Saray Maabig a Gawa so Mangigloria ed Dios

LAPUD maabig a kondukta tan napanuliranan iran kimey da, saray tuan Kristiano so mangiglogloria ed Dios. (1 Pedro 2:12) Naimano iya ed samay agawa ed Italya diad agano niran taon.

Nen Setyembre 1997, yinmegyeg na maksil ed nanduruman parte na saray rehyon na Marche tan Umbria, ya aneral ed ngalngali 90,000 a kaabungan. Saray grupo na Tastasi nen Jehova so tampol a tinmulong ed saray kapananisiaan da pati met ed arum. Intarya iray trailer, panugipan, dalikan, generator, tan arum niran nakaukolan a bengatla. Sarayan sagpot na pananulong so naimano.

Say peryodikon Il Centro so angibalita: “Say primeron sinmabi a tinmulong ed saray apektadon lugar et saray Tastasi nen Jehova ed Roseto [diad probinsya na Teramo] . . . Nilikud ed pantitipon a panapanaon pian manpikasi, saramay matoor ed si Jehova so nantrabaho diad praktikal a paraan, angiyoopresi na tulong ed saramay manasagmak na irap, antokaman so relihyon da.”

Say mayor na Nocera Umbra, sakey ed saray baley ya apektadon tuloy, so nansulat ed saray Tastasi: “Impapuso tan personal ak a misalsalamat ed sikayo lapud pananulong ya inyopresi yo ed saray manaayam ed Nocera. Segurado ak a nibabalikas koray liknaan na amin a mibabaley.” Niarum ni, say Ministry of Interior so anumang ed Congregazione Cristiana dei Testimoni di Geova (Kristianon Kongregasyon na Saray Tastasi nen Jehova) na sakey a sertipiko na merito tan sakey a medalyan “mamapaneknek ed kimey ya agawaan da tan maseet ya intulong da ed saray aktibidad a nisisiglaot ed emerhensian linmesa ed saray rehyon na Umbria tan Marche.”

Nen Oktubre na 2000, sakey a makadesyang a delap so agawa ed rehyon na Piedmont diad bandad amianen na Italya. Kinmiwas lamet a tampol iray Tastasi nen Jehova pian ontulong. Sarayan maabig a gawa so naimano met. Say Rehyon na Piedmont so angiter ed sikara na plake lapud “mablin boluntaryon impankimey [da] bilang panuporta ed saray taga Piedmont a naapektoan na delap.”

Binilin nen Jesu-Kristo iray babangatan to: “Pasindagen yo komon so silew yo ed arap na saray totoo; pian nanengneng da so saray maong a gawa yo, et galgalangen da so Ama yo a wala ed tawen.” (Mateo 5:16) Sililiket iray Tastasi nen Jehova a mangiglogloria ed Dios, aliwan diad inkasikaran dili, diad panggagawa na “saray maong a gawa” pian tulongan so kapara ran totoo diad espiritual tan ed arum niran paraan.