Kasin Peteg a Dios so Panmamatalekan Mo?

Sakey a grupo na saray managbaroy so imbaki na American Museum of Natural History nen 1906 a mangusisa na sakey a dalin diad Artic nisesengeg ed report na managdiskobren si Robert E. Peary, ya anengneng to pitoy taon ed asasakbay.

MANLAPUD Cape Colgate diad samsampot na amianen-sagur a kabiangan na Amianen Amerika, naimano nen Peary so singano amputi iran toktok na kapalandeyan diad sakey a niarawin dalin. Inngaran to itan ed sakey ed saray mansusuporta ed sikato ed pinansyal, “Crocker Land.” Maseguron alay liket na saramay mangusisan membro na nambaroy sanen apasikmatan da la so sakey a lugar ed bandad unaan da a walaan na saray pukdol, lawak, tan napnoy niebe iran toktok na kapalandeyan! Balet agnambayag et amoria ran sikara manaya so onnenengneng lambengat ed sakey ya abaloan ya Arctic. Sayan epekto ed pakanengneng lapud atmospera so amalikdo ed si Peary, tan sanen amoria la ra et sikara lay akapangusar na panaon, biskeg, tan kaykayarian pian usisaen so bengatlan aliwan tudtua manaya.

Natan et dakel a totoo so mangiiter na debosyon tan panaon da ed dirios a papanisiaan dan tudtua. Nen panaon na saray apostol nen Jesus, saray dirios a singa di Hermes tan Zeus so dinayew. (Gawa 14:11, 12) Natan, saray dirios a dadayewen na saray Shinto, Hindu, tan arum niran relihyon na mundo so minilyon la. Peteg, singa la ed ibabaga na Biblia a “dakel a dirios tan dakel a kakatawan.” (1 Corinto 8:5, 6) Kasin amin na saraya so petepeteg a dirios?

Dirios ya ‘Agmakapangilaban’

Alimbawa, konsideraen pay panangusar na saray imahen odino simbolo diad panagdayew. Diad saramay manmamatalek odino manpipikasi’d panamegley na saratan, ompatnag a saray talintao so manangisalba a walaay labas nen too iran pakayari a makatumang odino makapangiliktar ed totoo manlapud kapeligroan. Balet talaga ta a makapangisalba ira? Nipaakar ed saratan a bengatla, oniay inkuan na salmista: “Saray talintao na saray nasyones pilak tan balitok ira, gawa na limalima na totoo. Wala so sangisangi ra, balet ag-ira makasalita; wala so matamata ed sikara balet ag-ira  makanengneng; wala so layalayag da, balet ag-ira makadngel; nisay wala so antokaman a panlinlinawa ed saray sangi ra.” On, sikara so dirios ya ‘agmakapangilaban.’​—Salmo 135:15-17; Isaias 45:20.

Tua, saramay manggagawa na talintao so mangipasen a say kimey na limalima ra so walaan na bilay tan pakayari. Tan saramay mandadayew ed saray talintao so manmamatalek ed saratan. Oniay inkuan nen propeta Isaias: “Sikato [say talintao] so sakbaten da ed abala, sikato so awiten da, tan sikato so ipasen da ed pasen to, tan sikato so onalagey.” Inyarum to ni: “Agnaani onalis ed pasen to: on nayarian na too so ontawag ed sikato, anggan ontan agmakaebat odino makapangilaban ed sikato ed kairapan to.” (Isaias 46:7) Say katuaan to et say talintao so mansiansian andiay bilay anggan panon lay kasimoon na pananisia na saramay manmamatalek ed satan. Saratan ya imbolik ya imahen tan imbobo a talintao so “andi-kana a dirios.”​—Habacuc 2:18, NW.

Say panag-idolo, panagdayew, odino panangigalang ed saray totoo na panligliwaan, isport, mapolitika iran sistema, tan relihyoson papangulo so kaslakan met la natan. Niarum ni, say kuarta so sakey a dios parad dakel. Diad kada sakey ed saratan a kaso et sarayan talintao so nipaparungtal a singa walaan iray kablian bangta anggapo. Imposiblin niiter na sarayan talintao so amin ya iilaloan na saramay manisia’d sikara. Alimbawa, ompatnag a say kayamanan so solusyon ed dakel a problema, balet say pakayari na kaykayamanan so makapalikdo. (Marcos 4:19) Oniay intepet na sakey a managsukimat: “Panon tayon nisalaysay so katuaan a say pirmin pampirpirawatan na alay karakel a totoo, tan papanisiaan bilang solusyon ed amin, sano agamoran la et dakel lay nambabangil ya epekto to manlapud ag-inkakontento anggad makapaermen ya eksperiensya?” On, say panggegemtan ed kayamanan et nayarin mankaukolan ed too na pangisakripisyo to’d petepeteg a walaay kablian, a singa say maong a bunigas, makapenek a bilay na pamilya, maapit iran pikakaaro, odino mablin relasyon ed say Manamalsa. Say dios to et magmamaliw a ‘talintao na inkatila’!​—Jonas 2:8.

‘Anggapo so Oneebat’

Kakulangkulangan so pangibagan tudtua so aliwan tudtua. Saray managdayew ed dios a Baal diad panaon nen propeta Elias so akaaral manlapud makapasinagem ya eksperiensya. Mapekder dan panisiaan a si Baal so walaan na pakayari a mangipaway na apoy manlapud tawen tan manulam ed nibagat ya ayep. Diad tua et “tinawag da so ngaran nen Baal manlapu ed kabuasan ni angga ed ngarem ya inkuan da, O Baal, dengelen mo kami.” Kasin walaan na saray layag si Baal a makadngel tan sangi a makapansalita? Intuloy ni na salaysay: “Anggapo so boses, nisay anto ya onebat.” On, ‘anggapo so dinmengel.’ (1 Arari 18:26, 29) Si Baal so aliwan tudtua, nisay mabilay, odino aktibo.

Agaylan importante a kabaten tan dayewen tayo so sakey a Dios a tudtua! Balet siopa so Dios? Tan panon a say panmatalek ed sikato so mangunggona ed sikatayo?

[Saray litrato ed pahina 3]

Say kaiba nen Peary a si Egingwah a mamabantag ed lawak pian anapen so dalin

Robert E. Peary

[Credit Lines]

Egingwah: Manlapud libron The North Pole: Its Discovery in 1909 Under the Auspices of the Peary Arctic Club, 1910; Robert E. Peary: NOAA

[Saray litrato ed pahina 4]

Dakel so napapalikdo ed tatalintaoen diad sayan mundo