Propesiya nen Isaias​—Liwawa Parad Amin a Katooan I

Kapitulo Beinte-Uno

Niyatagey so Lima nen Jehova

Isaias 25:1–27:13

1. Akin ya aapresyaen nen Isaias si Jehova?

 SI Isaias so walaan na aralem a panangaro ed si Jehova tan panliliketan to so pandayew ed sikato. Oniay inkelyaw to: “O Jehova, sika so Dios ko; sika so paatageyen ko, igalang ko naani ngaran mo.” Antoy tinmulong ed propeta a nawalaan na ontan lan apresasyon ed Manamalsa to? Say manunan sengegan et say pikakabat to ed si Jehova tan ed kimkimey to. Ipapatnag iyan kakabatan na sinmublay iran balikas nen Isaias: “Ta nanggawa  ka na saray makapakelaw, saray pananimbawa lanti nen inmuna, dia ed katooran tan katuaan.” (Isaias 25:1) Singa si Josue ya akauna ed sikato, amta nen Isaias a matoor tan napanmatalekan si Jehova, tan ontuatua so amin na saray “pananimbawa” to, salanti, saray bengatlan ginagala to.​—Josue 23:14.

2. Anton pananimbawa nen Jehova so inyabawag natan nen Isaias, tan anto so nayarin tutukoyen na sayan pananimbawa?

² Kabiangan ed saray pananimbawa nen Jehova so panangiyabawag ed panangukom to sumpad kakabusol na Israel. Inyabawag natan nen Isaias so sakey ed saraya: “Ginawam so syudad a sakey a lusbo, say sakey a kinutaan a syudad ed sakey ya inkageba, say sakey a palasyo na saray sankaili ya aliwa a syudad la; sikato naani agla nipaalagey anggan kapigan.” (Isaias 25:2) Anto iyan ag-angaranan a syudad? Nayarin tutukoyen nen Isaias so Ar na Moab​—say Moab so abayag lan manbubusol ed totoo na Dios. * Odino ompan sikatoy manutukoy ed sananey a mas mabiskeg a syudad, say Babilonia.​—Isaias 15:1; Sofonias 2:8, 9.

3. Diad anton dalan a si Jehova so idayew na kakabusol to?

³ Panon so ikiwas na kakabusol nen Jehova sano nasumpal so pananimbawa to sumpad mabiskeg a syudad da? “Say baley a mabiskeg paliketen [“idayew,” NW] to ka; say syudad na saray makapakebbiew a nasyon ontakot ira naani ed sika.” (Isaias 25:3) Natalosan no akin a say makapanyarin-amin a Dios so takotan na kakabusol to. Balet, panon dan idayew si Jehova? Kasin ipulisay da la so palson dirios da tan awaten so puron panagdayew? Arawin ontan! Imbes, singa si Faraon tan Nabucodonosor, idayew da si Jehova sano napilitan iran mamidbir ed pirmin inkasuperyor to.​—Exodo 10:16, 17; 12:30-33; Daniel 4:37.

4. Anton “syudad na saray makapakebbiew a nasyon” so wala natan, tan panon ya anggan sikato et nepeg a mangidayew ed si Jehova?

⁴ Natan “say syudad na saray makapakebbiew a nasyon” et say “baleg a syudad, a wala so pakauley to ed saray arari ed dalin,” salanti, say “Babilonia a Baleg,” say sankamundoan ya empiryo na palson relihyon. (Apocalipsis 17:5, 18) Say manunan kabiangan na sayan empiryo et say Kakristianoan. Panon ya idadayew na saray relihyoson lider na Kakristianoan si Jehova? Panamegley na kapilitan a pamidbir ed saray makapakelkelaw a bengatlan sinumpal to nisesengeg ed saray Tastasi to. Nagkalautla nen 1919 sanen impawil nen Jehova iray lingkor to ed dinamikon kimey kayari na inkibulos da manlapud espiritual ya impakautibo ed Babilonia a Baleg, sarayan lider so “ataktakot . . . , et angiter na galang ed Dios na tawen.”​—Apocalipsis 11:13. *

5. Panon a sasalimbengan nen Jehova iramay sigpot a manmamatalek ed sikato?

⁵ Anggaman si Jehova so momoriaen na kakabusol to a makapataktakot, sikatoy salimbeng na saray mauyamo tan mapaabeba a malabay a manlingkor ed sikato. Nayarin salien na saray masebeg a relihyoso tan mapolitikan manuley so amin pian buyaken so pananisia na saray tuan managdayew, balet onsaew ira lapud walaan iraya na sigpot a panagmatalek ed si Jehova. Diad kaunoran et magmainomay ton pepeen iray onsusumpa ed sikato, a gawaen to itan a singa to sisiruman na lurem so makaatong a petang na agew ed desierto odino sasaraan na bakor so kasil na bagyo.​—Basaen so Isaias 25:4, 5.

‘Sakey a Bangkete Parad Amin a Baley’

6, 7. (a) Anton klase na ponsia so intarya nen Jehova, tan parad siopa? (b) Anto so iyaanino na bangkete ya impropesiya nen Isaias?

⁶ Singa sakey a maaron ama, si Jehova so aglambengat manasalimbeng ed ananak to noagta papakanen to met ira, nagkalalo la diad espiritual a paraan. Kayari ton imbulos so totoo to nen 1919, sikato so angitarya parad sikara na sakey a bangkete na impanbiktorya, say daakan a suplay na espiritual a tagano: “Dia ed saya a palandey si Jehova na saray ehersito manggawa naani ed saray amin a baley na sakey a liket [“bangkete,” NW] ed saray mataba a bengatla, sakey a liket na saray alak ed tapew na saray bolirek, saray mataba a bengatla a napno na utek, tan saray alak ed tapew na saray bolirek napaitneng ira.”​—Isaias 25:6.

⁷ Say bangkete so intarya ed “palandey nen Jehova.” Anto iyan palandey? Satan et say “palandey na abung nen Jehova” ya agusan na amin a nasyones “dia ed saray kaunoran ya agew.” Satan so “masanto a palandey” nen Jehova, ya agpasakitan tan agderalen na saray matoor a managdayew to. (Isaias 2:2; 11:9) Diad sayan nipaatagey a pasen na panagdayewan so pangitataryaan nen Jehova na daakan a bangkete to parad saray matoor a totoo. Tan saray maabig ya espiritual a bengatla a malaem ya itatarya natan so mangiyaanino ed saray maabig a pisikal iran bengatla ya itarya sano say Panarian na Dios so magmaliw lan mogmon gobierno na katooan. Diad satan et anggapo lay eras. “Wala so daakan ya ilik ed tapew na dalin ed tapew na toktok na saray palandey.”​—Salmo 72:8, 16.

8, 9. (a) Anton duaran baleg a kabusol na katooan so naekal? Ipaliwawa. (b) Anto so gawaen na Dios pian naekal so kabalawan ed totoo to?

⁸ Saramay mibibiang la natan ed intarya na Dios ya espiritual a ponsia so walaan na saray maglorian iilaloan. Talinengen iray sinmublay a balikas nen Isaias. Diad impangikompara to ed kasalanan tan patey diad makaapos a “pandong,” odino “sakbong,” oniay inkuan to: “Et bagbagen [nen Jehova] dia ed saya a palandey so lupa na sakbong a manakbong ed saray amin a baley, tan say pandong a nibilkag ed tagey na saray amin a nasyon. Inakmon to so patey ed ando lan ando; et say Katawan a Jehova punasen to naani so saray lua ya onagus ed saray amin a lupa.”​—Isaias 25:7, 8a.

 ⁹ On, anggapo lay kasalanan tan patey! (Apocalipsis 21:3, 4) Niarum ni, say impamauges a sinungdoan na saray lingkor nen Jehova diad nilibo laran taotaon so mangangga met la. “Say kabalawan na baley to ekalen to naani a manlapu ed amin a dalin: ta si Jehova sikato so sinalita to.” (Isaias 25:8b) Panon a nagawa iya? Ekalen nen Jehova so panlalapuan na satan a kabalawan, si Satanas tan say bini to. (Apocalipsis 20:1-3) Agpankelawan no akin a natangguyor iray totoo na Dios a mangikelyaw: “Nia, saya sikato so Dios tayo; sikato so inalagar tayo, tan sikato ilaban to itayo: saya sikato si Jehova; sikato so inalagar tayo, manliket tan manggayaga itayo dia ed panangilaban to.”​—Isaias 25:9.

Saray Mapaatagey so Nipaabeba

10, 11. Anton maruksa a pidedeneng so iyaalagar nen Jehova ed Moab?

¹⁰ Iliktar nen Jehova diad limog na totoo to iramay mangipapatnag na inkamapaabeba. Balet, say kaabay a bansa na Israel a Moab so mapangta, tan kabusol nen Jehova so inkapangta. (Uliran 16:18) Kanian, say Moab so nigana a nabaingan. “Dia ed saya a palandey say lima nen Jehova manpainawa; et say Moab nigatin-gatin naani ed pasen to, a singa dayami a nigatin-gatin ed danum na panagdutakan. Et yunat to naani so lima to ed pegley to, a singa say onlangoy yunat to so saray lima to ya onlangoy; balet si Jehova paabebaen to naani so pangta to a nitipon a pati say inkapsel na saray lima to. Et saray atagey a kuta na saray bakor mo igeba to, paabebaen to, tan yakar to ed dalin, angga ed dabok.”​—Isaias 25:10-12.

¹¹ Say lima nen Jehova so “manpainawa” ed palandey na Moab. Say resulta? Say mapangta a Moab so nibasig tan nigatin-gatin a singa diad “panagdutakan.” Diad panaon nen Isaias, saray dayami so igagatin-gatin ed abunton a dutak pian gawaen ya abono; kanian ipapasakbay nen Isaias a nabaingan so Moab, anggaman atagey tan singano maligen iray bakor to.

12. Akin ya imbiig so Moab parad inyabawag a panangukom nen Jehova?

¹² Akin ya imbiig nen Jehova so Moab parad ontan a maruksan panangukom? Saray Moabita so kapolian nen Lot, a kaanakan nen Abraham tan sakey a managdayew ed si Jehova. Kanian, aliwa labat iran kaabay na bansan akisipan ed Dios noagta kanayon da met ira. Anggaman onia, pinili ra so palson dirios tan impatnag da so pirmin pambusol ed Israel. Kanepegan da so pansumpalan da. Diad onia, say Moab so mipara ed kakabusol na saray lingkor nen Jehova natan. Sikato so nagkalautlan mipara ed Kakristianoan, a mankuan a nanlapu ed inmunan-siglo a Kristianon kongregasyon, balet singa akadkauna lan naimano, satan so manunan kabiangan na Babilonia a Baleg.

Say Kanta na Kilalaban

13, 14. Anton “mabiskeg a syudad” so walad totoo na Dios natan, tan sioparay naabuloyan a makaloob ed satan?

¹³ Komusta so totoo na Dios? Lapud panliketan da so nawalaan na pabor tan salimbeng nen Jehova, inkasil da so boses da legan na kanta. “Dia ed saman ya agew nakanta so saya a kanta ed dalin na Juda: Walaan kami na mabiskeg a syudad: panangilaban so ipasen to naani nipaakar ed saray bakor tan panagtalayapan. Lukasan yo so saray pinto, pian say matunong a nasyon a mangunor na sisia makaloob.” (Isaias 26:1, 2) Anggaman andi-duaruwa a sarayan salita so awalaan na kasumpalan nensaman a panaon, walaan met iratan na malinew a kasumpalan natan. Say “matunong a nasyon” nen Jehova, say espiritual ya Israel, so pinagamoran na mabiskeg tan singa-syudad ya organisasyon. Agaylan sengegan na gayaga tan pankanta!

¹⁴ Anton nengneng na totoo so oonla ed sayan “syudad”? Inter na kanta so ebat: “Say inklinasyon a susuportaan a maong et salimbengan mo [Dios] ed mantultuloy a kareenan, lapud diad sika so panmamatalekan na sakey. Manmatalek kayo ed si Jehova lawas, ta dia ed si Jah Jehova so Batondampay ed andi-geter a panaon.” (Isaias 26:3, 4, NW) “Say inklinasyon” a susuportaan nen Jehova et say pampirawat a mangunor ed saray matunong a prinsipyo to tan manmatalek ed sikato, ya aliwan diad mipupuligesgesan a sistema na mundo ed komersyo, politika tan relihyon. Si “Jah Jehova” so alenleneg a napanmatalkan a Batondampay na kaligenan. Saramay sigpot a manmamatalek ed si Jehova so salimbengan to tan manggayaga ed “mantultuloy a kareenan.”​—Uliran 3:5, 6; Filipos 4:6, 7.

15. Panon a nipaabeba natan so “mapangta a syudad,” tan diad anton dalan a satan so igatin-gatin na “salisali na duka”?

¹⁵ Agaylan miduma iya ed agawa ed kakabusol na totoo na Dios! “Inyakseb to so saray manaayam ed tagey, say mapangta a syudad: sikato so impangabeba to, sikato so impangabeba to angga ed dalin; sikato so inyakar to angga ed dabok. Say sali sikato so igatin to; anggan say salisali na duka, tan saray kurang na naukolan.” (Isaias 26:5, 6) Lamet, nayarin tutukoyen dia nen Isaias so “mapangta a syudad” diad Moab, odino nayarin tutukoyen to so sananey a syudad, a singa say Babilonia, a peteg a nipaatagey ed inkatangsit. Antokaman so kipapasen, binalintuag nen Jehova so kipapasen na “mapangta a syudad,” tan ‘saray duka tan naukolan’ to so angigatin-gatin ed satan. Natan sayan propesiya so matukotukoy ed Babilonia a Baleg, nagkalautla say Kakristianoan. Nen 1919 sayan “mapangta a syudad” so apilitan a mangibulos ed saray totoo nen Jehova​—sakey a makapabaing ya inkaplag​—tan sikara met so angigatin-gatin ed saray datin managkautibo ra. (Apocalipsis 14:8) Panon? Panamegley na mapublikon pangiyaanunsio ed onsabin ibales nen Jehova ed sikato.​—Apocalipsis 8:7-12; 9:14-19.

(Ituloy ed ontumbok a paway)

[Saray paimano ed leksab]

[Tepetepet Parad Panagaral]