Natalonaan Mo so Inkabegtebegtew

SIOPA so makapangibagan agton balot aliknay ot-ot ya itatarok na inkabegtebegtew? Dakel iray rason na panbegtebegtew tayo. Balet nagkalalo la itan ed bibiin agbalot akiasawa odino ed saramay abalo odino indiborsyo.

Alimbawa, oniay salaysay na sakey a Kristianon marikit a manngaran na Frances: “Kasabik ed edad a 23, ompatnag ya amin a kakaarok so wala la’d panamaley, tan siak labat lay atilak.” * Say liknaan a pambukbukor so nayarin onloor diad ilabas na taotaon tan say panilalon naasawa so lalon nagegetaran. “Agko ginetmay mansiansian marikit, tan siansian labay ko ni so miasawa no niwalay pankanawnawa,” so inaksobi nen Sandra, a natan et ngalngali lan man-50. Oniay ipapabitar nen Angela, a manedad lay masulok a 50: “Agak pa determinadon mansiansian wala’d kasuloan, balet ta ontan so nagmaliwan ko. Pigpigara iray agagin lalaki a walad kasuloan diad lugar ya akaasainan ko bilang espisyal payunir.”

Nakomendaan a tuloy, ta denesisyonan na dakel a Kristianon bibii so agpiasawa lapud matoor a panguunor da ed simbawa nen Jehova a miasawa “dia ed linawa na Katawan lambengat.” (1 Corinto 7:39) Walaray sarasarag da so mansiansian wala’d kasuloan, balet parad arum et say pankaliktan a piasawa tan pakawalaay ananak so ompapalalo diad ilalabas na taotaon. “Say agpakakapenek na liknaan, lapud anggapoy asawa, so agnaandi lawas ed siak,” so ipapatua nen Sandra.

Say arum a sengegan, a singa say pangasikaso ed maedad lan atateng, so lalon mamabegtew ed sakey. “Lapud anggapoy asawak, inilaloan la na pamilya mi a siak so mangasikaso ed maedad lan atateng mi,” kuan nen Sandra. “Sinakbat ko so maslak ed sayan responsabilidad ed loob na 20 taon, anggaman anemira kamin sanaagi. Nainomayan ak komon no walay masiken kon manuporta ed siak.”

Sasalambiten nen Frances so sakey nin bengatla a mamapaloor ed inkabegtebegtew to. Isasalaysay to: “No maminsan et siak so diretsaan a tetepetan na totoo, ‘Akin et agka akiasawa?’ Ipapalikna na ontan a balikas a kasalanan koy kipapasen kon wala’d kasuloan. Diad amin lawarin kasal ya aatendian ko, walay ontetepet ed siak na makapasakit a tepet a, ‘Kapigan met so pankasal mo?’ Kanian panisipen ak na satan, ‘No saray sinononot ed espiritual ya agagin lalaki et agda ak labay, ompan andian ak na saray Kristianon kalidad odino agak seguro magana.’”

Panon a natalonaan so liknaan a pambukbukor tan inkabegtebegtew? No bilang ta wala, panon a makatulong so arum?

Manmatalek ed si Jehova

Nankanta so salmista: “Paawit mo ed Jehova so awit [“pakabebelatan,” NW] mo, et sikato bembenan to ka: agton balot paulyan so matunong  a natentenyeg.” (Salmo 55:22) Say salitan “pakabebelatan” diad Hebreon teksto et literal a mankabaliksan na “nabebetangan,” tan tutukoyen na satan iray problema tan kapagaan a nayarin sagmaken tayo lapud kipapasey bilay tayo. Si Jehova so mas mikabat ed sarayan pakabebelatan nen say siopaman ni tan makapangiter ed sikatayo na biskeg pian napidenengan iratan. Natutulongan na panagmatalek ed si Jehova a Dios si Angela pian natalonaan toy inkabegtebegtew. Diad panutukoy ed sigpot-panaon a ministeryo to, nanonotan to ni: “Sanen ginmapo ak a nampayunir, arawdawi so panaayaman mi ed sankaasinggeran a kongregasyon. Naaralan mi so sigpot a manmatalek ed si Jehova, tan satan a pandedependi so akatulong ed siak ed interon bilay ko. Sano negatibo laray nononoten ko, siak so mitotongtong ed si Jehova tan tutulongan to ak. Lawas a baleg a ligliwa ed siak so Salmo 23, tan mabetbet kon babasaen itan.”

Walay sankaimanon pakabebelatan a sasakbaten nen apostol Pablo. Diad ag-onkulang a taloran inkagawa et ‘akikasi ed Katawan pian naekal ed sikato so sabit ed laman.’ Si Pablo so agmamilagron atulongan, balet ta naawat to so sipan na agkanepegan a panangasi na Dios a sikatoy sustunien to. (2 Corinto 12:7-9) Naaralan met nen Pablo so sekreto na inkakontento. Diad saginonor et insulat to: “Dia ed balang sakey tan dia ed amin a bengatla inaral ko so maamot ya anggan kapesel tan kaerasan, anggan mamarakel tan mankaukolan. Nayarian ko a gawaen so ganagana ed saman so mamabiskeg ed siak.”​—Filipos 4:12, 13.

Panon a nagamoran na sakey so biskeg na Dios sano nadidismaya odino begtebegtew? Insulat nen Pablo: “Agkayo mapaga ed antokaman; noag dia ed ganagana lapu ed pikakasi tan pikekerew a tekep na pisasalamat nipakabat komon ed Dios so saray kerew yo. Tan say deen na Dios, a talonaan ton amin a pakatalos, bantayan to so kapusoan yo tan saray nonot yo ed Kristo Jesus.” (Filipos 4:6, 7) Iyaaplika nen Sandra iyan simbawa. Insalaysay to: “Lapud siak so wala’d kasuloan, baleg so panaon a siak so manbukbukor. Mamapawala iya ed siak na baleg a pankanawnawan manpikasi ed si Jehova. Liknaen kon siak so maap-apit ed sikato tan makapitongtong ed sikato nipaakar ed saray problemak tan panliliketan ko.” Tan inkuan nen Frances: “Siak so naynay a mipupuligesgesan ed saray dilin negatibon liknaan ko. Balet say prangkaan a pangibagay naliliknak ed si Jehova so ontutulong na baleg ed siak. Kombinsido ak a si Jehova so interesado ed antokaman a mangapekta’d espiritual tan emosyonal a pankaabiganan ko.”​—1 Timoteo 5:5.

“Mantatarokan Kayo na Awit na Sinansakey”

Diad loob na Kristianon impanaagi, saray pakabebelatan so agkaukolan a sakbaten labat na sakey. Oniay insimbawa nen apostol Pablo: “Mantatarokan kayo na awit na sinansakey, tan sumpalen yo ya ontan so ganggan nen Kristo.” (Galacia 6:2) Diad pililimog tayo ed saray kaparan Kristiano, makala itayo na “maong a salita” na panamaseseg a pakalemeway belat na inkabegtebegtew.​—Uliran 12:25.

Konsideraen met so ibabaga na Kasulatan nipaakar ed anak a bii na Ukom na Israel a si Jefte. Sakbay ton tinalo iray kalaban a puersa na Ammon, insipan nen Jefte so pangiter ed si Jehova ed siopaman ya unonan ompaway ed sankaabungan to ya onabet a mangapresya’d sikato. Agawan say inmabet et say marikit to. (Uko-ukom 11:30, 31, 34-36) Anggaman mankabaliksan itan na pansiansia ton marikit tan pangikaindan ed normal a getman pampamilya, mabulos so marikit nen Jefte a manoor ed saman a sipan, say panlingkor ed santuaryo ed Shilo legay bilay to. Kasin agnaimano so impansakripisyo to? Diad kasunian: “Saray bibii ya anak na Israel onla ra a tinaon a mangambegya ed bii ya anak nen Jefte a Galaadita ed apat agew ed sakey taon.” (Uko-ukom 11:40) On, say komendasyon so makapaseseg ed saramay kokomendaan. Kanian, agtayo isisiblet itan ed saramay makanepegan a komendaan.

Maabig no konsideraen tayo met so alimbawa nen Jesus. Anggaman agkaugalian na saray Judion lalaki so pitongtong ed bibii, si  Jesus so akitongtong ed si Maria tan Marta. Maseguro, balanglan sikaray balo odino ag-akiasawa. Labay nen Jesus a panggayagaan dan dua iray espiritual a gunggona na pikakaaro to. (Lucas 10:38-42) Naalig tayo so alimbawa nen Jesus diad pangimbita tayo ed saray agagi’d espiritual a bibii ya andiay asawa diad saray sosyal a pantitipon tan diad pitaraton manpulong a kaiba ra. (Roma 12:13) Kasin pisasalamatan da so ontan a panangimano? Oniay inkuan na sakey ya agin bii: “Amtak a siak so inaro tan papablien na saray agagi, balet pisalamatan kon tuloy no ipanengneng day lalon personal ya interes ed siak.”

“Lapud andian kami na pamilya,” insalaysay nen Sandra, “babaleg so pankaukolan mi a naaro, say pakaliknan kabiangan kami na pamilya na espiritual ya agagin lalaki tan bibii.” Mapatpatnag, tatalimaen nen Jehova iratan, tan mikokoopera itayo ed sikato sano ipalikna tayon sikara so labalabay tan inaro tayo. (1 Pedro 5:6, 7) Say ontan a panangiyansakit so naiimano, ta “say walaan na panangasi ed duka paotangen to si Jehova, et say maong a gawa to ipawil to [nen Jehova a Dios] ed sikato a bayaran.”​—Uliran 19:17.

“Ta Balang Sakey Taroken To Naani so Awi’ton Dili”

Anggaman makatulong so arum, tan say suporta ra so makapaseseg, say “balang sakey [et] taroken to naani so awi’ton dili.” (Galacia 6:5) Anggaman ontan, diad panakbat na inkabegtebegtew et kaukolan ya imanoen tayoray pigaran kapeligroan. Singa bilang, say inkabegtebegtew so nayarin manaeg ed sikatayo no agtayo la mitalosan. Diad biek a dapag, nadaeg tayo so inkabegtebegtew diad panamegley na aro. (1 Corinto 13:7, 8) Say panangiter tan pananginabang so sankaabigan a paraan pian naromog so liket​—antokaman iray sirkumstansya tayo. (Gawa 20:35) “Andian ak na dakel a panaon pian isipen so pambukbukor ko,” kuan na sakey a maseeseet ya agin bii a payunir. “Sano naliliknak a siak so mausar tan okupado, agak begtebegtew.”

Nepeg met ya alwaran tayon say inkabegtebegtew so agmanagdag ed sikatayon onloob ed agmakabat a relasyon. Alimbawa, agaylan makapaermen no abuloyan so pilalek a piasawa a mamulag ed sikatayo ed dakel a probleman lapud impiasawa’d agmananisia tan nagkalautla ed Makasulatan a simbawan paliisan so ontan a pako! (2 Corinto 6:14) Oniay inkuan na sakey a diborsyadan Kristiano: “Wala so bengatlan alodloor nen say pansiansian walad kasuloan. Say piasawa ed agsuston too.”

Say probleman agnaresolbi so kaukolan a sungdoan, anggan panon et diad antikey labat a panaon. Diad tulong na Dios, say liknaan ya inkabegtebegtew so nasungdoan. Legan itayon manlilingkor ed si Jehova, makapankompiyansa itayo ya onsabi agew et amin iran pankaukolan tayo so napenek diad sankaabigan a posiblin paraan.​—Salmo 145:16.

[Paimano ed Leksab]

[Saray litrato ed pahina 28]

Natalonaan so inkabegtebegtew diad pangiter tan panginabang