Manmatalek ed si Jehova​—Say Dios a Tudtua

Asali yo ta la so tinmangay ed tawen diad malinlinak a labi tan anengneng iray nilasus a bitewen? Panon mon nisalaysay so inkiwala na saratan?

DIAD sakey a mapalnan labi, akitongtong iray bitewen ed si Arin David na kadaanan ya Israel ed piguratibon paraan, kanian sikatoy apakiwas a mangisulat: “Saray tawen ipaliwawa ra so gloria na Dios; tan say sansinakoban iparungtal to so gawa na saray lima to.” (Salmo 19:1) On, say Manamalsa imbes a say pinalsa so makanepegan a “mangawat na gloria tan dayew tan pakayari.”​—Apocalipsis 4:11; Roma 1:25.

“Say amaalagey ed saray amin a bengatla sikato so Dios,” so kuan na Biblia. (Hebreos 3:4) On, say tuan Dios, ‘a say ngaran to et Jehova, so sankatageyan a manuna ed amin a dalin.’ (Salmo 83:18) Tan sikato so aliwan sakey ya ilusyon​—sakey ya abaloan labat. Oniay imbaga nen Jesu-Kristo nipaakar ed mangatatawen ya Ama to, si Jehova: “Say angibaki dia ed siak sikato so tua.”​—Juan 7:28.

Si Jehova​—Say Mananumpal na Saray Gagala To

Say nikadkaduman ngaran na Dios a Jehova, so pinmatnag a ngalngali 7,000 a danay diad Hebreon Kasulatan lambengat. Satan a mismon ngaran so mangipapabitar ed katuaan a sikato so tua. Say ngaran na Dios so literal a mankabaliksay “Pagmaliwen To.” Dedeskribien sirin nen Jehova a Dios so inkasikato bilang Mananumpal na saray gagala to. Sanen tinepetan nen Moises so Dios no antoy ngaran to, pinalaknab nen Jehova so kabaliksan na satan ed onian dalan: “Magmaliw ak ed pagmaliwan ko.” (Exodo 3:14, NW) Oniay direktan ibabaga na patalos nen Rotherham: “Magmaliw ak ed antokaman a kaliktan ko.” Papaneknekan nen Jehova, odino desididon pagmaliwen to, a nagawa so antokaman a nakakaukolan ta pian ontua iray matunong a gagala tan sipasipan to. Kanian, aakbibiten to so dakel a makapakelaw a titulo, a singa say Manamalsa, Ama, Soberanon Katawan, Pastol, Jehova na saray ehersito, Dumerengel na pikakasi, Ukom, Engranden Instruktor, Mananondon.​—Uko-ukom 11:27; Salmo 23:1; 65:2; 73:28; 89:26; Isaias 8:13; 30:20; 40:28; 41:14.

Say tuan Dios lambengat so makanepegan a mangakbibit ed ngaran a Jehova, ta agbalot makapanseguro so totoo no kasin ontalona iray plano ra. (Santiago 4:13, 14) Si Jehova lambengat so makapangibagan: “Unong a say uran tan say musiak a lurem onlasor ira a manlapu ed tawen, et ag-ira ompawil diman no ag-ingen salogen da so dalin, tan pambungaen da tan pambukelen da, tan pangikdan to na bini ed saray managtanaman tan tinapay ed manangan. Ontan met naani so salitak ya ompaway ed sangik; sikato naani ag-ompawil ed siak a paoypaoy, noag ingen sumpalen to naani so kaliktan ko, tan onaligwas naani ed bengatla a pangiyakaran ko ed sikato.”​—Isaias 55:10, 11.

Susumpalen nen Jehova so gagala to tekep na pakaseguro ta anggan say ompatnag ya imposible ed totoo so tudtua manlapud punto de bista to. Pigay taon kayari impatey di Abraham, Isaac,  tan Jacob, sikaray sinaglawi nen Jesus diad impangibagan: “Sikato [si Jehova] so aliwan Dios na saray inatey, noag ingen saray mabilay, ta manbilay so amin a nipaakar ed sikato.” (Lucas 20:37, 38) Sarayan taloran matoor a patriarka so inatey la, balet say gagala na Dios a paolien ira so segseguradon nagawa ta diad sikato et singa ra la mabilay. Say pamilay ed sarayan matoor a lingkor so agmairap parad si Jehova no panon ya agmairap so impamalsa to ed inmunan too manlapud sapok na dalin.​—Genesis 2:7.

Itatarya nen apostol Pablo so sakey nin alimbawa na katuaan a say Dios et pagmaliwen ton nasumpal so ginetma to. Diad Kasulatan, si Abraham so atawag a “pinagka-ama na saray dakel a nasyon.” (Roma 4:16, 17) Anggaman anggapo ni ilalak nen Abram, say ngaran to so sinalatan la nen Jehova ya Abraham, a mankabaliksay “Ama na sakey ya Ulop (Karaklan).” Pinagmaliw nen Jehova a petepeteg so kabaliksan na satan a ngaran diad mamilagron impangipawil ed pakayarin panilalak na masiken lan Abraham tan akulaw lan asawa ton Sara.​—Hebreos 11:11, 12.

Lapud naikdan na baleg a pakayari tan autoridad, sinaglawi nen Jesu-Kristo iray peteg a nagawa a manlalapud atagtagey a punto de bista nen say punto de bista na totoo. Anggaman inatey la so maapit a kaaro ton si Lazaro, imbaga nen Jesus ed saray babangatan to: “Si kaaro tayon Lazaro naugip, ingen onla ak pian sikato so liingen ko ed ugip.” (Juan 11:11) Akin a sinaglawi nen Jesus a say inatey a too so nauugip labat?

Sanen sinmabi si Jesus ed baley nen Lazaro diad Betania, sikatoy linma ed lubok tan impaekal to so baton akasara ed lolooban. Kayari maksil ya impanpikasi, ingganggan to: “Lazaro, paway ka!” Legan ya akateen so kamataan na saramay wadman diad lubok, “saman so inatey pinmaway, ya apotipotan so saray lima tan saray sali to na saray berber ya abel, tan say lupa to apotipotan na sakey ya ules.” Insan inkuan nen Jesus: “Ukbaran yo tan paulyan yo.” (Juan 11:43, 44) Pinaoli nen Jesus si Lazaro​—impawil to so bilay na toon inatey la ed loob na apatiran agew! Katuaan so imbaga nen Kristo sanen inkuanton say kaaro to et naugip. Manlapud panmoria nen Jehova tan si Jesus, say inatey a Lazaro et singa labat nanaugip. On, si Jesus tan say mangatatawen ya Ama to so interesado’d saray bengatla a peteg.

Napagmaliw nen Jehova a Petepeteg Iray Iilaloan Tayo

Agaylan pandumaan ed baetan na saray mapalikdon talintao tan say petepeteg a Dios! Sililingon ipapaarap na saray managtalintao so labas nen too iran pakayari ed saray dadayewen da. Balet, sayan panagdayew so agmakapangitarok ed sarayan talintao na saray abilidad a manggaway milagro. Diad biek a dapag, manepeg labat a tukoyen nen Jehova a Dios iray abayag lan inatey a lingkor to a singano ra mabilay, lapud sarag ton ipawil so bilay da. “Si Jehova so tua a Dios,” tan agton balot papalikdoen so totoo to.​—Jeremias 10:10.

Agaylan makaligliwa so pakaamta a diad nigetar a panaon nen Jehova et paolien toray inatey a walad memorya to​—a nipawil ira ed bilay! (Gawa 24:15) On, sasaglawien na kioli so kipawil ed padron na bilay na indibidual. Say pannodnonot ed saray padron na bilay na inaatey tan pamaoli ed sikara so aliwan problema parad say Manamalsa, a walaan na ag-ageteran a kakabatan tan pakayari. (Job 12:13; Isaias 40:26) Lapud daakan ed panangaro si Jehova, usaren to so naspot a memorya to pian ipawil so bilay na saray  inatey diad paraison dalin pati met lay personalidad da sakbay na impatey da.​—1 Juan 4:8.

Legan a manasingger la so anggaan na mundo nen Satanas, talagan say arapen so maliwliwawa parad saramay manmamatalek ed tuan Dios. (Uliran 2:21, 22; Daniel 2:44; 1 Juan 5:19) Papaseguroan itayo na salmista: “Wala ni so daiset, et say bagel onandi. . . . Ingen ta saray mauyamo tawiren da naani dalin: tan manliket ira a dili ed inkadaakan na kareenan.” (Salmo 37:10, 11) Say krimen tan karawalan so bengabengatla la’d apalabas. Ontalona so inkahustisya, tan naandi la iray irap lapud ekonomya. (Salmo 37:6; 72:12, 13; Isaias 65:21-23) Amin a pakasuysoyan na panaglabi nisesengeg ed panagbilay, rasa, tribu, tan etniko so naandi la. (Gawa 10:34, 35) Saray bakal tan ayura ed panlalaban so naandi la. (Salmo 46:9) Diad satan a panaon et “say manaayam agto naani ikuan, Mabeblay ak.” (Isaias 33:24) Amin et panggayagaan day naspot tan maligsan bunigas. (Apocalipsis 21:3, 4) Say paraiso ed dalin so asingger lan magmaliw a petepeteg. Ginagala la itan nen Jehova!

On, amin a nibase’d Biblian iilaloan so asingger lan nasumpal. Akin ya abuloyan tayoy inkasikatayo a napalikdo na say tatalintaoen na sayan mundo anta sigpot a makapanmatalek itayo ed si Jehova? Linawa to ya “amin a totoo nilaban ira komon, tan ondago ra ed pakapikabat ed katuaan.” (1 Timoteo 2:3, 4) Imbes ya usaren so panaon tan kaykayarian tayo ed saray ilusyon, odino saray abaloan, ed sayan sistema na bengabengatla tan ed dirios na satan, pabulaslasen so pikakabat tayo ed Dios a tudtua tan manmatalek ed sikato tekep na interon puso tayo.​—Uliran 3:1-6; Juan 17:3.

[Litrato ed pahina 6]

Diad panmoria nen Jehova tan si Jesus, si Lazaro so nauugip lambengat

[Saray litrato ed pahina 7]

Say paraiso ed dalin so asingger lan magmaliw a petepeteg