Antoy Kasalat na Malinis a Konsiensia?

“INGGANGGAN a Makaawat so Gobierno na R$20,000.” Sayan nikaduman paulon balita so agano nin pinmaway ed say peryodiko ed Brazil a Correio do Povo. Insalaysay na artikulo so nipaakar ed si Luiz Alvo de Araújo, sakey a kartero diman, ya akapangilako ed gobierno na melag a lote. Kayari ton pinirmaan so kialis na kanepegan to ed dalin, abigla si Luiz sanen naamtaan ton sikatoy binayaran na R$20,000 (ngalngalin $8,000, U.S.) a sobra nen say nampaknaan a presyo!

Say pangipawil ed sulok so mairap a gawaen. Kayari na pigaran agmatalonan indalaw ed saray departamento na gobierno, abilin si Luiz a mangupa na sakey ya abogado pian uksoyen so problema ed korte. “Mapatnag a walay sakey ya alingo, tan lapud nambabangil nin proseso, anggapoy makaamta no panon a resolbien so kaso,” so inkomento na huis ya anentensya’d gobierno ya awaten so kuarta tan iter so kanepegan a bayar. “Saya so un-unaan a klase na kaso a naimatonan ko.”

Oniay insalaysay nen Luiz, a sakey ed saray Tastasi nen Jehova: “Agnaako na nipasal-ed-Biblian konsiensiak so pangiyamot na agko kayarian. Nepeg kon ipawil so kuarta.”

Talagan dakel so mangibagan nikadkaduman tuloy itan ya awawey odino mairap a tebeken. Balet ipapanengneng na Biblia a papablien a tuloy na saray tuan Kristiano so pamasiansia ed malinis a konsiensia diad pidedeneng da ed saray sekular a pakauley. (Roma 13:5) Determinado iray Tastasi nen Jehova a pansiansiaen so ‘maabig a konsiensia tan manbilay a sigagalang [o simamatua] dia ed saray amin bengatla.’​—Hebreos 13:18.