Sigpot ya Akinlongan Bilang Manangibangat na Salitay Dios
Sigpot ya Akinlongan Bilang Manangibangat na Salitay Dios
“Say Dios . . so peteg a manggagawa ed sikamin sigpot a kualipikado bilang ministros.” —2 CORINTO 3:5, 6, NW.
1, 2. Antoran sagpot ed panagpulong so gagawaen no maminsan, balet akin a mabetbet iratan ya onsaew?
ANTOY liknaan yo sano naikdan kayo na trabahon agkayo kualipikadon manggawa? Isipen pa: Akaparaan lay materyales a nakaukolan yo, pati saray kagawaan ya usaren yo. Balet agyo amta no panon itan a gawaen. Alodloor ni, apuraan iyan trabaho. Iilaloan kayo na totoo. Agaylan makapadismaya itan!
2 Say ontan a problema so aliwa met ya imahinasyon. Konsideraen so sakey ya alimbawa. No maminsan, sasalien na sakey ed saray iglesia na Kakristianoan so mangorganisa tan manggawa na panagkalar ed kabkaabungan. Saratan a sagpot so mabetbet ya onsaew, a manbayag labat na pigaran simba odino bulan. Akin? Lapud agtutulongan na Kakristianoan iray patumbok to ya onkualipika ed satan a kimey. Anggan saray klero so agkualipikado ed satan a panagpulong a kimey, anggaman ed taotaon ya impanaral da ed sekular iran eskuelaan tan seminaryo. Akin a nibaga tayo itan?
3. Diad 2 Corinto 3:5, 6, anton balikas so amitlon inusar, tan anto so kabaliksan na satan?
3 Isasalaysay na Salitay Dios no anto so mangikualipika ed peteg a manangipulong na Kristianon maong a balita. Apuyanan si apostol Pablo a mangisulat: “Aliwan lapud ta sikamin mismo et sigpot a kualipikado pian manisip ya antokaman a bengatla so manlalapud sikamin dili, noagta say impagmaliw min sigpot a kualipikado et manlalapud Dios, a peteg a manggawa ed sikamin sigpot a kualipikado bilang ministros.” (2 Corinto 3:5, 6, NW) Imanoen iray balikas ya amitlon inusar dia—“sigpot a kualipikado.” Anto so kabaliksan na satan? Ibabaga na Vine’s Expository Dictionary of Biblical Words: “Sano tutukoyen iray bengatla [say orihinal a Griegon salita] et mankabaliksan na ‘magenap la’ . . ; sano tutukoyen iray totoo, mankabaliksan itan na ‘makayari,’ ‘makanepegan.’” Kanian, say sakey a “sigpot a kualipikado” so makayari tan makanepegan a manumpal ed niiter a kimey. On, saray tuan ministro na maong a balita so kualipikadon manggawa ed sayan kimey. Sikara so makayari, matukoy, odino makanepegan a manpulong.
4. (a) Panon ya ipapabitar na alimbawa nen Pablo a say pagmaliw a kualipikado ed Kristianon ministeryo so aglabat nigana ed saray pigaran pinili? (b) Anto so taloran paraan ya uusaren nen Jehova pian onkualipika itayo bilang ministros?
4 Balet, panlalapuan na satan a kualipikasyon? Kasin diad personal iran abilidad? Maong ya impanutek? Manlapud denesinyon edukasyon diad saray bantog ya eskuelaan? Saratan a bengatla so mapatnag a wala la’d si apostol Pablo. (Gawa 22:3; Filipos 3:4, 5) Ingen, sikato so mapaabeban amidbir a saray kualipikasyon to bilang ministro so nanlapu ed si Jehova a Dios, aliwan diad saray eskuelaan na atagtagey ya edukasyon. Kasin saratan a kualipikasyon so parad pigara labat a pinili? Insulat nen Pablo ed kongregasyon na Corinto so nipaakar ed “impagmaliw min sigpot a kualipikado.” Peteg ya isusuheri na satan a seseguroen nen Jehova ya amin a matoor a lingkor to et makayari, a makapangisumpal ed kimey ya ipapagawa to ed sikara. Panon a pagmamaliwen nen Jehova a kualipikado iray tuan Kristiano natan? Singbaten tayo so taloran paraan ya uusaren to: (1) say Salita to, (2) say masanton espiritu to, tan (3) say mangaraldalin ya organisasyon to.
Say Salita nen Jehova so Mangikualipika ed Sikatayo
5, 6. Anto so epekto na Masanton Kasulatan ed saray tuan Kristiano?
5 Unona, panon a makatulong so Salitay Dios pian onkualipika itayo bilang ministros? Insulat nen Pablo: “Amin a Kasulatan so impuyan na Dios tan makagunggona ed panagbangat, ed panamaat, diad pangipetek ed saray bengatla, diad panagdisiplina ed inkatunong, ta pian say too na Dios so magmaliw a sigpot a makayari, nagnap ya akinlongan ed amin a maabig a gawa.” (2 Timoteo 3:16, 17, NW) Kanian say Masanton Kasulatan so ontutulong ed sikatayo pian magmaliw a “sigpot a makayari, nagnap ya akinlongan” a manumpal ed “maabig a gawa” a panangibangat ed totoo nipaakar ed Salitay Dios. Balet, komusta so amin ya ontutumbok ed saray iglesia na Kakristianoan? Nabubukay da so Biblia. Panon a makatulong itan a libro ed pigaran totoo a magmaliw a kualipikadon ministros ingen ta ag-ira ontutulong ed arum? Say ebat so akadependi ed awawey tayo nipaakar ed Biblia.
6 Makapaermen, dakel a mimimisa so agmangawat ed mensahe na Biblia ya “unong ed katuaan, say salitay Dios.” (1 Tesalonica 2:13) Say Kakristianoan so amawala na makapabanday a rekord nipaakar ed saya. Kayari na dakel a taon ya impanaral da ed saray teolohikon eskuelaan, akinlongan kasi iray klero bilang manangibangat na Salitay Dios? Andin balot. Agayla, arum ya estudyante so ginmapon maneskuela ed seminaryo bilang mananisia ed Biblia balet nangraduar a manduaruwa! Diad saginonor, imbes ya ipulong da so Salitay Dios—ya agla panisiaan na dakel ed sikara—ipapaarap da so ministeryo ra ed arum iran lawak, ya ondadapag ira ed mapolitikan pandedebati, a mangiyaalibansa ed ebanghelyo a parad sosyedad (social gospel), odino mangidadanet ed saray pilosopiya na too diad saray sermon da. (2 Timoteo 4:3) Midumaan, saray puron Kristiano so manutumbok ed alimbawa nen Jesu-Kristo.
7, 8. Panon a midumaan so awawey nen Jesus ed Salitay Dios manlapud saray relihyoson lider ed panaon to?
7 Ag-inabuloyan nen Jesus a naimpluensyaan na saray relihyoson lider so panag-isip to. Balanglan manbabangat ed melag a grupo, a singa saray apostol to, odino ed dakerakel a totoo, si Jesus so angusar a maong ed masanton sulsulat. (Mateo 13:10-17; 15:1-11) Sayan agamil so angibiig ed sikato manlapud saray relihyoson lider nensaman. Sikara so pirmin anismaya ed kabanyakan a totoo pian mangusisa ed saray aralem a bengatla nipaakar ed Dios. Diad tua, kaslakan lan panisiaan na sakey a managbangat ed saman a panaon a walaray teksto ed Biblia ya aralem a tuloy pian isingbat ed siopaman balet ta nisingbat labat iratan ed papaboran ya estudyante to—tan no bilang ta ontan, dia lambengat ed makalnan boses tan asakbongan so ulo. Saraman a relihyoson lider so maanito nipaakar ed paningbat ed pigaran parte na Biblia a singa met ed panangibalikas ed ngaran na Dios!
8 Aliwan ontan si Kristo. Panisiaan to ya aliwan pigpigara labat noagta amin a totoo so kaukolan a makaaral ed “amin a salitan ombesngaw ed sangi’ Dios.” Ag-interesado si Jesus a mangiter na antokaman a tombok na pikakabat ed sakey a pinilin grupo na saray iskolar. Inkuan to ed saray babangatan to: “No anto so ibagak ed sikayo ed kabilungetan, salitaen yo ed maliwawa; tan no anto so narengel yo ed esaes, ibelyaw yo ed toktok day kaabungan.” (Mateo 4:4; 10:27) Si Jesus so magunaet a nampilalek a manginabang ed pikakabat na Dios diad dakel a totoo anggad posible.
9. Anto so panguusaran na saray tuan Kristiano ed Biblia?
9 Say Salitay Dios so nepeg a manunan pangibasiyan na bangat tayo. Alimbawa, sano manpaliwawa itayo ed Kingdom Hall na saray Tastasi nen Jehova, kaslakan et agmagenap so pambasa labat ed pinili iran bersikulo na Biblia. Nayarin kaukolan tayon ipaliwawa, iyilustra, tan iyaplika so sakey a tekston sisingbaten. Say kalat tayo et pian pabilayen so nisulat a mensahe na Biblia tan ipurek itan ed kapusoan na saray dumerengel tayo. (Nehemias 8:8, 12) Say Biblia so nepeg met ya usaren sano nakaukolan so mangiter na simbawa odino manametek a disiplina. Anggaman saray totoo so mansasalita na nanduruman lenguahe tan nanlalapud nanduruman abenegan, amin da so manrerespeto ed sankatalonggaringan a Libro—say Biblia.
10. Anto so nayarin epekto ed sikatayo na impuyan a mensahe na Biblia?
10 Sano nausar itan ed ontan a paraan, say mensahe na Biblia so walaan na pakayari. (Hebreos 4:12) Satan so mamakiwas ed saray totoo a manguman ed kabibilay da, a singa say ipaliis ed agmakasulatan iran agamil a pilalawanan, pikakalugoran, idolatriya, panagbuanges, tan panagtakew. Dakerakel la so atulongan na satan pian nalakseb da so daan a personalidad tan nisulong so balo. (Efeso 4:20-24) On, no respetoen tayo itan a nagkalalo nen say dinanman ya opinyon tan tradisyon na too tan matoor itan ya usaren, makatulong so Biblia pian magmaliw itayon makayari, a nagnap ya akinlongan bilang manangibangat na Salitay Dios.
Say Espiritu nen Jehova so Mangikualipika ed Sikatayo
11. Akin a matukoy a sasaglawien so masanton espiritu nen Jehova bilang “mananulong”?
11 Komadua, singbaten tayo so betang na masanton espiritu, odino aktibon puersa nen Jehova, ed pagmamaliw tayon nagnap ya akinlongan. Agtayon balot lilingwanan a say espiritu nen Jehova so sankabiskegan a puersa. Si Jehova so angiter na pakayari ed inad-aro ton Anak pian mangusar ed satan a makapakelkelaw a puersa nisesengeg ed amin a tuan Kristianos. Matukotukoy, si Jesus so anaglawi ed masanton espiritu bilang “say mananulong.” (Juan 16:7, NW) Pinaseseg toray patumbok to ya onkerew ira ed si Jehova na ontan ya espiritu, a pinaseguroan to ira a mabunlok si Jehova a mangiter ed satan.—Lucas 11:10-13; Santiago 1:17.
12, 13. (a) Akin ya importantin manpikasi itayo parad masanton espiritu ya ontulong ed sikatayo diad ministeryo? (b) Panon ya impatnag na saray Fariseo ya ag-onkukurang ed sikara so masanton espiritu?
12 Kaukolan itayon manpikasi ya inagew-agew ya onkerew na masanton espiritu, nagkalalo la pian ontulong ed sikatayo diad ministeryo tayo. Anto so epekto ed sikatayo na satan ya aktibon puersa? Mangimpluensya itan ed nonot tan puso tayo, ya ontulong ed sikatayon manguman, ombulaslas, tan nasalatan tayo na balo so daan a personalidad. (Colosas 3:9, 10) Makatulong itan ed sikatayo pian nabayuboan so mabli, singa-Kristo iran kalidad. Dakel ed sikatayo so makapangipatlep ed Galacia 5:22, 23. Saratan a bersikulo so angidatak ed bungabunga na espiritu na Dios. Say manuna et say aro. Satan a kalidad so makanakana ed ministeryo tayo. Akin?
13 Say aro so pirmin manamakiwas. Say aro ed si Jehova tan aro ed kaparan too so mamapakiwas ed saray tuan Kristiano pian inabang so maong a balita. (Marcos 12:28-31) No andian itayo na ontan ya aro, agtayo peteg ya onkualipika bilang manangibangat na Salitay Dios. Imanoen so pandumaan nen Jesus tan saray Fariseo. Oniay kuan na Mateo 9:36 nipaakar ed si Jesus: “Sanen anengneng toray dakerakel a totoo, inabagey to ra, lapud maermen tan abuybuyak ira, a singa saray karnero ya anggapoy pastol da.” Anto so liknaan na saray Fariseo nipaakar ed kabanyakan a totoo? Inkuan da: “Saraya a katooan ya agda amta so Ganggan naayew ira.” (Juan 7:49) Saratan a Fariseo so andian na aro ed totoo noagta pirmin pambusol. Mapatnag, say masanton espiritu so ag-onkukurang ed sikara.
14. Panon itayon napakiwas ed alimbawa nen Jesus a panangipanengneng na aro ed ministeryo to?
14 Si Jesus so walaan na empatya ed totoo. Sikato so sikakabat ed paniirap da. Amta to a naaabuso ira, akatatan ira, tan abuybuyak ira a singa karneron anggapoy managpastol. Ibabaga ed sikatayo na Juan 2:25 ya “amta la [nen Jesus] no anto so wala ed loob na too.” Lapud nagmaliw ya Marundunong a Komikimey nen Jehova legan na panamalsa, natalosan a tuloy nen Jesus so nipaakar ed inkatoo. (Uliran 8:30, 31) Satan a pakatalos so amaaralem ed panangaro to. Komon ta satan ya aro so lawas magmaliw a manamakiwas a puersa ed panagpulong a kimey tayo! No nalikas tayon nayarian tayoy onaligwas ed sayan pamaakaran, manpikasi itayo ya onkerew na masanton espiritu nen Jehova tan mankimey unong ed saray pikakasi tayo. Ebatan itayo nen Jehova. Ibaki to iyan mabisbiskeg a puersa pian ontulong ed sikatayo a lalon magmaliw a singa si Kristo, a matalonggaring a kualipikado diad pangipulong na maong a balita.
15. Panon ya onaplika ed si Jesus iray salita ed Isaias 61:1-3, ya angiwalwal met ed saray eskriba tan Fariseo?
15 Iner so nanlapuan na saray kualipikasyon nen Jesus? “Say espiritu na Katawan wala ed siak,” so inkuanto. (Lucas 4:17-21) On, si Jehova a mismo so anuro ed si Jesus panamegley na masanton espiritu. Agla kinaukolan nen Jesus so arum nin kualipikasyon. Kasin aturo iray relihyoson papangulo ed panaon to panamegley na masanton espiritu? Andi. Agmet ira akinlongan a manumpal ed Isaias 61:1-3, a binasa nen Jesus a maksil tan inyaplika to ed inkasikato. Pibasa yo pa iratan a bersikulo, tan imanoen yon mismo ya ag-akakapet iray mansimpisimpitan ya eskribas tan Fariseos. Andian ira na maong a balita ya iyabawag ed saray mairap-bilay. Panon da nin nipulong so kibulos na saray nipangaw tan pakapawil na pakanengneng na saray bulag? Diad espiritual a pantalos, sikaran mismo et bulag tan nipangaw ed saray tradisyon a ginaway too! Aliwan singa sikara, kasin kualipikado itayon mangibangat ed totoo?
16. Anto so nayarin napankompiyansaan na totoo nen Jehova natan nipaakar ed kualipikasyon da bilang ministros?
16 Tua, ag-itayo akapanaral ed saray eskuelaan na Kakristianoan parad atagtagey ya aral. Ag-itayo aturon managbangat manlapud sakey a teolohikon seminaryo. No ontan, kasin kulang iray kualipikasyon tayo? Andin balot! Say inkaturo tayo bilang Tastasi to so nanlapud si Jehova. (Isaias 43:10-12) No manpikasi itayo ya onkerew na espiritu to tan mankimey itayo unong ed pikakasi tayo, walaan itayo na sankatageyan iran kualipikasyon. Siempre, ag-itayo ayadyari tan onsasaew tayon kapeten so alimbawan impanengneng na Matalonggaring a Managbangat, si Jesus. Anggaman kuan, agta misalsalamat itayo ed si Jehova ta uusaren to so espiritu to pian onkualipika tan nakinlongan itayo bilang managbangat na Salita to?
Say Organisasyon nen Jehova so Mangikualipika ed Sikatayo
17-19. Panon a makatulong so limaran sinimban miting ya intarya na organisasyon nen Jehova pian onkualipika itayo bilang ministros?
17 Singbaten tayo natan so komatlon paraan a pangikinlong nen Jehova ed sikatayo bilang managbangat na Salita to—say mangaraldalin a kongregasyon, odino organisasyon to, a mangipapasal ed sikatayo bilang ministros. Panon? Isipen pa labat so programa na panagbangat a panggagayagaan tayo! Diad loob na sakey a simba, onaatendi itayo ed limaran Kristianon miting. (Hebreos 10:24, 25) Mantitipon itayo ed melag iran grupo diad Panagaral na Kongregasyon ed Libro pian panggayagaan so aralem a panagaral ed Biblia diad panamegley na libron-panaralan ya intarya na organisasyon nen Jehova. Diad italineng tan pankomento, makapanaaralan tan makapanpapabiskegan itayo. Nanaawat tayo met so personal ya instruksion tan panangimano na manangasikaso ed panagaral na libro. Diad Publikon Paliwawa tan Panagaral na Panag-Bantayan, makakagamor itayo ni na daakan tan makapabunigas ya espiritual a tagano.
18 Say Teokratikon Eskuelaan Parad Ministeryo so adesinyo pian mangiter ed sikatayo na instruksion ed no panon so pambangat. Diad pamparaan ed saray paliwawa bilang estudyante, naaralan tayo no panon so pangusar ed Salitay Dios diad pangibangat na dakerakel iran tema. (1 Pedro 3:15) Kasin apabtangan kayo la na sakey a paliwawa nipaakar ed sakey a teman kabkabisado yo, tan naimano yo a walay balon naaralan yo ed satan? Satan so kaslakan ya eksperiensya. Anggapo lay mamaaligwas ed pikakabat tayo ed sakey a tema noag say pangibangat ni ed satan diad arum. Anggaman ag-itayo apabtangan a mangipresenta, siansian makaaral itayo pian magmaliw a magmaong a managbangat. Diad kada estudyante, naimano tayo so maong iran kalidad, tan namolimoli tayo no panon tayon aligen iratan a kalidad.
19 Say Service Meeting met so adesinyon manginlong ed sikatayo bilang manangibangat ed Salitay Dios. Sinimba tayon panggagayagaan iray maligsan paliwawa, singbatan, tan demostrasyon ya imparaan parad ministeryo tayo. Anton presentasyon so usaren tayo? Panon tayon pidenengan iray nikaduman angat ed mapublikon ministeryo tayo? Antoran aspekto na panagpulong so lukas ed sikatayo a nakaukolan ni so nagkalalon panusisa tayo? Anto so makatulong pian magmaliw itayon lalon epektibo a managbangat diad panagpawil tan panangikondukta tayo na saray iyaaralan na Biblia? (1 Corinto 9:19-22) Saratan a tepet so naeebatan tan detalyadon sisingbaten ed Service Meeting. Nibase so dakel iran parte ed miting diad saray artikulo ed Ministeryo Tayo ed Panarian, a sananey nin kagawaan a nitarya pian nakinlongan itayo parad makanan kimey tayo.
20. Panon itayon sigpot a nagunggonaan ed saray miting tan asamblea?
20 Diad pamparaan tan iyatendi ed saray miting tayo insan pangiyaplika ed nanaaralan tayo diad kimey tayo bilang managbangat, makagamor itayo na malaknab a panangipasal. Balet wala ni so pangipasalan. Walaan itayo met na angkakabaleg iran miting—saray asamblea tan kombension—a denesinyon manginlong ed sikatayo bilang manangibangat na Salitay Dios. Tan agaylay paniilalo tayo ed atentibon italineng tan pangiyaplika ed satan a simbawa!—Lucas 8:18.
21. Anton ebidensya so mangipanengneng ya epektibo so kipapasal tayo, tan siopa so napagalangan?
21 Kasin epektibo so panangipasal ya intarya nen Jehova? Usisaen tayo so ebidensya. Kada taon et nilasus nilibo a totoo so natutulongan pian makaaral ed manuna iran doktrina na Biblia tan pian manbilay unong ed kakaukolanen ed sikara na Dios. Ondarakel so bilang tayo, balet anggapo ed sikatayo so personal a napagalangan lapud satan. Nepeg a realistiko so panmoria tayo ed saray bengatla, a singa si Jesus. Inkuanto: “Anggapo so too a makadago ed siak, likud no say Ama ya angibaki ed siak sikato so yasingger to.” Singa saray apostol nensaman, karaklan ed sikatayo et andiay aral tan ordinaryon totoo. (Juan 6:44; Gawa 4:13) Say italona tayo so akadependi ed si Jehova, a mangiyaasingger ed matuan-impanpuson totoo diad katuaan. Maabig so impangidalatdat nen Pablo ed satan: “Siak so angitanem, si Apolos so analog; bangbalet say Dios so amabaleg.”—1 Corinto 3:6.
22. Akin ya agtayon balot nadismaya nipaakar ed sigpot a pibibiang ed Kristianon ministeryo?
22 On, si Jehova a Dios so aktibon nalalanor ed kimey tayo bilang manangibangat na Salita to. Nayarin agtayo lawas liknaen a kualipikado itayo bilang managbangat. Balet tandaan, si Jehova so mangiyaasingger na totoo ed inkasikato tan ed Anak to. Si Jehova so mangikualipika ed sikatayo a manlingkor ed saramay balo ni panamegley na Salita to, say masanton espiritu to, tan say mangaraldalin ya organisasyon to. Onkiwas tayo ed panangipasal nen Jehova diad pangiyaplika ed saray maong a bengatla ya itatarya to natan pian sigpot itayon nakinlongan bilang manangibangat na Salitay Dios!
Panon Yon Ebatan?
• Panon itayon kikinlongan na Biblia diad panagpulong a kimey?
• Anto so betang na masanton espiritu diad ikualipika tayo bilang ministros?
• Diad antoran dalan ya akatulong ed sikayo so mangaraldalin ya organisasyon nen Jehova pian onkualipika bilang manangipulong na maong a balita?
• Akin a makapankompiyansa itayo sano mibibiang itayo ed ministeryo?
[Tepetepet Parad Panagaral]
[Litrato ed pahina 24]
Bilang manangibangat na Salitay Dios, impatnag nen Jesus so aro ed totoo