to iratan legan ya itutultuloy ton ookupaan so atagey a posisyon to diad biek a bilay. Kasin apanggayagaan to? Andi. Dakel ed saratan a kayamanan so tinatakew labat na saray managsamsam ed lubok, tan dakel a bengatlan ag-atakew so nanengneng la natan ed saray museum.

Lapud sikatoy inatey, seguradon agnausar na Faraon iraman ya ankablin bengatla. Diad ipapatey, anggaporay kipapasen ya atagtagey tan abebbeba, anggapoy mayaman tan duka. Oniay ibabaga na Biblia: “Say makabat a totoo ompatey; natawtaw ya amin iray makulangkulang tan kabanyakan a totoo. Ta saray totoo singa ira kalakian a baka ya agmanbayag so bilay to, singa ira baka ya antiktikey so panaon to.” (Salmo 49:10, 12, The New English Bible) Arari man odino ariripen itayo, onaplika irayan nipuyan a salita ed sikatayon amin: “Saray inaatey agda amta so bengatla, ag-ira met nawalaan na tumang; . . . Anggapo so gawa, no kanonotan, no pakaamta, no kakabatan, dia ed Sheol, a laen mo.”​—Eclesiastes 9:5, 10.

Nianak itayon amin a parepareho ed imaton na Dios, tan amin tayo so ompatey a parepareho. Kanian, agaylan kaapaan so pangipaatagey na sakey a grupo na totoo manlapud sananey legan na antikey a panaon a pambilay tayo!

Sakey a Sosyedad ya Anggapoy Duma ed Kipapasen​—Panon?

Anggaman ontan, wala ni kasi ilalo ya onsabi panaon et niwala so sosyedad ed limog na totoo ya aliwa lan importante so kipapasen ed sosyedad? On, wala. Ngalngalin 2,000 taon lay apalabas sanen wadiad dalin si Jesus, say pundasyon so niletneg parad satan a sosyedad. Inyapay nen Jesus so bilay to bilang dondon parad amin a mananisian katooan pian diad ontan et “siopaman a manisia ed sikato agnatawtaw, noag ingen wala so bilay ton andi-anggaan.”​—Juan 3:16.

Pian ipabitar ya anggapo ed saray patumbok to so nepeg a mangipaatagey na inkasikara ed saray kapananisiaan da, oniay inkuan nen Jesus: “Agkayo komon patatawag na Rabbi; ta sakey so  managbangat ed sikayo, et sikayo ya amin sanaagi kayo. Tan anggapoy tawagen yo na ama ed dalin; ta sakey so Ama yo, a sikatoy wala ed tawen. Tan agkayo met patatawag na katawan; sakey so katawan yo a salanti si Kristo. Ingen saman so kabalbalgan ed sikayo sikato naani aripen yo. Tan siopaman a mangitandoro na inkasikato, napaabeba naani.” (Mateo 23:8-12) Diad imaton na Dios, amin a tuan babangatan nen Jesus so parepareho diad pananisia.

Kasin minoria na inmuunan Kristianos so inkasikara a parepareho? Ontan so ginawa na saramay akatalos ed bangat nen Jesus. Minoria ran parepareho so balang sinansakey ed pananisia tan pinaneknekan da iya diad impanawag day “agi” ed balang sinansakey. (Filemon 1, 7, 20) Anggapoy siopaman ya apakiwas a moriaen toy inkasikato bilang magmaong nen say arum. Alimbawa, konsideraen so mapaabeban paraan na impaneskribe nen Pedro ed inkasikato diad komaduan sulat to: “Si Simon Pedro, aripen tan apostol nen Jesus-Kristo diad saramay akagamor na mabli met a pananisia, a singa dia ed sikami.” (2 Pedro 1:1) Si Pedro so personal a binangatan nen Jesus, tan bilang sakey ya apostol, sikato so walaan na importantin responsabilidad. Ingen, impasen toy inkasikato bilang sakey ya aripen tan binidbir ton say arum a Kristianos so walaan na miparan pribilehyo a singa sikato no nipaakar ed katuaan.

Nayarin ibaga na arum a say totontonen ed inkaparpareho so sumlang ed katuaan a nen sakbay-Kristianon panaon et ginawa na Dios so Israel bilang nikadkaduman nasyon to. (Exodo 19:5, 6) Nayarin ikuan da a sakey iyan alimbawa na panangipaatagey ed rasa, balet ta aliwan ontan. Tua a nanggayagaan na saray Israelita, bilang kailalakan nen Abraham, so nikadkaduman pisisiglaotan ed Dios tan nausar ira bilang paralanan parad saray panangiparungtal na Dios. (Roma 3:1, 2) Balet say gagala na saya et aliwan pian sikara so pagalangan na agmanepeg. Imbes satan et pian ‘napapalar iray amin a nasyon.’​—Genesis 22:18; Galacia 3:8.

Apapaway a maslak ed saray Israelita so ag-angalig ed pananisia na inmunan ateng da a si Abraham. Sikaray agnanmatoor tan impulisay day Jesus bilang Mesias. Lapud satan, sikaray impulisay na Dios. (Mateo 21:43) Anggaman ontan, saray mauyamo ed limog na katooan so agsinmaew a makagamor ed saray nisipan a bendisyon. Diad Pentecostes 33 K.P., nianak so Kristianon kongregasyon. Sayan muyongan na saray Kristiano a nilanaan na masanton espiritu so atawag bilang “Israel na Dios,” tan nagmaliw itan a paralanan pian nipasabi iraman a bendisyon.​—Galacia 6:16.

Kinaukolan a nibangat so arum a membro na satan a kongregasyon diad pamaakaran na inkaparpareho. Alimbawa, sinimbawa nen babangatan a Santiago iraman so mangigagalang ed mayaman iran Kristiano a lalo nen saray mairap-bilay. (Santiago 2:1-4) Agmanepeg itan. Impabitar nen apostol Pablo a saray Gentil a Kristiano so talagan ag-abebbeba nen saray Judion Kristiano, tan saray bibiin Kristiano so talagan ag-abebbeba nen saray lalaki. Oniay insulat to: “Ta sikayon amin anak kayo na Dios, lapu ed pananisia ed Kristo Jesus. Ta lapag yo ya abinyagan ed Kristo, inkawes yo si Kristo. Anggapo so Judio, tan Griego, anggapo so aripen o bulos, anggapo so laki, o bii: ta sikayon amin saksakey kayo ed Kristo Jesus.”​—Galacia 3:26-28.

Totoon Anggapoy Duma ed Kipapasen Natan

Panggugunaetan na saray Tastasi nen Jehova natan so manbilay unong ed Makasulatan iran prinsipyo. Kabat da a saray kipapasen ed sosyedad et anggapoy kabaliksan ed imaton na Dios. Kanian, anggapo ed limog da so grupon klerigo/lego,  tan ag-ira ibibiig unong ed kolor na baog odino kayamanan. Anggaman arum ed sikara so nayarin mayaman, sikaray agmangiyaapasakey ed “maapan gloria na bilay,” lapud natetebek dan temporaryo labat iratan a bengatla. (1 Juan 2:15-17) Imbes, amin da so nankakasakey ed panagdayew ed Sankatalbaan a Soberano, si Jehova a Dios.

Aawaten na balang sakey ed sikara so responsabilidad a mibiang ed kimey a pangipulong ed maong a balita na Panarian ed kapara ton too. Singa si Jesus, igagalang da iray nabebelatan tan nipupulisay panamegley na ibibisita ra ed saray kaabungan da, ya iyoopresi dan bangatan ira ed Salita na Dios. Saraman so abebay kipapasen da ed panagbilay so mikikimey a nankakasakey ed saraman so nayarin impasen na arum bilang walad atagey a kipapasen. Say espiritual iran kalidad so importante, aliwan say kipapasen ed sosyedad. A singa nen inmunan siglo, amin so sanaagi ed pananisia.

Say Inkaparpareho so Mamapawala na Panduruma

Siempre, agkabaliksan na inkaparpareho so sigpot a panpadpara. Amin a lalaki tan bibii, matakken odino malangwer, so nirepresenta ed sayan Kristianon muyongan a laktipen na saray totoo a nanlapud dakel tan nanduruman abenegan ed rasa, pansasalita, bansa, tan ekonomya. Bilang indibidual, walaan ira na nanduruman abilidad ed mental tan pisikal. Balet anggapo iray atagtagey odino abebbeba lapud saratan a pandurumaan. Imbes, saratan a pandurumaan so manreresulta ed makapaliket a panduruma. Bibidbiren na saraman a Kristianos ya antokaman a talenton walad sikara so langkap a nanlapud Dios tan aliwa iratan a rason pian liknaen dan sikaray atagtagey.

Saray inkaduma ed kipapasen so resulta na panasali na too ya uleyan so inkasikato imbes a tumboken so panangiwanwan na Dios. Agmanbayag, salatan na Panarian na Dios so agew-agew a pananguley ed sayan dalin, tan manresulta itan ed pakaandi na saray ginaway-toon panduruma na kipapasen ed sosyedad, pati amin niran bengatla a pansesengegan na paniirap ed interon awaran. Insan, diad peteg a pantalos, ‘tawiren na saray mauyamo so dalin.’ (Salmo 37:11) Amin a sengegay panlastog nipaakar pangipapasen ed inkasuperyor na sakey so naandi la. Aglan balot naabuloyan iray kipapasen ed sosyedad a mangapag ed sankamundoan ya impanaagi na too.

[Blurb ed pahina 5]

Say Manamalsa ‘agto lalabien so inkatoo na saray prinsipe, odino agto imatleken so mayaman a lalo nen say duka, ta sikara ya amin so gawa na saray lima to.’​—Job 34:19.

[Litrato ed pahina 6]

Igagalang na saray Tastasi nen Jehova iray kapara ran too

[Saray litrato ed pahina 7]

Say espiritual iran kalidad so importante ed limog na saray tuan Kristiano