“Talaranan Mo, Medyo Ansakit Iya”

KASIN nadngel mo la iratan a salita? Nayarin satan so imbaga na sakey a doktor odino nars sakbay ton ginawa so nirekomendan panagtambal.

Maseguron agmo impulisay so panagtambal ta pian napaliisan labat so iilaloan ya ot-ot. Imbes, intepel mo itan ta pian nagamoran moray pankaabigan na bunigas mo. Diad grabe iran kaso, say pangawat odino pangipulisay ed agkomportablin pakatambalan so mansumpal ed pambilay odino ipatey.

Anggaman agtayo lawas kakaukolanen so pampadoktor, amin tayo bilang ag-ayadyarin totoo so mankaukolan na disiplina, odino panametek, anggano no diad maminsan et ansakit itan. (Jeremias 10:23) Pian nidanet iyan pankaukolan na saray anak, oniay kuan na Biblia: “Say inkaatiw nisinger ed puso na ugaw; balet say panaklay na panangibangat mangiyarawi ed sikato.”​—Uliran 22:15.

Say panaklay, diad sayan kipapasen et simbolo na autoridad na ateng. Tua a pigpigaran ugugaw so malabay na disiplina. No lalanoren na satan so pananusa, agda labay itan. Balet, saray makabat tan maaron atateng so agsinononot ed pakasakitay liknaan na anak noagta say pankaabiganan na anak da. Amta na Kristianon atateng a say Salita na Dios so tua sanen inkuanton: “Anggapo so pananusa natan a singa sengeg na liket, noag ingen kaermenan: balet kayari to mangiter na bunga a mareen na katunongan ed saray nailuam la lapu ed sikato.”​—Hebreos 12:11; Uliran 13:24.

Siempre, aliwan saray ugugaw lambengat so mankakaukolan na disiplina. Para met itan ed saray wala la’d edad. Say Biblia so mitotongtong ed saray wala la’d edad sanen inkuanto: “Bembenan mo a malet so panangibangat; sikato so agmo yabuloy ya onla; sikato so unoren mo; ta sikato so bilay mo.” (Uliran 4:13) On, saray makabat a totoo​—ugaw man odino matatken​—so padisiplina unong ed Salita na Dios, say Biblia, lapud say panggawa’d satan so kiliktaran na bilay da.