“Dago Kayo’d Siak, . . . et Ikdan ta Kayoy Pampainawa”

Saray Miting a Makapanaayatan ed Aro tan Maabig Iran Gawa

MANLAPUD Toronto ya anggad Tokyo, manlapud Moscow ya anggad Montevideo​—maminpiga ed loob na sakey simba et minilyon a Tastasi nen Jehova pati iray kakaaro ra so ondadagsa ed saray panagdayewan da. Kabiangan ed saraya iray maseet a de-pamilyan lalaki, a naksawan kayari na sanagew ya impantrabaho; saray makukulin kaasawaan a bibii tan kainaan a kaibay ankekelag ya ananak da; saray maligsan tobonbalo a naneskuela ed satan ya agew; saray maletey lan matatakken a matantantan ya onakar lapud sakit tan panutot; saray makpel a balo tan ulila; tan saray nagogonigon a kamarerwa a mankakaukolan na ligliwa.

Dakel a paraan na panagbiahe so uusaren na sarayan Tastasi nen Jehova​—wadtan iray mapmaples a bullet train tan saray asno, diad saray aseksek a luluganan ed subway tan saray trak. Arum so kaukolan ya ombeltang ed saray ilog a napno na buwaya, bangta kaukolan ya anosan na arum so makapaalipanes a trapik ed angkakabaleg a syudades. Akin ya ontanlay gunaet na sarayan amin a totoo?

Manuna et lapud say iyaatendi tan pibibiang ed saray Kristianon miting so importantin dalan a pangisaklang na panagdayew ed si Jehova a Dios. (Hebreos 13:15) Tinukoy nen apostol Pablo so sakey nin rason sanen insulat to: “Manpapagalangan itayo ed sakey tan sakey pian manaayatan itayo ed aro tan dia ed saray maabig a gawa; ya agtayo paulyan so saray panmumuyong tayo, . . . noag ingen mansisimbawaan itayo; tan nagkalalo la, lapud nanengneng yo a manasingger so agew.” (Hebreos 10:24, 25) Inyaniweng dia nen Pablo iray liknaan na salmistan David, a nankantan: “Nanliket ak nensaman nen imbaga ra ed siak, Onla itayo ed abung nen Jehova.”​—Salmo 122:1.

Akin a panggagayagaan na saray Kristiano so kiwala ra ed saray miting? Lapud saramay presente so aglabat mangiimaton. Imbes, saray miting so mangiiter ed sikara na saray pankanawnawa a makapankakabat. Nagkalautlan papawalaen na sarayan pandaragup so pangiter, aliwa lambengat a pangawat, tan pakapanaayatan ed aro tan makapanggawa na saray maabig. Nisesengeg ed saya et saray miting so makapabiskeg iran okasyon. Niarum ni,  saray Kristianon miting so sakey ed saray paraan a totooren nen Jesus so sipan ton: “Dago kayo’d siak, . . . et ikdan ta kayoy pampainawa.”​—Mateo 11:28.

Pasen na Ligliwa tan Panangiyansakit

Walaan iray Tastasi nen Jehova na maong iran rason pian moriaen iray miting a makapaligliwa. Sakey a bengatla et nipaparungo ed saray miting so espiritual a tagano diad dugan panaon na “say matoor tan makabat ya aripen.” (Mateo 24:45) Walaan met na importantin betang iray miting ed pagmaliw na saray lingkor nen Jehova ya onsiano tan maseseg a managbangat na Salitay Dios. Niarum ni, diad Kingdom Hall, naromog na sakey so grupo na maaro, mangiyaansakit, tan maasikason kakaaro ya akaparaan tan mabulos ya ontulong tan manligliwa ed arum diad panaon na pakadetdetan.​—2 Corinto 7:5-7.

Ontan so naeksperiensya nen Phillis, sakey a balo ya inatey so masiken to sanen mantaon na limara tan walora iray anak to. Diad panedeskribe ed makaligliwan epekto na saray Kristianon miting ed sikaran saniina, oniay inkuanto: “Makaligliwa so iyakar ed Kingdom Hall lapud lawas impanengneng na saray kapananisiaan so panangaro tan panangiyansakit panamegley na lakap, Makasulatan a panamaseseg, odino pamirit ed lima. Satan so lugar a lawas kon kaliktan a laen.”​—1 Tesalonica 5:14.

Kayari impakaoperaan nen Marie, inkuan na doktor to a kaukolan toy manpaabig ed loob na anemiran simba. Legan na inmuna iran simba na panpapaabig to, agnayarin onatendi si Marie ed saray miting. Naimano na doktor to a sikatoy agmaligsa a singa dati. Sanen amoria na doktor ya agto onaatendi ed saray miting, sikatoy pinaseseg ya onatendi. Inmebat si Marie a say masiken to, ya agto karelihyonan, so agmamapaonla ed sikato diad saray miting ompan makaapekto itan ed bunigas to. Niresitaan sirin na doktor a “mangigaganggan” ed si Marie ya onla ed Kingdom Hall parad panlilimog a makapaseseg tan makapabiskeg. Oniay inkuan nen Marie: “Kayari inyatendik ed sakey a miting, dinmakep so liknaan ko. Ginmapo ak met lan mangan, sanlabi ak ya akaugip, agko la kaukolan so mabetbet a pantomar na tambal a parad panutot, tan siak lamet so maimis!”​—Uliran 16:24.

Say maaron atmospera na saray Kristianon miting so naiimano na saray taga paway. Pinili na sakey a kolehyala ya obserbaan iray Tastasi nen Jehova pian mansulat na research paper parad asignatura ton ethnology. Nipaakar ed kipapasen na saray miting, oniay insulat to: “Say ampetang ya impangabrasa ed siak . . . [so] makapadinayew a tuloy. . . . Say inkamakaaro na saray Tastasi nen Jehova so sankatalonggaringan a kalidad tan moriaen kon satan so kalidad a sankaimportantian a kabiangan na eksena.”​—1 Corinto 14:25.

Diad sayan magulon mundo, say Kristianon kongregasyon so pasen na espiritual ya inawa. Satan so kawalaan na kareenan tan aro. Diad kiwala ed saray miting et naeksperiensyam a mismo so katuaan na saray salita na salmista: “Nengneng yo, alay kaabigan tan alay kaligliwaan na panayaman na sanaagi ed inkasaksakey!”​—Salmo 133:1.

[Kahon/Litrato ed pahina 25]

PAMENEK ED NIKADUMAN PANKAUKOLAN

Panon a saramay telek et nagunggonaan manlapud saray Kristianon miting? Diad sankamundoan, manitibukel iray Tastasi nen Jehova na saray kongregasyon a sign-language. Legan na apalabas a 13 taon, aporma ed Estados Unidos so 27 a kongregasyon a sign-language tan 43 a grupo na sign-language. Diad 40 nin bansa et wala la so ngalngalin 140 a kongregasyon a sign-language. Napapawala iray Kristianon palapagan panamegley na video ed 13 sign-language.

Iyoopresi na Kristianon kongregasyon ed saray telek so pankanawnawan nidayew si Jehova. Si Odile, a datin Katoliko diad Pransya ya asagmak toy tubat-tubat a graben depresyon tan namplano ni ingen a manbikkel, so misalsalamat a tuloy lapud impakaaral to’d Biblia diad saray Kristianon miting. “Apapawil koy bunigas ko tan gayaga ed bilay,” so inkuanto. “Balet manuna’d amin et, aromog ko so katuaan. Parad siak, say bilay natan so walaan na gagala.”