Mantultuloy ya Ipatnag so Kamaongan

“Say bunga na liwawa sikato so amin a kaabigan [o kamaongan] tan kaptekan tan katuaan.”​—Efeso 5:9.

1. Panon so pangipapanengneng natan na minilyon a mipakna ira ed Salmo 31:19?

 SAY makapadinayew a nagawaan na siopaman a too et say pangigloria ed si Jehova. Natan, minilyon so manggagawa ed satan diad pangidadayew ed Dios lapud kamaongan to. Bilang matoor a Tastasi nen Jehova, sikatayo so sigpot-puson mipakna ed salmista ya angikanta: “Alay kinabalgan na kaabigan mo, a tinipon mo ya onkana ed saray ontakot ed sika!”​—Salmo 31:19.

2, 3. Anto so nayarin nagawa sano say panaggaway-babangatan a kimey et ag-atekepan na maong a kondukta?

² Say mapagalang a takot ed si Jehova so mamakiwas ed sikatayon mangidayew ed sikato lapud kamaongan to. Satan met so mamakiwas ed sikatayon ‘misalamat ed si Jehova, ondakmomo ed sikato, tan mangipakabat ed inkaari to.’ (Salmo 145:10-13) Satan so rason no akin a maseseg itayon mibibiang ed panangipulong ed Panarian tan ed panaggaway-babangatan a kimey. (Mateo 24:14; 28:19, 20) Siempre, say panagpulong a kimey tayo so nepeg a natekepan na maong a kondukta. Ta no andi, makapangitarok itayo na kabandayan ed masanton ngaran nen Jehova.

³ Dakel a totoo so mankuan a mandadayew ira ed Dios, balet say kondukta ra so agmitunosan ed saray estandarten nidatak ed impuyan a Salita to. Nipaakar ed arum ya agmitutunosan ed saray ibabaga ran panggawa na maong, oniay insulat nen apostol Pablo: “Sika a mangibangat ed arum agmo bangatan so inkasika a dili? Sika ya ipupulong mo so agpantakew mantakew ka ta? Sika, a kuan mo a say sakey a too agto nepeg so manggawa na pikakalugoran mikalugoran ka ta? . . . Say ngaran na Dios naayew lapu ed sikayo dia ed utel na saray Gentiles, unong na nisulat.”​—Roma 2:21, 22, 24.

4. Anto so epekto na maong a kondukta tayo?

⁴ Imbes a mangitarok na kabandayan ed ngaran nen Jehova, satan so pambanikelan tayon igloria panamegley na maong a kondukta tayo. Saya so walaan na positibon epekto ed saramay walad paway na Kristianon kongregasyon. Sakey lan bengatla et ontulong itan ed sikatayo pian napareen iray onsusumpa. (1 Pedro 2:15) Mas importante, say maong a kondukta tayo so managyat ed totoo diad organisasyon nen Jehova, a mangilulukas na pankanawnawa ed sikara a mangigloria ed sikato tan makagamor na andi-anggaan a bilay.​—Gawa 13:48.

5. Antoran tepet so nepeg tayon konsideraen?

⁵ Lapud ag-itayo ayadyari, panon tayon napaliisan so kondukta a mangitarok na kabandayan ed si Jehova tan mangigapol ed saray manaanap na katuaan? On, panon itayon ontalona ed panangipatnag na kamaongan?

Say Bunga na Liwawa

6. Anto so pigara ed “saray gawa na saray bilunget ya ag-ombunga,” balet anton bunga so nepeg ya ompatnag ed limog na saray Kristiano?

⁶ Bilang dedikadon Kristianos, walay bengatlan panggagayagaan tayo a makatulong ed pakapaliis ed “saray gawa na saray bilunget ya ag-ombunga.” Laktipen na saraya so makapabanday ed Dios iran  gawa a singa say panagtila, panagtakew, maabuson panagsalita, marutak a panagtongtong nipaakar ed sekso, makapabaing a kondukta, mabanday a panaglurey, tan panagbuanges. (Efeso 4:25, 28, 31; 5:3, 4, 11, 12, 18) Imbes ya ilanor tayo so inkasikatayo ed saratan a gawa, “manakar [itayon] singa anak na liwawa.” Imbaga nen apostol Pablo a ‘say bunga na liwawa sikato so amin a kamaongan tan kaptekan tan katuaan.’ (Efeso 5:8, 9) Kanian diad pankurang ed liwawa et nitultuloy tayon nipatnag so kamaongan. Balet anton klase na liwawa iya?

7. Anto so nepeg tayon gawaen pian nitultuloy tayon nipatnag so kamaongan?

⁷ Anggaman ed agtayo inkayadyari, nipatnag tayo so kamaongan no mankurang itayo ed espiritual a liwawa. “Say salitam sikato so sakey a silewan ya onkana ed saray salisalik, tan sakey a liwawa ya onkana ed basbas ko,” so inkanta na salmista. (Salmo 119:105) No kaliktan tayo a mantultuloy tayon nipatnag so “bunga na liwawa” diad panamegley na ‘amin a kamaongan,’ nepeg tayon tuloytuloy ya anamoten so espiritual a liwawa a naromog ed Salitay Dios, a maalwar a nausisa ed saray Kristianon publikasyon, tan regular a nasisingbat diad saray miting tayo ed panagdayew. (Lucas 12:42; Roma 15:4; Hebreos 10:24, 25) Nakaukolan met ya ikdan tayo na nikaduman imano so alimbawa tan saray bangat nen Jesu-Kristo, say “silew na mundo” tan “sinag na gloria [nen Jehova].”​—Juan 8:12; Hebreos 1:1-3.

Sakey a Bunga na Espiritu

8. Akin a nipatnag tayo so kamaongan?

⁸ Say espiritual a liwawa so maseguron ontulong ed sikatayo pian nipatnag so kamaongan. Niarum ni, nayarian tayon ipatnag iyan kalidad lapud iwawanwan itayo na masanton espiritu, odino aktibon puersa na Dios. Say kamaongan so kabiangan na “bunga na espiritu.” (Galacia 5:22, 23) No manpasakop itayo ed panangigiya na masanton espiritu nen Jehova, mamawala itan ed sikatayo na alay abig a bunga na kamaongan.

9. Panon tayon makakiwas a mitunosan ed saray salita nen Jesus a nikurit ed Lucas 11:9-13?

⁹ Say pirmin pilalek tayo a paliketen si Jehova diad panangipatnag ed kamaongan, a bunga na espiritu, so nepeg a mamakiwas ed sikatayon mitunosan ed saray salita nen Jesus: “Kerew kayo, et naikdan kayo; mananap kayo, et makaromog kayo; ompato’ kayo, et nalukasan ed sikayo. Ta balang sakey ya onkerew, mangawat; et say mananap, makaromog; et say ompatok, nalukasan. Et siopa ed sikayo so ama sano say anak to onkerew ed sikato na tinapay, et sikato so ikdan to na sakey a bato? ono sira, et sikato so mangiter na sakey ya uleg a panagkasira? Ono sikatoy onkerew na sakey ya iknol, iter to ed sikato so sakey ya alakdan? No sikayo sirin, anta mauges kayo, amta yo so mangiter na saray maong a panangaro ed saray anak yo agkasi nagkalalo a say Ama yo a mangatatawen mangiter na espiritu santo ed saray onkerew ed sikato?” (Lucas 11:9-13) Komon ta tumboken tayo so simbawa nen Jesus diad ikerew tayo na espiritu nen Jehova ta pian nitultuloy tayon nipatnag so bunga na kamaongan.

‘Mantultuloy a Manggawa na Maong’

10. Antoran aspekto na kamaongan nen Jehova so asalambit ed Exodo 34:6, 7?

¹⁰ Panamegley na espiritual a liwawa a manlalapud Salitay Dios tan diad tulong na masanton espiritu na Dios, nayarian tayo so ‘mantultuloy a manggawa na maong.’ (Roma 13:3) Diad regular a panagaral na Biblia, lalon ondakel so naaralan tayo no panon tayon aligen so kamaongan nen Jehova. Akonsidera ed inmunan artikulo iray aspekto na kamaongan na Dios a nidatak ed panangiyabawag ed si Moises ya asalambit ed Exodo 34:6, 7, ya oniay nabasa tayo: “Jehova, Jehova, Dios a mapangasi tan maomaong, mapalna ya onsanok, tan daakan ed maaro ya abig na linawa, tan katuaan; a mangigagana na maaro ya abig na linawa ed saray nilibo, mamerdona na inkauges, tan impakasumpa, tan kasalanan; tan anggan anton pamaakaran agto ibilang a malinis so nankasalanan.” Say maapit a panimano  ed sarayan aspekto na kamaongan nen Jehova so ontulong ed sikatayon ‘mantultuloy a manggawa na maong.’

11. Panon itayon naapektaan ed pikakabat a si Jehova et mapangasi tan maomaong?

¹¹ Napasakbayan itayo ed sayan panangiyabawag na Dios a nakaukolan tayon aligen si Jehova diad pagmaliw a mapangasi tan maomaong. “Maliket iray mapangasi,” kuan nen Jesus, “lapud napanengnengan iray panangasi.” (Mateo 5:7, NW; Lucas 6:36) Lapud sikakabat itayo a si Jehova et maomaong, napakiwas itayon magmaliw a maong diad pidedeneng tayo ed arum, pati ed saramay pupulongan tayo. Mitunosan iya ed simbawa nen Pablo: “Say salita yo komon natekepan lawas na liga, alaokan na asin, pian nakabatan yo no panon so nepeg yo a yebat ed balang sakey.”​—Colosas 4:6.

12. (a) Lapud say Dios et mapalna ya onsanok, panon so nepeg ya ikiwas tayo ed arum? (b) Say maaron abig a linawa nen Jehova so mamakiwas ed sikatayo a manggawa na anto?

¹² Lapud say Dios et mapalna ya onsanok, say pilalek tayon ‘mantultuloy a manggawa na maong’ so mamakiwas ed sikatayo a mananos ed saray ankekelag a kakulangan na saray kapananisiaan tan imanoen iray maong a kalidad da. (Mateo 7:5; Santiago 1:19) Say maaron abig-linawa nen Jehova so mamakiwas ed sikatayo a mangipatnag na matoor ya aro, anggan diad makapasubok a tuloy iran kipapasen. Saya so maseguron pilpilaleken.​—Uliran 19:22.

13. Panoy nepeg ya ikiwas tayo pian nipatnag a si Jehova et ‘daakan ed katuaan’?

¹³ Lapud say mangatatawen ya Ama tayo et ‘daakan ed katuaan,’ panggunaetan tayon ‘imatalek so inkasikatayon dili bilang ministros to panamegley na matuan panagsalita.’ (2 Corinto 6:3-7) Kabiangan ed pitoran bengatla a kagulgula nen Jehova et say “matila a dila” tan “matila a tasi a manbitla na tilatila.” (Uliran 6:16-19) Kanian say pilalek tayon mamaliket ed Dios so mamapakiwas ed sikatayon ‘paliisan so katilaan tan salitaen so tua.’ (Efeso 4:25) Komon ta agtayon balot onsaew a mangipatnag na kamaongan ed sayan importantin paraan.

14. Akin a nepeg itayon magmaliw a manamerdona?

¹⁴ Say panangiyabawag na Dios ed si Moises so nepeg met a mamakiwas ed sikatayo a magmaliw a manamerdona, lapud si Jehova et akaparaan a mamerdona. (Mateo 6:14, 15) Siempre, dudusaen nen Jehova iramay agmagbabawin managkasalanan. Nepeg tayon itandoro sirin iray estandarte to nipaakar ed kamaongan a manasaglawi’d panmantini ed espiritual a kalinisan na kongregasyon.​—Levitico 5:1; 1 Corinto 5:11, 12; 1 Timoteo 5:22.

‘Manlikas Kayo’

15, 16. Panon itayon natulongan na simbawa nen Pablo a nikurit ed Efeso 5:15-19 pian nitultuloy tayon naagamil so kamaongan?

¹⁵ Pian nagegemtan so kurang na kamaongan anggaman ed kaugsan a walad kaliberliber tayo, nakaukolan a napano itayo na espiritu na Dios tan manbantay ed no panon so pankurang tayo. Unong ed satan, pinaseseg nen Pablo iray Kristiano ed Efeso: “Nengneng yo sirin a tinekepan na panlikas no panon so panakar yo, aliwan singa  andi kalakal, noag ingen singa makalakal; Ya anamoten yo so panaon, ta saray agew sikara so mauges. Kanian aliwa kayo komon a makulangkulang, noag ingen talosan yo no anto so linawa na Katawan. Tan agkayo manbuanges na alak, a sikato so kawalaan na pisesepakan, noag ingen napano kayo komon na espiritu. A mansasalita so sakey tan sakey ed sikayo na saray salmo tan saray himno tan kankansion a nipaakar ed espiritu, a mankankanta tan irayrayew yo ed saray kapusoan yo so Katawan.” (Efeso 5:15-19) Sayan simbawa so maseguron matukoy ed sikatayo diad sarayan maatap a kaunoran iran agew.​—2 Timoteo 3:1.

¹⁶ Ta pian nitultuloy tayon naagamil so kamaongan, nepeg itayon manlikas a say pankukurang tayo et singa saramay mangaagamil na maridios a kakabatan. (Santiago 3:17) Nepeg a paliisan tayo so mauges iran kasalanan tan nepeg a napano itayo na masanton espiritu, a paiwanwan itayo ed satan. (Galacia 5:19-25) Diad pangiyaplika ed espiritual a bilin a nitatarya diad saray Kristianon miting, asamblea, tan kombension, makapantultuloy itayon makapanggawa na maong. Saray salita nen Pablo ed saray taga-Efeso so mangipanonot met ed sikatayo a maslak ed saray pandaragup tayo parad panagdayew et nagunggonaan itayo manlapud masimoon a panagkanta ed ‘maespiritual iran kansion,’ a dakel ed saratan so mangiyaapasakey ed saray maespiritual a kalidad, a singa say kamaongan.

17. No say sirkumstansya ra so mangamper ed pakaatendi ran regular ed saray miting, anto so naseguro na saray mansasakit lan Kristiano?

¹⁷ Komusta met so nipaakar ed saray kapananisiaan ya agmakaatendin regular ed saray Kristianon miting lapud mansasakit la ran maong? Nayarin nadidismaya ira lapud agda lawas nidayew si Jehova diad pilimog dan mismo ed saray espiritual ya agagi ra. Balet makapanseguro ira a natalosan nen Jehova so kipapasen da, a pansiansiaen to ra ed katuaan, ikdan to ra na masanton espiritu to, tan ontulong ed sikara a manggawa na maabig.​—Isaias 57:15.

18. Anto so ontulong ed sikatayo pian nagegemtan so kurang na kamaongan?

¹⁸ Kakaukolanen ed pangegemtan ed kurang na kamaongan so panalwar tayo ed saray pililimog tayo tan paliisan iramay “maingongot ed maabig.” (2 Timoteo 3:2-5; 1 Corinto 15:33) Say pangiyaplika ed satan a simbawa so ontulong ed sikatayon ompaliis ed ‘pamaermen ed masanton espiritu na Dios’ diad isumlang ed panangiwanwan na satan. (Efeso 4:30) Niarum ni, natulongan itayon manggawa na maong no bayuboan tayo so maapit a pisisiglaotan ed saramay mangipapatnag ed kabibilay da ya aaroen da so kamaongan tan paiwawanwan ira ed masanton espiritu nen Jehova.​—Amos 5:15; Roma 8:14; Galacia 5:18.

Say Kamaongan so Mangitarok na Maabig Iran Resulta

19-21. Isalaysay iray eksperiensyan mangipapanengneng ed epekto na panangipatnag ed kamaongan.

¹⁹ Say pankurang ed espiritual a liwawa, pampasakop ed panangidirehi na espiritu na Dios, tan pambantay ed no panon so pankurang tayo so ontulong pian napaliisan tayo so mauges tan ‘makapantultuloy a manggaway maong.’ Bilang epekto, saya so mamawala na maabig iran resulta. Konsideraen pa so alimbawa nen Zongezile, sakey ed saray Tastasi nen Jehova ed Abalaten Aprika. Sakey a kabuasan, sanen sikatoy mamaarap la ed eskuelaan, ninengneng to no pigara ni so walad daiset a nibangko to. Say papel a pinmaway ed automatikon makina na teller so alingon angipatnag na masulok a R42,000 ($6,000, U.S.). Sikato so sinugsogan na guardia na banko tan arum ni ya ipaway to la so kuarta tan ideposito to ed arum a banko. Say Tasin sanasawa labat a kaiba to ed abung so angomenda ed sikato lapud agto impaway so kuarta.

²⁰ Diad ontumbok ya agew na trabaho, inreport nen Zongezile so lingo diad banko. Adiskobre a mipadpara so account number to ed samay mayaman a negosyante ya alingon nampundo ed account to. Lapud mankelkelaw ta agginastos nen Zongezile so kuarta to, oniay intepet na negosyante: “Anto so relihyon mo?” Insalaysay nen Zongezile a sikato so sakey ed saray Tastasi nen Jehova. Sikato so masimoon a kinomendaan na saray opisyal na banko, ya angikuan: “Pirawat mi ya amin komon a totoo et matua a singa saray Tastasi nen Jehova.” Tua, saray gawa na inkamatua tan kamaongan so sengegan na pangigloriaan na arum ed si Jehova.​—Hebreos 13:18.

²¹ Saray gawa na kamaongan so agnakaukolan a magmaliw nin matalonggaring pian nawalaan na maabig ya epekto. Bilang pangiyilustra: Sakey a kalangweran a Tasi a manlilingkor bilang  sigpot-panaon ya ebanghelisador ed sakey ya isla na Samoa so nakaukolan ya onla ed ospital diman. Manaalagar iray pasyente pian manpanengneng ed sakey a doktor, tan naimano na Tasi a grabe lay pansasakit na akulaw ya ontumbok ed sikato. Pinauna to so akulaw pian naasikaso lan tampol. Diad onsaginonor ya inkagawa, nabet na Tasi iyan akulaw diad tindaan. Sikato so anonotan na akulaw tan saray maong a ginawa to diad ospital. “Natan et amtak la a saray Tastasi nen Jehova so peteg a mangaaro ed kapara ran too,” so inkuanto. Lapud sikato so datin ag-ondengel na mensahe na Panarian, say kamaongan ya impanengneng ed sikato na Tasi so walaan na maong ya epekto. Inawat na akulaw so opresin panangiyaral na Biblia tan ginmapon angasol na pikakabat ed Salitay Dios.

22. Anto so sakey a lalon importantin paraan pian ‘makapanggawa na maong’?

²² Maseguron makapangidalatdat kayo met na saray eksperiensya a mangipanengneng ed kablian na panangipatnag na kamaongan. Sakey ed lalon importantin paraan ed ‘pantultuloy a manggawa na maong’ et say regular a pibibiang ed panangiyabawag na maong a balita na Panarian na Dios. (Mateo 24:14) Komon ta maseseg tayon mibiang ed sayan mablin kimey, a nonoten a saya so sakey a paraan pian makagawa na maong, nagkalalo la ed saramay paborablin onkiwas. Sankaimportantian, say ministeryo tayo tan say maong a kondukta tayo so mangigloria ed si Jehova, say mismon lapuan na kamaongan.​—Mateo 19:16, 17.

Mantultuloy a “Manggawa na Maong”

23. Akin a say Kristianon ministeryo et maong a kimey?

²³ Maseguron say ministeryo tayo et maong a kimey. Manresulta itan ed kilalaban tayo tan ed saramay ontalineng ed mensahe na Biblia, ya ontundas ira ed dalan ya ompugta’d andi-anggaan a bilay. (Mateo 7:13, 14; 1 Timoteo 4:16) Sano nipaarap itayo sirin ed saray panagdesisyon, say pilalek a manggawa na maong so maseguron pansengegan na pangitepet tayo ed inkasikatayo: ‘Panon a makaapekta iyan desisyon ed panangipulong ko ed Panarian? Kasin makagunggonan talaga so kurang a nononoten ko? Kasin makatulong itan ed siak pian natulongan ko met so arum a mangawat na “andi-angga a maong a balita” tan nawalaan na maapit a siglaotan ed si Jehova a Dios?’ (Apocalipsis 14:6) Manresulta ed baleg a liket so desisyon a mangiyaalibansa ed intereses na Panarian.​—Mateo 6:33; Gawa 20:35.

24, 25. Anto so pigaran paraan a nagawaan so kamaongan ed kongregasyon, tan ed anto so pakaseguroan tayo no mantultuloy itayon mangipatnag na kamaongan?

²⁴ Komon ta agtayon balot leglemewen so makagunggona iran epekto na kamaongan. Tuloytuloy tayon nipatnag iyan kalidad diad pansuporta ed Kristianon kongregasyon tan diad panggawa na anggaay nayarian tayo diad pangasikaso ed intereses na satan. Maseguron makagawa itayo na maong sano regular itayon onaatendi tan mibibiang ed saray Kristianon miting. Say mismon kiwawala tayo so mamaseseg ed saray kaparan managdayew, tan say imparaan a maong iran komento tayo so mamaseseg ed sikara diad espiritual a paraan. Makagawa itayo met na maong sano usaren tayo iray kaykayarian tayo pian mantinien so Kingdom Hall tan sano aasikasoen tayo itan. (2 Arari 22:3-7; 2 Corinto 9:6, 7) On, “unong a wala so kiambegya manggawa itayo na maabig ed saray amin, nagkalalo ed saray kaamong na pananisia.”​—Galacia 6:10.

²⁵ Agtayo nailaloan so kada situasyon a mankaukolan na pangipatnag na kamaongan. No nipaarap itayo sirin ed saray balon angat, komon ta anapen tayo so liwawa a manlapud Kasulatan, manpikasi parad masanton espiritu nen Jehova, tan gawaen tayo so anggaay nayarian tayo a manumpal ed maong tan naspot a linawa to. (Roma 2:9, 10; 12:2) Sikatayo so makapanmatalek a bendisyonan itayo nen Jehova ed daakan a paraan legan ya itutultuloy tayo so pangipatnag na kamaongan.

Panon Yon Ebatan?

• Panon tayon nagawaan so sankatalonggaringan a kamaongan?

• Akin a say kamaongan et atawag a ‘bunga na liwawa’?

• Akin a say kamaongan et atawag a ‘bunga na espiritu’?

• Say maong a kondukta tayo so walaan na anton epekto?

[Tepetepet Parad Panagaral]

[Litrato ed pahina 17]

Ontulong ed sikatayo so Salitay Dios tan masanton espiritu to pian nipatnag so kamaongan

[Saray litrato ed pahina 18]

pangipatnag na kamaongan so mamawala na maabig iran resulta