Tepetepet Manlapud Saray Managbasa

Diad anton laknab ya onaplika ed saray Kristiano natan iray panameget nipaakar ed panasawa na saray mankanayon a nidatak diad Mosaikon Ganggan?

Say Ganggan ya inter nen Jehova ed nasyon na Israel so aliwan detalyado nipaakar ed saray seremonya tan totontonen ed kasal. Balet, indatak na satan iray sebel sumpad partikular iran panangasawa. Alimbawa, diad Levitico 18:6-20 et naromog tayo so dakel iran nisebel a relasyon nipaakar ed ‘asingger a kanayon.’ Satan a teksto so detalyadon tuloy a mangidadatak no dinan iran mankakanayon so agnepeg a nawalaan na pirerelasyon ed sekso ed balang sakey. Siempre, saray Kristiano so anggapo la’d silong na Mosaikon Ganggan odino diad saray totontonen na satan. (Efeso 2:15; Colosas 2:14) Anggaman ontan, agkabaliksan na saya a basta ibaliwala na saray Kristiano iyan pamaakaran sano mamipili na asawaen o piasawaan. Walaray pigaran rason no akin ya onia so kipapasen.

Unona, walaray sekular a ganggan a mangokontrol ed panasawa na saray maapit a mankanayon, tan obligado iray Kristiano a mangunor ed saray ganggan na bansan panaayaman da. (Mateo 22:21; Roma 13:1) Siempre, saratan a ganggan so nanduruma ed balang pasen. Maslak ed saratan a ganggan natan so manunan ibabase ed henetiko iran panangonsidera. Kabkabat la so katuaan a say panasawa na saray maapit a mankanayon so nayarin mameligro ed siopaman ya ilalak da a nawalaay henetiko iran depekto tan sakisakit. Lapud saya tan lapud ‘katutulok ed saray atagtagey a pakauley,’ saray Kristianon mangaasawa o miaasawa so ontutulok ed ley na bansa ra ed panangasawa.

Insan wadtan so pamaakaran ed no anto so aabobonan tan ag-aabobonan diad komunidad a panaayaman na sakey. Amin lawarin kultura so walaan na saray totontonen tan kustombre a mangisesebel ed panasawa na totoon maapit a mankanayon, a maslak a manmoria ed satan ya impankasakey bilang inseston pirerelasyon kanian isesebel. Anggaman saray espesipikon isesebel a relasyon so manduruman tuloy diad nanduruman kultura, “diad inkalapagan, no lalon maapit so henetikon relasyon na duaran too, mas mabiskeg tan mas mapeget so pananebel odino pangamper ed seksual a panrelasyon da,” so inkuan na The Encyclopædia Britannica. Sirin, anggaman anggapoy nalalanor ya inseston pirerelasyon, saray Kristiano so agmalabay a mangibaliwala ed saray niletneg a kustombre odino ed saray makatunongan a liknaan na komunidad, pian agnabalaw so Kristianon kongregasyon odino say ngaran na Dios.​—2 Corinto 6:3.

Say agnepeg ya ibaliwala et say inter na Dios a konsiensia tayo. Amin a too so nianak a walaan na kasiporan a pakatebek ed no anto so duga tan aliwa, odino maong tan mauges. (Roma 2:15) Ibabaga ed sikara na konsiensia ra no anto so normal tan manepeg tan no anto so aliwan natural tan mabanday, likud no satan so apikewet odino agla makalikna lapud mauges ya agagamil. Tinukoy nen Jehova iyan bengatla sanen inter to ed saray Israelita so ganggan to sumpad panasawa na saray maapit a mankanayon. Oniay nabasa tayo: “Agyo igagawa so gawagawa yod’man ed dalin ya Ehipto a nanayaman yo: tan agyo aaligen a gawaen so gawagawa na dalin a Canaan, a pangiyakaran ko ed sikayo; nisay manonton kayo ed saray pangitontonan da.” (Levitico 18:3) Papablien na saray Kristiano so nibase ed Biblia a konsiensia ra tan agda abuloyan a naimpluensyaan itan na apikewet a pakatebek na nasyones ed duga tan aliwa.​—Efeso 4:17-19.

Kanian, anto so nikuan tayo? Anggaman anggapo la’d silong na Mosaikon Ganggan iray Kristiano, malinew ya ibabaga ed sikara na konsiensia ra a say panasawa na saray maapit a mankanayon​—a singa say ama tan anak, ina tan anak, sanagi​—so sigpot ya isesebel ed Kristianon komunidad. * Legan ya onlalaknab so buleg, bibidbiren na saray Kristiano a walaray ganggan tan ley a manguuley ed legal a panangasawa tan walaray estandarte ya aabobonan ed sosyedad tan kultura. Saraya so nepeg a maalwar ya ikonsidera ta pian mitunos itayo ed Makasulatan a simbawa a: “Say panangasawa sikato komon so narayew ed saray ganagana.”​—Hebreos 13:4.

[Paimano ed Leksab]