Makaaral ed si Nicodemo

“NO SIOPAMAN a too, maliket ya ontumbok ed siak, iburi to so inkasikato, tan sakbaten to so krus [“panamairapan a kiew,” NW] to ya inagew-agew, tan tumboken to ak.” (Lucas 9:23) Satan ya imbitasyon so mabulbulos ya inawat na saray mapaabeban sumisigay tan sakey a balbalawen a managsingil na buis. Tinaynan da so amin a bengatla pian tumboken si Jesus.​—Mateo 4:18-22; Lucas 5:27, 28.

Wala ni itan ya imbitasyon nen Jesus anggad natan, tan dakel la so kinmiwas. Anggaman ontan, walaray maliket a paiyaralan na Biblia ed saray Tastasi nen Jehova balet ta masuyat iran ‘mangiburi ed inkasikara tan manakbat ed panamairapan a kiew da.’ Agda labay a sakbaten so responsabilidad tan pribilehyon pagmaliw a babangatan nen Jesus.

Akin a walaray agda labay so mangawat na imbitasyon nen Jesus tan idedika so inkasikara ed si Jehova a Dios? On, nayarin mankaukolan na dakel a panaon iramay agpinabaleg ed ideya na Judio tan  Kristiano nipaakar ed inkasaksakey na Dios sakbay dan natebek a walay sakey a personal, makapanyarin-amin a Manamalsa. Ingen, anggan kayari na inkakombinse ra a say Dios so tudtua, say arum so agtinmumbok ed saray bakat nen Jesus. Natatakot ira ompan saray kakanayon tan kakaaro ra so manisip na negatibo ed sikara no magmaliw iran Tastasi nen Jehova. Say arum, ya agla sinononot ed inkaganatan na panaon a pambibilayan tayo, so binmaling ed pangegemtan na dayew tan kayamanan. (Mateo 24:36-42; 1 Timoteo 6:9, 10) Antokaman so rason, parad saramay mapaleen ed pandesisyon da a magmaliw a papatumbok nen Jesus, walay naaralan da manlapud salaysay a nipaakar ed si Nicodemo, sakey a mayaman a Judion manuley diad panaon nen Jesus.

Naikdan si Nicodemo na Alay Abig Iran Pankanawnawa

Manga anemiran bulan labat kayari na inggapo nen Jesus ed mangaraldalin a ministeryo to, abidbir la nen Nicodemo a si Jesus et ‘sakey a managbangat a nanlapu ed Dios.’ Diad pandinayew ed saray milagron agano nin ginawa nen Jesus diad Jerusalem ed Paskua nen 30 K.P., diad labi so inyasingger nen Nicodemo pian ipatua so panisia to ed si Jesus tan pian lalon nakabat iyan managbangat. Diad saman et imbaga nen Jesus ed si Nicodemo so aralem a katuaan nipaakar ed pankaukolan a “niyanak lamet” ta pian makaloob ed Panarian na Dios. Diad sayan inkagawa, imbaga met nen Jesus iray salita ya: “Ontanlay impangaro na Dios ed mundo, ya inter to so bogbogtong ya Anak to, pian siopaman a manisia ed sikato agnatawtaw, noag ingen wala so bilay ton andi-anggaan.”​—Juan 3:1-16.

Agaylan dakep ya ilalo so nipaarap ed si Nicodemo! Sikatoy nayarin magmaliw a sakey  ed maapit a kaiba nen Jesus, a personal ton napamintuan so nanduruman aspekto na bilay nen Jesus diad dalin. Bilang sakey a manuley na saray Judio tan managbangat diad Israel, dakel so amta nen Nicodemo nipaakar ed Salita na Dios. Sikato met so walaan na aralem a pikakabat, a napatnagan ed impakabidbir ton si Jesus so managbangat ya imbaki na Dios. Interesado si Nicodemo ed espiritual iran pamaakaran, tan nikadkaduma so inkamapaabeba to. Talagan alay irap parad sakey a membro na sankatageyan a korte na saray Judio so pangaksobi ed pobrin ilalak na karpentero bilang sakey a toon imbaki na Dios! Amin iratan a kalidad so makanakana ed pagmaliw a sakey a babangatan nen Jesus.

Say interes nen Nicodemo ed sayan too a taga-Nazaret so agbinmetel. Kayari na duay taon tan kapaldua, diad Piesta na Saray Kobongkobong et inmatendi si Nicodemo ed sakey a pantitipon ed Sanhedrin. Diad sayan panaon et si Nicodemo so “sakey [ni] ed sikara.” Saray manunan saserdote tan Fariseo so angibaki na saray opisyal a mangerel ed si Jesus. Pinmawil iray opisyal tan inreport da ya: “Anggapo ni too a nansalita na onia.” Diad saman et sikaray minudmora na saray Fariseo: “Pati sikayo met so nibalang? Anisia ta so siopaman ed saray manuley, ono ed saray Fariseos? Balet saraya a katooan ya agda amta so ganggan naayew ira.” Agla napokpokan nen Nicodemo so inkasikato. Sikatoy nansalita: “Say ganggan tayo ukomen to ta so sakey a too, ya agni dengelen ya unona so inkasikato tan amtaen no anto so gagawaen to?” Sikato sirin so nagmaliw a puntirya na kritisismo na arum niran Fariseo: “Sika met taga Galilea ka? Usisaen mo, et nanengneng mo ya anggapo so propeta ya onletaw ed Galilea.”​—Juan 7:1, 10, 32, 45-52.

Manga anem bulan ed saginonor, diad Agew na Paskua nen 33 K.P., naimatonan nen Nicodemo so impangiyepas ed si Jesus manlapud panamairapan a kiew. Inibaan to si Jose na Arimatea, sakey met a membro na Sanhedrin, diad impangiponpon ed bangkay nen Jesus. Diad satan a gagala ya intarok nen Nicodemo so “sakey a laok na mira tan aloe” a manbelat na ngalngali 100 a Romanon libra, a misimbangan ed 72 ya Ingles a libra. Satan so balbaleg a kantidad na kuarta. Kaukolan met na satan so pampakpel pian arapen to so pansumpalan na pakapilanor ed “saman so manamalingo,” a singa tawag  na kapara ton Fariseos ed si Jesus. Inapura ra so impangiponpon ed bangkay nen Jesus, a sikaran dua so angikarga ed si Jesus diad asingger a balon lubok. Balet, angga ni ed sayan bekta et si Nicodemo so siansia nin agbibidbiren a babangatan nen Jesus!​—Juan 19:38-42; Mateo 27:63; Marcos 15:43.

No Akin a Sikatoy Agkinmiwas

Ag-imparungtal nen Juan ed salaysay to no akin a pinaliisan nen Nicodemo so ‘panakbat ed panamairapan a kiew to’ tan tumboken si Jesus. Balet, sikatoy angiter na pigaran pakapatnagan a makapangisalaysay ed ag-inkadesidido na sayan Fariseo.

Manuna’d amin, impabitar nen Juan a sayan Judion manuley so “linma ed [si Jesus] ed labi.” (Juan 3:2) Oniay eksplinasyon na sakey ya iskolar ed Biblia: “Linma si Nicodemo diad labi, aliwan lapud takot, noagta pian naarawian toray ulop na totoon mangamper ed panupapet to ed si Jesus.” Balet, si Juan so anukoy ed si Nicodemo bilang “saman so [lakin] nen inmuna linma ed Jesus ed labi” diad parehon konteksto a tinukoy toy Jose na Arimatea bilang “babangatan nen Jesus, ingen maamot lapud takot ed saray Judios.” (Juan 19:38, 39) Sirin, maseguro a si Nicodemo so inmasingger ed si Jesus diad labi lapud “takot ed saray Judios,” no panon a tatakotan met na arum diad panaon to so antokaman a pakapilanor ed si Jesus.​—Juan 7:13.

Kasin ipapaleen mo ni so desisyon mon magmaliw a sakey ed saray babangatan nen Jesus lapud iilaloan mon ibaga na kakanayon, kakaaro, tan kalimog mo? “Say takot [ed] too mantarok na kalot,” kuan na sakey a proverbio. Panon mon pidenengan so ontan a takot? Intuloy na proverbio: “Balet anggan siopa ya ipasen to so ilalo to ed Jehova nilaban.” (Uliran 29:25) Ta pian napaelet itan a panagmatalek ed si Jehova, kaukolan mon personal a naeksperiensya a sika so talimaen na Dios sano nagogonigon ka. Manpikasi ed si Jehova, tan kerew mo ed sikaton pabiskegen to ka pian nagawaan mo iray anggan ankelag a dedesisyonan nipaakar ed panagdayew mo. Diad ontan et kalkalnan say pananisiam tan panagmatalek mo ed si Jehova so ombulaslas anggad nasabi punton makapanggawa ka la na saray angkabaleg a desisyon a mitunosan ed linawa na Dios.

Say posisyon tan inkabantog nen Nicodemo bilang membro na manuuley a klase so nayarin angamper met ed sikato ed pangala na importantin kundang a pangiburi ed inkasikaton dili. Diad saman a panaon et nayarin pabpablien to ni so posisyon to bilang membro na Sanhedrin. Kasin masuyat kan onkiwas a magmaliw a patumbok nen Kristo lapud ompan nabalang mo so bantog a posisyon mo ed sosyedad odino ompan kaukolan mon italirak laray iilaloan mon iyaaligwas? Anggapo ed sarayan bengatla so nikompara ed kagalangan ed pagmaliw a lingkor na Sankatageyan ed uniberso, a mabulos a mamenek ed saray kerewen mo a mitunosan ed linawa to.​—Salmo 10:17; 83:18; 145:18.

Sakey nin posiblin rason ed impanpaleen nen Nicodemo et nayarin nisisiglaot ed saray kayamanan to. Bilang sakey a Fariseo, nayarin sikatoy naimpluensyaan na arum, “a maaro ra ed kuarta.” (Lucas 16:14) Say katuaan a sarag ton saliwen so mabmablin laok na mira tan aloe so mamapaneknek ed inkayaman to. Walara natan so mangipapaleen ni ed desisyon dan sakbaten iray responsabilidad na sakey a Kristiano lapud paga ra ed materyal a kaykayarian da. Balet, insimbawa nen Jesus ed saray patumbok to: “Agkayo mapaga’d panagbila’yo no anto so kanen yo, ono anto so inumen yo; agyo met kapagaay laman yo, no anto so ikawes yo. . . . Say Ama yon mangatatawen amta to a nakaukolan yo so saraya ya amin a bengatla. Ingen anapen yo nin unona so panarian, tan say inkatunong to; et amin iraya a bengatla niarum ira ed sikayo.”​—Mateo 6:25-33.

Baleg so Asaew nen Nicodemo

Makapainteres, say salaysay nipaakar ed si Nicodemo, a niparungtal labat ed Ebanghelyo nen Juan, so agmangibabaga no kasin sikatoy nagmaliw a patumbok nen Jesus odino andi. Unong ed sakey a tradisyon, si Nicodemo so tinmalindeg ed dapag nen Jesus, nampabautismo, nagmaliw a puntirya na Judion panamasegsegang, nakal ed posisyon to, tan diad kaunoran et pinatakyas ed Jerusalem. Antokaman  so agawa, walay bengatlan segurado: Baleg so asaew to lapud panagpaleen to legan a wadia ni ed dalin si Jesus.

No komon ta ginapoan la nen Nicodemo so ontumbok ed si Jesus diad primeron impiarap to ed Katawan, sikato komon so nagmaliw a maapit a babangatan nen Jesus. Lapud pikakabat, aralem a pakatalos, inkamapaabeba, tan inkamanonot ed espiritual iran pankaukolan nen Nicodemo, sikato komon so nagmaliw a matalonggaring a babangatan. On, sikato komon so akadngel ed saray alay abig a paliwawa na Baleg a Managbangat, akaaral na importante iran leksion manlapud saray ilustrasyon nen Jesus, akaimaton ed saray makapadinayew a milagron ginawa nen Jesus, tan apabiskeg komon ed panamatanir a panamaseseg nen Jesus ed saray apostol to. Balet asaew to itan ya amin.

Lapud inkamasuyat nen Nicodemo a mandesidi, baleg so naandi ed sikato. Kabiangan ed asaew nen Nicodemo et say maligsan imbitasyon nen Jesus: “Dago kayo’d siak, amin yon nasasagpotan tan nabebelatan, et ikdan ta kayo’y pampainawa. Ala yoy pakok ed sikayo, tan manaral kayo’d siak; ta mauyamo ak tan mapaabeba ak a puso; et naromog yoy inawa nipaakar ed saray kamarerwa yo. Ta say pakok mainomay, tan anlemew so awit ko.” (Mateo 11:28-30) Asaew nen Nicodemo so pankanawnawan naeksperiensya iyan aktual a pakarepresko manlapud si Jesus a mismo!

Komusta Ka Balet?

Nanlapula’d 1914, si Jesu-Kristo so wala la ed tawen bilang Ari na mangatatawen a Panarian na Dios. Diad impangipasakbay to no antoy nagawa legan na kiwawala to, imbaga to iya nilikud ni ed arum a bengatla: “Saya ya ebanghelyo na panarian nipulong naani ed sankamundoan ya onkanan pamintuan ed saray amin a nasyones; et saman la onsabi so anggaan.” (Mateo 24:14) Sakbay na isabi na anggaan, satan a sankamundoan a panangipulong so nepeg a nasumpal ni. Panliliketan nen Jesu-Kristo so pakapipibiang na saray ag-ayadyarin totoo. Sika met so makapibiang ed sayan kimey.

Binidbir nen Nicodemo a si Jesus so nanlapud Dios. (Juan 3:2) Diad panaaral mo na Biblia, nayarin ontan met so konklusyon mo. Nayarin akapanggawa ka la na saray pananguman ed bilay mo pian nitukoy mo ed saray estandarte ed Biblia. Nayarin onaatendi ka la ed saray miting na Tastasi nen Jehova ta pian nagkalalon makagamor ka na pikakabat ed Biblia. Nakomendaan ka lapud pansasagpot mo. Ingen, mas ni so kaukolan a gawaen nen Nicodemo nen say basta pakatebek a si Jesus et imbaki na Dios. Kaukolan ton ‘iburi so inkasikato, tan sakbaten to so panamairapan a kiew to ya inagew-agew, tan tumboken to [si Jesus].’​—Lucas 9:23.

Ipapuso so ibabaga nen apostol Pablo ed sikatayo. Insulat to: “Diad pankikimey min nikasakey ed sikato pikasi mi ed sikayo met ya agyo awaten so grasya na Dios ed andi kakanaan. Ta kuanto, Dia ed makanan panaon dinengel ta ka, tan dia ed agew na panangilaban tinulongan ta ka; nia, natan so makanan panaon; nia, natan so agew na panangilaban.”​—2 Corinto 6:1, 2.

Natan la so panaon pian bayuboan so pananisian mamakiwas ed sika. Ta pian nagawaan itan, dalepdepen iray bengatlan nanaaralan mo ed Biblia. Manpikasi ed si Jehova, tan kerewen mo’d sikato a tulongan to kan mangipanengneng na ontan a pananisia. Legan mon naeeksperiensya so pananulong to, say apresasyon tan panangarom ed sikato so mamakiwas ed sikan kaliktanen so ‘pangiburim ed inkasika tan sakbaten so panamairapan a kiew mo ya inagew-agew tan tumboken si Jesu-Kristo.’ Kasin onkiwas ka la natan?

[Litrato ed pahina 9]

Diad inmuna et makmakpel a tinmalindeg si Nicodemo parad si Jesus

[Litrato ed pahina 9]

Anggaman ed isusumpa, tinmulong si Nicodemo ed impangiponpon ed bangkay nen Jesus

[Litrato ed pahina 10]

Napabiskeg kan onkiwas diad personal a panagaral tan pikakasi

[Litrato ed pahina 10]

Kasin awaten mo so pribilehyon mankimey ed silong na panangidaulo nen Jesu-Kristo?