Sakey a Syudad ed Toktok na Palandey
Sakey a Syudad ed Toktok na Palandey
“SIKAYO so silew na mundo. Say sakey a syudad a nipasen ed tapew na sakey a pukdol agnayarin yamot,” so inkuan nen Jesus ed saray babangatan to diad bantog a Sermon to ed Palandey.—Mateo 5:14.
Dakel ed saray baley na Judea tan Galilea so walad saray palandey imbes a diad saray lawak ed leksab. Say manunan rason ed panlabay ed saray nipukdol a pasen et lapud liktar iratan a lugar. Nilikud ed managsakop iran armada, saray grupo na managsamsam so nanggagaygay ed saray ayaman na Israelita. (2 Arari 5:2; 24:2) Saray masebeg a mibabaley so mas makapangidepensa ed nantataluntonan a kaabungan a walad toktok na palandey nen say diad patar a baley, a mankaukolay atatagey a bakor a manprotekta.
Lapud maslak ed saray bakor na kaabungan na Judio so apalitadaan na dena, say interon simpok na sarayan pinaputin kaabungan a nantataluntonan a walad pukdol so magmainomay a nabantag anggan diad arawi. (Gawa 23:3) Diad maliwawan Palestina a bubutayan na agew, sarayan baley a nipukdol so onliliwawa a singa silew a panandaan, a singa kaliwawa na saray baley ed Mediteraneo ya angga ni’d panaon tayo.
Inusar nen Jesus iyan makapasagyat ya aspekto na baryo na Galilea tan Judea pian ibangat ed saray patumbok to so betang na sakey a tuan Kristiano. Oniay inkuanto ed sikara: “Ontan met pasindagen yo komon so silew yo ed arap na saray totoo; pian nanengneng da so saray maong a gawa yo, et galgalangen da so Ama yo a wala ed tawen.” (Mateo 5:16) Bangta saray Kristiano so agmanggagawa na maabig pian sikaray pandinayewan na totoo, say maabig a kondukta ra so siansian naiimano.—Mateo 6:1.
Say ontan a maabig a kondukta so naimano legan na saray distriton kombension na Tastasi nen Jehova. Oniay inreport na sakey a peryodiko diad España, a manutukoy ed agano nin kombension: “Anggaman agtanton paniinteresan diad arum a sekta iray teman nipaakar ed relihyon, aliwan ontan diad saray Tastasi nen Jehova. Lapud agda labay a nabalang so kakanaan na Biblia, sikaray mangiyaaplika ed Salita na Dios.”
Si Thomas, say mangaasikaso ed istadyum diad amianen-sagur na España a mabetbet ya uusaren na saray Tastasi, et nanliketan to so impakapilimog ed saray totoon mangiyaaplika ed Salita na Dios. Impaleen to ni ed pigaran simba so panretiro to ed trabaho pian sikatoy wadman legan na distriton kombension na saray Tastasi nen Jehova. Sanen sikato so inasinggeran na dakel ya inmatendi, pati saray ugugaw, kayari na kombension pian sikatoy pisalamatan ed impikoopera to legan na apalabas a pigaran taon tan pian ibaga ra a maabig komon so panretiro to, inmagus iray lua to. Oniay inkuanto: “Say sankaabigan a naeksperiensyak ed bilay ko et say impakapikabat ko ed sikayon totoo.”
Say sakey a syudad ed toktok na palandey so manasagyat ed imano na sakey a maniimaton lapud nipasen itan ed sankatageyan tan lapud say liwawa na agew so isisindag na amputin kaabungan ditan. Mipadpara, saray tuan Kristiano so ontatalindeg a nidumaduma lapud pambabanikelan dan tumboken so atagey a Makasulatan iran estandarte ed inkamatua, moralidad, tan panangasi.
Niarum ni, isisindag na saray Kristiano so liwawa na katuaan diad panagpulong a kimey da. Oniay imbaga nen apostol Pablo ed saray inmunan-siglon Kristiano: “Bangta wala ed sikami so panangasikaso, unong ed agamoran mi a panangasi, agkami onkapuy . . . noag ingen diad inkipaliwawa na katuaan imatalek mi sikamin dili 2 Corinto 4:1, 2) Anggaman walay isusumpa ed inerman a pasen a nampulongan da, benendisyonan nen Jehova so ministeryo ra kanian diad ngalngalin taon 60 K.P., ayarian nen Pablo ya isulat a say maong a balita so nipupulong la “ed amin a pinalsa ed leksab na tawen.”—Colosas 1:23.
ed konsiensia na balang too ed imaton na Dios.” (Natan, masimoon met a gagawaen na saray Tastasi nen Jehova so responsabilidad da pian ‘nisindag so silew da ed arap na saray totoo,’ unong ya ingganggan nen Jesus. Diad pangitotongtong da tan diad panamegley na saray nipalapag a materyal, nikakayat na saray Tastasi nen Jehova so maong a balita ed 235 a daldalin diad interon mundo. Ta pian makasabi so liwawa na katuaan na Biblia ed dakel a totoo anggad posibli, sikaray mangipapalapag na saray publikasyon na Biblia ed manga 370 a lenguahe.—Mateo 24:14; Apocalipsis 14:6, 7.
Diad nanduruman pasen, inarap na saray Tastasi so angat ed panaral na saray lenguahe na totoo ya inmalis manlapud saray bansa a sesebelan odino insebel so kimey a panagpulong. Alimbawa, diad pigaran angkakabaleg a syudad diad Amianen Amerika, wala so dakel a dinmagsan totoo a nanlalapud Tsina tan Russia. Saray Tastasi a manaayam diman so nanggunaet a manaral na Insik, Ruso, tan arum niran lenguahe ta pian nipulong so maong a balita ed saray balon-sabi. Diad tua, saray abantin kurso ed pigaran lenguahe so nikokondukta pian nipulong so maong a balita ed arum ni legan a say uma so “amputi la ran manpaparaan parad panagani.”—Juan 4:35.
Onia so impasakbay nen propeta Isaias: “Nagawa dia ed saray kaunoran ya agew, a say palandey na abung nen Jehova niletneg ed toktok na saray palandey, tan nipaatagey ed labas na saray pukdol; et saray amin a nasyon onagus ira ya angga ed sikato.” Namparan diad kondukta tan ministeryo ra, a tutulongan na saray Tastasi nen Jehova so totoo ed inerman a pasen ya ontatdang ed “say palandey na abung nen Jehova” pian nabangatan ira ed saray dalan na Dios tan pian naaralan da so manakar ed saray basbas na Dios. (Isaias 2:2, 3) Say maliket a pansumpalan et singa la ed impabitar nen Jesus, ya amin da so ‘mangigalgalang ed Ama ra a wala ed tawen,’ si Jehova a Dios.—Mateo 5:16; 1 Pedro 2:12.