Idadaulo nen Kristo so Kongregasyon To

“Nia, wala ak a naynay ed sikayo, ya angga ed kasampotan na mundo.”​—MATEO 28:20.

1, 2. (a) Sanen inter to so ganggan a manggawa na babangatan, anto so insipan na apaolin Jesus ed saray patumbok to? (b) Panon ya aktibon indaulo nen Jesus so akadkaunan Kristianon kongregasyon?

 SAKBAY ya ontokotok ed tawen, si Jesu-Kristo, say apaolin Lider tayo, so inmapireng ed saray babangatan to tan kuanto: “Amin a pakauley niiter ed siak ed tawen tan dia ed dalin. Onla kayo sirin, tan manggawa kayo na saray babangatan ed amin a nasyones, a binyagan yo ra ed ngaray Ama, tan say Anak, tan say espiritu santo. Ya ibangat yo ran mangunor na amin a bengabengatla ya ingganggan ko ed sikayo; tan nia, wala ak a naynay ed sikayo, ya angga ed kasampotan na mundo.”​—Mateo 23:10; 28:18-20.

² Aglambengat impabtang nen Jesus ed saray babangatan to so manangisalbay-bilay a kimey na panaggawa na dakel nin babangatan noagta insipan to met a sikatoy walad sikara. Say awaran na asasakbay ya Inkakristiano, unong a nikurit ed libro na Biblia a Saray Gawa, so maseguron mangipapabitar ya inusar nen Kristo so autoridad a niiter ed sikato pian idaulo so kapkapanporman kongregasyon. Imbaki to so insipan a “mananulong”​—say masanton espiritu​—pian mamabiskeg tan mangiwanwan ed pansasagpot na saray patumbok to. (Juan 16:7; Gawa 2:4, 33; 13:2-4; 16:6-10) Inusar nen apaolin Jesus iray anghel a walad panangimando to pian tulongan iray babangatan to. (Gawa 5:19; 8:26; 10:3-8, 22; 12:7-11; 27:23, 24; 1 Pedro 3:22) Niarum ni, angitarya so Lider tayo na panangidirehi ed kongregasyon diad impangiyarunsa ed kualipikadon lalaki a manserbi bilang mananguley ya ulop.​—Gawa 1:20, 24-26; 6:1-6; 8:5, 14-17.

3. Antoran tepet so singbaten ed sayan artikulo?

³ Komusta balet ed panaon tayo, ‘say kasampotan na sistema na bengabengatla’? Panon so pangidadaulo nen Jesu-Kristo ed Kristianon kongregasyon natan? Tan panon tayon nipanengneng ya aawaten tayo iyan panangidaulo?

Say Katawan so Walaan na Matoor ya Aripen

4. (a) Siopa so manugyop ed “matoor tan makabat ya aripen”? (b) Anto so impudir na Katawan ya asikasoen na aripen?

⁴ Sanen inter to so propesiya nipaakar ed tanda na kiwawala to, inkuan nen Jesus: “Siopa sirin so matoor tan makabat ya aripen, a sikatoy impasen na katawan to a mangimaton ed sankaabungan to, a mangiter ed sikara na tagano ed panaon a kinepeg to? Mapalar so satan ya aripen, a sikatoy nasabian na katawan to ya ontay gagawaen to. Tua kuan ko ed sikayo, a sikatoy ipasento’d amin a wala ed sikato.” (Mateo 24:45-47) Say “katawan” et say Lider tayo, si Jesu-Kristo, tan sikato so anuro ed “matoor tan makabat ya aripen” ​—say ulop na alanaan iran Kristiano diad dalin​—a mangasikaso ed amin a pamaakaran to diad dalin.

5, 6. (a) Diad pasingawey a naawat nen apostol Juan, anto so ililitrato na “pitoran kandelero a balitok” tan “pitora a bitewen”? (b) Anto so ipapatnag na katuaan a say “pitora a bitewen” so walad kawanan a lima nen Jesus?

⁵ Ipapabitar na libro na Biblia ya Apocalipsis a say matoor tan makabat ya aripen so direktan walad silong na panangontrol nen Jesu-Kristo. Diad sakey a pasingawey nipaakar ed “agew na Katawan,” anengneng nen apostol Juan so “pitora a kandelero a balitok; tan dia ed pegley na pitora a kandelero, anengneng ko so sakey a kaulibay na anak na too” a ‘walad kawanan a lima to so pitoran bibitewen.’ Diad impangipaliwawa ed pasingawey nen Juan, inkuan nen Jesus: “Say misteryo na saray pitora a bitewen ya anengneng mo ed kawanan ko, tan saray pitora a kandelero a balitok. Saray pitoran bitewen sikara so angheles na pitora ya iglesia: tan saray pitora a kandelero sikara so pitoran iglesia.”​—Apocalipsis 1:1, 10-20.

⁶ “Say pitora a kandelero a balitok” so mangililitrato ed amin a tuan Kristianon kongregasyon a niwala ed “agew na Katawan,” a ginmapo nen 1914. Komusta balet imay ‘pitoran bibitewen’? Diad primero et isisimbolo ra so amin a nailalak ed espiritu, alanaan iran manangasikaso a mangiimaton ed saray kongregasyon nen inmunan-siglo. * Saray manangasikaso so walad kawanan a lima nen Jesus, salanti, diad silong na panangontrol tan panangidirehi to. On, inwanwan nen Kristo Jesus so tugyop na aripen a klase. Balet, natan et daiset laray alanaan a manangasikaso. Panon ya onnanatnat so panangidaulo nen Kristo ed masulok a 93,000 a kongregasyon na saray Tastasi nen Jehova ed sankamundoan?

7. (a) Panon so panguusar nen Jesus ed Mananguley ya Ulop pian mangidaulo ed saray kongregasyon ed sankadalinan? (b) Akin a nibaga a saray Kristianon manangasikaso so tinuro na masanton espiritu?

⁷ Singa diad inmunan-siglo, walay melag a grupo na kualipikadon lalaki ed limog na saray alanaan a manangasikaso a manlilingkor natan bilang Mananguley ya Ulop, a mangirerepresenta ed tugyop na matoor tan makabat ya aripen. Uusaren na Lider tayo iyan Mananguley ya Ulop pian turoen so kualipikadon lalaki​—balanglan alanaan na espiritu odino andi​—bilang mamatatken ed lokal a kongregasyon. Nipaakar ed saya, importantin tuloy so betang na masanton espiritu, ya inter nen Jehova so pakauley ed si Jesus a mangusar ed satan. (Gawa 2:32, 33) Unona ed amin, sarayan manangasikaso so nepeg a mangapet ed saray kakaukolanen a nidatak ed Salitay Dios, ya impuyan na masanton espiritu. (1 Timoteo 3:1-7; Tito 1:5-9; 2 Pedro 1:20, 21) Saray rekomendasyon tan pananuro so gawaen kayari na pikakasi tan diad silong na panangigiya na masanton espiritu. Niarum ni, saray aturon indibidual so mangipapatnag ed bunga na satan ya espiritu. (Galacia 5:22, 23) Say simbawa sirin nen Pablo so onaaplika met ed amin a mamatatken, balanglan alanaan odino andi: “Alwaran yo so inkasikayon dili, tan say amin a kasimpukokan ya anginan na espiritu santo ed sikayo a managbantay [“manangasikaso,” NW].” (Gawa 20:28) Sarayan aturon lalaki so papaidirehi ed Mananguley ya Ulop tan mabulos a manpastol ed kongregasyon. Diad onian paraan, a si Kristo so walad sikatayo natan tan aktibon mangidadaulo ed kongregasyon.

8. Panon ya uusaren nen Kristo iray anghel pian mangiwanwan ed saray patumbok to?

⁸ Uusaren met nen Jesus iray anghel a mangiwanwan ed saray patumbok to natan. Unong ed ilustrasyon na trigo tan sisañaz, onsabi so panag-ani diad ‘kasampotan na sistema na bengabengatla.’ Siopa so usaren na Katawan a manani? ‘Saray manani et saray anghel,’ so kuan nen Kristo. Inyarum to: “Say Anak na too ibaki to naani ’ray angheles to, tan tiponen da naanin ipaway ed panarian to so amin a bengabengatla a sengeg na kagapolan, tan saray manggaway karelmengan.” (Mateo 13:37-41) Niarum ni, no panon ya inwanwan na sakey ya anghel si Felipe pian naromog so  Etiopen eunoko, wala met so daakan ya ebidensya natan ya uusaren nen Kristo iray anghel pian idirehi so kimey na saray tuan Kristiano diad pananap ed saray matuan-impanpuso.​—Gawa 8:26, 27; Apocalipsis 14:6.

9. (a) Anton paraan so uusaren nen Kristo a mangiwanwan ed Kristianon kongregasyon natan? (b) Anton tepet so nepeg tayon konsideraen no labay tayoy nagunggonaan ed panangidaulo nen Kristo?

⁹ Agaylan panamaseguro so pakaamtan itatarya nen Jesu-Kristo so panangidaulo ed saray babangatan to natan panamegley na Mananguley ya Ulop, say masanton espiritu, tan saray anghel! Anggaman temporaryon niyarawi so arum ed saray mandadayew ed si Jehova manlapud Mananguley ya Ulop makasengeg ed panamasegsegang odino mipadpara iran rason, si Kristo so mangitarya nin siansia na panangidaulo panamegley na masanton espiritu tan suporta na anghel. Balet, nagunggonaan tayo labat ed panangidaulo to no awaten tayo itan. Panon tayon nipatnag ya aawaten tayo so panangidaulo nen Kristo?

‘Ontulok Kayo . . . Pauleyan Kayo’

10. Panon tayon nipanengneng so panamabli ed saray aturon mamatatken ed kongregasyon?

¹⁰ Say Lider tayo so angiter ed saray kongregasyon na ‘langkap a lalaki’​—‘arum so manangipulong na maabig a pakabat, arum so pastor tan manangibangat.’ (Efeso 4:8, 11, 12) Say awawey tan tratamento tayo ed sikara so malinew a mangipaparungtal no kasin aawaten tayo so panangidaulo nen Kristo. Manepeg labat ya ipanengneng tayo so ‘pisasalamat’ ed kualipikado ed espiritual iran lalaki ya inter nen Kristo. (Colosas 3:15) Makanepegan met ira ed panagrespeto tayo. “Saray mamasiken a manuley a maong nibilang ira komon a manepeg ed mamiduan dayew,” so insulat nen apostol Pablo. (1 Timoteo 5:17) Panon tayon nipatnag so pisasalamat tan panamabli tayo ed saray mamasiken​—mamatatken odino manangasikaso​—diad kongregasyon? Inmebat si Pablo: “Ontulo’kayo ed saray wala a manuley ed sikayo, tan pauleyan kayo ed sikara.” (Hebreos 13:17) On, nakaukolan a tuloken tayo ira tan manpasakop ed sikara.

11. Akin a say panagrespeto ed uksoyan nipaakar ed mamatatken so kabiangan na pambilay unong ed bautismo tayo?

¹¹ Say Lider tayo et ayadyari. Saray lalakin inter to bilang langkap et ag-ayadyari. Kanian sikara so nalingo no maminsan. Ingen, importante so pansiansia tayon matoor ed uksoyan nen Kristo. Diad tua, say ikiwas tayo unong ed dedikasyon tan bautismo tayo so mankabaliksan na pamidbir ed inka-lehitimo na tinuro na espiritu ya autoridad diad kongregasyon tan mabulos a manpasakop ed satan. Say bautismo tayo ed ‘ngaran na masanton espiritu’ so mapublikon panangiyabawag a bibidbiren tayo so masanton espiritu tan aawaten tayo so betang na satan ed saray gagala nen Jehova. (Mateo 28:19) Satan a bautismo so mankabaliksan na pikoopera tayo ed espiritu tan paliisan so antokaman a bengatla a mangamper ed ikukurang na satan ed limog na saray patumbok nen Kristo. Lapud say masanton espiritu so walaan na makanan betang ed panangirekomenda tan pananuro ed mamatatken, peteg kasin makapanmatoor tayo ed dedikasyon tayo no agtayo mikokoopera ed uksoyan na kongregasyon nipaakar ed saray mamatatken?

12. Antoran alimbawa nipaakar ed agpanagrespeto ed autoridad so indatak nen Judas, tan anto so naaralan tayo ed saratan?

¹² Lugan na Kasulatan iray alimbawa a mangibangat  ed sikatayo nipaakar ed kablian na katutulok tan panagpasakop. Diad panutukoy ed saramay maabuson mansasalita ed saray aturon lalaki ed kongregasyon, impabitar nen babangatan a Judas so taloran manamasakbay ya alimbawa, a kuanto: “Kasi la ra! ta tinumbok da so dalan nen Cain, tan sinmegba ra ed kalilingo nen Balaam lapu ed tumang, tan atawtaw ira ed kasebegan nen Cora.” (Judas 11) Imbaliwala nen Cain so maaron simbawa nen Jehova tan ginagala ton gegemtanen so kurang na makapatey lan pambusol. (Genesis 4:4-8) Anggaman aminpiga lan pinasakbayan na Dios, sinali nen Balaam ya ayewen so totoo na Dios makasengeg ed pinansyal a tumang. (Numeros 22:5-28, 32-34; Deuteronomio 23:5) Si Cora so walaan na mismon maabig a responsabilidad ed Israel, balet aliwa itan a magenap ed sikato. Inggaulo to so panagrebeldi sumpa ed lingkor na Dios a si Moises, say sankauyamoan a too ed dalin. (Numeros 12:3; 16:1-3, 32, 33) Sinmabi so desyang ed si Cain, Balaam, tan Cora. Agaylan linew so ibabangat ed sikatayo na sarayan alimbawa pian ontalineng ed simbawa na saramay uusaren nen Jehova ed responsablin posisyon tan respetoen ira!

13. Antoran bendisyon so impasakbay nen propeta Isaias parad saramay manpasakop ed uksoyan nipaakar ed mamatatken?

¹³ Siopa so agmalabay a nagunggonaan ed matalonggaring ya uksoyan na panangasikaso ya inletneg na Lider tayo ed loob na Kristianon kongregasyon? Oniay impasakbay nen propeta Isaias nipaakar ed saray bendisyon na satan: “Nia sakey ya ari so manari naani ed kaptekan, tan saray prinsipe manuley ira naani ed inkatunong. Et sakey a too so magmaliw naani a singa sakey ya amotan na dagem, tan sakey a siroman ed bagyo, singa saray agus na saray danum ed pasen ya amaga, singa anino na sakey a baleg a batondampay ed sakey a dalin ya apagaan.” (Isaias 32:1, 2) Kada sakey ed saray mamatatken so kaukolan a magmaliw ya ontan a ‘pasen’ na salimbeng tan kaligenan. Anggaman say pampasakop ed autoridad so mairap ed sikatayo, komon ta masimoon tayon  panggunaetan so pagmaliw a matulok tan mapasakop ed inyuksoy na Dios ya autoridad ed loob na kongregasyon.

No Panon a Manpapasakop Iray Mamatatken ed Panangidaulo nen Kristo

14, 15. Panon a nipatnag na saramay mangaasikaso ed kongregasyon a manpapasakop ira ed panangidaulo nen Kristo?

¹⁴ Balang Kristiano​—nagkalautla ed saray mamatatken​—so nepeg a manumbok ed panangidaulo nen Kristo. Saray manangasikaso, odino mamatatken, so walaan na sukat na autoridad ed loob na kongregasyon. Balet agda panggugunaetan so pagmaliw a ‘mananguley ed pananisia na saray kapananisiaan da’ diad pangontrol ed bilay da. (2 Corinto 1:24) Ipapapuso na saray mamatatken iray salita nen Jesus: “Amta yo a saray makauley na saray Gentiles sikara so katawan ed sikara, tan saray manunaan agamilen da so pakauley da ed sikara. Aliwan ontan naani dia ed sikayo.” (Mateo 20:25-27) Legan a susumpalen na saray mamatatken so responsabilidad da, masimoon dan panlilingkoran so arum.

¹⁵ Papasesegen iray Kristiano: “Nonot yo so saray manuley ed sikayo, a sikara so nansalita ed sikayo na salitay Dios; tan motektek yo no anto so asumpalan na impanbilay da, alig yo so pananisia ra.” (Hebreos 13:7) Ag-iya kakaukolanen lapu lambengat ta mangidadaulo iray mamatatken. Inkuan nen Jesus: “Sakey so katawan [“Lider,” NW] yo a salanti si Kristo.” (Mateo 23:10) Say pananisia na saray mamatatken so nepeg ya aligen lapud aaligen da so peteg a Lider tayo, si Kristo. (1 Corinto 11:1) Konsideraen so pigaran paraan a panggugunaet na saray mamatatken diad pagmaliw a singa-Kristo ed relasyon da ed arum diad loob na kongregasyon.

16. Anggaman ed walan autoridad to, panon so impideneng nen Jesus ed saray patumbok to?

¹⁶ Anggaman matalonggaring si Jesus ed amin a paraan nen saray ag-ayadyarin totoo tan sikatoy walaan na agnaparaan ya autoridad ya impagamor na Ama to, sikato so mapaabeba ed impideneng to ed saray babangatan to. Agto dinismaya iray ondedengel ed sikato diad panangiparayag na pikakabat. Impatnag nen Jesus so inkamalikas tan inkaabagey ed saray patumbok to, a ninonot to iray pankaukolan na totoo. (Mateo 15:32; 26:40, 41; Marcos 6:31) Agton balot kinmerew ed saray babangatan to na agda niiter, tan agton balot angipasakbat ed sikara na agda naawit. (Juan 16:12) Si Jesus so ‘mauyamo tan mapaabeba.’ Agpankelawan sirin a dakel so arepreskoan ed sikato.​—Mateo 11:28-30.

17. Panon a nipatnag na saray mamatatken so singa-Kriston kapaabebaan ed siglaotan da ed arum diad loob na kongregasyon?

¹⁷ No impatnag nen Kristo a Lider so kapaabebaan, nagkalalo la sirin ya ipatnag itan na saramay mangidadaulo ed loob na kongregasyon! On, sikara so agmangaabuso ed antokaman ya autoridad ya inmatalek ed sikara. Tan sikara so ‘ag-onsabi tekep na kaatageyan na pananalita,’ diad panasalin sagyaten so arum. (1 Corinto 2:1, 2) Imbes, panggugunaetan dan salitaen iray salita na Makasulatan a katuaan tekep na inkasimpli tan inkasimoon. Niarum ni, panggugunaetan na mamatatken so pagmaliw a makatunongan ed saray iilaloan da ed arum tan magmaliw a makonsidera ed saray pankaukolan na agagi ra. (Filipos 4:5) Lapud sikakabat ira a balang sakey so walaan na saray limitasyon, sikara so maaron mangikokonsidera ed saratan diad pidedeneng da ed saray agagi ra. (1 Pedro 4:8) Tan agta makaparepresko iray mamatatken a mauyamo tan mapaabeba? Petepeteg ya ontan.

18. Anto so naaralan na mamatatken ed paraan na pidedeneng nen Jesus ed saray ugugaw?

¹⁸ Si Jesus so mainomay ya asinggeran, na anggan saray ordinaryon tuloy a totoo. Nodnonoten pa so inkiwas to sanen binaat na saray babangatan  to iray totoon ‘mangiyaakar ed sikato na ankekelag ya ugugaw.’ “Paulyan yo so saray ankekelag ya ugugaw ya ondago ed siak,” so kuan nen Jesus, “agyo ra sebelan.” Insan “inala to ra ed saray taklay to, tan benendisyonan to ra, ya intapew to so saray lima to ed sikara.” (Marcos 10:13-16) Si Jesus so maligsa tan mapangasi, kanian arum so asagyat ed sikato. Agnatatakot so totoo ed si Jesus. Anggan saray ugugaw so komportable ed kiwawala to. Saray mamatatken so mainomay met ya asinggeran, tan diad pangipapanengneng da na ampetang a panangaro tan panangasi, say arum, pati ugugaw, so agnasisikig a milimog ed sikara.

19. Anto so nalalanor ed pakawalaan na “kanonotan nen Kristo,” tan anton sagpot so kakaukolanen na saya?

¹⁹ Say laknab na pakaalig na mamatatken ed si Kristo Jesus so mandependi ed no panon kalaknab so pakapikabat da ed sikato. “Siopa kasi akapikabat ed kanonotan na Katawan, a makapangibangat ed sikato?” so intepet nen Pablo. Insan inyarum to: “Sikatayo balet wala ed sikatayo so kanonotan nen Kristo.” (1 Corinto 2:16) Say pakawalaan na kanonotan nen Kristo so manasaglawi ed pakapikabat ed padron na panag-isip to tan say amin ya aspekto na personalidad to ta pian amta tayo no anto so nayarin gawaen to ed sakey a situasyon. Isipen pa so pakapikabat a maong ed Lider tayo! On, kakaukolanen na saya so panimanon maong ed saray salaysay na Ebanghelyo tan say regular a pamano ed saray kanonotan tayo na pakatalos ed bilay tan alimbawa nen Jesus. Sano pansagpotan na mamatatken so panumbok ed panangidaulo nen Kristo ed ontan a laknab, mas onkiling iramay walad kongregasyon a mangalig ed pananisia ra. Tan naliketan iray mamatatken ed pakanengneng ed arum a maliket a manutumbok ed saray bakat na Lider.

Mantultuloy a Manpasakop ed Panangidaulo nen Kristo

20, 21. Diad pantatalaran tayo ed insipan a balon mundo, anto so nepeg a determinasyon tayo?

²⁰ Makanakana ya amin tayo so mantultuloy a manpasakop ed panangidaulo nen Kristo. Legan a manasingger tayo la ed anggaan na sayan sistema na bengabengatla, say kipapasen tayo so mipadpara ed saramay Israelita ed Patar na Moab nen 1473 K.K.P. Sikara so wala la’d tambib na Insipan a Dalin, tan oniay inyabawag na Dios diad panamegley nen propeta Moises: “Mila ka naani a miulop ed saya a baley ed dalin ya insamba nen Jehova ed saray ama ra ya iter ed sikara.” (Deuteronomio 31:7, 8) Si Josue so aturon lider da. Pian makaloob ed Insipan a Dalin, saray Israelita so kinaukolan a manpasakop ed panangidaulo nen Josue.

²¹ Oniay ibabaga ed sikatayo na Biblia: “Sakey so katawan [“Lider,” NW] yo a salanti si Kristo.” Si Kristo lambengat so mangidaulo ed sikatayo ya onarap ed insipan a balon mundo a panayaman na inkatunong. (2 Pedro 3:13) Determinado tayo sirin a manpasakop ed panangidaulo to diad amin ya aspekto na bilay.

[Paimano ed Leksab]

Kasin Nanonotan Yo?

• Panon so impangidaulo nen Kristo ed akadkaunan kongregasyon?

• Panon so pangidadaulo nen Kristo ed kongregasyon to natan?

• Akin a nepeg itayon manpasakop ed saramay mangidadaulo ed loob na kongregasyon?

• Diad antoran dalan a nipatnag na mamatatken a si Kristo so Lider da?

[Tepetepet Parad Panagaral]

[Litrato ed pahina 15]

Idadaulo nen Kristo so kongregasyon to tan bebembenan to iray manangasikaso ed kawanan a lima to

[Saray litrato ed pahina 16]

“Ontulo’kayo ed saray wala a manuley ed sikayo, tan pauleyan kayo”

[Litrato ed pahina 18]

Jesus so maligsa tan mainomay ya asinggeran. Sikato so panggunaetan ya aligen na saray Kristianon