Akin ya Aderal Iman a Mundo Nensaman?

ALIWAN natural a desyang so sankagloboan a Delap. Satan so panangukom na Dios. Niiter so pasakbay, balet imbaliwala itan na karaklan. Akin? Oniay impaliwawa nen Jesus: “Diad saraman ya agew ed arapen na delap [saray totoo] nankakakan ira tan naninum ira, angaasawa ra tan akiaasawa ra anggad agew ya inloob nen Noe ed biong. Tan agda akabkabatan [“ag-ira nanimano,” NW] angga ed sinmabi’ delap, et inyanor to ra ya amin.”​—Mateo 24:38, 39.

Sakey a Maaligwas a Sibilisasyon

Diad pigaran pamaakaran, nanggayagaan na sibilisasyon sakbay na Delap iray bentaha ya anggapo ed sikatayo natan. Alimbawa, amin a katooan so mansasalita na saksakey a lenguahe. (Genesis 11:1) Saya so akatulong na baleg ed saray agawaan ed art tan siensia a mankakaukolan na nankakasakey a sagpot na dakel a totoo a walaan na nanduruman abilidad. Ontan met, kabaliksan na say andukey a bilay a nanggayagaan na maslak a totoo nensaman a nayarian dan itultuloy ya aruman so naaralan da ed loob na dakel lan siglo.

Ibabaga na arum ya aliwan talagan andukey so bilay na too nensaman tan saray taon ya asalambit ed salaysay na Biblia et bulabulan labat. Kasin tua itan? Bueno, konsideraen so kaso nen Mahalalel. Oniay ibabaga na Biblia: “Si Mahalalel nambilay ya anemaplo tan lima a tinaon, insan to inilalak si Jared. . . . Amin ya agew nen Mahalalel walonlasus tan siamaplo tan lima a tinaon: insan inatey.” (Genesis 5:15-17) No say kabaliksan na sakey taon et sakey bulan, si Mahalalel so nanilalak sanen limay taon to labat! Kanian say sakey taon et aliwan sakey bulan, saray totoo nensaman so asingger ni  ed ayadyarin kaksilan na inmunan too, si Adan. Peteg a nambilay ira ed loob na saray siglo. Anto so adampot da?

Dakel a siglo sakbay na Delap, say populasyon na dalin so dinmakerakel ya anggad ayarian nen Cain ya ilalak nen Adan so mangipaalagey na sakey a syudad, a tinawag ton Enoc. (Genesis 4:17) Legan na saray panaon sakbay na Delap, inmaligwas so nanduruman industriya. Walaray pandayan parad “amin a gansa tan balatyang.” (Genesis 4:22) Anggapoy duaruwa a sarayan kagawaan so inusar ed konstruksion, panagkarpentero, panagdait, tan agrikultura. Amin na sarayan trabaho so atukoy ed saray salaysay nipaakar ed sankaunaan a totoon nambilay ed dalin.

Maseguron say agamoran dan pikakabat so akatulong ed manumtumbok iran kailalakan pian napaaligwas iray inka-eksperto ed panagpanday, panagdalus, panagkomponi na saray karnero tan baka, panaggaway sulat, tan saray inkadunong ed panagpinta, iskultura, odino musika. Alimbawa, si Jubal so “ama na saray managtogtog na arpa tan plauta.” (Genesis 4:21) Malaklaknab so inaligwasan na sibilisasyon. Ingen, amin a bengatla so biglan anampot. Antoy agawa?

Anto so Problema?

Anggaman ed amin na saratan a bentaha, say sosyedad sakbay na Delap so walaan na mauges a gapoan. Say angigapo na satan, a si Adan, so nanrebelde ed Dios. Si Cain, say angipaalagey na inmunan nikurit a syudad, et pinatey toy dilin agi to. Agpankelawan a say kaugsan so maples a kinmayat! Linmoor iray resulta na kasalanan ya impatawir nen Adan ed ilalak to.​—Roma 5:12.

Saray bengatla so mabitar a mamanpantok la sanen denetermina nen Jehova ya abuloyan toy kipapasen a mantultuloy ni na 120 a taon. (Genesis 6:3) Oniay inkuan na Biblia: “Say kabaglan na too ed dalin abalbaleg, tan mauges labat a lanang so pimorekdek na nonot na puso. . . . Say dalin napno nensaman na karawalan.”​—Genesis 6:5, 11.

Diad kaunoran, espesipikon imbaga na Dios ed si Noe a deralen to so amin a laman panamegley na delubio. (Genesis 6:13, 17) Anggaman si Noe so “sakey a managpulong na katunongan,” mapatnag a mairap a panisiaan na katooan a mangangga so amin a bengatlan walad kaliberliber da. (2 Pedro 2:5) Walwaloran totoo so angunor ed pasakbay tan niliktar. (1 Pedro 3:20) Akin ya importante iya ed sikatayo natan?

Antoy Kabaliksan na Satan ed Sikatayo?

Manbibilay itayo la ed panaon a singa met ed panaon nen Noe. Naynay tayon narerengelan so nipaakar ed saray gawa na terorismo, kampanya ed palanit a panagpatey, turobos iran panamatey na saray managpatey ya andian na malinew a motibo, tan say pirmin iloloor na karawalan ed loob na ayaman. Say dalin so napno lamet na karawalan, tan singa nensaman, say mundo so napapasakbayan ed onsabin panangukom. Inkuan a mismo nen Jesus a sikatoy onsabi bilang Ukom a tinuro na Dios tan ibiig to so totoo a singa say pastol so mangibibiig ed saray karnero manlapud saray kanding. Saramay napaneknekan ya agmakana, inkuan nen Jesus, so “onla ra naani ed dusa ya andi-anggaan.” (Mateo 25:31-33, 46) Balet, inkuan na Biblia a diad sayan panaon et walaray minilyon a makaliktar​—sakey a baleg ya ulop a mandadayew ed alenleneg a tuan Dios. Diad mundon onsabi et panggayagaan na saraya so bilay diad magnayon a kareenan tan kaligenan ya agnin balot agawa nensaman.​—Miqueas 4:3, 4; Apocalipsis 7:9-17.

Napaneknekan a mismo na dakel a managmudmora ed saray balikas na Biblia tan ed saray pasakbay nipaakar ed ikiwas a pangukom a tuan nagawa iratan. Balet impaliwawa nen apostol Pedro a saratan a manduaruwa so mangibabaliwala ed saray katuaan. Oniay insulat to: “Dia ed kaunoran ya agew onsabi so saray managlurey a . . . kuanen da: Iner so kawalaan na sipan ed idateng to? . . . Ta nanlinawaan da ya inlingwan a walaray katawenan nanlapu la’d inmunan panaon, tan say dalin a wala ed danum tan utel na danum lapud salita na Dios: Lapu ed saya say mundo nen saman, dia ed inkayanep to na danum atawtaw: Balet saray tawen a wala natan, tan say dalin, impansiansia ra na dilin salitan niyatol ya onkana ed apoy ed agew na panangukom, tan dia ed  kaderal na saray mangaruksan totoo.”​—2 Pedro 3:3-7.

Say sankamundoan a pasakbay nipaakar ed sayan onsabin agew na panangukom tan say ontumbok a mensahe na maong a balita nipaakar ed kareenan so maseet a nipupulong la natan bilang katutulok ed mapropetikon ganggan nen Jesus. (Mateo 24:14) Sayan pasakbay so agnepeg a leglemewen. Totooren na makapanyarin-amin a Dios so sinalita to.

Say Mundo ya Onsabi

Anto so arapen na katooan, diad pangonsidera ed makatantandan pananguman ya onsabi? Diad unonan kabiangan na Sermon to ed Palandey, insipan nen Jesus: “Mapalar iray mauyamo: ta tawiren day dalin.” Insan to imbangat iray babangatan to a manpikasi ed Dios: “Nagawa komon so linawam, unong ed tawen, ontan met ed dalin.” (Mateo 5:5; 6:10) On, imbangat a mismo nen Jesus ya akaparaan la so alay abig ya arapen parad matoor a katooan diad dalin a mismo. Tinukoy to itan bilang “balo a panamalsa.”​—Mateo 19:28.

Kanian legan mon momolimolien so arapen, agmo aabuloyan iray managludlurey a panduaruwaen da ka ed pasakbay na Dios. Tua a nayarin ompatnag a say kaliberliber tayo so maligen, tan say kaplesan a mundo so abayag lan mantutultuloy. Siansian ag-itayo nepeg a manmatalek ed satan. Say mundo na katooan so akondena la. Ipapuso sirin so konklusyon na sulat nen apostol Pedro:

“Diad inengneng a saraya ya amin a bengatla naderal ira naani, anton nengneng na inkatoo so nepeg yon pagmaliwan ed amin a masantos a panagbilay tan simpitan, dia ed panalagar tan pampilalek yo ed isabi agew na Dios . . . Bangta kaliktan yo so saraya a bengatla, pampelengan yo tan pian naromog kayo’d kareenan, ya andi matik tan karumsisan ed imaton to. . . . Ombuna kayo komon ed grasya tan pikakabat ed Katawan tan Manangilaban tayo a Jesu-Kristo.” (2 Pedro 3:11, 12, 14, 18) Kanian, makaaral ed say agawa ed panaon nen Noe. Onapit ed Dios. Ombulaslas ed pikakabat ed si Jesu-Kristo. Bayuboan so maridios a debosyon, tan magmaliw a kabiangan na saramay minilyon a mankaliktan a naliktar ed panampot na sayan mundo a mamaarap ed mareen a mundon onsabi.

[Litrato ed pahina 5]

Kabkabat la so panagpanday sakbay na Delap

[Litrato ed pahina 7]

Akaparaan la so alay abig ya arapen