Naawat Yo la Kasi so “Espiritu na Katuaan”?
Naawat Yo la Kasi so “Espiritu na Katuaan”?
“[Say] Ama, et ikdan to kayo na sananey a managligliwa, pian manayam ed sikayo lawas, salanti say espiritu na katuaan.”—JUAN 14:16, 17.
1. Anton importantin impormasyon so impaamta nen Jesus ed saray babangatan to legan na unor ya oras a kaiba to ira ed tagey a silir?
“KATAWAN, iner so laen mo?” Sakey itan ed saray intepet na apostoles nen Jesus legan na unor iran oras na impilimog to ed sikara sanen wala ra’d tagey a silir ed Jerusalem. (Juan 13:36) Kaleganan na panduroypo ra, impaamta nen Jesus ed sikara a sikato so kaukolan ya ompawil ed Ama to. (Juan 14:28; 16:28) Sikato so aliwa lan lupalupaan a mangibangat ed sikara tan mangebat ed saray tepet da. Balet, pinaseguroan to ira, a kuanto: “Mikasi ak ed Ama, et ikdan to kayo na sananey a managligliwa [“mananulong” NW], pian manayam ed sikayo lawas.”—Juan 14:16.
2. Anto so insipan nen Jesus ya ibaki to ed saray babangatan to kayari na itaynan to?
2 Imparungtal nen Jesus itan a mananulong tan impaliwawa to no panon itan ya ontulong ed saray babangatan to. Inkuanto ed sikara: “Sarayan bengatla agko inkuan ed sikayo a nanlapu ed gapo, lapud wala ak nin iba yo. Balet natan onla ak ed saman so angibaki dia ed siak; . . . makana ed sikayo ya ontaynan ak. Ta no agak ontaynan, say managligliwa ag-onla dia ed sikayo; ingen no onla ak, sikatoy ibakik ed sikayo. . . . sano onsabi espiritu na katuaan, itonton to kayo ed amin a katuaan.”—Juan 16:4, 5, 7, 13.
3. (a) Kapigan so inkibaki na “espiritu na katuaan” ed saray inmuunan Kristiano? (b) Anto so importantin paraan a say espiritu so “mananulong” ed sikara?
3 Sayan sipan so asumpal nen Pentecostes 33 K.P., unong a pinekderan nen apostol Pedro: “Sayan Jesus pinaoli Dios ed bilay, a sikato so natasian mi ya amin. Nen nitandoro sirin ed nikawanan na Dios, tan nen inawa’to ed Ama so sipan na espiritu santo, inyibung to so saya, a sikato so nanengneng yo tan narengel yo.” (Gawa 2:32, 33) Unong a nanengneng tayo ed saginonor, say masanton espiritu a nikalbo nen Pentecostes so anumpal ed dakel iran bengatla parad inmuuna iran Kristiano. Balet insipan nen Jesus a say “espiritu na katuaan” so ‘mangipanonot ed amin a bengatlan imbaga to ed sikara.’ (Juan 14:26) Satan so ontulong ed sikara a makanonot ed ministeryo tan saray bangat nen Jesus, anggan saray mismon sinalita to, tan insulat da iratan. Satan so nagkalalon makatulong ed masiken lan apostol Juan diad pansampot na inmunan siglo K.P., sanen inggapo to so mangisulat ed Ebanghelyo to. Satan a salaysay so mangilaktip ed mablin simbawa nen Jesus sanen inletneg to so Memoryal na ipatey to.—Juan, kapitulo 13-17.
4. Panon ya akatulong so “espiritu na katuaan” ed inmuunan alanaan a Kristianos?
4 nsipan met nen Jesus ed saramay inmunan babangatan to a say espiritu so ‘mangibangat ed sikara ed amin a bengatla’ tan iwanwan to ra ed amin a katuaan.’ Satan ya espiritu so ontulong ed sikara a makatalos ed araralem a bengatla na Kasulatan tan pansiansiaen na satan so pankakasakey da ed kanonotan, pakatalos, tan gagala. (1 Corinto 2:10; Efeso 4:3) Pinabiskeg sirin na masanton espiritu iramay inmunan Kristianos ya onakto bilang sakey a grupon “matoor tan makabat ya aripen” a mangitarya na espiritual a “tagano ed panaon na kinepeg to” parad sinansakey iran alanaan a Kristianos.—Mateo 24:45.
Mamapatua so Espiritu
5. (a) Anton balon ilalo so imparungtal nen Jesus ed saray babangatan to diad samay labi na Nisan 14, 33 K.P.? (b) Anto so betang na masanton espiritu ed kasumpalan na sipan nen Jesus?
5 Diad samay labi na Nisan 14, 33 K.P., impasagilig nen Jesus ed saray babangatan to a diad saginonor et awaten to ra tan miayam ira ed sikato tan say Ama to diad tawen. Inkuanto ed sikara: “Dia ed abung nen Amak walaray amayamay a panayaman. No ag-ontan, imbagak komon ed sikayo, ta onla ak a mangiparaan na pasen ya onkana’d sikayo. Et onla ak tan mangiparaan ak na pasen ya onkana’d sikayo, onla ak dia lamet, tan awaten ta kayo ed inkasiak, pian no iner so kawalaan ko, diman makapanayam kayo met.” (Juan 13:36; 14:2, 3) Miuley ira ed sikato diad Panarian to. (Lucas 22:28-30) Pian naawat da iyan mangatatawen ya ilalo, nakaukolan a ‘nianak ni ira ed espiritu’ bilang espiritual ya ananak na Dios tan nalanaan ira a manlingkor bilang arari tan saserdote a kaiba nen Kristo ed tawen.—Juan 3:5-8; 2 Corinto 1:21, 22; Tito 3:5-7; 1 Pedro 1:3, 4; Apocalipsis 20:6.
6. (a) Kapigan so inggapo na mangatatawen a tawag, tan panon karakel so akaawat ed sayan tawag? (b) Saramay atawag so abautismoan ed anto?
6 Sayan ‘mangatatawen a tawag’ so ginmapo nen Pentecostes 33 K.P. tan, diad manunan kabiangan, so ompatnag ya anampot la ed kapegleyan na dekaday 1930. (Hebreos 3:1) Say bilang na saramay atatakan na masanton espiritu pian magmaliw a kabiangan na espiritual ya Israel et 144,000, a ‘sinaliw manlapud saray taga-dalin.’ (Apocalipsis 7:4; 14:1-4) Saraya so abautismoan ed espiritual a laman nen Kristo, ed kongregasyon to, tan ed impatey to. (Roma 6:3; 1 Corinto 12:12, 13, 27; Efeso 1:22, 23) Kayari na inkabautismoan da ed danum tan impakalanaan da na masanton espiritu, sikara so linmoob la ed masakripisyon kurso, sakey a bilay na katooran anggad ipatey da.—Roma 6:4, 5.
7. Akin a saray alanaan a Kristiano so manepeg labat a mibiang ed saray emblema ed Memoryal?
7 Bilang espiritual ya Israelitas, sarayan alanaan a Kristiano so wala la’d balon sipanan ed baetan nen Jehova tan say “Israel na Dios.” (Galacia 6:16; Jeremias 31:31-34) Say balon sipanan so apaletan ed nipaagus a dala nen Kristo. Sinalambit iya nen Jesus sanen inletneg to so Memoryal na impatey to. Inrekord nen Lucas: “Et angala na tinapay, et sanen akapisalamat, pinisag to, et inter to ed sikara, a kuan to, Saya sikatoy laman ko a niiter nisengeg ed sikayo; gawa yo ‘ya a pakanodnonotan ed siak. Et say kopa ontan met kayari panamangdem, ya inkuan to, Saya a kopa sikato so balon sipan dia ed dalak, a naibung nisengeg ed sikayo.” (Lucas 22:19, 20) Say nakdaan, odino nakekeraan a membro na 144,000 a wadia ni’d dalin, so manepeg a mibiang ed saray embleman tinapay tan alak diad Memoryal na impatey nen Kristo.
8. Panon ya amta na alanaan a sikara so akaawat na mangatatawen a tawag?
8 Panon ya amta na saray alanaan ya akaawat ira na mangatatawen a tawag? Maseguron naawat da so panamatua na masanton espiritu. Oniay insulat nen apostol Pablo nipaakar ed saratan: “Ganagana ya intonton na espiritu na Dios sikara ‘ya so anak na Dios. . . . Say dilin espiritu so mamatua ed espiritu tayo, ya anak itayo na Dios: Tan no anak itayo, tomatawir itayo met; tomatawir na Dios, tan mitatawir ed Kristo; a no ontan a mantepel itayo pati sikato, pian iba to itayo a nigloria.” (Roma 8:14-17) Sayan panamatua na espiritu so mabisbiskeg kanian saramay walaan na samsamet a panduaruwa nipaakar ed impakaawat da ed mangatatawen a tawag so makatunongan a manisip ya ag-ira kabiangan, tan sikara sirin so ontunda met lan mibiang ed saray emblema ed Memoryal.
Say Espiritu tan say Arum a Karnero
9. Anton nandumaan a grupo so sinalambit ed Ebanghelyo tan ed libro na Apocalipsis?
9 Sankanonot nen Jesus so limitadon bilang na saray Kristiano ya atawag a manugyop ed espiritual ya Israel, sanen sikara so tinukoy to bilang “melag a pulok.” Naabrasa ira ed “kasimpukokan” na balon sipanan, a miduma ed agnabilang ya “arum a karnero,” ya inkuan nen Jesus a nepeg met a natipon. (Lucas 12:32; Juan 10:16) Saramay kabiangan na arum a karnero ya atipon ed panaon na anggaan so manugyop ed “baleg ya ulop” a niliktar ed “baleg a kairapan,” a walaan na ilalon manbilay ya ando lan ando diad paraison dalin. Makapainteres, say pasingawey a naawat nen Juan diad pansampot na inmunan siglo K.P. so mangibiig ed sayan baleg ya ulop tan say 144,000 a membro na espiritual ya Israel. (Apocalipsis 7:4, 9, 14) Kasin say arum a karnero so makaawat met na masanton espiritu, tan no ontan, panon a mangapekta itan ed kabibilay da?
10. Panon ya abautismoan so arum a karnero ed ‘ngaran na Ama tan ed Anak tan ed masanton espiritu’?
10 Say masanton espiritu so maseguron walaan na importantin betang ed kabibilay na arum a karnero. Insimbolo ra so dedikasyon da ed si Jehova diad impanpabautismo ra ed ‘ngaran na Ama tan ed Anak tan ed masanton espiritu.’ (Mateo 28:19) Bibidbiren da so inkasoberano nen Jehova, manpapasakop ed si Kristo bilang Ari ra tan Mananondon da, tan manpapasakop ira ed impluensya na espiritu, odino aktibon puersa na Dios, diad kabibilay da. Diad agew-agew, panggugunaetan dan bayuboan so “bunga na espiritu,” salanti say “aro, liket, deen, kasungdoan, kauyamoan, kaabigan, sisia, tayadno, dangka.”—Galacia 5:22, 23.
11, 12. (a) Panon ya apasantos iray alanaan ed nikadkaduman dalan? (b) Diad anton dalan a say arum a karnero so alinisan tan apasantos?
11 Say arum a karnero so nepeg met a mangiyabuloy ed Salitay Dios tan say masanton espiritu to a mangogol, odino mamasantos ed sikara. Saray alanaan so alinisan la ed nikadkaduman paraan, a niyabawag a matunong tan masanto bilang nobya nen Kristo. (Juan 17:17; 1 Corinto 6:11; Efeso 5:23-27) Tinukoy ira nen propeta Daniel bilang “saray sasanto na Sankatageyan,” a mangawat na Panarian diad silong na “anak na too,” si Kristo Jesus. (Daniel 7:13, 14, 18, 27) Asasakbay ni, diad panamegley nen Moises tan Aaron, oniay inyabawag nen Jehova ed nasyon na Israel: “Siak si Jehova a Dios yo: kanian mansimpit kayo ed inkasikayo, tan mansantos kayo; ta siak santo ak.”—Levitico 11:44.
12 Say salitan “panamasantos” so manunan mankabaliksan na “gawa odino proseso na pagmaliw a masanto, nisian, odino nibiig parad serbisyo odino uusaren nen Jehova a Dios; say kipapasen na pagmaliw a masanto, apasantos, odino agogolan.” Kasakbayan na 1938, indalatdat na Say Panag-Bantayan a saray Jonadab, odino arum a karnero, so “nepeg a manaral a say pakakonsagra [dedikasyon] tan panamasantos so kinaukolan ed balang sakey a magmaliw a kabiangan na baleg a karaklan tan manbilay ed dalin.” Diad pasingawey a nipaakar ed baleg ya ulop, a nikurit ed libro na Apocalipsis, sikara so asaglawi bilang “inurasan da so kawekawes da, tan sikara so pinaputi ra ed dala na Kordero” tan bilang mangisasaklang ed si Jehova na ‘sagradon panaglingkor ed agew tan labi ed templo to.’ (Apocalipsis 7:9, 14, 15) Diad tulong na masanton espiritu, pambabanikelan na arum a karnero a kapeten iray kakaukolanen nen Jehova nipaakar ed inkasanto.—2 Corinto 7:1.
Panggawa na Maabig ed Saray Agagi nen Kristo
13, 14. (a) Unong ed parabolo nen Jesus nipaakar ed karnero tan kanding, anto so akadependian na kilalaban na saray karnero? (b) Diad sayan panaon na anggaan, panon a sinuportaan na arum a karnero iray agagi nen Kristo?
13 Impabitar nen Jesus so maapit a siglaotan na arum a karnero tan say melag a pulok diad parabolo to nipaakar ed karnero tan kanding, a nilaktip ed propesiya to ed “kasampotan na sistema na saray bengatla.” Diad satan a parabolo, malinew ya impatnag nen Kristo a say kilalaban na arum a karnero so maapit a nisiglaot ed kondukta ra nipaakar ed alanaan, a tinawag ton “agagik.” Inkuanto: “Say Ari ikuan to’d saray walad nikawanan a lima to, Galidia, sikayo bendito nen Amak, tawiren yoy panarian ya imparaan ed sikayo a nanlapu ed inletneg na mundo. . . . Tua kuan ko’d sikatayo, Bangta sikatoy ginawa yo ed sakey ed sarayan agagik, anggan saraya a kamelagan, sikatoy ginawa yo ed siak.”—Mateo 24:3; 25:31-34, 40.
14 Say balikas a ‘bangta satan so ginawa yo’ so manutukoy ed saray kiwas na maaron impanuporta ed saray nailalak ed espiritu ya agagi nen Kristo, ya impasen na mundo nen Satanas bilang sankaili, ya impisok da ni ingen so arum ed sikara. Sikara so nankaukolan na tagano, magenap a kawes, tan panangasikaso ed bunigas da. (Mateo 25:35, 36, NW, paimano’d-leksab) Diad sayan panaon na anggaan, nanlapu la’d 1914, dakel ed saray alanaan so akaeksperiensya ed saratan. Say modernon awaran na saray Tastasi nen Jehova so mamaneknek a sikara so sinuportaan na saray matoor a kakaiba ra, say arum a karnero, lapud saraya so apakiwas ed espiritu.
15, 16. (a) Diad anton kimey so nagkalautlan akatulongan na arum a karnero ed saray alanaan ya agagi nen Kristo diad dalin? (b) Panon ya imbalikas na alanaan so apresasyon da ed arum a karnero?
15 Diad sayan panaon na anggaan, saray alanaan ya agagi nen Kristo ed dalin so nagkalautlan akaawat na aktibon pananuporta na arum a karnero diad panusumpal ed inter na Dios a ganggan ya ‘ipulong iyan ebanghelyo na panarian ed sankamundoan ya onkanan pamintuan ed saray amin a nasyones.’ (Mateo 24:14; Juan 14:12) Anggaman ondaraiset so bilang na saray alanaan ed dalin, say bilang na arum a karnero so inmabot ed literal a minilyon. Nilibo ed sikara so nanlingkor bilang sigpot-panaon ya ebanghelisador—bilang saray payunir tan misionaryo—a mangikakayat ed maong a balita na Panarian “angga ed kasampotan na dalin.” (Gawa 1:8) Arum so mibibiang ed panagtasin kimey ed anggaay nayarian da tan maliket iran manusuporta ed sayan importantin kimey ed pinansyal a paraan.
16 Agaylan pisalsalamat na saray alanaan ya agagi nen Kristo ed sayan matoor a pananuporta na kaiba ran arum a karnero! Nibalikas a maong iray liknaan da ed libron Worldwide Security Under the “Prince of Peace,” ya intarya na aripen a klase nen 1986. Inkuan na satan: “Nanlapu la’d Guerra Mundial II, say kasumpalan na propesiya nen Jesus nipaakar ed ‘kasampotan na sistema na bengabengatla’ so makasengeg a tuloy ed betang a susumpalen na ‘baleg ya ulop’ na ‘arum a karnero’ . . . Pisalamatan a tuloy sirin so ‘baleg ya ulop’ a nanlapud nanduruman nasyon tan lenguahe, lapud malaklaknab a betang da diad pananumpal ed propesiya [nen Jesus] ed Mateo 24:14!”
‘Ag-Ira Komon Nayadyari No Anggapo Itayo’
17. Diad anton dalan a saray matoor nensaman a napaoli diad dalin so ‘agnayadyari no anggapo’ iray alanaan?
17 Sanen si apostol Pablo so nansalita bilang sakey ed saray alanaan tan tinukoy to so matoor a lalaki tan bibii a nambilay sakbay nen Kristo, oniay insulat to: “Sarayan amin, dia ed impakagamor da na sakey a maong a tasi lapu ed pananisia’ra, anggaman ontan agda ni inawat so sipan: Say Dios angiparaan na magmaong a bengatla nipaakar ed sikatayo [saray alanaan], pian ag-ira komon nayadyari ya andi itayo.” (Hebreos 11:35, 39, 40) Legan na Milenyo, si Kristo tan say 144,000 ya alanaan ya agagi to ed tawen so onakto bilang arari tan saserdote tan manginabang diad dalin na saray gunggona na dondon bagat nen Kristo. Say arum a karnero sirin so ‘nayadyari’ ed laman tan kanonotan.—Apocalipsis 22:1, 2.
18. (a) Anto so nepeg a nitulong na saray katuaan na Biblia pian makarandan so arum a karnero? (b) Anton ilalo so tatalaranan na arum a karnero diad ‘kipatnag na ananak na Dios’?
18 Amin na saya so nepeg a nipaslep ed kanonotan na arum a karnero no akin ya insentron maong na Kristianon Griegon Kasulatan si Kristo tan saray alanaan ya agagi to tan say manunan betang da ed pananumpal na saray gagala nen Jehova. Ipasen sirin na arum a karnero a pribilehyo so panuporta diad amin a posiblin paraan ed saray alanaan ya aripen a klase legan a tatalaranan so ‘kipatnag na ananak na Dios’ ed Armagedon tan legan na Milenyo. Makapanilalo ira ed arapen a ‘kiliktar ed inkaaripen na kabulokan ya onloob ed kawayangan na gloria na saray anak na Dios.’—Roma 8:19-21.
Nankakasakey ed Espiritu na Memoryal
19. Anto so ginawa la na “espiritu na katuaan” ed saray alanaan tan saray kakaiba ra, tan panon iran nagkalalon mankakasakey diad labi na Marso 28?
19 Diad pansaran pikakasi to ed samay labi na Nisan 14, 33 K.P., inkuan nen Jesus: “Aliwan saraya labat so pikasik, . . . pian saksakey iran amin salanti singa sika, Ama, wala ka ed siak, tan siak ed sika, pian wala ra met ed sikata, pian say mundo manisia ya imbaki mo ak.” (Juan 17:20, 21) Makasengeg ed aro, imbaki na Dios so Anak to pian iter to so bilay to parad kilalaban na saray alanaan tan say mundo na matulok a katooan. (1 Juan 2:2) Pinankasakey na “espiritu na katuaan” iray agagi nen Kristo tan saray kakaiba ra. Diad labi na Marso 28, kaselek na agew, mantipon so duaran grupo pian nodnonoten so impatey nen Kristo tan nodnonoten da so amin a ginawa la nen Jehova parad sikara panamegley na bagat na pinabli ton Anak, si Kristo Jesus. Komon ta say kiwala ra ed satan ya importantin okasyon so mamabiskeg ed pankakasakey da tan mamasimbalo ed determinasyon dan mantultuloy a manggawa ed linawa na Dios, a mangipatnag a panliliketan da so napibilang ed saramay aaroen nen Jehova.
Bilang Panrepaso
• Kapigan nibaki so “espiritu na katuaan” ed saray inmuunan Kristiano, tan panon itan ya apaneknekan a “mananulong”?
• Panon ya amta na alanaan a sikara so akaawat na mangatatawen a tawag?
• Diad antoran dalan ya onkukurang so espiritu na Dios ed arum a karnero?
• Panon a makakagawa na maong so arum a karnero ed saray agagi nen Kristo, tan akin ya ag-ira ‘nayadyari no anggapo’ iray alanaan?
[Tepetepet Parad Panagaral]
[Litrato ed pahina 21]
“Say espiritu na katuaan” so niyibung ed saray babangatan nen Pentecostes 33 K.P.
[Saray litrato ed pahina 23]
Say arum a karnero so manggagawa na maong ed saray agagi nen Kristo diad panusuporta ra ed pananumpal ed ganggan na Dios a manpulong