Maong a Panangidaulo​—Iner so Pakaromogan Tayo?

“AMIN ya abung et walay amaalagey,” so kuan na Biblia, “balet say amaalagey ed amin a bengatla et say Dios.” (Hebreos 3:4, NW; Apocalipsis 4:11) Lapud si Jehova, say tuan Dios, so Manamalsa tayo, “kabat to so inkagawa tayo.” (Salmo 103:14) Sikatoy walaan na nagnap a pikakabat ed saray limitasyon tan pankaukolan tayo. Tan lapud sikato so maaron Dios, kaliktan ton sikatayoy napenek ed saratan a pankaukolan. (Salmo 145:16; 1 Juan 4:8) Kabiangan la ed pankaukolan tayo so maong a panangidaulo.

Onia so inyabawag nen Jehova panamegley nen propeta Isaias: “Nia, sikato so iter ko a nipaakar a tasi ed saray baley a pangulo [o lider] tan managganggan ed saray baley.” (Isaias 55:4) Say solusyon ed problema ed panangidaulo natan so mangilalanor ed pamidbir ed sayan Lider​—a tinuron mismo na Makapanyarin-amin​—tan say pangawat ed panangidaulo to. Sirin, siopa iyan nipasakbay a Lider tan Managganggan? Antoray pamaneknekan ed sikato bilang sakey a lider? Iner so pangitontonan to ed sikatayo? Anto so nepeg tayon gawaen pian minabang ed panangidaulo to?

Sinmabi la so Insipan a Lider

Manga 2,500 a taon lay apalabas, pinmayawar si anghel Gabriel ed si propeta Daniel tan inkuanto’d sikato: “Amtaen mo sirin, tan talosan  mo, a manlapud ed impaway na ganggan a mamasimbalo tan mangipaalagey na Jerusalem angga ed alanaan, say prinsipe [“Mesias a Lider,” NW], wala naani pitora a simba to, tan anemaplo tan dua a simba to: nipaalagey lamet a walaan na pulong tan banawang, anggan dia ed saray magulo a panaon.”​—Daniel 9:25.

Malinew, papakabatan na anghel si Daniel nipaakar ed espesipikon panaon na isabi na pinili nen Jehova a Lider. Onapireng so “Mesias a Lider” kayari na 69 a simba, odino 483 a taon, diad pamilang manlapud 455 K.K.P., sano ompaway so ganggan ya ipaalagey lamet so Jerusalem. * (Nehemias 2:1-8) Antoy agawa kayari na satan a peryodo? Oniay insalaysay na managsulat na Ebanghelyo a si Lucas: “Bang dia ed taon a koma-labinlima ya inkaari nen Tiberio Cesar, a peles a gobernador ed Judea si Poncio Pilato, tan si Herodes, sikato so tetrarka ed Galilea [29 K.P.], . . . dia ed kalawakan sinmabi salita na Katawan ed Juan ya anak nen Zacarias. Et sikato so linma ed amin a dalin ed kaliberliber na Jordan, ya angipulpulong na binyag nipaakar ed pamaandi ed saray kasalanan.” Diad saman a panaon, “manaalagar so ombaley” ed Mesias a Lider. (Lucas 3:1-3, 15) Anggaman dinmago so karaklan ed si Juan, aliwan sikato iman so Lider.

Insan diad ngalngalin Oktubre 29 K.P., linma si Jesus na Nazaret ed si Juan pian manpabautismo. Tan si Juan so angiter na pantasi a kuanto: “Anengneng ko so espiritu ya onleleksab a singa malapati a nanlapu ed tawen; et pinmetek ed ulo to. Et sikato so agko wari a kabat: balet say angibaki ed siak a maminyag ed danum inkuanto ed siak, Dia ed tapew na siopaman a pakanengnengan mo na espiritu ya onleksab, tan ompetek ed ulo to, sikato lanlamang so maminyag ed espiritu santo. Et anengneng ko, tan angiter ak na pantasi a saya sikato so Anak na Dios.” (Juan 1:32-34) Nen abautismoan si Jesus, sikatoy nagmaliw ya alanaan a Lider​—say Mesias, odino Kristo.

On, apaneknekan a si Jesu-Kristo imay insipan a “pangulo [o lider] tan managganggan ed saray baley.” Tan no usisaen tayo iray kalidad to bilang lider, mainomay tayon natebek a papalumbasan a tuloy na panangidaulo to iray kakaukolanen natan ed sakey a naspot a lider.

Say Mesias​—Sakey a Naspot a Lider

Say maong a lider so malinew a mangididirehi tan ontutulong ed nasasakopan ton totoo a nawalaay determinasyon tan abilidad pian sikaray matalonan makaresolbi ed saray problema. ‘Saya so nakaukolan parad say matalonan lider ed koma-21 a siglo,’ so kuan na libron 21st Century Leadership: Dialogues With 100 Top Leaders. Agaylan epektibo so impangiparaan nen Jesus ed saray dumerengel to pian napidenengan da iray agew-agew a situasyon! Konsideraen pa labat so sankabantogan a paliwawa to​—say Sermon ed Palandey. Napnon tuloy na praktikal a simbawa iray salitan nikurit ed Mateo kapitulo 5 ya anggad 7.

Alimbawa, konsideraen so simbawa nen Jesus nipaakar ed panresolbi ed saray personal ya agpantatalosan. Inkuanto: “Kanian no isasaklang mo so bagat mo ed altar, et nanonotan mod’man a say agim et walay bengatlan pamusolan to ed sika. Itilak mod’man so panangarom ed arap na altar, et onla ka, ta mipulangan ka nin unona ed agim, insan ka ed satan onla tan isaklang mo so panangarom.” (Mateo 5:23, 24) Say manunaan a kundang et say pambulon lan mikareenan ed arum​—a nagkalalon importante nen say panggawa ed relihyoson obligasyon, a singa say pangiyapay diad altar na templo ed Jerusalem unong a kakaukolanen na Mosaikon Ganggan. Ta no andi, saray panangidayew tayo so ag-abobonan na Dios. Praktikal natan so simbawa nen Jesus a singa met nen apalabas iran siglo.

Tinulongan met nen Jesus iray dumerengel to pian napaliisan so patit na imoralidad. Insimbawa to ed sikara: “Nadngelan yo a nikuan, Agka mikalugoran ed agmo asawa. Balet kuan ko ed sikayo, a balang sakey ya onlimgis ed sakey a bii ed pangagum to, akilawanan la ed sikato diad puso to.” (Mateo 5:27, 28) Agaylan matukotukoy a pasakbay! Akin a gapoan tayo so pannodnonot ed  satan a bengatla a mansumpal ed pakapikalugoran? Diad puso so pansengegan na panaglawan tan pikakalugoran, kuan nen Jesus. (Mateo 15:18, 19) Sikatayoy makabat no alwaran tayoy puso tayo.​—Uliran 4:23.

Lugan met na Sermon ed Palandey so matalonggaring a simbawa nipaakar ed pangaro na sakey ed kabusol to, ed pangipatnag na inkamabunlok, ed pakawalaan na manepeg a panmoria ed saray materyal tan espiritual a bengatla, tan arum ni. (Mateo 5:43-47; 6:1-4, 19-21, 24-34) Impanengneng met nen Jesus ed dumerengel to no panon so ikerew na tulong na Dios diad impangibangat to’d sikara no panon so manpikasi. (Mateo 6:9-13) Papabiskegen tan ipaparaan na Mesias a Lider iray patumbok to pian napidenengan daray probleman kaslakan ed katooan.

Aminem ya inggapo nen Jesus iray balikas to diad Sermon to’d Palandey diad impangibagan “nadngelan yo a nibaga” odino “asalita met,” insan to balet imparungtal so sananey nin ideya, ya inkuanton “ingen kuan ko ed sikayo.” (Mateo 5:21, 22, 27, 28, 31-34, 38, 39, 43, 44) Satan so pakapatnagan a niyugali la na saray dumerengel to so onkiwas ed ontan a paraan, unong ed saray insangin tradisyon na Fariseo. Balet ipapanengneng natan nen Jesus ed sikara so duman paraan​—say bengatlan angipatnag ed tuan kabaliksan na Mosaikon Ganggan. Diad ontan et ipapakabat nen Jesus so pananguman, tan ginawa to iya diad paraan a mainomay ya awaten na saray patumbok to. On, apakiwas nen Jesus so totoo pian manguman a tampol ed saray kabibilay da, diad espiritual tan moral a paraan. Saya so sakey a tanda na tuan lider.

Ipapabitar na sakey a libron-panaralan nipaakar ed panangipakurang ya alay irap a nagawaan itan a pananguman. Oniay inkuan na satan: “Say ahente ed pananguman [lider] so mankakaukolay pililikna a singa social worker, aralem a pakatebek a singa sikolohista, inkapaot a singa bumabatik, inkasebeg a singa bulldog, panilalo-ed-dili a singa ermitanyo, tan inkaanos a singa santo. Tan anggaman walaan na saratan a kalidad, agni naseguro so itatalona.”

“Saray lider so nepeg a manugali a singa labay dan panugali na saray idadaulo ra,” so inkuan na sakey ya artikulon apauloan na “Panangidaulo: Kasin Importante so Ug-ugali?” Peteg a say maong a lider so mangaagamil ed ibabangat to. Agaylan tua itan ed si Jesu-Kristo! On, imbangat to iraman so kaiba to a magmaliw a mapaabeba, balet intarya to met so pakaaralan da panamegley na impanguras to’d salisali ra. (Juan 13:5-15) Agto lambengat imbaki iray babangatan to a mangipulong na maong a balita na Panarian na Dios, noagta insekar to met so inkasikato ed satan a kimey. (Mateo 4:18-25; Lucas 8:1-3; 9:1-6; 10:1-24; Juan 10:40-42) Tan no nipaakar ed ikikiwas nen Jesus ed panangidaulo, sikato so angipanengneng na ehemplo. “Say Anak anggapoy nagawaan to ed inkasikato,” so inkuanto ed sikaton mismo, “noag say nanengneng to a gagawaen na Ama.”​—Juan 5:19.

Say akadkaunan impangonsidera ed imbaga tan ginawa nen Jesus so malinew a mangipapabitar a sikato so naspot a Lider. Diad tua et apalumbasan to so amin ya estandarte na too parad maong a panangidaulo. Ayadyari si Jesus. Lapud akaawat na imortal a bilay kayari impatey tan inkioli to, sikato so magnayon a mabilay. (1 Pedro 3:18; Apocalipsis 1:13-18) Siopan too a lider so makapipara ed sarayan kualipikasyon?

Antoy Nepeg Tayon Gawaen?

Bilang manuuley lan Ari ed Panarian na Dios, say “Mesias a Lider” so mamendisyon ed matulok a katooan. Oniay isisipan na Kasulatan nipaakar ed saya: “Say dalin napano naani ed pikakabat ed Jehova, singa saray danum sakbongan da so dayat.” (Isaias 11:9) “Saray mauyamo tawiren da naani dalin: tan manliket ira a dili ed inkadaakan na kareenan.” (Salmo 37:11) “Onyurong ira naani balang sakey ed silong na kiew to ya ubas tan ed silong na kiew to a higos; et anggapo naani manaktakot ed sikara.” (Miqueas 4:4) “Say Dios met lanlamang so wala naani ed sikara tan Dios da: Tan punasen to so amin a lua ed kamataan da; tan anggapo la naani ipatey; tan anggapo la naani onnangis o dageyem, o ot-ot: ta saray una a bengatla sikara so linmabas la.”​—Apocalipsis 21:3, 4.

 Say mundo natan so mamoproblema ed panangidaulo. Balet, itotonton nen Jesu-Kristo iray mauyamo diad mareen a balon mundo, a ditan et mankakasakey iray matulok a katooan diad panangidayew ed si Jehova a Dios tan onaligwas a mamaarap ed inkayadyari. Agaylan importante a nawalaan itayoy panaon pian gamoran so pikakabat nipaakar ed tuan Dios tan ed tinuro ton Lider tan onkiwas a mitunosan ed satan a pikakabat!​—Juan 17:3.

Say sakey ed saray sankaabigan a pakapangipatnag tayoy panamagalang ed satan a persona et say pangalig ed sikato. Agta nepeg tayo sirin ya aligen so sankatalonggaringan a Lider ed awaran na too​—si Jesu-Kristo? Panon tayon nagawaan itan? Antoy epekto ed bilay tayo no awaten tayoy panangidaulo to? Sarayan tepet tan arum nira so nasingbat ed ontumbok a duaran artikulo.

[Paimano ed Leksab]

[Litrato ed pahina 4]

Impasakbay nen Daniel so nipaakar ed isabi na pinili na Dios a Lider

[Saray litrato ed pahina 7]

Saray bangat nen Jesus so angiparaan ed totoo pian napidenengan iray problema ed bilay

[Litrato ed pahina 7]

Si Jesus so mangitonton ed matulok a katooan diad mareen a balon mundo