Jehova​—Say Sankatalonggaringan ya Ehemplo na Kamaongan

“Misalamat kayo ed Jehova na saray ehersito, ta si Jehova sikato so maong.”​—JEREMIAS 33:11.

1. Akin a napakiwas itayon mangidayew ed Dios lapud kamaongan to?

 SI Jehova a Dios so maong diad absoluton pantalos. “Agaylan kabaleg so kaabigan [o kamaongan] to!” so inkelyaw nen propeta Zacarias. (Zacarias 9:17) On, napatnagan so kamaongan ed amin a bengatlan ginawa na Dios diad impangiparaan to ed dalin pian panggayagaan tayo. (Genesis 1:31) Agtayon balot narandan so amin a komplikado iran ley a pinakurang na Dios sanen pinalsa to so uniberso. (Eclesiastes 3:11; 8:17) Balet say daiset ya amta tayo nipaakar ed satan so mamapakiwas ed sikatayon mangidayew ed Dios lapud kamaongan to.

2. Panon yon ukeran so kamaongan?

² Anto so kamaongan? Satan so moral ya inka-ekselente, odino kaabigay ugali. Ingen, nagkalalo ni itan nen say kaandian na amin a kaugsan. Say kamaongan, bilang kabiangan na bunga na espiritu, so sakey a positibon kalidad. (Galacia 5:22, 23) Nipatnag tayo so kamaongan sano manggawa itayo na maabig tan makagunggona iran bengatla parad arum. Diad sayan sistema na bengabengatla, say ipapasen a maong na arum a grupo so nayarin moriaen na arum bilang mauges. Anggaman ontan, ta pian napanggayagaan tayo so deen tan liket, nepeg a wala so sakey ya estandarte na kamaongan. Siopa so makanepegan a mangiletneg ed satan ya estandarte?

3. Anto so ipapabitar na Genesis 2:16, 17 nipaakar ed estandarte na kamaongan?

³ Inletneg na Dios so estandarte na kamaongan. Diad kagapo na awaran na too, si Jehova so angiganggan ed inmunan too: “Nayarian mo so  mangan na labay mo ed amin a kiew na tanamanan: Ingen ta say kiew na pakaamtaan mo na maong tan mauges, agmo nepeg a panganan: ta dia ed agew a pangan mo ed satan ompatey ka.” (Genesis 2:16, 17) On, nakaukolan a manilalo iray totoo ed Manamalsa ra parad pikakabat ed no antoy maong tan mauges.

Agkanepegan a Panangipatnag na Kamaongan

4. Anto so ginawa la na Dios ed katooan nanlapula’d impankasalanan nen Adan?

⁴ Say ilalo na katooan parad magnayon a liket ed inkayadyari so aderal sanen nankasalanan tan agbinidbir nen Adan so kanepegan na Dios a mangiletneg na saray estandarte na kamaongan. (Genesis 3:1-6) Balet, sakbay a nianak iray ilalak nen Adan a makatawir na kasalanan tan ipapatey, impasakbay la na Dios so isabi na ayadyarin Bini. Oniay inyabawag nen Jehova, a peteg a nidirekta ed “daan ya uleg,” si Satanas a Diablo: “Mangiyan ak na gulaan ed sika tan say bii, tan gulaan ed saray ilalak mo tan ilalak to; sikato sugaten to so ulom, et sika sugaten mo so mukor to.” (Apocalipsis 12:9; Genesis 3:15) Gagala nen Jehova a narondon so makasalanan a katooan. Diad agkanepegan a panangipatnag na kamaongan, peteg ya intarya nen Jehova so ontan a probisyon parad kilalaban na saramay mangagamil na pananisia ed dondon bagat na pinabpabli ton Anak.​—Mateo 20:28; Roma 5:8, 12.

5. Anggaman akatawir itayo na mauges a kiling na puso, akin a nayarian tayon ipatnag so sakey a sukat na kamaongan?

⁵ Siempre, lapud kasalanan nen Adan, atawir tayo so mauges a kiling na puso. (Genesis 8:21) Makapaliket balet ta tinulongan itayo nen Jehova a mangipatnag na sukat na kamaongan. Say pantultuloy ed saray bengatlan naaralan ed mablin masanton sulsulat to so aglambengat ‘manggawa ed sikatayon makabat parad kilalaban’ tan ‘manginlong ed amin a maong a gawa’ noagta ontulong met ed sikatayo a manggawa na maong ed imaton to. (2 Timoteo 3:14-17, NW) Balet, pian nagunggonaan itayo ed Makasulatan ya instruksion tan nipatnag so kamaongan, nepeg a nawalaan itayo na awawey a singa say salmistan angikanta: “Sika [Jehova] maong ka, tan gagawaen mo so maong; ibangat mo ed siak so saray panangitontonan mo.”​—Salmo 119:68.

Nitandoro so Kamaongan nen Jehova

6. Sanen impaitarok la nen Arin David so kaban na sipan ed Jerusalem, anganta iray Levita na sakey a kansion a walaan na anton balikas?

⁶ Binidbir nen Arin David na kadaanan ya Israel so kamaongan na Dios tan nanggunaetan to so panangigiya To. “Maong tan matunong si Jehova,” so kuan nen David. “Kanian ibangat to so saray managkasalanan ed dalan.” (Salmo 25:8) Say madibinon panangibangat a niiter ed saray Israelita so angilaktip ed samploran importantin ganggan​—say Samploran Ganggan​—a nisulat ed duaran tapyas na bato tan nisimpen ed sagradon kaban a tinawag na kaban na sipan. Sanen impaitarok la nen David so Kaban ed kabiseran syudad na Israel, say Jerusalem, nankanta iray Levita ya angilaktip ed sayan balikas: “Misalamat kayo ed Jehova, ta sikato maong; ta say abig na linawa to magnayon lawas.” (1 Awaran 16:34, 37-41) Agaylan makapaliket a narengelan iratan a salita manlapud bibil na saray Levitan komakanta!

7. Anto so agawa sanen nitarok la so Kaban ed Sankasantosan tan kayari na pikakasi nen Solomon ed dedikasyon?

⁷ Saratan met a balikas na panangidayew so nidanet sanen nidedika so templo nen Jehova ya impaalagey nen Solomon, ya anak nen David. Sanen nipuesto la so kaban na sipan ed Sankasantosan na kapampaalagey a templo, saray Levita so nandayew ed si Jehova, “ta sikato [et] maong; ta say abig na linawa to magnayon lawas.” Diad satan  ya inkagawa say templo so mamilagron alimbos na lurem a mangisisimbolo ed maglorian kiwawala nen Jehova. (2 Awaran 5:13, 14) Kayari na pikakasi nen Solomon nipaakar ed dedikasyon, “say apoy inmakseb a nanlapu ed tawen, tan inulam to so bagat a poolan tan saray bagbagat.” Diad impakanengneng da ed saya, “amin iray anak na Israel . . . dinmakmomo ra ed saray lupa ra ed dalin ed gagatinan, tan angigalang ira, tan akisalamat ira ed Jehova, ya inkuan da, ta sikato maong; ta say abig na linawa to magnayon lawas.” (2 Awaran 7:1-3) Kayari na 14-agew a piesta, sinmempet iray Israelita ed saray ayaman da a “malikeliket tan magaygayaga ed puso lapu ed kaabigan ya impatnag nen Jehova ed David, tan dia ed Solomon, tan dia ed Israel a baley to.”​—2 Awaran 7:10.

8, 9. (a) Anggaman si Jehova so indayew na saray Israelita lapud kamaongan to, anton kurang so ginegemtan da ed saginonor? (b) Anto so impasakbay nen Jeremias nipaakar ed Jerusalem, tan panon ya asumpal itan a propesiya?

⁸ Makapaermen, saray Israelita so agnantultuloy a nambilay unong ed saray kanta ra ed panangidayew ed Dios. Sinmabi panaon, say totoo na Juda so ‘angigalang ed si Jehova ed saray bibil da [labat].’ (Isaias 29:13) Imbes a tuloken da iray estandarte na Dios ed kamaongan, ginmapo ran angagamil na mauges. Tan anto so kaugsan a ginawa ra? Agayla, sikara so nankasalanan na idolatriya, imoralidad, panaglames ed saray mairap-bilay, tan arum niran ambebelat a kasalanan! Bilang resulta, aderal so Jerusalem tan akautibo ed Babilonia iray manaayam ed Juda nen 607 K.K.P.

⁹ Dinisiplina sirin na Dios so totoo to. Balet, diad panamegley nen propeta Jeremias, impasakbay to a narengelan ni ed Jerusalem so boses na saramay mangibabagan: “Misalamat kayo ed Jehova na saray ehersito, ta si Jehova sikato so maong, ta say maaro ya abig na linawa to mansiansia ed ando lan ando.” (Jeremias 33:10, 11) Tan ontan so agawa. Kayari na 70-taon ya impankibalatar ed dalin, nen 537 K.K.P., say Judion nakdaan so pinmawil ed Jerusalem. (Jeremias 25:11; Daniel 9:1, 2) Angipaalagey lamet ira na altar diad sular na templo ed Palandey Moria tan nambabagat ira diman.  Say pundasyon na templo so nipaalagey ed komaduan taon manlapula’d impawil da. Agaylan makapalikliket a panaon! “Sanen saray managpaalagey inggaton da so panangipaletnegan na templo nen Jehova,” kuan nen Esdras, “saray saserdote ya akakawes tan akatambuyog, tan saray Levita ya anak ira nen Asaf ya akasimbalo, pian mangigalang ira ed Jehova, unong ed bilin nen David ya ari ed Israel. Et nankanta ra a sakey tan sakey dia ed panangigalang tan pisasalamat ed Jehova, ya inkuan da, Ta sikato maong, ta say maong a linawa to magnayon lawas nipaakar ed Israel.”​—Esdras 3:1-11.

10. Anton importantin balikas so walad gapo tan sampot na Salmo 118?

¹⁰ Pinmatnag ed pigaran salmo so mipadparan balikas na panangidayew nipaakar ed kamaongan nen Jehova. Kabiangan ed saratan so Salmo 118, a kinanta na saray Israelitan sankaabungan pian sampotan so panagngilin ed Paskua. Satan a salmo so onggapo tan mansampot ed saray salitan: “Misalamat kayo ed Jehova; ta sikato et maong: ta say maaron abig na linawa to et maando lawas.” (Salmo 118:1, 29) Nayarin saraya so unor iran balikas na panangidayew a kinanta nen Jesu-Kristo kaiba iray matoor ya apostoles to ed samay labi sakbay na impatey to nen 33 K.P.​—Mateo 26:30.

“Iparungtal Mo ed Siak so Gloriam”

11, 12. Sanen apasimaran nen Moises so gloria na Dios, anton panangiyabawag so nadngel to?

¹¹ Say kamaongan nen Jehova tan say maaron abig a linawa to so impansiglaotan ed unonan pankanawnawa sakbay na panaon nen Esdras. Kayarin tuloy na impandayew na saray Israelita ed binalitokan a kilaw a baka diad kalawakan tan atigway laray managgaway-mauges, akikasi si Moises ed si Jehova: ‘Iparungtal mo ed siak so gloriam.’ Lapud amta ton agnanengneng nen Moises so lupa To tan manbilay, oniay inkuan nen Jehova: “Ipanengneng ko naani so amin a kaabigan [o kamaongan] ko dia ed arapan mo.”​—Exodo 33:13-20.

¹² Pinmatnag so kamaongan nen Jehova ed arap nen Moises diad tinmumbok ya agew ed Palandey Sinai. Diad saman a bekta et apasimaran nen Moises so gloria na Dios tan nadngel to iyan panangiyabawag: “Jehova, Jehova, Dios a mapangasi tan mapaaro [“maomaong,” NW], mapalna ya onsanok, tan daakan ed maaro ya abig na linawa, tan katuaan; a mangigagana na maaro ya abig na linawa ed saray nilibo, mamerdona na inkauges, tan impakasumpa, tan kasalanan; tan anggan anton pamaakaran agto ibilang a malinis so nankasalanan, dalawen to so kaugsan na saray ama ed saray anak, tan saray anak ed saray anak, dia ed komatlo tan dia ed komapat a kailalakan.” (Exodo 34:6, 7) Ipapabitar na sarayan salita a say kamaongan nen Jehova so misiglaotan ed maaro ya abig na linawa to tan arum niran aspekto na personalidad to. Say pangonsidera ed saraya so ontulong ed sikatayon mangipatnag na kamaongan. Konsideraen tayon unona so kalidad ya amiduan sinalambit ed sayan makapakelaw a panangiyabawag ed kamaongan na Dios.

“Dios a . . . Daakan ed Maaro ya Abig na Linawa”

13. Diad panangiyabawag ed kamaongan na Dios, anton kalidad so amiduan asalambit, tan akin a saya so matukoy?

¹³ “Jehova, Dios a . . . daakan ed maaro ya abig na linawa, . . . a mangigagana na maaro ya abig na linawa ed saray nilibo.” Say Hebreon salita a nipatalos a “maaro ya abig na linawa” so mankabaliksan met na “matoor ya aro.” Satan lambengat a kalidad so amiduan nidatak ed inyabawag na Dios ed si Moises. Agaylan matukoy, lapud say manunan kalidad nen Jehova et aro! (1 Juan 4:8) Say bantog a balikas na panangidayew ed si Jehova a  “sikato et maong: ta say maaron abig na linawa to et maando lawas” so mangidadanet ed sayan kalidad.

14. Siopa so nagkalalo lan makapanggayaga ed kamaongan tan maaron abig-linawa na Dios?

¹⁴ Say sakey a pakapatnagan na kamaongan nen Jehova et sikato so “daakan ed maaro ya abig na linawa.” Saya so nagkalalo lan mapatnag diad matamoy a panangasikaso to ed saray dedikado, matoor a lingkor ton totoo. (1 Pedro 5:6, 7) Unong a napaneknekan na saray Tastasi nen Jehova, sikato so ‘mangigagana na maaro ya abig na linawa’ ed saramay mangaaro tan manlilingkor ed sikato. (Exodo 20:6) Say nasyon na silalaman ya Israel so agla makakaeksperiensya ed maaron abig na linawa, odino matoor ya aro nen Jehova, lapud impulisay da so Anak to. Balet mansiansia lawas so kamaongan tan matoor ya aro na Dios ed matoor iran Kristiano ed amin a nasyon.​—Juan 3:36.

Jehova​—Mapangasi tan Maomaong

15. (a) Say panangiyabawag a nadngel nen Moises ed Palandey Sinai so ginmapo ed anton balikas? (b) Anto so lalanoren na panangasi?

¹⁵ Say panangiyabawag a nadngelan nen Moises ed Palandey Sinai so angilukas ed balikas a: “Jehova, Jehova, Dios a mapangasi tan maomaong.” Say Hebreon salita a nipatalos a “panangasi” so nayarin ontukoy ed “saray pait” tan maapit a misiglaotan ed terminon “panag-anakan.” Say panangasi sirin so mangilalanor ed saray liknaan a matamoy a panangabagey a walad akindalem na sakey a too. Balet aliwa lambengat a puron panangabagey so laktipen na panangasi. Satan so nepeg a mamakiwas ed sikatayo a manggawa na bengatlan mamakepa ed paniirap na arum. Singa bilang, natetebek na saray maaron Kristianon mamatatken so pankaukolan a magmaliw a mapangasi ed saray kapananisiaan, a ‘mangipatnag na panangasi tekep na liket’ sano saya so matukoy.​—Roma 12:8; Santiago 2:13; Judas 22, 23.

16. Akin a nibagan maomaong si Jehova?

¹⁶ Say kamaongan na Dios so nipapatnag met diad pagmamaliw ton maomaong. Say maong a too so “mapatpatnag a makonsidera ed saray liknaan na arum” tan ipapatnag to so ‘pandinayewan a panangasi nagkalalo la ed saray abebbeba.’ Si Jehova so sankaabigan ya ehemplo ed pagmaliw a maomaong diad pidedeneng ed saray matoor a lingkor to. Singa bilang, diad panamegley na saray anghel, tekep na kamaongan a pinabiskeg na Dios so masiken lan propeta a Daniel tan sanen pinakabatan to so birhen a si Maria nipaakar ed pribilehyo ton mangiyanak ed si Jesus. (Daniel 10:19; Lucas 1:26-38) Bilang totoo nen Jehova, maseguron papablien tayo so maong a paraan to diad iyaapelo to ed sikatayo panamegley na saray pahina na Biblia. Sikato so dadayewen tayo lapud satan a panangipatnag ed kamaongan to tan panggugunaetan tayo so magmaliw a makonsidera diad pidedeneng tayo ed arum. Sano ipetek na saramay walaan na espiritual a kualipikasyon so sakey a kapananisiaan “ed espiritu na tayadno,” panggunaetan da so magmaliw a matamoy tan maong.​—Galacia 6:1.

Say Dios so Mapalna ya Onsanok

17. Akin a misalsalamat itayo ta si Jehova et “mapalna ya onsanok”?

¹⁷ [Say] Dios . . . mapalna ya onsanok.” Saratan a salita so mangipapaimano ed sananey nin aspekto na kamaongan nen Jehova. Maan-anos si Jehova ed saray kakulangan tayo tan iikdan to itayo na pankanawnawa pian natalonaan iray seryoson kaleteyan tan ombulaslas ed espiritual. (Hebreos 5:12–6:3; Santiago 5:14, 15) Say anos na Dios so mangunggona met ed saramay agni nagmaliw a managdayew ed sikato. Sikara so walaan ni na panaon ya onkiwas ed mensahe na Panarian tan magbabawi. (Roma 2:4) Anggaman maanos si Jehova, say kamaongan to no maminsan so mamakiwas ed sikato a mangibalikas ed sanok to, unong a ginawa to sanen nandayew iray Israelita ed binalitokan a kilaw a baka ed Palandey Sinai. Say sanok na Dios so magano lan nipatnag ed mas malaknab a paraan sano panganggaen to so marelmeng a sistema nen Satanas.​—Ezequiel 38:19, 21-23.

18. Nipaakar ed katuaan, anto so pandumaan nen Jehova tan saray lider a totoo?

¹⁸ ‘Si Jehova so Dios a . . . daakan ed . . . katuaan.’ Agaylay piduma nen Jehova ed saray lider a totoo, a mangisisipan na dakerakel balet ta agda natotoor! Diad pisunian, saray managdayew ed si Jehova so makapanmatalek ed amin a bengatlan inkuan to ed apuyanan a Salita to. Lapud say Dios so daakan ed katuaan, lawas itayon makapanmatalek ed saray sipan to. Lapud kamaongan to, say mangatatawen  ya Ama tayo so matoor ya oneebat ed saray pikakasi tayo parad espiritual a katuaan a daakan ya itatarya to.​—Salmo 43:3; 65:2.

19. Anton matalonggaring a panangipatnag na kamaongan so nipapanengneng nen Jehova ed saray magbabawin managkasalanan?

¹⁹ “[Si] Jehova [so] Dios a . . . mamerdona na inkauges, tan impakasumpa, tan kasalanan.” Lapud kamaongan to, si Jehova so akaparaan a mamerdona ed saray magbabawin managkasalanan. Maseguron malikeliket itayo a say maaron mangatatawen ya Ama tayo so angitarya na probisyon parad pakaperdona panamegley na bagat nen Jesus. (1 Juan 2:1, 2) On, malikeliket itayo ta amin a mangaagamil na pananisia ed dondon so makapanggayaga ed apaboran a siglaotan ed si Jehova, tekep na ilalon magnayon a bilay ed insipan a balon mundo to. Agaylan matalonggaring iran rason pian idayew si Jehova lapud pangipapatnag to na kamaongan ed katooan!​—2 Pedro 3:13.

20. Anto so ebidensya tayo ya agkokonsentien na Dios so kaugsan?

²⁰ ’Anggan anton pamaakaran ag-ibilang nen Jehova a malinis so nankasalanan.’ Diad tua et saya so sakey nin rason pian itandoro si Jehova lapud kamaongan to. Akin? Lapud say makanan aspekto na kamaongan et agmangonsenti ed kaugsan diad antokaman a paraan. Niarum ni, “sano ompayawar so Katawan tayo a Jesus a manlapu ed tawen ya iba to so saray angheles na pakayari to,” nitarok so panangibales “ed saray agmikabat ed Dios, tan dia ed saray ag-ontulok ed ebanghelyo.” Sikara so “mantepel na dusa a salanti andi-anggaan a kabalang da.” (2 Tesalonica 1:6-9) Saray makaliktar a mandadayew ed si Jehova so nagnap la’d satan a makapanggayaga ya agla ra dokiroken na agmaridios a totoo, a “maingongot ed saray maabig.”​—2 Timoteo 3:1-3.

Aligen so Kamaongan nen Jehova

21. Akin a nepeg tayon ipatnag so kamaongan?

²¹ Andi-duaruwa a dakel so rason tayo pian idayew tan pisalamatan si Jehova lapud kamaongan to. Bilang lingkor to, agta nepeg a gawaen tayo so anggaay nayarian tayo pian ipatnag iyan kalidad? On, lapud pinaseseg nen apostol Pablo iray kaparan Kristiano: “Aligen yo sirin so Dios, singa anak to kayon inararo.” (Efeso 5:1) Say mangatatawen ya Ama tayo so tuloytuloy a mangipapatnag na kamaongan kanian ontan tayo met.

22. Anto so konsideraen tayo ed ontumbok ya artikulo?

²² No interon-puso tayon nitalaga ed si Jehova, maseguron pampilalekan tayon tuloy so pangalig ed kamaongan to. Lapud kapolian itayo na makasalanan ya Adan, aliwan mainomay so panggawa na maong. Balet, diad ontumbok ya artikulo et nanengneng tayo no akin a posibli ed sikatayo so pangipatnag na kamaongan. Konsideraen tayo met so pigaran paraan a pangalig tayo ed si Jehova​—say sankatalonggaringan ya ehemplo na kamaongan.

Panon Yon Ebatan?

• Anto so kamaongan?

• Anton Makasulatan a balikas so mangidadanet ed kamaongan na Dios?

• Anto so pigaran pakapatnagan na kamaongan nen Jehova?

• Akin a nepeg tayon aligen so alimbawa nen Jehova nipaakar ed kamaongan?

[Tepetepet Parad Panagaral]

[Litrato ed pahina 12]

Dinisiplina nen Jehova so totoo to nensaman lapud ag-ira nambilay unong ed saray balikas da ed panangidayew

[Litrato ed pahina 12]

Pinmawil ed Jerusalem so matoor a nakdaan

[Litrato ed pahina 13]

Nadngel nen Moises so makapakelaw a panangiyabawag ed kamaongan na Dios

[Litrato ed pahina 15]

Say kamaongan nen Jehova so nanengneng ed paraan ya iyaapelo to ed sikatayo panamegley na saray pahina na Biblia