Tepetepet Manlapud Saray Managbasa

Kasin susto so pangibagan pupugeran na panangasi nen Jehova so inkahustisya to?

Anggaman inusar iyan balikas, maabig no paliisan itan lapud singano isusuheri na satan a papakepaen odino kokontrolen na panangasi nen Jehova so inkahustisya to, a singano mas superyor so panangasi to ed say makapasakit a kalidad na inkahustisya. Aliwan susto iya.

Say Hebreon salita parad “inkahustisya” so nayarin mankabaliksan met na “panangukom.” Say inkahustisya so maapit a misiglaotan ed inkatunong. Balet, say inkahustisya so kaslakan a walaan na legal iran kabaliksan. Say inkatunong so kaslakan ya anggapo. Tua a say inkahustisya nen Jehova so nayarin managlawi ed panangipaakseb na manepeg a dusa, balet nayarin managlawi met itan ed pangitarya na kilalaban parad saramay makanepegan. (Genesis 18:20-32; Isaias 56:1; Malaquias 4:2) Kanian, agnepeg a moriaen so inkahustisya nen Jehova bilang makapasakit odino nakaukolan a pakepaen.

Say Hebreon salita parad “panangasi” so nayarin ontukoy ed say panangontrol ed panangipaakseb na panangukom. Nayarin ontukoy met itan ed inkamaparaan a panangipatnag na panangabagey, a mangitatarok na pakainawaan ed saray nalalames.​—Deuteronomio 10:18; Lucas 10:29-37.

Si Jehova so Dios na inkahustisya tan panangasi. (Exodo 34:6, 7; Deuteronomio 32:4; Salmo 145:9) Say inkahustisya tan panangasi to so parehon naspot, tan onkukurang iratan a mantutunosan ed sakey tan sakey. (Salmo 116:5; Oseas 2:19) Saratan a kalidad so naspot ya asimbang odino manpanoan ed sakey tan sakey. Kanian, no ibaga tayon say panangasi nen Jehova so mamupuger ed inkahustisya to, nayarian tayo met ya ibagan say inkahustisya nen Jehova so mamupuger ed panangasi to.

Impropesiya nen Isaias: “Manalagar si Jehova, pian kasian to kayo; pian diad ontan sikato so nitandoro; et sikato so maparaan ed panangasi ed sikayo; ta si Jehova sikato so Dios na inkatunong [“inkahustisya,” The New English Bible].” (Isaias 30:18) Ipapanengneng dia nen Isaias a mangisasagyat so inkahustisya nen Jehova na saray gawa na panangasi, ya agkabaliksan na satan a pakekepaen odino kokontrolen na panangasi to so inkahustisya to. Ipapanengneng nen Jehova so panangasi lapud sikato so makatunongan tan lapud sikato met so maaro.

Tua, say managsulat na Biblia a si Santiago so angisulat: “Say panangasi maliket ya onsumpa ed panangukom.” (Santiago 2:13b) Balet, diad konteksto et aliwan si Jehova so tutukoyen nen Santiago noagta saray Kristiano a mangipapanengneng na panangasi​—alimbawa, diad saray pakaskasi tan mairap-bilay. (Santiago 1:27; 2:1-9) No saratan a mapangasin sinansakey so ukomen la, nodnonoten nen Jehova so kondukta ra tan mapangasin perdonaen to ra diad basiyan na bagat na Anak to. Kanian, talonaan na mapangasin kondukta ra so pirmin panangukom a kanepegan da komon.​—Uliran 14:21; Mateo 5:7; 6:12; 7:2.

Sirin, aliwan susto so pangibagan say panangukom nen Jehova so pupugeran na panangasi to diad pantalos a say inkahustisya to et kaukolan a pakepaen na panangasi. Diad biang nen Jehova et naspot a mankasimbangan irayan kalidad. Manbabalansian iratan a dua no panon met a saratan so mamabalansi tan babalansien​—na arum niran kalidad nen Jehova, a singa say aro tan kakabatan.