Propesiya nen Isaias​—Liwawa Parad Amin a Katooan I

Kapitulo Desi-Otso

Saray Leksion Nipaakar ed Ag-inkamatoor

Isaias 22:1-25

1. Anto kasi so liknaan na wala’d liliktoben a syudad nensaman?

 ISIPEN pa no anto so liknaan na wala’d liliktoben a syudad nensaman. Diad paway na saray bakor et wadtan so kabusol​—mabiskeg tan maruksa. Antam ya inggeba to laray arum a syudad. Natan et sikato so determinadon mangubkob tan manamsam ed syudad yo tan pasooten tan pateyen to ray manaayam ditan. Saray armada na kabusol so mabisbiskeg a tuloy pian direktan pilabanan; maniilalo ka a naamper ira komon na saray bakor na syudad. Legan kan ontatandag diad toktok na saray bakor, nanengneng mo iray toren parad pangubkob ya awit na kabusol. Awit da met iray makinan parad pangubkob a makapangitupak na angkakabaleg iran bato pian nageray iray depensa yo. Nanenengneng mo iray troson panagbungaw na bakor tan saray takayan a pankalaban da, saray managpana tan karwahe ra, say dakerakel a sundalo ra. Agaylan makapakebbiew a nenengnengen!

2. Kapigan agawa so impangubkob a deneskribe ed Isaias kapitulo 22?

² Diad Isaias kapitulo 22 et nabasa tayo so nipaakar ed ontan ya impangubkob​—say impangubkob ed Jerusalem. Kapigan itan agawa? Mairap a napiho so anggan sakey ya impangubkob a ditan asumpal so amin a deneskriben nagawa. Mapatnag, say propesiya so sankaabigan a natalosan bilang inkalapagan a deskripsion na nanduruman pangubkob a nasagmak na Jerusalem, say inkalapagan a pasakbay ed no anto so nagawa ed arapen.

3. Anto so reaksion na saray manaayam ed Jerusalem ed panangubkob a deneskribe nen Isaias?

³ Legan na panangubkob a deneskribe nen Isaias, anto so gagawaen na saray manaayam ed Jerusalem? Bilang totoon akisipan ed Dios, kasin sikaray onkekelyaw ed si Jehova pian pailiktar? Andi, ipapatnag da so makulangkulang a walna, a singa samay nanenengneng natan diad limog na dakel a mankuan a mandadayew ed Dios.

Sakey a Syudad a Kukubkoben

4. (a) Anto so “lawak na pasingawey,” tan akin a satan so angaranan na ontan ? (b) Anto so espiritual a kipapasen na saray manaayam ed Jerusalem?

⁴ Diad kapitulo 21 na Isaias, balang sakey ed saray taloran panangukom a mensahe so ginmapo ed balikas a “Say panangiyabawag.” (Isaias 21:1, 11, 13, NW) Say kapitulo 22 so ginmapo met ed ontan a paraan: “Say awit na [“panangiyabawag ed” NW] lawak na pasingawey. Anto ta so liliknaen mo natan, ta sigpot a tinmatdang ka ed saray toktok [o atep] na abung?” (Isaias 22:1) Say “lawak na pasingawey” so ontutukoy ed Jerusalem. Say syudad so tatawagen a lawak lapud anggaman walad atagey a pasen, satan so apaliberan na ataragey iran palandey. Satan so insiglaot ed “pasingawey” lapud dakel a pasingawey tan puyan na Dios so niiter ditan. Lapud saya, nepeg ya ontalineng ed saray salita nen Jehova iray manaayam ed syudad. Imbes, sikato so imbaliwala ra tan nisuawi ed palson panagdayew. Say kabusol a mangukubkob ed syudad so instrumento ed panangukom na Dios sumpad bangar a totoo to.​—Deuteronomio 28:45, 49, 50, 52.

5. Anto so nayarin rason no akin a sinmegep so totoo ed saray atep da?

⁵ Imanoen a saray manaayam ed Jerusalem so ‘tinmatdang ed saray atep’ na kaabungan da. Nensaman, palatas iray atep na kaabungan na Israelita tan mabetbet a manlilimog iray pamilya ditan. Ag-imbaga nen Isaias no akin a ginawa ra itan ed sayan bekta, balet saray salita to so mangipapatnag na agpanangabobon. Kanian, nayarin sinmegep ira ed saray atep pian mikasi ed palson dirios da. Saya so niyugali ra legan na taotaon antis a sinmabi so kadederal na Jerusalem nen 607 K.K.P.​—Jeremias 19:13; Sofonias 1:5.

6. (a) Antoran kipapasen so nagagawa diad loob na Jerusalem? (b) Akin a manliliket so arum, balet anto so nagawa ed arapen?

⁶ Oniay intuloy nen Isaias: “O sika a napno ka na saray paneyag, sakey a magulo a syudad, sakey a malikeliket a baley; saray inatey ed sika ag-ira inatey ed kampilan, ag-ira met inatey ed bakal.” (Isaias 22:2) Dinmagsa so dakerakel ed syudad, tan wala so inkagulo. Saray totoo ed karsada so maingal tan natatakot. Balet, arum so manliliket, nayarin lapud liknaen dan maligen ira odino panisiaan dan naandi met lanlamang so kapeligroan. * Balet, say panliket ed satan a panaon et kaatiwan. Dakel ed syudad so ompatey a mas maruksa nen say ipatey ed tarem na kampilan. Say syudad a kukubkoben so agmakala na tagano diad paway. Nanaupot iray akasimpen ed syudad. Say kaeerasan tan panseseksekan na totoo so sengegan na saray epidemya. Kanian dakel ed Jerusalem so ompatey lapud eras tan  salot. Saya so namparan agawa nen 607 K.K.P. tan 70 K.P.​—2 Arari 25:3; Tagleey 4:9, 10. *

7. Anto so ginawa na saray manuley ed Jerusalem legan na pangukubkob, tan anto so agawa ed sikara?

⁷ Diad sayan krisis, anton klasen panangiwanwan so gagawaen na saray mananguley? Oniay ebat nen Isaias: “Amin iray mananguley mo binmatik ira a nanuulop, binalor ira na saray managpana; amin iray aromog ed sika abalor ira a nantitipon; tinmaynan ira ed arawi.” (Isaias 22:3) Saray manuley tan makapanyari a lalaki so binmatik tan insan ira narel! Sikara so akautibo tan inawit a priso ya anggapo so anggan sakey a bekang ya imbinat sumpad sikara. Saya so agawa nen 607 K.K.P. Kayarin abungaw so padir na Jerusalem, batik si Arin Sedekias legan na labi kaiba iray mabiskeg a bataan to. Naamtaan itan na kabusol, kanian inusilan da ra, tan nabotan da ra diad saray patar na Jerico. Nantatayak iray mabiskeg a lalaki. Si Sedekias so dinegkem, binulag, inggulonggulong, tan inggayugoy anggad Babilonia. (2 Arari 25:2-7) Agaylan makapasinagem so nansumpalan na agto impanmatoor!

Agonigon Lapud Kalamidad

8. (a) Anto so reaksion nen Isaias ed propesiyan mangipapasakbay ed desyang a nasagmak na Jerusalem? (b) Anto so magmaliw a kipapasen na Jerusalem?

⁸ Sayan propesiya so pirmin anenyeg ed si Isaias. Oniay inkuan to: “Agkayo onnengneng ed siak, mannangis ak na ampaipait; agkayo mansagpot a manligliwa ed siak nipaakar ed kabagbag na anak a bibii na baley ko.” (Isaias 22:4) Nanermenan nen Isaias so impropesiyan pansumpalan na Moab tan Babilonia. (Isaias 16:11; 21:3) Natan et say kagogonigon tan pantagleey to so mas nagkalalo ni legan ton nonodnonoten so desyang a nasagmak na mismon kabaleyan to. Sikatoy agnatambayo. Akin? “Ta sikato so agew na kagulogulo, tan kigatin-gatin, tan panduaruwa, a manlapu ed Katawan, si Jehova na saray ehersito, dia ed lawak na pasingawey; sakey a kageba na saray bakor, tan sakey a panakis ed saray palandey.” (Isaias 22:5) Say Jerusalem so pirmin nawetwet. Saray totoo so manteyengteyeng ya agda amta so gawaen da lapud inkabigla. Legan ya onlalabot so kabusol ed bakor na syudad, wala so “panakis ed saray palandey.” Kasin kabaliksan na saya ya onkelyaw ed Dios iray manaayam ed syudad diad masanton templo to ed Palandey Moria? Nayarin ontan. Balet, nipaakar ed agda inkamatoor, nayarin kabaliksan labat na satan a say aki-akis na inkatalagnaw da so mananiweng diad akapaliber a kapalandeyan.

9. Deskribien so armada a mamapagyaw ed Jerusalem.

⁹ Anton klase na kabusol so mamapagyaw ed Jerusalem? Oniay ibabaga ed sikatayo nen Isaias: “Si Elam nanawit na saray pananginan na pana, pati saray diluganan iran totoo tan kabayoan a lalaki; et say Kir nilukasan to so kinlong.” (Isaias 22:6) Saray kalaban so kompleto’d ayura. Walaray pumapana ra a napno so pananginan da na saray pana. Ipaparaan na saray bumabakal iray kinlong da parad bakal. Walaray karwahe tan saray kabayon impasal parad bakal. Kabiangan ed armada iray sundalo manlapud Elam, a walad amianen na tatawagen natan a Gulpo na Persia, tan manlapud Kir, a nayarin walad asingger na Elam. Say impanalambit ed saratan a dalin so mangipapatnag ya arawin tuloy so panlapuan na saray onlulusob. Ipapatnag met na satan a saray pumapana ya Elamita so nayarin kabiangan ed armada a manesesga ed Jerusalem nen panaon nen Ezekias.

Saray Panasalin Pangidepensa

10. Anto so nagagawa a mangipapatnag na mauges parad syudad?

¹⁰ Oniay impaneskribe nen Isaias ed nagagawan situasyon: “Nagawa, a saray apili a lawak mo napno ra na saray luganan, tan saray lalaki a kabayoan nandarasig ira ed wangalan. Et naekal to so sakbong na Juda.” (Isaias 22:7, 8a) Napano na saray karwahe tan kabayo iray patar diad paway na syudad na Jerusalem tan mandarasig ira pian deralen iray wangalan na syudad. Anto so nakal a “sakbong na Juda”? Mapatnag, satan so wangalan na syudad, a say kaderal na satan so mangipapatnag na mauges parad saray manangidepensa. * Sano sayan mananalimbeng a sakbong so naekal, lukas so syudad parad saray mangaataki ed satan.

11, 12. Antoran panangidepensa so ginawa na saray manaayam ed Jerusalem?

¹¹ Inimano natan nen Isaias iray panasali na totoon mangidepensa ed inkasikara. Say inmunan ninonot da​—saray ayura! “Ninmengneng ka ed saman ya agew ed panangayuraan ed abung ed takel. Et anengneng yo so saray kutkutlaong na Syudad nen David, a sikara so dakel; et tinipon to so saray danum na banda’d leksab na tanke.” (Isaias 22:8b, 9) Saray ayura so insimpen diad panag-ayuraan ya abung ed takel. Sayan panag-ayuraan so impaalagey nen Solomon. Lapud satan so gawa ed saray cedro na Libano, satan so akabat bilang “abung ed takel na Libano.” (1 Arari 7:2-5) Inusisa ra iray abungawbungaw ed bakor. Nantipon ira na danum​—sakey ya importantin kundang ed panangidepensa. Kaukolan na totoo so danum pian manbilay. No anggapo itan, agmakayari so syudad. Balet, imanoen ya anggapoy nibaga a nanilalo ira ed si Jehova parad kililiktar. Imbes, nanmatalek ira ed dili ran pakayari. Agtayon balot komon nagawa itan a lingo!​—Salmo 127:1.

¹² Anto so nayarin gawaen ed saramay abungawbungaw ed bakor na syudad? “Binilang yo so saray kaabungan na Jerusalem, tan inggeba yo so saray kaabungan pian onkana a pamabiskeg ed bakor.” (Isaias 22:10) Ninengneng so kaabungan no dinan so nayarin igeba pian nausar so materyal diad pangapiger ed saray abungaw. Sakey iyan impansagpot pian naamper so kabusol a sigpot a nawalaan na kontrol ed bakor.

 Totoon Andiay Pananisia

13. Panon a sasalien na totoo a seguroen so suplay na danum, balet siopa so alingwanan da?

¹³ “Nanggawa kayo met na sakey a tanke ed leet na saray duaran bakor nipaakar ed danum na daan a tanke. Balet agkayo ninmengneng ed saman so nanggawa ed saya, agyo met inggalang imay nannonot ya abayag la.” (Isaias 22:11) Saray impansagpot pian mantipon na danum, a deneskribe dia tan diad bersikulo 9, so mangipapanonot ed sikatayo ed inkiwas nen Arin Ezekias pian salimbengan so syudad sumpad saray onlulubak ya Asiryano. (2 Awaran 32:2-5) Balet, saray totoo ed syudad diad sayan propesiya nen Isaias so sigpot ya andiay-pananisia. Aliwan singa si Ezekias, agda ninonot so Manamalsa legan dan kikimeyan so depensa na syudad.

14. Anggaman ed manamasakbay a mensahe nen Jehova, anto so makulangkulang ya awawey na totoo?

¹⁴ Oniay intuloy nen Isaias: “Dia ed satan ya agew say Katawan, si Jehova na saray ehersito, tinawag to so pannangis, tan panagogol, tan panyangyang, tan panbalkes na magaspang ya abel: et, nia, so liket tan kagayagaan, a pampatey ed saray baka tan pampatey ed saray karnero, panangan na laman tan paninum na alak: mangan itayo tan oninum itayo ta nabuas ompatey itayo.” (Isaias 22:12, 13) Ag-impatnag na saray manaayam ed Jerusalem so pagbabawi ed impanrebeldi ra sumpad si Jehova. Ag-ira nannangis, nampaputot na buek da, odino nansulong na magaspang ya abel bilang tanda na pagbabawi. No ginawa ra komon itan, nayarin ipuera ira nen Jehova ed onsabi iran makapataktakot a bengatla. Imbes, pinaulyanan day inkasikara a nigalet ed minumundon panliliket. Ontan met ya awawey so naiimano natan diad limog na totoon agmanmamatalek ed Dios. Lapud anggapoy ilalo ra​—balanglan diad kioli manlapud inaatey odino diad bilay ed arapen a Paraison dalin​—gegemtanen da so kabibilay dan walaay kaalakan na laman, diad pangibabagan: “Mangan itayo tan oninum itayo, sirin ta nabuas ompatey itayo.” (1 Corinto 15:32) Agaylan kulang na pakatebek! No manmatalek ira labat komon ed si Jehova, nawalaan ira na magnayon ya ilalo!​—Salmo 4:6-8; Uliran 1:33.

15. (a) Anto so mensahe nen Jehova nipaakar ed panangukom ed Jerusalem, tan siopa so mangipaakseb ed panangukom to? (b) Akin a sagmaken met na Kakristianoan so sinagmak na Jerusalem?

¹⁵ Saray aliktob a manaayam ed Jerusalem so agnawalaan na kaligenan. Oniay inkuan nen Isaias: “Si Jehova na saray ehersito pinmuyan ed saray layag ko, Petepeteg a saya ya inkauges agnapaandi ed sikayo angga ed ompatey kayo, kuan na Katawan, si Jehova na saray ehersito.” (Isaias 22:14) Lapud inkaawet na puso na totoo, anggapo so panamerdona. Andi-saew ya onsabi so ipapatey. Saya so peteg a nagawa. Say Soberanon Katawan, si Jehova na saray ehersito, so angikuan ed satan. Bilang kasumpalan ed saray mapropetikon salita nen Isaias, amiduan agawa so desyang ed agmatoor a Jerusalem. Satan so dineral na saray armada na Babilonia tan diad saginonor et saramay taga-Roma. Kanian, ontan met, say desyang so onsabi ed agmatoor a Kakristianoan, a saray membro to so mankuan a mandadayew ed Dios balet diad tua et sikato so ipupulisay da lapud kimkimey da. (Tito 1:16) Saray kasalanan na Kakristianoan, ontan met ed saramay arum a relihyon ed mundo a manmumudmora ed matunong iran dalan na Dios, so “sinmabi ra angga ed tawen.” Singa say lingo na apostatan Jerusalem, say lingo ra so pirmin tuloy ya agla nasakbongan.​—Apocalipsis 18:5, 8, 21.

Say Masiblet a Mayurdomo

16, 17. (a) Siopa natan so angawat na manamasakbay a mensahe manlapud si Jehova, tan akin? (b) Lapud saray atagey ya ambisyon to, anto so nagawa ed si Sebna?

¹⁶ Manlapud agmatoor a totoo, impaarap natan na propeta so imano to ed sakey ya agmatoor ya indibidual. Oniay insulat nen Isaias: “Onia so inkuan na Katawan, si Jehova na saray ehersito, Onla ka, onsabi ka ed saya a panangisimpen na kayamanan [“mayurdomo,” NW], salanti si Sebna, a sikato so manunaan ed abung, tan kuan mo, Anto so gawaen mo dia? Tan anto so wala ed sika dia, ya angotkot ka na lubok nipaakar ed sika? Mangokotkot na lubok nipaakar ed sikato ed tagey, a mamapanday na panag-ayaman nipaakar ed sikato ed bato!”​—Isaias 22:15, 16.

¹⁷ Si Sebna so ‘mayurdomo a manunaan ed abung,’ nayarin say abung nen Arin Ezekias. Bilang ontan, sikatoy walaan na maimpluensyan posisyon, ya onkomadua lambengat ed ari. Dakel so iilaloan ed sikato. (1 Corinto 4:2) Ingen, imbes a manunan imanoen to komon iray pankaukolan na bansa, ginemtan nen Sebna so dili ton dayew. Sikatoy nampagawa na mabmablin lubok​—a mipara ed kien na ari​—ya inyukit para ed sikato diad atagey a bato. Diad pangiimano nen Jehova ed saya, pinuyanan to si Isaias a pasakbayan so agmatoor a mayurdomo: “Nia, si Jehova a singa mabiskeg a too, ibantak to ka a makmaksil; on, balkoten to ka a malmalet. Sikato petepeteg a patpatleken to ka, tan itolintolin to ka a singa bola ed maawang a dalin; diman ka ompatey naani, tan diman so kawalaan na saray luganan na gayagam, sika so kibabaingan na abung na katawan mo. Et ekalen to ka manlapu ed betang mo; et manlapu ed kipapasen mo igayugoy to ka.” (Isaias 22:17-19) Lapud inkaagum to, ag-anggan nawalaan si Sebna na sakey ya ordinaryon lubok diad Jerusalem. Imbes, sikatoy ibuntok a singa bola, pian ompatey ed arawin dalin. Diad saya et walay pasakbay ed amin na saramay angimatalekan na autoridad diad limog na totoo na Dios. Say pangabuso ed pakayari so mangitonton ed pakabalang ed satan ya autoridad tan nayarin say pakadestiero.

18. Siopa so onsalat ed si Sebna, tan anto so kabaliksan na pangawat na sayan sakey ed opisyal a kawekawes nen Sebna tan say tombok na abung nen David?

¹⁸ Balet, panon a naekal si Sebna ed posisyon to? Diad panamegley nen Isaias et oniay impaliwawa nen Jehova: “Nagawa dia ed satan ya agew, a tawagen ko so aripen ko ya Eliakim ya anak a laki nen Elcias: Et sikato so kawesan ko ed sokbong mo, tan sikato so pabiskegen ko ed balkes mo, tan imatalek ko so pananguleyan mo ed lima  to; et sikato naani ama ed saray manaayam ed Jerusalem, tan diad abung nen Juda. Et say tombok na abung nen David nigaton ed abala to; et sikato so mangilukas, tan anggapo so mangikapot; et sikato so mangikapot, tan anggapo so mangilukas.” (Isaias 22:20-22) Bilang kasandi nen Sebna, niiter ed si Eliakim so opisyal a kawekawes na mayurdomo ontan met ed tombok na abung nen David. Uusaren na Biblia so terminon “tombok” a mangisimbolo ed autoridad, gobierno, odino pakayari. (Ikompara so Mateo 16:19.) Nensaman, say mananimbawa na ari, ya angimatalekan na saray tombok, so nayarin walaan na inkalapagan a panangasikaso ed saray maarin ayaman, a makapampili ni ingen na saray kandidato a makapanlingkor ed ari. (Ikompara so Apocalipsis 3:7, 8.) Kanian, say betang na mayurdomo so makana, tan dakel so iilaloan ed siopaman a manlilingkor ed ontan a kipapasen. (Lucas 12:48) Nayarin sarag nen Sebna itan, balet lapud sikato so agmatoor, sikato so salatan nen Jehova.

Duaran Simbolikon Latok

19, 20. (a) (a) Panon ya apaneknekan a bendisyon si Eliakim ed kabaleyan to? (b) Anto so nagawa ed saramay maniilalo ni ed si Sebna?

¹⁹ Diad kaunoran, angusar si Jehova na simbolikon pananalita pian deskribien so pangiyalis na pakayari nen Sebna ed si Eliakim. Oniay inkuan to: “Sikato [Eliakim] so ipalpal ko a singa pasak [“latok,” NW] ed matalek a pasen; et sikato naani nipaakar a yurongan na gayaga na abung nen ama to. Et isabit da ed sikato so amin a gayaga na abung nen ama to, say simit to tan say gawa to, balang melag ya agamil, manlapu ed saray [“baseha a,” NW] yaong angga ed saray [“baseha a,” NW] poronggo to. Dia ed satan ya agew, kuan nen Jehova na saray ehersito, say pasak [Sebna] a nipalpal ed matalek a pasen nabagot; et sikato naani nigeba, tan napelag; et say awit a wala nensaman ed tapew to naekal; ta sikato so sinalita nen Jehova.”​—Isaias 22:23-25.

²⁰ Diad sarayan bersikulo say unona a latok et si Eliakim. Sikato so magmaliw a “yurongan na gayaga” ed abung nen ama to, si Elcias. Aliwan singa si Sebna, agto iyan ed kababaingan so abung odino reputasyon nen ama to. Si Eliakim so magmaliw a magnayon a suporta ed saray baseha na sankaabungan, salanti, diad saray arum a manlilingkor ed ari. (2 Timoteo 2:20, 21) Diad kasunian, say komaduan latok et ontutukoy ed si Sebna. Anggaman sikato so ompatnag a singa maligen, sikato so naekal. Siopaman a maniilalo ni ed sikato so napelag.

21. Diad modernon panaon, siopa so singa si Sebna a sinalatan, akin, tan siopa so sinmalat?

²¹ Ipapanonot ed sikatayo na eksperiensya nen Sebna a diad saramay mankuan a manlilingkor ed Dios, saramay angawat na saray pribilehyo ed serbisyo so nepeg a mangusar ed saratan pian manlingkor ed arum tan mangitarok na dayew ed si Jehova. Nepeg ya agda abusoen so posisyon da pian manpayaman odino pian ombantog. Alimbawa, abayag lan iyaalibansa na Kakristianoan so inkasikato bilang tinuron mayurdomo, say mangaraldalin a manangilaman nen Jesu-Kristo. Balet, singa si Sebna ya angitarok na kababaingan ed ama to diad impanggemtan ed mismon dayew to, saray lider na Kakristianoan so angitarok na kababaingan ed Manamalsa diad impantipon na kaykayamanan tan pakayari parad inkasikara. Kanian, sanen sinmabi panaon na panangukom “manlapu ed abung na Dios” nen 1918, inekal nen Jehova so Kakristianoan. Sananey nin mayurdomo so abidbir​—“say matoor a mayurdomo, say makabat a sakey”​—say tinuro parad mangaraldalin a sankaabungan nen Jesus. (1 Pedro 4:17; Lucas 12:42-44, NW) Ipapatnag na sayan tugyop a klase so inkasikato a makanan manakbat ed maarin “tombok” na abung nen David. Singa say napanmatalkan a “latok,” apaneknekan itan bilang say napanmatalkan a suporta parad amin a nanduruman “baseha,” saray alanaan a Kristiano a walaan na nanduruman responsabilidad a maniilalo ed satan parad espiritual a tagano. Saray ‘arum a karnero’ met, a singa say ‘sankaili ed loob na saray pulong-pinto’ na Jerusalem nensaman, so maniilalo ed sayan “latok,” say modernon-agew ya Eliakim.​—Juan 10:16; Deuteronomio 5:14.

22. (a) Akin a nipanpanaon so panalat ed si Sebna bilang mayurdomo? (b) Diad modernon panaon, akin a nipanpanaon so inkaturo na “say matoor a mayurdomo, say makabat a sakey”?

²² Sinalatan nen Eliakim si Sebna sanen si Senakerib tan saray ulop to so mamapagyaw ed Jerusalem. Mipadpara, “say matoor a mayurdomo, say makabat a sakey,” so tinuro a manlingkor legan na panaon na anggaan, ya onsabi ed kapantokan sano si Satanas tan say armada to so onkiwas parad unor a panangataki ed “Israel na Dios” tan say kaiba ran arum a karnero. (Galacia 6:16) Singa ed panaon nen Ezekias, satan a panangataki so mansumpal ed kadederal na saray kabusol na inkatunong. Saramay mandedepende ed ‘latok ed matalek a pasen,’ say matoor a mayurdomo, so makaliktar, no panon ya akaliktar iray matoor a manaayam ed Jerusalem diad inlusob na Asiryano ed Juda. Agaylan makabat, sirin, so ag-ipeket ed apaneknekan a palson “latok” na Kakristianoan!

23. Anto so agawa ed si Sebna diad kaunoran, tan anto so naaralan tayo ed saya?

²³ Anto so agawa ed si Sebna? Anggapo so rekord tayo no panon ya asumpal ed sikato so propesiya a nikurit diad Isaias 22:18. Sanen intandoro to so inkasikato tan insan apabanday, sikato so miulibay ed Kakristianoan, balet nayarin sikato so akaaral manlapud disiplina. Diad saya et sikatoy miduman tuloy ed Kakristianoan. Sanen papasukoen la na Asiryanon si Rabsaces so Jerusalem, say balon mayurdomo nen Ezekias, a si Eliakim, so angidaulo ed delegasyon a pinmaway pian mangabet ed sikato. Balet, si Sebna so walad dikingan to bilang sekretaryo na ari. Mapatnag, si Sebna so siansia nin manlilingkor ed ari. (Isaias 36:2, 22) Alay abig a leksion parad saramay naandian na posisyon ed serbisyo diad organisasyon na Dios! Imbes ya ombarong tan manimbel, makabat ed biang da so pansiansian panlingkor ed si Jehova ed antokaman a kapasidad ya iyabuloy to. (Hebreos 12:6) Diad panggawa ed ontan, napaliisan da so desyang a nasagmak na Kakristianoan. Panggayagaan da so abobon tan bendisyon na Dios diad andi-anggaan.

[Saray paimano ed leksab]

[Tepetepet Parad Panagaral]