Kasin Peteg ed Sikayo so Panangidaulo nen Kristo?

“Agkayo met patatawag na katawan; sakey so katawan [“Lider,” NW] yo a salanti si Kristo.”​—MATEO 23:10.

1. Siopa lambengat so Lider na saray tuan Kristiano?

 MARTES ed saman, Nisan 11. Taloy agew ed saginonor et napapatey si Jesu-Kristo. Saya so unor la ya ibisita to ed templo. Diad satan ya agew, innabang nen Jesus so importantin bangat ed dakel a totoo a nandaragup diman tan ed saray babangatan to. Inkuanto: “Agkayo komon patatawag na Rabbi; ta sakey so managbangat ed sikayo, et sikayo ya amin sanaagi kayo. Tan anggapoy tawagen yo na ama ed dalin; ta sakey so Ama yo, a sikatoy wala ed tawen. Tan agkayo met patatawag na katawan; sakey so katawan yo a salanti si Kristo.” (Mateo 23:8-10) Malinew, si Jesu-Kristo so Lider na saray tuan Kristiano.

2, 3. Say italineng ed si Jehova tan pangawat ed Lider a tinuro to so walaan na anton epekto ed bilay tayo?

² Agaylan makagunggona iray epekto na panangidaulo nen Jesus ed bilay tayo sano awaten tayo itan! Oniay inyabawag nen Jehova a Dios panamegley nen propeta Isaias diad pangipasakbay ed isabi na sayan Lider: “O, amin a napgaan, dago kayo ed saray danum, tan say andian na pilak; dago kayo, manaliw kayo, tan mangan kayo; on, dago kayo, tan manaliw kayo na alak tan gatas ya anggapo so pilak tan anggapo so bayar to. . . . Talinengen yo ak a maseeseet, tan kanen yo so maong, tan panliketen yo komon so kamarerwa yo lanlamang ed inkataba. . . . Nia, sikato so inter ko a nipaakar a tasi ed saray baley a pangulo tan managganggan ed saray baley.”​—Isaias 55:1-4.

³ IInusar nen Isaias so kaslakan iran likido​—danum, gatas, tan alak​—bilang piguratibon salita a mangipanengneng ed no panon a naapektaan so personal a kabibilay tayo sano ontalineng tayo ed si Jehova tan tumboken so Lider tan Komander ya inter to ed sikatayo. Makaparepresko so resulta. Singa itan iyinum na sanbason ambetel a danum ed ampetang a panaon. Say inkapgaan tayo ed katuaan tan inkatunong so onkepa. No panon a say gatas so mamakasil ed saray kapangiyanak tan mamabaleg ed sikara, ‘say gatas na salita’ so mamabiskeg ed sikatayo tan mamawala na espiritual ya ibubulaslas ed siglaotan tayo ed Dios. (1 Pedro 2:1-3) Tan siopa so ag-onabobon a say alak so agmangarum na liket ed ponsia? Diad mipadparan dalan, say panagdayew ed tuan Dios tan say panumbok ed saray bakat na tinuro ton Lider so ‘mamasayaksak’ ed bilay. (Deuteronomio 16:15) Importante sirin ya amin tayo​—malangwer tan matakken, laki tan bii​—so mangipatnag a say panangidaulo nen Kristo so peteg ed sikatayo. Balet, panon tayon nipatnag ed inagew-agew a bilay tayo a say Mesias so Lider tayo?

Sikayoran Tobonbalo​—Mantultuloy Kayon ‘Onaligwas diad Kakabatan’

4. (a) Anto so agawa sanen binmisita so 12 años a Jesus diad Jerusalem nen panaon na Paskua? (b) Kaunongay pikakabat la nen Jesus anggaman 12 años to ni labat?

⁴ Konsideraen pa so ehemplon impatnag na Lider tayo parad saray kalangweran. Anggaman daiset so nidalatdat nipaakar ed inkaugaw nen Jesus, walay sakey ya agawa a mapatpatnag. Sanen 12 años nen Jesus, sikato so inawit na atateng to diad tinaon ya ibibisita ed Jerusalem parad Paskua. Diad sayan inkagawa et akasentro so imano to ed Makasulatan a diskusyon, kanian sikato so atilak na pamilya to. Kayari na taloy agew et sikato so aromog na saray aburido lan atateng to, si Jose tan Maria, diad templo, ya ‘akayurong ed leet na saray managbangat tan ondedengel tan mantetepet ed sikara.’ Niarum ni, ‘amin na saramay ondedengel ed sikato so mankelkelaw ed pakatalos to tan ed saray ebat to.’ Isipen pa a diad edad ton 12 años et nayarian la nen Jesus so mangitepet na saray bengatlan makapaliing-kanonotan, nisiglaot  ed espiritual tan makapangiter met na matudio iran ebat! Maseguron sikato so atulongan na panangipasal na atateng.​—Lucas 2:41-50, NW.

5. Panon a nayarin determinaen na saray kalangweran so awawey da nipaakar ed panagaral ed Biblia bilang pamilya?

⁵ Nayarin wala kayo’d kalangweran. No say atateng yo et debosyonadon lingkor na Dios, maseguron wala so regular a programa na pamilya yo ed panagaral na Biblia ed abung yo. Anto so awawey yo ed panagaral na pamilya? Akin ta no molimolien iray tepet a singa say: ‘Kasin interon-kamarerwa ak a manusuporta ed uksoyan na panagaral mi na Biblia bilang pamilya? Kasin mikokoopera ak ed satan, ya agmanggagawa na bengatlan mangapekta ed akaeskedyul a panagaral mi?’ (Filipos 3:16) ‘Kasin aktibo ak a mibibiang ed panagaral? Sano matukoy, kasin mantetepet ak nipaakar ed aaralen a materyal tan mankokomento ed kiyaplikaan na satan? Diad iyaaligwas ko ed espiritual, kasin babayuboan ko so pampilalek ed “taganon anawet, a sikato so kien na saray ayadyari [“matakken,” NW] a totoo”?’​—Hebreos 5:13, 14.

6, 7. Panon kaimportante so programa na inagew-agew a panagbasa na Biblia parad saray tobonbalo?

⁶ Makanakana met so programa na inagew-agew a panagbasa na Biblia. Inkanta na salmista: “Mapalar so too ya agmanakar ed panangibangat na saray agmatunong, . . . noag say gayaga to wala ed ganggan nen Jehova; tan diad ganggan to mandalepdep [“manbasa ed makalnan boses,” NW] ed agew tan labi.” (Salmo 1:1, 2) Say sinmalat ed si Moises, si Josue, so ‘nambasa ed libro na ganggan diad makalnan boses ed agew tan labi.’ Saya so akatulong ed sikato ya onkiwas a makabat tan ontalona ed panusumpal to ed asainmin ya inter ed sikato na Dios. (Josue 1:8) Say Lider tayo, si Jesu-Kristo, so angikuan: “Walan nisulat, Aliwa a say tinapay labat so napambilay na too noag say amin a salitan ombesngaw ed sangi’ Dios.” (Mateo 4:4) No nakaukolan tayo so literal a tagano ed kada agew, nagkalalo la sirin a nakaukolan tayo so espiritual a tagano ed regular a paraan!

⁷ apud amoria to so espiritual a pankaukolan to, say 13-años a si Nicole so ginmapon nambasa na Biblia ed inagew-agew. * Natan, diad edad a 16 et abasa to lan aminsan so interon Biblia tan ngalngali to la itan nakapaldua diad mikaduan danay. Simpli so paraan to. Oniay kuanto: “Siak so determinadon manbasa na manga sakey a kapitulo kada agew.” Panon ya akatulong ed sikato so inagew-agew a panagbasa ed Biblia? Oniay ebat to: “Dakerakel natan iray makapuy ya impluensya. Inagew-agew a nipapaarap ak ed saray pakadesdesan diad eskuelaan tan inerman a pasen a mangaangat ed pananisiak. Say inagew-agew a panagbasa ed Biblia so tinmulong ed siak a makanonot a tampol ed saray ganggan tan prinsipyo na Biblia a mamapabiskeg ed siak a manresisti ed sarayan pakadesdesan. Bilang resulta, lalon inmapit ak ed si Jehova tan si Jesus.”

8. Anto so niyugali nen Jesus diad sinagoga, tan panon so pakaalig ed sikato na saray kalangweran?

⁸ Niyugali nen Jesus so ondengel tan mibiang ed panagbasa na Kasulatan diad loob na sinagoga. (Lucas 4:16; Gawa 15:21) Agaylan makagunggona ed saray kalangweran so panumbok ed satan ya alimbawa diad regular ya iyaatendi ed saray Kristianon miting, a ditan babasaen tan aaralen so Biblia! Oniay impangibalikas na 14 años a Richard ed saratan a miting: “Makanakana iray miting ed siak. Siak so lawas apanonotan ditan nipaakar ed maong tan mauges, no anto so moral tan imoral, no anto so singa-Kristo tan no anto so andi. Agko la kaukolan a sagmaken ni so ampait ya eksperiensya pian makaaral.” On, “say panamatua [“panonot,” NW] nen Jehova matua, gawaen to a makalakal so andi amta.” (Salmo 19:7) Sineguro met nen Nicole a naatendian so amin a limaran miting ed kongregasyon diad kada simba. Sikato so manguusar met na manlapud duara anggad taloran oras diad panparaan ed saratan.​—Efeso 5:15, 16.

9. Panon a makapantultuloy iray kalangweran ya ‘ombulaslas ed kakabatan’?

⁹ Say inkatobonbalo so maabig a pankanawnawa ya onggamor na ‘pikakabat ed saksakey a tuan Dios, tan saman so imbaki to, salanti si Jesu-Kristo.’ (Juan 17:3) Nayarin walaray kabat yon kalangweran a manguusar na dakel a panaon ed panagbasa na komiks, panagbantay na telebisyon, panggalaw na video games, odino panagparlas diad Internet. Akin et aligen yo ira anta sarag yon aligen so ayadyarin ehemplo na Lider tayo? Bilang tobonbalon laki, panliketan to so panaral nipaakar ed si Jehova. Anto so resulta? Lapud panamabli to ed saray espiritual a bengatla, si “Jesus so nantultuloy a binmulaslas ed kakabatan.” (Lucas 2:52, NW) Kanian nayarian yo met.

“Mantutulokan so Sakey tan Sakey”

10. Anto so ontulong ed bilay na pamilya pian magmaliw a lapuan na deen tan liket?

¹⁰ Say ayaman so nayarin magmaliw a maligen a pasen na deen tan kapnekan odino magulon pasen na pankokolkol. (Uliran 21:19; 26:21) Say pangawat tayo ed panangidaulo nen Kristo so makatulong ed pamabulaslas na deen tan liket diad loob na pamilya. Diad tua, say ehemplo nen Jesus so pangaligan nipaakar ed siglaotan na pamilya. Oniay ibabaga na Kasulatan: “Mantutulokan so sakey tan sakey ed sikayo dia ed katatakot ed Kristo. Sikayo ya asawan bibii, pauleyan kayo ed saray kaasawaan yo a dili, a singa met ed Katawan. Ta say asawan laki sikato so ulo na asawan bii, a singa si Kristo met sikato so ulo na iglesia, a sikaton dili so manangilaban ed laman; . . . Asawan lalaki, aroen yo so saray kaasawaan yo, a singa met si Kristo ya inaro to so iglesia, tan insaklang to so inkasikato nisengeg ed sikato.” (Efeso 5:21-25) Diad kongregasyon na Colosas, oniay insulat nen apostol Pablo: “Anak, ontulo’kayo ed saray kaatengan yo ed amin a bengabengatla, ta saya sikato so makapaliket ed Katawan.”​—Colosas 3:18-20.

11. Panon a nipatnag na asawan laki a peteg ed sikato so panangidaulo nen Kristo?

¹¹ Say pangunor ed sayan simbawa so mankabaliksay pangidaulo na asawan laki ed pamilya, a sikatoy matoor a suportaan na akulaw to, tan unoren na ananak iray atateng da. Balet, say inkaulo na laki so manresulta ed liket no agamilen itan ed suston paraan. Nepeg ya aralen na makabat ya asawan laki no panon ton agamilen so inkaulo diad pangalig ed mismon Ulo tan Lider to, si Kristo Jesus. (1 Corinto 11:3) Anggano si Jesus so nagmaliw ed saginonor ya “ulo ed saray lapag a bengatla a nipaakar ed iglesia,” sikato so “agdia linma [ed dalin] a panlingkoran, noag say manlingkor.” (Efeso 1:22; Mateo 20:28) Diad mipadparan dalan, say Kristianon asawan laki so mangaagamil ed inkaulo to, aliwan ed sinisiblet a  bentaha, noagta pian asikasoen iray pankaabigan na akulaw tan ananak to​—on, say interon pamilya. (1 Corinto 13:4, 5) Panggugunaetan ton aligen so maridios iran kalidad na ulo to, si Jesu-Kristo. Singa si Jesus, sikato so mauyamo tan mapaabeba ed puso. (Mateo 11:28-30) Agto mairap ya ibaga iray salitan “dispensa mo ak” odino “duga ka” sano sikato so alingo. Lapud maabig ya alimbawa to, mainomay parad asawan bii so pagmaliw a ‘katulongan,’ sakey a ‘kapanoan,’ tan ‘kaiba’ na ontan a laki, a makaaral tan mitulongan ed sikato.​—Genesis 2:20; Malaquias 2:14.

12. Anto so makatulong ed asawan bii a mabulos a mangawat ed prinsipyo na inkaulo?

¹² Diad biang na asawan bii, sikato so nepeg a manpasakop ed masiken to. Balet no sikato so naiimpluensyaan na espiritu na mundo, sikato so nayarin manleglemew la ed prinsipyo na inkaulo, tan say panagpasakop ed laki so agla makapasagyat ed sikato. Ag-ibabaga na Kasulatan a nepeg a magmaliw a madomina so laki, balet kakaukolanen na satan a manpasakop so kaasawaan a bibii ed kaasawaan dan lalaki. (Efeso 5:24) Kakaukolanen met ed Biblia a sakbaten na asawan laki odino ama so responsabilidad ed pamilya, tan sano iyaplika so simbawa nipaakar ed satan, saya so mamawala na deen tan uksoy ed pamilya.​—Filipos 2:5.

13. Anton alimbawa na panagpasakop so impatnag nen Jesus parad saray ananak?

¹³ Saray ananak so nakaukolan a matulok ed kaatengan da. Nipaakar ed saya, angipatnag si Jesus na ekselentin alimbawa. Kayari na agawa ed templo sanen atilak so 12 años a Jesus ed loob na taloy agew, sikato so “linma ya akiulop ed [saray atateng to], et sinmabi ra ed Nazaret; et matulotulok ed sikara.” (Lucas 2:51) Say pampasakop na ananak ed kaatengan da so mamadaak na deen tan pantutunosan ed pamilya. Sano manpasakop so amin ed loob na pamilya diad panangidaulo nen Kristo, say resulta et maliket a pamilya.

14, 15. Anto so makatulong ed sikatayo ya ontalona diad pangarap ed makapaangat a situasyon ed loob na pamilya? Mangiter na alimbawa.

¹⁴ Anggaman onlesa iray makapaangat a kipapasen diad ayaman, say tombok ed itatalona et say pangalig ed si Jesus tan pangawat ed panangigiya to. Alimbawa, say impangasawa nen 35 años a Jerry ed si Lana, ina na sakey a tin-edyer a marikit, so amawala na probleman agda naisip a dua. Oniay impaliwawa nen Jerry: “Amtak a diad pagmaliw a maong ya ulo, kinaukolan kon iyaplika so mipara iran prinsipyo na Biblia a mangitatarok na aligwas ed arum niran pamilya. Balet adiskobrek a kaukolan kon iyaplika iratan tekep na malalaknab a kakabatan tan pakatebek.” Sikato so impasen na sioman ton marikit a makakasbel ed sikaran san-ina tan sikato so pirmin nanimbelan na sayan anak. Kinaukolan nen Jerry so pakatebek pian natalosan ton say panagsalita tan kakikiwas na anak a bii et naimpluensyaan na ontan ya awawey. Panon ton aresolbi so situasyon? Oniay ebat nen Jerry: “Nampaknaan mi nen Lana a diad kaplesan et sikato ni so mandisiplina bilang ateng bangta iyapasakey ko so pamawala na maong a relasyon ed sioman ko. Sinmabi panaon, maong so resulta na sayan paraan.”

¹⁵ Sano nipaarap itayo ed mairap iran situasyon ed ayaman, nakaukolan tayo so pakatebek pian natalosan no akin ya ontan so panagsalita tan kakikiwas na saray kapamilyaan. Nakaukolan tayo met so kakabatan pian suston niyaplika iray maridios a prinsipyo. Alimbawa, malinew ya atebek nen Jesus no akin a sikato so diniwit na bii a maniirap la’d pampaparala to, tan sikato so makabat tan maabagey ya akideneng ed sayan bii. (Levitico 15:25-27; Marcos 5:30-34) Say kakabatan tan pakatebek so mapatnag a kalidad na Lider tayo. (Uliran 8:12) Maliket itayo no onkiwas itayon singa sikato.

‘Mantultuloy ya Iyuna so Panarian’

16. Anto so nepeg a manunaan ed kabibilay tayo, tan panon iyan impatnag nen Jesus panamegley na alimbawa to?

¹⁶ Impabitar nen Jesus no anto so nepeg a manunaan ed kabibilay na saramay mangawat ed panangidaulo to. Inkuanto: “Anapen yo nin unona so panarian, tan say inkatunong to; et amin iraya a bengatla niarum ira ed sikayo.” (Mateo 6:33) Tan diad panamegley na alimbawa to, impatnag to ed sikatayo no panon itan a gawaen. Diad pansampot na 40-agew ya impanayunal, impandalepdep, tan pikakasi kayari na inkabautismoan to, si Jesus so nidunget ed sakey a tukso. Inyopresi ed sikato nen Satanas a Diablo so pananguley ed “amin a panarian na mundo.” Isipen pa so bilay a niwala ed si Jesus sano inawat to so  opresi na Diablo! Balet, inyapasakey nen Kristo so panggawa ed linawa nen Ama to. Amta to met a maganggano itan a bilay ed mundo nen Satanas. Tampol ton impulisay so opresi na Diablo, a kuanto: “Walan nisulat, Sika igalang mo naani so Dios a Katawan mo, tan sikato labat so panlingkoran mo.” Kayarin tuloy na satan, “ginmapoy Jesus a nampulong, tan nankuan, Mansibkel kayo; ta asingger la so panaria’y tawen.” (Mateo 4:2, 8-10, 17) Legan na interon mangaraldalin a bilay to, si Kristo so sigpot-panaon a manangiyabawag na Panarian na Dios.

17. Panon tayon nipatnag a manunaan ed kabibilay tayo so intereses na Panarian?

¹⁷ Nepeg tayon aligen so Lider tayo tan agtayo pasasagyat ed mundo nen Satanas a gawaen a kalat ed bilay so pakawalaan na trabaho tan karera a pakakuartaan na baleg. (Marcos 1:17-21) Agaylan makulangkulang so kikulasbong ed patit na minumundo iran gegemtan, a magmaliw lan segundaryo so intereses na Panarian! Inmatalek ed sikatayo nen Jesus so kimey na panangipulong ed Panarian tan panaggaway-babangatan. (Mateo 24:14; 28:19, 20) On, nayarin walaan itayo na pamilya odino arum niran responsabilidad ya asikasoen, balet agtayo kasi maliket a mangusar ed saray labi tan sampot-simba a manumpal ed responsabilidad tayo bilang Kristiano, salanti, say panagpulong tan panagbangat? Tan agaylan makapaseseg a kaleganan na 2001 a serbisyon taon et ngalngalin 780,000 so akapanlingkor bilang sigpot-panaon a ministro, odino payunir!

18. Anto so makatulong ed sikatayo pian nawalaan na liket diad ministeryo?

¹⁸ Si Jesus so ililitrato na saray salaysay na Ebanghelyo bilang mananumpal tan walaan na matamoy iran liknaan. Diad impakaimano to ed espiritual a pankaukolan na saramay walad kaliberliber to, naabagey to ra tan magunaet a tinmulong ed sikara. (Marcos 6:31-34) Magmaliw a makapaliket so ministeryo tayo sano mibiang itayo ed satan makasengeg ed aro ed arum tan masimoon a pilalek ya ontulong ed sikara. Balet panon tayon nawalaan na ontan a pilalek? Oniay kuan nen kalangweran a Jayson: “Sanen tin-edyer ak ni, agko tanton panliketan so ministeryo.” Anto so akatulong ed sikato pian napabli to iyan kimey? Oniay ebat nen Jayson: “Diad pamilyak, saray Sabado na kabuasan so lawas akatalaga ed lawak na kimeyan. Maabig iya ed siak lapud diad lalon pibibiang ko ed ministeryo, lalon natetebek ko so kaabigan a nagagawaan na satan tan lalon panliliketan ko itan.” Nepeg met a regular tan maseet itayon mibiang ed ministeryo.

19. Anto so nepeg a determinasyon tayo nipaakar ed panangidaulo nen Kristo?

¹⁹ ITalagan makaparepresko tan makapatumang so pangawat ed panangidaulo nen Kristo. Sano gawaen tayo itan, say inkatobonbalo so magmaliw a  panaon na iyaaligwas ed pikakabat tan kakabatan. Say bilay na pamilya so magmaliw a lapuan na deen tan liket, tan say ministeryo so sakey a kimey a makapangitarok na gayaga tan inkapnek. Determinado tayo sirin ya ipatnag ed inagew-agew a bilay tayo tan ed saray desisyon a petepeteg ed sikatayo so panangidaulo nen Kristo. (Colosas 3:23, 24) Balet si Jesu-Kristo so mangidadaulo ed sikatayo diad sananey nin aspekto​—diad loob na Kristianon kongregasyon. Singbaten ed ontumbok ya artikulo so pakagunggonaan tayo ed sayan probisyon.

[Paimano ed Leksab]

Kasin Nanonotan Yo?

• Panon tayon nagunggonaan diad panumbok ed tinuro na Dios a Lider tayo?

• Panon a nipatnag na saray tobonbalo a kaliktan dan tumboken so panangidaulo nen Kristo?

• Anto so epekto na panangidaulo nen Kristo diad bilay na pamilya na saramay manpapasakop ed satan?

• Panon a nipatnag na ministeryo tayo a petepeteg ed sikatayo so panangidaulo nen Kristo?

[Tepetepet Parad Panagaral]

[Saray litrato ed pahina 9]

Say inkatobonbalo so maabig a panaon pian onggamor na pikakabat ed Dios tan ed tinuro ton Lider

 [Litrato ed pahina 10]

Say pampasakop ed inkaulo nen Kristo so mangiyalibansa na liket ed pamilya

[Saray litrato ed pahina 12]

Inyuna nen Jesus so Panarian. Kasin iyuuna yo met?