Propesiya nen Isaias​—Liwawa Parad Amin a Katooan I

Katuloyan na Kapitulo Beinte

Sakey a Nakdaan so ‘Onkelyaw a Magaygayaga’

13, 14. (a) Antoray ganggan nen Jehova nipaakar ed panagani? (b) Panon ya inusar nen Isaias iray ganggan ed panagani pian iyilustra a walaray makaliktar ed panangukom nen Jehova? (c) Anggaman walaray onsasabin mauddiem a panaon na subok, diad anto a makaseguro iray matoor a taga-Judea?

¹³ Ta pian makapan-ani na saray olibo, papaspasen na saray Israelita na baston so kakiewan pian napaktak so bunga. Unong ed Ganggan na Dios, sikaray sinebelan a pawilen so sangasanga pian aroroten so nakekeraan iran olibo. Nisay burboren da so nakekeraan iran ubas kayari ran inani iray ubasan da. Saray nakekeraan ed ani so nepeg ya itilak parad saray duruka​—para “ed sankaili, dia ed ulila, tan dia ed balo a bii”​—pian tudtoren da. (Deuteronomio 24:19-21) Manlapud sarayan kabkabat lan maong iran ganggan et inyilustra nen Isaias so makaligliwan katuaan a walaray makaliktar ed onsasabin panangukom nen Jehova: “Onia naani dia ed pegley na dalin ed nanleleetan na saray balbaley, singa say panbanlayon na kiew ya olibo, singa say pantudtor sano say panagburbor na ubas agawa la. Saraya itagey da so boses da, oneyag ira [“onkelyaw ira a magaygayaga,” NW]; nipaakar ed kaatageyan nen Jehova onakis ira na maksil a manlapu ed dayat. Kanian pagayagaen yo si Jehova ed bukig, salambengat say ngaran nen Jehova, a Dios na Israel, dia ni ed saray pulo na dayat. Manlapu ed kaarawian a kabiangan na dalin akadngel kami na kankanta. Gloria ed matunong [“a Sakey,” NW]”!​—Isaias 24:13-16a.

¹⁴ No panon a mansiansia so arum a bunga ed kiew odino ed yakal kayari na panagani, ontan met walaray arum a natilak kayarin ipaakseb nen Jehova so panangukom to​—“say pantudtor sano say panagburbor na ubas agawa la.” Singa nikurit ed bersikulo 6, saraya so sinalambit la na propeta, ya inkuan ton “daiset a totoo so nakeraan.” Siansia, anggaman dagdaiset ira, kaukolan a walaray makaliktar ed kadederal na Jerusalem tan Juda, tan diad saginonor et sakey a nakdaan so ompawil manlapud impakakautibo pian makmakan lamet so dalin da. (Isaias 4:2, 3; 14:1-5) Anggaman saray maptek-impanpuson totoo so managmak na mauddiem a panaon na subok, makapanseguro ira a walay kililiktar tan gayaga ed arapen. Nanengneng na saray makaliktar so pakasumpal na mapropetikon salita nen Jehova tan namoria ra a si Isaias et tuan propeta na Dios. Napano ira na gayaga legan dan naiimatonan so kasumpalan na saray propesiya nipaakar ed panangipawil. Inerman ira nikaykayat​—balanglan diad saray isla na Mediteraneo diad Sagur, diad Babilonia ed “Bukig,” odino diad arum nin ararawin pasen​—idayew da so Dios lapud sikaray niliktar tan ikanta ra: “Gloria ed matunong a Sakey!”

Anggapo so Makalegyas ed Panangukom nen Jehova

15, 16. Anto so liknaan nen Isaias nipaakar ed nagawa ed kabaleyan to? (b) Anto so nasagmak na saray agmatoor a manaayam ed dalin?

¹⁵ Balet, natan et masakbay ni pian manggayaga. Impawil nen Isaias iray kapanaonan to ed peles a nagagawa, diad impangikuanto: “Balet inkuan ko, Onebeng ak, onebeng ak, abagey ak la! Say liputan managamil ed liput; on, say liputan ed kaliputan. Takot, tan say kalinsurong, tan say kalot, wala ra ed tapew mo, O manaayam ed dalin. Et nagawa, a say ombatik a manlapu ed tanol na takot napelag naani ed kalinsurong; et say ontatdang manlapu ed pegley na kalinsurong naala naani ed kalot: ta saray dorongawen ed tagey akalukas ira, tan saray angipaletnegan ed dalin onkeyer. Say dalin sigpot a nabuyak, say dalin naderal a maminpinsan, say dalin natenyeg a makmaksil. Say dalin mantogingging naani a singa abuek a too, tan nibayesbayes dia tan diman a singa anduyan; et say impakalukso to sikato naani ambelat ed tapew to, et sikato so nipasag, tan agla onalagey.”​—Isaias 24:16b-20.

¹⁶ Nanermen a tuloy si Isaias lapud nasagmak na kabaleyan to. Saray nagagawa ed kaliberliber to so sengegan na inkabeblay tan inkaabagey. Kasmak so managliput a totoo tan sengegan na katatakot na saray manaayam ed dalin. Sano ekalen nen Jehova so pananalimbeng to, nasagmak na saray agmatoor a manaayam ed Juda so kebbiew ed agew tan labi. Sikaray agmakaseguro ed bilabilay da. Anggapo so makalegyas ed desyang a nasagmak da lapud impangikaindan ed saray ganggan nen Jehova tan impangibaliwala ed maridios a kakabatan. (Uliran 1:24-27) Onsabi so desyang anggaman saray managliput ed dalin, a manasalin mangombinse ed totoo ya onaligwas so kipapasen, so manguusar na katilaan tan panamalikdo pian iwanwan ira ed kurang a mamaarap ed kadederal. (Jeremias 27:9-15) Saray walad paway a kabusol so onlusob tan samsaman da ra tan awiten da ra bilang kautibo. Amin na saya so makapagonigon a maong ed si Isaias.

17. (a) Akin ya aliwan posibli so pakalegyas? (b) Sano say pakapanyari na panangukom nen Jehova so ompaway manlapud katawenan, anto so nagawa ed dalin?

¹⁷ Ingen, kaukolan ya iyabawag na propeta ya anggapo so makalegyas. Inerman so pampelengan na totoo a batikan et naerel ira. Arum so nayarin makalegyas ed sakey  a desyang, balet sikaray nidunget ed sananey​—anggapoy kaligenan. Satan so singa papatitan ya ayep ya ag-apaktak ed abot balet ta asabukolan diad sakey a patit. (Ikompara so Amos 5:18, 19.) Say pakapanyari na panangukom nen Jehova so ompaway manlapud katawenan tan yegyegen to iray mismon pundasyon na dalin. Singa abuek a too, say dalin so mantogingging tan nabaktar lapud belat na kasalanan to tan agla makabangon lamet. (Amos 5:2) Say panangukom nen Jehova et agla nauman. Sigpot a sagmaken na dalin so kadederal tan kageba.

Manuley si Jehova Diad Gloria

18, 19. (a) Anto so nayarin tutukoyen na “ehersito na saray atagey,” tan panon irayan natipon “ed panangipangawan”? (b) Panon ya imanoen so “ehersito na saray atagey” “kayari na saray dakel ya agew”? (c) Panon ya imanoen nen Jehova so “arari na dalin”?

¹⁸ Say propesiya nen Isaias natan so linmaknab, ya ontutukoy ed unor a pakasumpal na gagala nen Jehova: “Nagawa dia ed satan ya agew a si Jehova dusaen to so ehersito na saray atagey ed tagey, tan saray arari na dalin ed tapew na dalin. Et natiptipon ira, a singa saray pinangaw natipon ira ed kalinsurong, tan nipukok ira ed panangipangawan; et kayari na saray dakel ya agew sikara so nadalaw. Saman la say bulan natiweng, tan say banwa nabaingan; ta si Jehova na saray ehersito manari ed palandey Sion, tan dia ed Jerusalem; tan dia ed arap na saray mamasiken to napagloria.”​—Isaias 24:21-23.

¹⁹ Say “ehersito na saray atagey,” so nayarin ontutukoy ed demoniko iran “manuley ed mundo na sayan kabilungetan, . . . saray mauges ya espiritu ed pasen a mangatatawen.” (Efeso 6:12) Saraya so awalaan na mabiskeg ya impluensya ed saray pakayari ed mundo. (Daniel 10:13, 20; 1 Juan 5:19) Say kalat da et pian pabenegen so totoo ed si Jehova tan ed puron panagdayew to. Agaylay intalona ran angayat ed Israel diad pananumbok ed mauges iran agamil na nasyones ya akapaliber ed sikara a sengegay makanepegan a panangukom na Dios! Balet, wala so eebatan nen Satanas tan saray demonyo to ed Dios sano ipaarap to ed kaunoran so imano to ed sikara tan ed saray manuley diad dalin, “saray arari ed dalin ed tapew na dalin,” ya inimpluensyaan dan ombeneg ed Dios tan sumlangen iray ganggan to. (Apocalipsis 16:13, 14) Diad simbolikon panagsalita et inkuan nen Isaias a natipon ira tan “nipukok ira ed panangipangawan.” “Kayari na saray dakel ya agew,” nayarin sano si Satanas tan saray demonyo to (balet aliwan “saray arari na dalin ed tapew na dalin”) so temporaryon imbulos diad kasampotan na Sanlibon Taon ya Uley nen Jesu-Kristo, ipaakseb nen Jehova ed sikara so unor a dusa a kanepegan da.​—Apocalipsis 20:3, 7-10.

20. Diad kadaanan tan modernon panaon, panon tan kapigan a ‘nagmaliw ya ari’ si Jehova?

²⁰ Sayan kabiangan na propesiya nen Isaias so angitilak ed saray Judio na alay dakep a panamaseguro. Diad nigeter a panaon nen Jehova, itarok to so kageba na kadaanan a Babilonia tan ipawil to iray Judio ed dalin da. Diad 537 K.K.P., sano ipatnag to so pakapanyari tan inkasoberano to ed onian paraan nisesengeg ed totoo to, peteg a nibaga ed sikaran: ‘Say Dios yo so nagmaliw ya ari!’ (Isaias 52:7) Diad modernon panaon, si Jehova so ‘nagmaliw ya ari’ nen 1914 sanen impasen to si Jesu-Kristo bilang Ari ed mangatatawen a Panarian To. (Salmo 96:10) Sikato met so ‘nagmaliw ya ari’ nen 1919 sanen impatnag to so pakayari na inkaari to diad impangibulos ed espiritual ya Israel manlapud inkaaripen ed Babilonia a Baleg.

21. (a) Panon a ‘natiweng so bulan tan nabaingan so banwa’? (b) Anton maksil a tawag so walaan na sankaengrandian a kasumpalan?

²¹ Si Jehova so “magmaliw [lamet] ya ari” sano panganggaen to so Babilonia a Baleg tan amin na sayan mauges a sistema na bengabengatla. (Zacarias 14:9, NW; Apocalipsis 19:1, 2, 19-21) Kayari na satan, say uley na Panarian nen Jehova so magmaliw a matalonggaring a tuloy ed gloria ya agnaparaan na managaag a bulan nisay masnag a banwa no kaagwan. (Ikompara so Apocalipsis 22:5.) Nabaingan so banwa tan bulan, a singa panangibaga, ya ikompara so inkasikara ed magloria a Jehova na saray ehersito. Si Jehova so manuley a sankatageyan. Nipatnag ed amin so makapanyarin-amin a biskeg tan gloria to. (Apocalipsis 4:8-11; 5:13, 14) Agaylan makapakelkelaw ya iilaloan! Diad satan a panaon, say tawag na Salmo 97:1 so nipaknol ed interon dalin diad sankaengrandian a kasumpalan na satan: “Si Jehova manari: manggayaga komon so dalin; say kinarakel na saray pulpulo manliket ira nisengeg ed saya.”

[Tepetepet Parad Panagaral]